ಕುಡಾ ಹಗರಣ ಆರೋಪಿ ಬಂಧನ

ಈ ಬಗ್ಗೆ ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ವಿವರ ಹಂಚಿಕೊಂಡ ಎಸ್ಪಿ ಡಾ.ರಾಮ್​ ಎಲ್​.ಅರಸಿದ್ದಿ, ಒಟ್ಟು 8.89 ಕೋಟಿ ರೂ. ಅಕ್ರಮವಾಗಿದೆ. ರವೀಂದ್ರ ಕುಮಾರ್​ ಎಂಬಾತನ ವಿರುದ್ಧ ಮಾತ್ರ ದೂರು ದಾಖಲಾಗಿದೆ. ಆದರೆ, ಆತನ ಪತ್ನಿ ರಮಾ ಹಾಗೂ ಸಹೋದರ ಅನಿಲ್​ ಕುಮಾರ್​ ಅವರ ಖಾತೆಯಲ್ಲೂ ಅಕ್ರಮವಾಗಿ ಹಣ ವರ್ಗಾವಣೆ ಆಗಿದೆ. ಹೀಗಾಗಿ ಮೂವರನ್ನು ಬಂಧಿಸಲಾಗಿದೆ. ರವೀಂದ್ರ ಕುಮಾರ್​ ನ್ಯಾಯಾಂಗ ವಶದಲ್ಲಿದ್ದು, ಪೊಲೀಸ್​ ಕಸ್ಟಡಿಗೆ ತೆಗೆದುಕೊಂಡು ವಿಚಾರಣೆ ನಡೆಸುತ್ತೇವೆ. ಸದ್ಯ ನಮಗೆ ಆಡಿಟ್​ ವರದಿ ಸಿಕ್ಕಿದೆ. ಅದರಲ್ಲಿ ನಕಲಿ ಖಾತೆ ಹಾಗೂ ಅದರಲ್ಲಿನ ವ್ಯವಹಾರಗಳ ಬಗ್ಗೆ ಉಲ್ಲೇಖವಿಲ್ಲ. ರವೀಂದ್ರ ಕುಮಾರ್​ ಹಾಗೂ ಅವರ ಕುಟುಂಬಸ್ಥರು ಸೇರಿ ಇತರ ಅಕೌಂಟ್​ಗಳಿಗೆ ಹಣ ವಹಿವಾಟು ನಡೆದಿದೆ ಎಂದರು.

ಈಗಾಗಲೇ ಅವರ ಖಾತೆಯಲ್ಲಿದ್ದ ಎ್​ಡಿ ಸೇರಿ ಇತರ ಹಣಕಾಸು ಒಳಗೊಂಡು ಮೂರು ಕೋಟಿ ರೂಪಾಯಿಗೂ ಹೆಚ್ಚು ಹಣ ಫ್ರೀಜ್​ ಮಾಡಿದ್ದೇವೆ. ಬಾಕಿ ಮೊತ್ತ ವಶಪಡಿಸಿಕೊಳ್ಳಲಾಗುವುದು. ಇಷ್ಟು ದಿನ ಆರೋಪಿತರು ತಲೆಮರೆಸಿಕೊಂಡಿದ್ದರಿಂದ ತನಿಖೆಯಲ್ಲಿ ಹೆಚ್ಚಿನ ಪ್ರಗತಿ ಆಗಿರಲಿಲ್ಲ. ಪ್ರಕರಣದಲ್ಲಿ ಯಾರ್ಯಾರು ಭಾಗಿದಾರರು, ಅವರ ಪಾತ್ರವೇನು, ಖಾತೆ ತೆಗೆದಿದ್ದು, ವಹಿವಾಟು ನಡೆಸಿದ್ದರಲ್ಲಿ ಹಿಂದಿನ ಆಯುಕ್ತ ಯೋಗಾನಂದ ಸೇರಿ ಇತರರ ಪಾತ್ರವೇನು ಎಂಬ ಬಗ್ಗೆ ತನಿಖೆಯಲ್ಲಿ ವಿಷಯ ಬಹಿರಂಗವಾಗಲಿದೆ. ತನಿಖೆ ಕಾರಣ ಕೆಲ ವಿಷಯ ಬಹಿರಂಗ ಪಡಿಸಲು ಆಗದು ಎಂದು ತಿಳಿಸಿದರು.

ಕಳೆದ 20 ದಿನದಿಂದ ತಲೆಮರೆಸಿಕೊಂಡಿದ್ದ ಪ್ರಮುಖ ಆರೋಪಿ ರವೀಂದ್ರ ಕುಮಾರ್​ ಪೊಲೀಸರ ಕೈಗೆ ಸಿಗದೇ ತಪ್ಪಿಸಿಕೊಂಡಿದ್ದ. ಅವರ ಕುಟುಂಬದವರೂ ಮನೆಯಲ್ಲಿ ಇರಲಿಲ್ಲ. ವಿವಿಧ ಧಾರ್ಮಿಕ ಸ್ಥಳಗಳಿಗೆ ಭೇಟಿ ನೀಡಿದ್ದರೆನ್ನಲಾಗಿದೆ. ಮೂರ್ನಾಲ್ಕು ತಂಡ ರಚಿಸಿಕೊಂಡು ಹುಡುಕಾಟ ನಡೆಸಲಾಗಿತ್ತು. ಆ.23ರಂದು ರವೀಂದ್ರ ಕುಮಾರ್​ ಸಹೋದರ ಅನಿಲ್​ ಕುಮಾರ್​ ಬಂಧನವಾಗಿದೆ. ಆ.27ರಂದು ಚಿತ್ರದುರ್ಗಕ್ಕೆ ರವೀಂದ್ರ ಕುಮಾರ್​ ತೆರಳುತ್ತಿದ್ದ ಮಾಹಿತಿ ಲಭಿಸಿದೆ. ಬೆನ್ನಟ್ಟಿದ ಪೊಲೀಸರಿಗೆ ರವೀಂದ್ರ ಕುಮಾರ್​ ಹಾಗೂ ಅವರ ಪತ್ನಿ ಮತ್ತು ಮಗ ಸಿಕ್ಕಿದ್ದಾರೆ. ಎರಡು ಕಾರ್​ಗಳಲ್ಲಿ ಪ್ರತ್ಯೇಕವಾಗಿ ಪ್ರಯಾಣ ಬೆಳೆಸುತ್ತಿದ್ದರು. ಖಚಿತ ಮಾಹಿತಿ ಆಧರಿಸಿ ಪೊಲೀಸರು ಬಂಧನ ಮಾಡಿದ್ದಾರೆಂದು ಎಸ್ಪಿ ವಿವರ ಹಂಚಿಕೊಂಡರು.