ಎಸ್​ಐಆರ್​ಗೆ ಮ್ಯಾಪಿಂಗ್​ ಬಹುತೇಕ ಪೂರ್ಣ

ಮತದಾರರ ಪಟ್ಟಿ ವಿಶೇಷ ಪರಿಷ್ಕರಣೆಯಲ್ಲಿ ಮುಖ್ಯವಾಗಿ 2002ನ್ನು ಮೂಲ ಮತದಾರರ ಪಟ್ಟಿಯಾಗಿಸಿಕೊಂಡು ತುಲನೆ ಮಾಡಲಾಗುತ್ತಿದೆ. ಸದ್ಯ ಇರುವ ಮತದಾರರು ಹಾಗೂ 2002ರಲ್ಲಿನ ಮೂಲ ಮತದಾರರ ಪಟ್ಟಿ ಹೋಲಿಕೆ ಮಾಡಲಾಗುತ್ತಿದೆ. ಈಗಾಗಲೇ ಇದ್ದವರ ವಿವರಗಳು ಮ್ಯಾಪಿಂಗ್​ ಆಗಲಿವೆ. 2002ರ ನಂತರ ಮತದಾನ ಹಕ್ಕು ಪಡೆದವರು ಮೂಲ ಮತದಾರರ ಪಟ್ಟಿಯಲ್ಲಿ ಇರುವುದಿಲ್ಲ. ಅಂಥವರನ್ನು ಅವರ ಪಾಲಕ, ಪೋಷಕರ ಮತಚೀಟಿಯೊಂದಿಗೆ ಹೋಲಿಕೆ ಮಾಡಿ ಅನುಮೋದನೆ ನೀಡಲಾಗುತ್ತಿದೆ. 

ವಿಧಾನಸಭಾ ಕ್ಷೇತ್ರವಾರು ಮತದಾರರ ಪಟ್ಟಿ ಹಿಡಿದು ಬಿಎಲ್​ಒಗಳ ಮೂಲಕ ಚುನಾವಣಾ ಶಾಖಾಧಿಕಾರಿಗಳು ಎಸ್​ಐಆರ್​ ಚುರುಕುಗೊಳಿಸಿದ್ದಾರೆ. ಕೇಂದ್ರ, ರಾಜ್ಯ ಚುನಾವಣಾ ಆಯೋಗ ಸೂಚನೆ ಅನ್ವಯ ಈಗಾಗಲೇ ಈ ಕಾರ್ಯ ಜಿಲ್ಲಾ ಹಂತದಲ್ಲಿ ಚಾಲನೆಯಾಗಿದೆ. ವಿಧಾನಸಭಾ ಕ್ಷೇತ್ರ, ತಾಲೂಕುವಾರು ಮತದಾರರು, ಮತಗಟ್ಟೆಗಳು, ನಗರ, ಗ್ರಾಮೀಣ ಭಾಗದ ಮತದಾರರು, 2002ರ ಮತಪಟ್ಟಿಯಲ್ಲಿ ಇದ್ದ ಮೂಲ ಮತದಾರರು, ಇಲ್ಲದ ಮತದಾರರು ಎಂದು ವಿಭಾಗಿಸಿಕೊಂಡು ಮ್ಯಾಪಿಂಗ್​ ಕಾರ್ಯ ಮಾಡಲಾಗುತ್ತಿದೆ. 

ಕೊಪ್ಪಳ ಜಿಲ್ಲೆಯಲ್ಲಿ ಏಳು ತಾಲೂಕುಗಳಿವೆ. ಕುಷ್ಟಗಿ, ಕನಕಗಿರಿ, ಗಂಗಾವತಿ, ಯಲಬುರ್ಗಾ ಹಾಗೂ ಕೊಪ್ಪಳ ವಿಧಾನಸಭಾ ಕ್ಷೇತ್ರಗಳಾಗಿವೆ. ನಗರ ಪ್ರದೇಶದಲ್ಲಿ 282, ಗ್ರಾಮೀಣ ಭಾಗದಲ್ಲಿ 1,033 ಒಟ್ಟು 1,315 ಮತಗಟ್ಟೆಗಳಿವೆ. ನಗರ ಭಾಗದಲ್ಲಿ 2,80,638, ಗ್ರಾಮೀಣ ಪ್ರದೇಶದಲ್ಲಿ 9,12,543 ಒಟ್ಟು 11,93,181 ಮತದಾರರಿದ್ದಾರೆ. ಕುಷ್ಟಗಿ ಕ್ಷೇತ್ರದಲ್ಲಿ 268 ಮತಗಟ್ಟೆ, 2,49,115 ಮತದಾರರು, ಕನಕಗಿರಿಯಲ್ಲಿ 266 ಬೂತ್​, 2,33,158 ವೋರ್ಟಸ್​, ಗಂಗಾವತಿ 235 ಮತಗಟ್ಟೆ, 2,10,835 ಮತದಾರರು, ಯಲಬುರ್ಗಾ 256 ಪೋಲಿಂಗ್​ ಬೂತ್​, 2,32,631 ವೋರ್ಟಸ್​ ಹಾಗೂ ಜಿಲ್ಲಾ ಕೇಂದ್ರ ಕೊಪ್ಪಳ ಕ್ಷೇತ್ರದಲ್ಲಿ 290 ಮತಗಟ್ಟೆ, 2,67,442 ವೋರ್ಟಸ್​ ಇದ್ದಾರೆ. 

ಮ್ಯಾಪಿಂಗ್​ ಕಾರ್ಯ ಶೇ.94.81ರಷ್ಟು ಮುಗಿದಿದ್ದು, ಶೇ5ರಷ್ಟು ಬಾಕಿ ಉಳಿದಿದೆ. ನಗರ ಪ್ರದೇಶದ 2,42,877 ಹಾಗೂ ಗ್ರಾಮೀಣ ಭಾಗದ 8,88,390 ಸೇರಿ 11,31,267 ಮತದಾರರ ಮ್ಯಾಪಿಂಗ್​ ಕಾರ್ಯ ಯಶಸ್ವಿಯಾಗಿ ಮುಗಿದಿದೆ. ಕುಷ್ಟಗಿ ಕ್ಷೇತ್ರದಲ್ಲಿ 2,40,354 (ಶೇ.96.48), ಕನಕಗಿರಿ ಕ್ಷೇತ್ರ 2,23,974 (ಶೇ.96.06), ಗಂಗಾವತಿ 1,92,252 (ಶೇ.91.19), ಯಲಬುರ್ಗಾ 2,25,058 (ಶೇ.96.74) ಹಾಗೂ ಕೊಪ್ಪಳ ಕ್ಷೇತ್ರದಲ್ಲಿ 2,49,629 (ಶೇ.93.34)ರಷ್ಟು ತುಲನೆ ಕಾರ್ಯ ಮುಗಿದಿದ್ದು, ಶೇ.94.81ರಷ್ಟು ಪ್ರಗತಿ ಸಾಧಿಸಲಾಗಿದೆ.

ಜಿಲ್ಲೆಯಲ್ಲಿ ಮತಪಟ್ಟಿ ಮ್ಯಾಪಿಂಗ್​ ಬಹುತೇಕ ಮುಗಿದಿದೆ. ನಗರ ಪ್ರದೇಶದ 37,761, ಗ್ರಾಮೀಣ ಭಾಗದ 24,153 ಒಟ್ಟು 61,914 ಮತದಾರರ ಮತ ಚೀಟಿ ತುಲನೆ ಮಾಡುವುದು ಬಾಕಿ ಉಳಿದಿದೆ. ಕುಷ್ಟಗಿ ಕ್ಷೇತ್ರದಲ್ಲಿ 8,761, ಕನಕಗಿರಿ 9,184, ಗಂಗಾವತಿ 18,583, ಯಲಬುರ್ಗಾ 7,573 ಹಾಗೂ ಕೊಪ್ಪಳ ಕ್ಷೇತ್ರದಲ್ಲಿ 17,813 ಮತದಾರರ ಮ್ಯಾಪಿಂಗ್​ ಮಾಡಬೇಕಿದೆ. ಬಿಎಲ್​ಒಗಳು ಈ ಕಾರ್ಯದಲ್ಲಿ ನಿರತರಾಗಿದ್ದು ತಮ್ಮ ಕ್ಷೇತ್ರದ ಮತದಾರರ ಪಟ್ಟಿ ಗುರಿ ಸಾಧನೆ ಮಾಡುತ್ತಿದ್ದಾರೆ.