ಜಿಲ್ಲಾ ನ್ಯಾಯಾಂಗ ಇಲಾಖೆ, ಬಾರ್ ಅಸೋಸಿಯೇಷನ್ ಗಂಗಾವತಿ ಇವರ ಸಹಯೋಗದಲ್ಲಿ ಎಪಿಎಂಸಿಯ ಶ್ರಮಿಕ ಭವನದಲ್ಲಿ ಶುಕ್ರವಾರ ಸಿವಿಲ್ ನ್ಯಾಯಾಧೀಶರು ಮತ್ತು ಜೆಎಂಎಫ್‌ಸಿ ನ್ಯಾಯಾಲಯವನ್ನು ವರ್ಚುವಲ್ ಮೂಲಕ ಉದ್ಘಾಟಿಸಿ ಮಾತನಾಡಿದರು.

ನ್ಯಾಯಾಂಗ ವ್ಯವಸ್ಥೆಯ ವಿಕೇಂದ್ರೀಕರಣ ಅತ್ಯವಶ್ಯಕವಾಗಿದೆ. ಕನಕಗಿರಿ ತಾಲೂಕು ಕೇಂದ್ರವಾಗಿ 8 ವರ್ಷಗಳಾಗಿದ್ದು, ಕೋರ್ಟ್ ಆರಂಭಿಸಬೇಕೆನ್ನುವ ಬೇಡಿಕೆ ಈಗ ಈಡೇರಿದೆ. ಮುಂದಿನ ದಿನದ ಕಾರ್ಯಕಲಾಪಗಳಂದು ಭೇಟಿ ನೀಡಿ ನ್ಯಾಯಾಲಯಕ್ಕೆ ಅವಶ್ಯವಾದ ಸೌಲಭ್ಯಗಳನ್ನು ಒದಗಿಸುವುದಾಗಿ ತಿಳಿಸಿದರು.

ಸ್ಥಳೀಯವಾಗಿ ನ್ಯಾಯಾಲಯಗಳು ಸ್ಥಾಪನೆಯಾಗುವುದರಿಂದ ಬಡ ಮತ್ತು ಮಧ್ಯಮ ವರ್ಗದವರಿಗೆ ಸಮಯ ಹಾಗೂ ಹಣ ಉಳಿತಾಯ ಜತೆಗೆ ಸ್ಥಳೀಯ ಮಟ್ಟದಲ್ಲೇ ನ್ಯಾಯ ಸಿಗಲು ಅನುಕೂಲವಾಗಲಿದೆ. ವಕೀಲರು ಮತ್ತು ನ್ಯಾಯಾಂಗ ಇಲಾಖೆ ಸಿಬ್ಬಂದಿ ಸಾರ್ವಜನಿಕರಿಗೆ, ವಿಶೇಷವಾಗಿ ಬಡ ಮತ್ತು ಶೋಷಿತರಿಗೆ ಸಕಾಲದಲ್ಲಿ ನ್ಯಾಯ ಒದಗಿಸಲು ಶ್ರಮಿಸಬೇಕು ಎಂದು ಕರೆ ನೀಡಿದರು.

ಕರ್ನಾಟಕ ಭೂಕಬಳಿಕೆ ನಿಷೀಧ ವಿಶೇಷ ನ್ಯಾಯಾಲಯದ ಮಾಜಿ ಅಧ್ಯಕ್ಷ ಎನ್.ಎಸ್. ಪಾಟೀಲ್ ಮಾತನಾಡಿ, ಇನ್ನುಮುಂದೆ ಕನಕಗಿರಿ ಜನತೆ ಸಣ್ಣಪುಟ್ಟ ಪ್ರಕರಣಗಳಿಗೂ ಗಂಗಾವತಿಗೆ ಅಲೆಯುವುದು ತಪ್ಪಲಿದೆ. ಯುವ ವಕೀಲರು ಆತ್ಮತೃಪ್ತಿಗಾಗಿ ಬಡವರಿಗೆ ಉಚಿತ ಕಾನೂನು ಸೇವೆ ಒದಗಿಸಲು ಮುಂದಾಗಬೇಕು. ಕಕ್ಷಿದಾರರ ಸಮಯ-ಹಣ ವ್ಯರ್ಥವಾಗುವುದನ್ನು ತಡೆಯುವ ಪ್ರಯತ್ನ ಮಾಡಬೇಕು. ರಾಜಿ ಸಂಧಾನ ಮೂಲಕ ವ್ಯಾಜ್ಯ ಇತ್ಯರ್ಥಕ್ಕೆ ಯತ್ನಿಸಬೇಕು. ಕೌಟುಂಬಿಕ ಪ್ರಕರಣದಲ್ಲಿ ಪತಿ-ಪತ್ನಿ ಮನವೊಲಿಸಿ ಒಂದುಗೂಡಿಸುವ ಕೆಲಸ ಮಾಡಬೇಕೆಂದು ಸಲಹೆ ನೀಡಿದರು.

ಡಿಸಿ ಡಾ. ಸುರೇಶ್ ಬಿ. ಇಟ್ನಾಳ ಮಾತನಾಡಿ, ಕೋರ್ಟ್ ಆರಂಭಕ್ಕೆ ಶಾಸಕ ಶಿವರಾಜ ತಂಗಡಗಿ ಅನುದಾನ ನೀಡಿದ್ದು, ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶ ಚಂದ್ರಶೇಖರ್ ಸಿ. ಅವರ ಸತತ ಪ್ರಯತ್ನದಿಂದಾಗಿ ಈ ನ್ಯಾಯಾಲಯ ಆರಂಭ ಸಾಧ್ಯವಾಗಿದೆ. ನ್ಯಾಯಾಂಗ, ಶಾಸಕಾಂಗ, ಕಾರ್ಯಾಂಗ ಸೇರಿ ಸಂಚಾರಿ ನ್ಯಾಯಾಲಯ ಆರಂಭಿಸುವ ಮೂಲಕ ತೃಪ್ತಿ ತರುವ ಕೆಲಸ ಮಾಡಿವೆ. ಕಾರಟಗಿ, ಕುಕನೂರು ನ್ಯಾಯಾಲಯ ಕಟ್ಟಡಕ್ಕೆ ಭೂಮಿ ಗುರುತಿಸಲಾಗಿದ್ದು, ಟೆಂಡರ್ ಹಂತದಲ್ಲಿವೆ ಎಂದು ತಿಳಿಸಿದರು.

ಗಂಗಾವತಿ ವಕೀಲರ ಸಂಘದ ಅಧ್ಯಕ್ಷ ಶರಣಬಸಪ್ಪ ನಾಯಕ, ಪ್ರಧಾನ ಕಾರ್ಯದರ್ಶಿ ಎಚ್.ಎಂ. ಮಂಜುನಾಥ ಮಾತನಾಡಿದರು. ಜಿಪಂ ಸಿಇಒ ವರ್ಣಿತ್ ನೇಗಿ, ಕನಕಗಿರಿ ನೂತನ ನ್ಯಾಯಾಲಯ ನ್ಯಾಯಾಧೀಶೆ ರೋಷಿನಿ ಪಾಟೀಲ್, ಎಪಿಎಂಸಿ ಕಾರ್ಯದರ್ಶಿ ಸಾವಿತ್ರಿ ಪಾಟೀಲ್, ಕೆಆರ್‌ಐಡಿಎಲ್ ಇಇ ಅನಿಲ್ ಪಾಟೀಲ್, ಬಾರ್ ಕೌನ್ಸಿಲ್ ಪದಾಧಿಕಾರಿಗಳಿದ್ದರು. ಹಿರಿಯ ವಕೀಲ ನಾಗರಾಜ ಗುತ್ತೇದಾರ ಕಾರ್ಯಕ್ರಮ ನಿರೂಪಿಸಿದರು.

ಕನಕಗಿರಿಯಲ್ಲಿ ವಾರದಲ್ಲಿ 2 ದಿನ ಕೋರ್ಟ್ ಕಲಾಪ ನಡೆಯಲಿದ್ದು, ಮುಂದಿನ ದಿನಗಳಲ್ಲಿ ಶಾಶ್ವತ ಕೋರ್ಟ್ ಆರಂಭಿಸಲು ಸೋಮವಾರವೇ ಹೈ ಕೋರ್ಟ್‌ಗೆ ಪ್ರಸ್ತಾವನೆ ಸಲ್ಲಿಸಲಾಗುವುದು. ಈಗಾಗಲೇ 2023ರಲ್ಲಿ ಆರಂಭವಾದ ಕಾರಟಗಿ ಹಾಗೂ ಕುಕನೂರು ಕೋರ್ಟ್‌ಗಳ ಸ್ವಂತ ಕಟ್ಟಡಕ್ಕಾಗಿ ತಲಾ 9 ಕೋಟಿ ರೂ. ಬಿಡುಗಡೆಯಾಗಿದೆ. ಕಾರಟಗಿ ಕೋರ್ಟ್‌ಗೆ ಕಾಯಂ ನ್ಯಾಯಾಧೀಶರ ನೇಮಕವಾಗಿದ್ದು, ಗಂಗಾವತಿಯಲ್ಲಿ ಗ್ರಾಹಕರ ವ್ಯಾಜ್ಯ ನ್ಯಾಯಾಲಯಕ್ಕೆ ಬೇಡಿಕೆಯಿಟ್ಟಿದ್ದೇವೆ ಎಂದು ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶ ಚಂದ್ರಶೇಖರ್ ಸಿ. ಮಾಹಿತಿ ನೀಡಿದರು.

ಗಂಗಾವತಿ, ಕನಕಗಿರಿ, ಕಂಪ್ಲಿ ಇತರ ತಾಲೂಕುಗಳು ಸೇರಿ ಕಿಷ್ಕಿಂಧಾ ತಾಲೂಕು ಆಗಬೇಕಲ್ಲದೇ, ಕನಕಗಿರಿ ಪಟ್ಟಣದ ಅಭಿವೃದ್ಧಿಗೆ ಬಾಗಲಕೋಟೆ-ದರೋಜಿ ರೈಲ್ವೆ ಯೋಜನೆ ಜಾರಿಯಾಗಬೇಕು. ಮಗು ಅತ್ತರಷ್ಟೇ ತಾಯಿ ಹಾಲುಣಿಸುತ್ತಾಳೆ ಎನ್ನುವುದನ್ನು ಅರಿತು ಪಕ್ಷಾತೀತವಾಗಿ ಹೋರಾಟ ಮಾಡುವುದು ಅವಶ್ಯ ಎಂದು ವಕೀಲರ ಸಂಘದ ಕಾರ್ಯದರ್ಶಿ ಮಂಜುನಾಥ ಹೇಳಿದರು.