ಜನಗಣತಿಗೆ ಕೊಪ್ಪಳ ಜಿಲ್ಲಾಡಳಿತ ಸಜ್ಜು

ಎರಡು ಹಂತದಲ್ಲಿ ಗಣತಿ ನಡೆಸುವುದಾಗಿ ಕೇಂದ್ರ ಸರ್ಕಾರ ತಿಳಿಸಿದೆ. ಮೊದಲು ಸ್ವಯಂ ಗಣತಿ, ಮನೆಗಳ ಪಟ್ಟಿ ಮತ್ತು ಗಣತಿ ಕಾರ್ಯ ಏಪ್ರೀಲ್​, ಮೇ ತಿಂಗಳಲ್ಲಿ ನಡೆಯಲಿದೆ. ಏ.1ರಿಂದ 15ವರೆಗೆ ಸ್ವಯಂ ಗಣತಿ, ಏ.16ರಿಂದ ಮೇ 15ವರೆಗೆ ಮನೆಗಳ ಪಟ್ಟಿ, ಗಣತಿ ನಡೆಸಲಾಗುವುದು. ಜನರು https://se.census.gov.in ಬಳಸಿ ಮಾಹಿತಿ ನೀಡಬೇಕು. ಮನೆಯ ಮುಖ್ಯಸ್ಥರ ಹೆಸರು, ಮೊಬೈಲ್​ ಸಂಖ್ಯೆ ಹಾಕಿ ಮನೆಯ ಜಿಯೋ ಟ್ಯಾಗ್​ ಮಾಡಬೇಕು. ಆಗ ಪೋರ್ಟಲ್​ ತೆಗೆದುಕೊಳ್ಳಲಿದೆ. 34 ಪ್ರಶ್ನಾವಳಿಗಳಿರಲಿದ್ದು, ಕೆಲವೊಂದಕ್ಕೆ ಉತ್ತರ ಭರ್ತಿ ಮಾಡಲು ಗಣತಿದಾರರಿಗೆ ಮಾತ್ರ ಅವಕಾಶವಿದೆ. ಉಳಿದವುಗಳಿಗೆ ಜನರು ಮಾಹಿತಿ ನೀಡಬಹುದೆಂದು ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ವಿವರಿಸಿದರು.

ಧರ್ಮ, ಜಾತಿ, ಲಿಂಗ, ಜನಸಂಖ್ಯೆ, ಆಸ್ತಿ ವಿವರ, ಸಾಕ್ಷರತೆ ಇನ್ನಿತರ ಮಾಹಿತಿ ಸಂಗ್ರಹಿಸಲಾಗುವುದು. ಪೋರ್ಟಲ್​ನಲ್ಲಿ ಬಳಕೆದಾರರ ಕೈಪಿಡಿ ಲಭ್ಯವಿರಲಿದೆ. ಸಂಪೂರ್ಣ ಓದಿ ಮಾಹಿತಿ ಒದಗಿಸಬೇಕು. ವಿವಿರ ಭರ್ತಿ ನಂತರ 12 ಅಂಕಿಗಳ ಐಡಿ ಬರಲಿದ್ದು, ಅದನ್ನು ಸೇವ್​ ಮಾಡಿಟ್ಟುಕೊಳ್ಳಬೇಕು. ಗಣತಿದಾರರು ಮನೆಗೆ ಬಂದಾಗ ಐಡಿ ನೀಡಿದಲ್ಲಿ ವಿವರ ಪರಿಶೀಲಿಸುವರು. ಬದಲಾವಣೆ ಇದ್ದಲ್ಲಿ ಮಾರ್ಪಡಿಸಲು ಅವಕಾಶ ಕಲ್ಪಿಸಲಾಗಿದೆ. ಮನೆಗೆ ಗಣತಿದಾರರು ಬಂದಾಗ ತಪ್ಪದೇ ಎಲ್ಲ ಮಾಹಿತಿ ಒದಗಿಸಬೇಕು. ನಿರಾಕರಿಸುವಂತಿಲ್ಲ ಎಂದು ತಿಳಿಸಿದರು.

ತಾಲೂಕುಗಳನ್ನು ನಗರ, ಗ್ರಾಮೀಣ ಪ್ರದೇಶವಾಗಿ ವಿಭಾಗಿಸಿ ಮನೆಗಳ ಪಟ್ಟಿ ಮಾಡಲಾಗಿದೆ. ಒಟ್ಟು 2,523 ಬ್ಲಾಕ್​ಗಳನ್ನು ರಚಿಸಲಾಗಿದೆ. 2,783 ಗಣತಿದಾರರನ್ನು ನೇಮಿಸಿದ್ದು, ಶೇ.10ರಷ್ಟು ಹೆಚ್ಚುವರಿ ಸಿಬ್ಬಂದಿ ನೇಮಿಸಲಾಗಿದೆ. 470 ಸೂಪರ್​ವೈಸರ್ಸ್​ಗಳಿದ್ದು ಒಟ್ಟು 3,253 ಸಿಬ್ಬಂದಿ ನಿಯೋಜನೆಗೊಂಡಿದ್ದಾರೆ. ಕಂದಾಯ, ಶಿಕ್ಷಣ, ನಗರ&ಸ್ಥಳಿಯ ಸಂಸ್ಥೆ ನೌಕರರನ್ನು ಗಣತಿಗೆ ನೇಮಿಸಿದೆ. ಈಗಾಗಲೇ ತರಬೇತಿ, ಮಾಹಿತಿ ನೀಡುವಿಕೆ, ವಿವರ ಭರ್ತಿ ವಿಧಾನಗಳ ಬಗ್ಗೆ ಮಾಹಿತಿ ಒದಗಿಸಿದ್ದೇವೆ. ನಾನು ಜಿಲ್ಲೆಗೆ ಪ್ರಧಾನ ಗಣತಿ ಅಧಿಕಾರಿ, ಜಿಪಂ ಸಿಇಒ ಅಪರ ಪ್ರಧಾನ ಅಧಿಕಾರಿ, ಎಡಿಸಿ ಜಿಲ್ಲಾ ಗಣತಿ ಅಧಿಕಾರಿ, ಎಸಿ ಉಪ ವಿಭಾಗೀಯ ಗಣತಿ ಅಧಿಕಾರಿ, ತಹಸೀಲ್ದಾರ್​ಗಳು ಚಾರ್ಜ್​ ಗಣತಿ ಅಧಿಕಾರಿಗಳು, ನಗರ, ಸ್ಥಳಿಯ ಸಂಸ್ಥೆಗಳ ಪೌರಾಯುಕ್ತರು/ಮುಖ್ಯಾಧಿಕಾರಿಗಳು ಆಯಾ ನಗರ&ಸ್ಥಳಿಯ ಸಂಸ್ಥೆ ವ್ಯಾಪ್ತಿಯ ಚಾರ್ಜ್​ ಗಣತಿ ಅಧಿಕಾರಿಗಳಾಗಿ ನಿಯೋಜನೆಗೊಂಡಿದ್ದಾಗಿ ಡಿಸಿ ತಿಳಿಸಿದರು.