ಆರಂಭವಾಗಿ ತಿಂಗಳಲ್ಲೇ ತಂಗಳು

ಕನಕಗಿರಿಯ ಇಂದಿರಾ ಕ್ಯಾಂಟೀನ್ ಹೊರನೋಟ.

Published on:

28 Dec 2025, 5:42 pm

ಪ್ರಮುಖ ಮುಖ್ಯಾಂಶಗಳು

ಕನಕಗಿರಿ ಇಂದಿರಾ ಕ್ಯಾಂಟೀನ್ ಅವ್ಯವಸ್ಥೆ
ಶುಚಿ-ರುಚಿ ತಪ್ಪಿದ ಆಹಾರ

ಕನಕಗಿರಿ: ಉದ್ಘಾಟನೆಯಾಗಿ ತಿಂಗಳಷ್ಟೇ ಗತಿಸಿದ ಇಲ್ಲಿನ ಇಂದಿರಾ ಕ್ಯಾಂಟೀನ್ ಸಮರ್ಪಕ ನಿರ್ವಹಣೆ ಇಲ್ಲದೆ ತಂಗಳಾದಂತಿದೆ.

2017ರಲ್ಲಿ ರಾಜ್ಯಾದ್ಯಂತ ಆರಂಭವಾದ ಇಂದಿರಾ ಕ್ಯಾಂಟೀನ್‌ಗಳಲ್ಲಿ 5 ರೂ.ಗೆ ಉಪಹಾರ, 10 ರೂ.ಗೆ ಊಟ ಸಿಗುವಂತೆ ಮಾಡಲಾಗಿದೆ. ಇದರಿಂದ ಎಷ್ಟೋ ಬಡವರು, ಕಾರ್ಮಿಕರು, ವಿದ್ಯಾರ್ಥಿಗಳಿಗೆ ಅನುಕೂಲವಾಗಿದೆ. ಆದರೆ, ಕಳೆದ ನವೆಂಬರ್ 25ರಂದು ಉದ್ಘಾಟನೆಯಾದ ಇಲ್ಲಿನ ಇಂದಿರಾ ಕ್ಯಾಂಟೀನ್‌ನಲ್ಲಿ ತಿಂಗಳಲ್ಲೇ ನಾನಾ ಸಮಸ್ಯೆಗಳು ಉಲ್ಬಣಿಸಿವೆ.

ರುಚಿಯಿಲ್ಲದ ಊಟ, ಒಡೆದ ಬಾಗಿಲ ಗಾಜು, ಕುಸಿದ ನೆಲಕ್ಕೆ ಹಾಸಿದ ಫೇವರ್ಸ್, ಬಳಕೆಗೆ ಬಾರದಂತಾದ ಶೌಚಗೃಹಗಳು, ಕೈ ತೊಳೆದ ನೀರು ಸರಬರಾಜಿಲ್ಲದೆ ದುರ್ವಾಸನೆ ಬೀರುವುದು ಪಟ್ಟಣದ ಬಸ್ ನಿಲ್ದಾಣ ಬಳಿ ಇರುವ ಇಂದಿರಾ ಕ್ಯಾಂಟೀನ್‌ನಲ್ಲಿ ಕಂಡುಬರುವ ದೃಶ್ಯಗಳಿವು. ಹಲವು ವರ್ಷಗಳ ಬಳಿಕ ಪಟ್ಟಣದಲ್ಲಿ ಇಂದಿರಾ ಕ್ಯಾಂಟೀನ್ ಆರಂಭಿಸಿದಕ್ಕೂ ಸಾರ್ಥಕ ಇಲ್ಲದಂತಾಗಿದೆ. ಎಂಟು ವರ್ಷಗಳ ಕಾಲ ಕುಂಟುತ್ತಾ ಸಾಗಿದ್ದ ಕ್ಯಾಂಟೀನ್ ಉದ್ಘಾಟನೆಯು ಕಳೆದ ನ.25ರಂದು ಸಚಿವ ಶಿವರಾಜ ತಂಗಡಗಿ ಅವರಿಂದ ಆಗಿದೆ.

ರುಚಿಯಿಲ್ಲದ ಊಟ-ಉಪಹಾರ

ದಿನನಿತ್ಯ ನೂರಾರು ಸಂಖ್ಯೆಯಲ್ಲಿ ಇಲ್ಲಿನ ಕ್ಯಾಂಟೀನ್‌ಗೆ ಬಡವರು, ಕಾರ್ಮಿಕರು ಹಾಗೂ ವಿದ್ಯಾರ್ಥಿಗಳು ಊಟ, ಉಪಹಾರ ಸೇವಿಸಲು ಬರುತ್ತಾರೆ. ಆದರೆ, ಉಪಹಾರ-ಊಟ ಶುಚಿ-ರುಚಿ ಇಲ್ಲದ ಕಾರಣ ಅರ್ಧಕ್ಕೆ ಕೈತೊಳೆದುಕೊಂಡು ಹೋಗುತ್ತಿದ್ದಾರೆ. ಇನ್ನು ಮೆನು ಚಾರ್ಟ್ ಪ್ರಕಾರ ಉಪಹಾರ-ಊಟ ತಯಾರಿಸದಿರುವುದು ಭಾನುವಾರ ಕಂಡು ಬಂತು.

ಕಿತ್ತು ಹೋದ ಶೌಚಗೃಹ ಬಾಗಿಲು

ಕ್ಯಾಂಟೀನ್ ಕಟ್ಟಡದಲ್ಲಿ ಮಹಿಳಾ ಹಾಗೂ ಪುರುಷರ ಪ್ರತ್ಯೇಕ ಶೌಚಗೃಹಗಳಿದ್ದು, ಬಾಗಿಲುಗಳು ಕಿತ್ತು ಹೋಗಿದ್ದರಿಂದ ಶೌಚಕ್ಕಾಗಿ ಪರದಾಡಬೇಕಾದ ಸ್ಥಿತಿ ಇದೆ. ನಿರ್ವಹಣೆಯಿಲ್ಲದೆ ಶೌಚಗೃಹ ಒಂದು ತಿಂಗಳೊಳಗಾಗಿ ಪಾಳು ಬಿದ್ದಿರುವುದು ವಿಪರ್ಯಾಸವಾಗಿದೆ. ಇನ್ನು ಉದ್ಘಾಟನೆ ದಿನವೇ ಒಡೆದಿರುವ ಬಾಗಿಲಿನ ಗಾಜು ಇಂದಿಗೂ ದುರಸ್ತಿಯಾಗಿಲ್ಲ.

ಕುಸಿದ ನೆಲಹಾಸಿನ ಫೇವರ್ಸ್‌

ಕ್ಯಾಂಟೀನ್ ಆವರಣದಲ್ಲಿ ಪಪಂನಿಂದ 11 ಲಕ್ಷ ರೂ. ಅನುದಾನ ಬಳಸಿ ಫೇವರ್ಸ್‌ ಅಳವಡಿಕೆ ಸೇರಿ ನಾನಾ ಅಭಿವೃದ್ಧಿ ಕೆಲಸ ಮಾಡಲಾಗಿದೆ. ಆದರೆ, ಫೇವರ್ಸ್‌ಗಳು ಕುಸಿದಿದ್ದು, ಹೆಜ್ಜೆ ಇಡಲು ಜನ ಹೆದರುವಂತಾಗಿದೆ. ಈ ಕಳಪೆ ಕಾಮಗಾರಿಯಿಂದಾಗಿ ಸರ್ಕಾರದ ಅನುದಾನ ಪೋಲಾಗಿದೆ ಎಂದು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ದುರ್ವಾಸನೆ: ಕೈ ತೊಳೆದ ನೀರು ಸರಿಯಾಗಿ ಸಾಗರದೇ ಎಲ್ಲೆಂದರಲ್ಲಿ ಬ್ಲಾಕ್ ಆಗಿದೆ. ಇದರಿಂದ ಕ್ಯಾಟೀನ್‌ನಲ್ಲಿ ದುರ್ವಾಸನೆ ಬೀರುತ್ತಿದ್ದು, ಮೂಗು ಮುಚ್ಚಿಕೊಂಡೆ ಹೋಗಬೇಕಿದೆ. ಇದರಿಂದ ಸಿಎಂ ಆಪ್ತ, ಸಚಿವ ಶಿವರಾಜ ತಂಗಡಗಿ ತವರಲ್ಲೇ ಸಿಎಂ ಅವರ ಕನಸಿನ ಯೋಜನೆ ಕಮಾಗಾರಿ ಸಮರ್ಪಕ ನಿರ್ವಹಣೆ ಇಲ್ಲದೆ ಒಂದೇ ತಿಂಗಳಲ್ಲಿ ಹಳ್ಳ ಹಿಡಿದಿದೆ ಎಂದು ಸಾರ್ವಜನಿಕರು ಬೇಸರಿಸಿದ್ದಾರೆ.

ಪಟ್ಟಣದ ವಾರ್ಡ್‌ಗಳ ಅಭಿವೃದ್ಧಿಗೆ ಬಳಸಲು ಅನುದಾನ ಕೊರತೆಯಿದೆ ಎಂದು ಹೇಳುವ ಪಪಂ ಅಧಿಕಾರಿಗಳು ಕ್ಯಾಂಟೀನ್‌ಗೆ ಅನುದಾನ ಬಳಸಿದ್ದು, ತಿಂಗಳೊಳಗಾಗಿ ಫೇವರ್ಸ್‌ಗಳು ಕುಸಿದಿರುವುದು ಅನುದಾನ ಪೋಲಾಗಿದೆ. ಇನ್ನು ಕ್ಯಾಂಟೀನ್‌ನಲ್ಲಿ ಸ್ವಚ್ಛತೆ ಮಾಯವಾಗಿದೆ. ಬಡವರಿಗೆ ಕಡಿಮೆ ದರಕ್ಕೆ ದೊರೆಯುವ ಊಟ-ಉಪಹಾರ ರುಚಿಯಾಗಿಲ್ಲ.

ಗುತ್ತಿಗೆದಾರರು ಪರಿವೀಕ್ಷಣಾ ಅವಧಿಯಲ್ಲೇ ಇದ್ದಾರೆ. ಮೆನು ಪ್ರಕಾರ ಉತ್ತಮ ಉಪಹಾರ-ಊಟ ಕೊಡುವುದಕ್ಕೆ ಸೂಚಿಸಲಾಗುವುದು. ಕ್ಯಾಂಟೀನ್‌ನಲ್ಲಿ ಸ್ವಚ್ಛತೆ ಕಾಪಾಡುವುದಕ್ಕೆ ಕ್ರಮ ಕೈಗೊಳ್ಳಲಾಗುವುದು. ಶೌಚಗೃಹಗಳ ಬಾಗಿಲುಗಳನ್ನು ಎರಡ್ಮೂರು ಬಾರಿ ದುರಸ್ತಿ ಮಾಡಿಸಲಾಗಿದೆ. ಆದರೂ, ಕೆಲ ಕಿಡಿಗೇಡಿಗಳು ಹಾಳು ಮಾಡುತ್ತಿರುವ ಬಗ್ಗೆ ಮಾಹಿತಿಯಿದೆ. ಮತ್ತೊಮ್ಮೆ ಸರಿಪಡಿಸಲಾಗುವುದು. ಫೇವರ್ಸ್‌ ಸರಿಪಡಿಸಲು ತಿಳಿಸಲಾಗುವುದು.

ಇಂದಿರಾ ಕ್ಯಾಂಟೀನ್