ಕೇಂದ್ರ-ರಾಜ್ಯದ ಜನವಿರೋಧಿ ನೀತಿಗೆ ಖಂಡನೆ

ಕಾರ್ಮಿಕರು, ರೈತರು, ಯುವಜನರು, ಮಹಿಳೆಯರು ಹಾಗೂ ವಿವಿಧ ದುಡಿವ ವರ್ಗಗಳ ಸಾವಿರಾರು ಜನರು ಭಾಗವಹಿಸಿ ಶಕ್ತಿ ಪ್ರದರ್ಶಿಸಿದರು. ಕೇಂದ್ರೀಯ ಬಸ್​ ನಿಲ್ದಾಣದಿಂದ ಅಶೋಕ ವೃತ್ತವರೆಗೆ ಪ್ರತಿಭಟನಾ ಮೆರವಣಿಗೆ ನಡೆಸಲಾಯಿತು. ಅಶೋಕ ವೃತ್ತದಲ್ಲಿ ಮಾನವ ಸರಪಳಿ ರಚಿಸಿ ಸರ್ಕಾರದ ವಿರುದ್ಧ ಘೋಷಣೆ ಕೂಗಿದರು. ನಂತರ ಜಿಲ್ಲಾಧಿಕಾರಿಗಳ ಮೂಲಕ ರಾಷ್ಟ್ರಪತಿಗೆ ಮನವಿ ಸಲ್ಲಿಸಲಾಯಿತು.

ಮುಷ್ಕರ ಹಿನ್ನೆಲೆಯಲ್ಲಿ ಬಂದ್​ಗೆ ಕರೆ ನೀಡಿದ್ದರೂ ಜನ ಅಷ್ಟಾಗಿ ಬೆಂಬಲ ನೀಡಲಿಲ್ಲ. ಜವಾಹರ ರಸ್ತೆಯಲ್ಲಿ ಕೆಲ ಅಂಗಡಿಕಾರರು ಅಂಗಡಿ ಬಂದ್​ ಮಾಡಿ ಬೆಂಬಲ ನೀಡಿದ್ದು ಕಂಡುಬಂತು. ಬಹುಪಾಲು ಅಂಗಡಿ, ಮುಂಗಟ್ಟೆಗಳು ತೆರೆದಿದ್ದವು. ಬ್ಯಾಂಕ್​, ಸಾರಿಗೆ, ಹೋಟೆಲ್​ ಸೇರಿ ಇನ್ನಿತರ ಸೇವೆಗಳು ಎಂದಿನಂತಿದ್ದವು.

ನಾಲ್ಕು ಕಾರ್ಮಿಕ ಸಂಹಿತೆಗಳು ದುಡಿವ ಜನರಿಗೆ ಮರಣ ಶಾಸನ. ಕಾರ್ಮಿಕರ ಹಕ್ಕು ಕಿತ್ತಿಕೊಳ್ಳಲಿವೆ. ಮುಷ್ಕ, ಸಾಮೂಹಿಕ ಚೌಕಾಸಿ, ಉದ್ಯೋಗ ಭದ್ರತೆ, ಆರೋಗ್ಯ ಮತ್ತು ಸುರಕ್ಷತೆ ಹಕ್ಕುಗಳಿಗೆ ಧಕ್ಕೆ ಉಂಟಾಗಲಿದೆ. ರೈಲ್ವೆ, ಬಂದರು, ಬ್ಯಾಂಕ್​, ವಿಮೆ, ವಿದ್ಯುತ್​, ಸಾರಿಗೆ, ದೂರಸಂಪರ್ಕ, ರಕ್ಷಣಾ ಉತ್ಪಾದನೆ, ವಿಮಾನ ನಿಲ್ದಾಣಗಳನ್ನು ಖಾಸಗೀಕರಣಗೊಳಿಸುತ್ತಿರುವುದು ಖಂಡನೀಯ. ನರೇಗಾ ದುರ್ಬಲ ಸಹಿಸಲಾಗದು ಎಂದು ಕಿಡಿ ಕಾರಿದರು.

ಕಾರ್ಮಿಕ ನಾಯಕರಾದ ಎಂ.ಬಿ.ನಾಗಡೌಡ, ಬಸವರಾಜ ಶೀಲವಂತರ, ಡಿ.ಎಚ್​. ಪೂಜಾರ, ಹನುಮೇಶ ಕಲ್ಮಂಗಿ, ಶರಣು ಪಾಟೀಲ್​, ಸುಂಕಪ್ಪ ಗದಗ, ಶರಣು ಗಡ್ಡಿ, ಆಶಾ, ಅಂಗನವಾಡಿ, ಬಿಸಿಯೂಟ, ಹಾಸ್ಟೆಲ್​ ಅಡುಗೆ ಸಹಾಯಕ ಮಹಿಳಾ ಕಾರ್ಮಿಕರು, ಕಟ್ಟಡ ಕಾರ್ಮಿಕರು, ಹಮಾಲಿ ಕಾರ್ಮಿಕರು, ಬೀದಿ ಬದಿ ವ್ಯಾಪಾರಸ್ಥರು, ದೇವದಾಸಿ ಮಹಿಳೆಯರು, ಪಂಚಾಯತಿ ನೌಕರರು, ಕೈಗಾರಿಕಾ ಕಾರ್ಮಿಕರು ಇತರರಿದ್ದರು.