ಹನುಮ ಭಕ್ತರಿಗೆ ಸಕಲ ಸೌಲಭ್ಯ

ಕೊಪ್ಪಳ: ಗಂಗಾವತಿ ತಾಲೂಕಿನ ಅಂಜನಾದ್ರಿಯಲ್ಲಿ ಡಿ.2 ಮತ್ತು 3ರಂದು ಹನುಮ ಮಾಲೆ ವಿಸರ್ಜನೆ ಕಾರ್ಯಕ್ರಮವಿದೆ. ಸುಮಾರು ಎರಡು ಲಕ್ಷ ಭಕ್ತರು ಬರುವ ನಿರೀಕ್ಷೆ ಇದ್ದು, ಜಿಲ್ಲಾ ಅಥ್ಲೆಟಿಕ್​ ಅಸೋಸಿಯೇಷನ್​ನಿಂದ ದಾರಿಯುದ್ದಕ್ಕೂ ಏಳು ಕಡೆ ಪ್ರಸಾದ, ವಸತಿ ಇನ್ನಿತರ ಸೌಲಭ್ಯ ಕಲ್ಪಿಸಲಾಗಿದೆ ಎಂದು ಸಂಸದ ರಾಜಶೇಖರ ಹಿಟ್ನಾಳ ಹೇಳಿದರು.

ನಗರದ ತಮ್ಮ ಕಚೇರಿಯಲ್ಲಿ ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ಜಿಲ್ಲಾಡಳಿತ ಅಗತ್ಯ ಪಾರ್ಕಿಂಗ್​, ದೀಪಾಲಂಕಾರ, ಪೂಜೆ, ಲೈವ್​ ಪ್ರಸಾರ, ಎಲ್​ಇಡಿ ಪರದೆ ಅಳವಡಿಸಿದೆ. ಸಹಾಯವಾಣಿ, ರೂಟ್​ ಮ್ಯಾಪ್​, ಪ್ರಸಾದ, ಕುಡಿವ ನೀರು ಕಲ್ಪಿಸಲಾಗಿದೆ. ಪ್ಲಾಸ್ಟಿಕ್​ ಸಂಪೂರ್ಣ ನಿಷೇಧಿಸಿದೆ. ಚೆಕ್​ ಪೋಸ್ಟ್​ನಲ್ಲಿ ಪ್ಲಾಸ್ಟಿಕ್​ ಪರಿಶೀಲಿಸಿ ಇದ್ದಲ್ಲಿ ವಶಕ್ಕೆ ಪಡೆಯಲಾಗುವುದು. ಮಾಲೆ ವಿಸರ್ಜಿಸುವವರಿಗೆ ವಸ್ತ್ರ ಹಾಕಲು ಪ್ರತ್ಯೇಕ ಸ್ಥಳ ಗುರುತಿಸಿದ್ದು ಅಲ್ಲೇ ಹಾಕಬೇಕೆಂದು ಮನವಿ ಮಾಡಿದರು.

ಜಿಲ್ಲಾ ಅಥ್ಲೆಟಿಕ್​ ಅಸೋಸಿಯೇಷನ್​ನಿಂದ ಕೊಪ್ಪಳದಿಂದ ಅಂಜನಾದ್ರಿಗೆ ಬರುವ ಮಾರ್ಗ ಮಧ್ಯದಲ್ಲಿ ಎಂಟು ಕಡೆ ಪಾದಯಾತ್ರಿ ಭಕ್ತರಿಗಾಗಿ ಪ್ರಸಾದ, ಕುಡಿವ ನೀರು, ಸ್ನಾನಟ್ಟ, ಶೌಚಗೃಹ ವ್ಯವಸ್ಥೆ ಕಲ್ಪಿಸಲಾಗಿದೆ. ಸುಮಾರು 30 ಸಾವಿರ ಭಕ್ತರಿಗೆ ಆಗುವಷ್ಟು ವ್ಯವಸ್ಥೆ ಇರಲಿದೆ. ಡಿ.2ರ ರಾತ್ರಿಯಿಂದ ಡಿ.3ರ ಮಧ್ಯಾಹ್ನದವರೆಗೆ ಸೌಲಭ್ಯ ಲಭ್ಯವಿರಲಿದೆ. ಸಂಗಾಪುರದ ಕಣವೆ ಆಂಜನೇಯ ದೇವಾಲಯ, ದರ್ಗಾದೇವಿ ಬೆಟ್ಟ, ಹಿಟ್ನಾಳ ಕ್ರಾಸ್​, ಆನೆಗೊಂದಿ ಕೃಷ್ಣದೇವರಾಯ ವೃತ್ತ, ಸಣಾಪುರ ಐಬಿ, ಕಡ್ಡಿರಾಂಪುರ ಬಳಿ ಕೇಂದ್ರ ಇರಲಿವೆ ಎಂದು ತಿಳಿಸಿದರು. ಕೊಪ್ಪಳ ನಗರಾಭಿವೃದ್ಧಿ ಪ್ರಾಧಿಕಾರ ಅಧ್ಯಕ್ಷ ಶ್ರೀನಿವಾಸ ಗುಪ್ತಾ ಇದ್ದರು.

ಭಕ್ತರು ಸ್ನಾನಕ್ಕೆ ಸೋಪು, ಶಾಂಪು ಬಳಕೆ ಮಾಡಬಾರದು. ಇದರಿಂದ ಪರಿಸರಕ್ಕೆ ಹಾನಿ ಆಗಲಿದೆ. ನದಿ ನೀರು ಕಲುಷಿತವಾಗುವುದು. ಇದಕ್ಕಾಗಿ ಸ್ನಾನಟ್ಟಗಳ ಬಳಿ ಕಡಲೆ ಹಿಟ್ಟು ನೀಡಲಾಗುವುದು ಸ್ನಾನಕ್ಕೆ ಹಿಟ್ಟು ಬಳಕೆ ಮಾಡಬೇಕು. ಈ ಮೂಲಕ ಪರಿಸರ ರಕ್ಷಣೆಗೆ ಕೈ ಜೋಡಿಸಬೇಕು ಎಂದು ಸಂಸದರು ಭಕ್ತರಿಗೆ ಮನವಿ ಮಾಡಿದರು.