ಡಾಂಬರ್ ಕಾಣದ ತಾಲೂಕಿನ ಕಟ್ಟೆ ಕಡೆಯ ರಸ್ತೆ ಇದಾಗಿದ್ದು, ಎರಡೂ ಊರಿನ ಜನರ ಸಂಪರ್ಕಕ್ಕೆ ಸಮಸ್ಯೆಯಾಗಿದೆ. ತಾಲೂಕು ಕೇಂದ್ರದಿಂದ 35 ಕಿ.ಮೀ.ದೂರದಲ್ಲಿರುವ ಹೊನಗಡ್ಡಿಯಿಂದ ಲಾಯದುಣಿಸಿ ಮಾರ್ಗವಾಗಿ ಹುಲಿಹೈದರ, ತಾವರಗೇರಾ, ಕುಷ್ಟಗಿ, ಇಳಕಲ್, ಗಂಗಾವತಿಗೆ ತೆರಳಲು ಈ ಭಾಗದ ಜನರು ಹರಸಾಹಸ ಪಡುವಂತಾಗಿದೆ. ಮಳೆಗಾಲ ಶುರುವಾದ್ರೆ ರಸ್ತೆ ಮೇಲೆ ನೀರು ಸಂಗ್ರಹಿಸಿ ವಾಹನಗಳ ಓಡಾಟ ತ್ರಾಸಾದಾಯಕವಾಗುತ್ತಿದೆ. ಆಳುದ್ದದ ರಸ್ತೆ ಗುಂಡಿಯಲ್ಲಿ ನೀರು ತುಂಬಿಕೊಳ್ಳುವ ಕಾರಣ ಅನೇಕ ಬೈಕ್ ಸವಾರರು ಆಯತಪ್ಪಿ ಬಿದ್ದು ಗಾಯ ಮಾಡಿಕೊಂಡ ಉದಾಹರಣೆಗಳಿವೆ. ರಸ್ತೆ ಹದಗೆಟ್ಟ ಕಾರಣಕ್ಕೆ ಈ ಮಾರ್ಗಕ್ಕೆ ಎರಡ್ಮೂರು ದಶಕಗಳಿಂದ ಸಾರಿಗೆ ವ್ಯವಸ್ಥೆ ಕಲ್ಪಿಸಿಲ್ಲ. ಹೊನಗಡ್ಡಿಯಿಂದ ಕೇವಲ 1 ಕಿ.ಮೀ. ಡಾಂಬರ್ ಹಾಕಿ ಕೈತೊಳೆದುಕೊಂಡಿರುವ ಜನಪ್ರತಿನಿಧಿಗಳಿಗೆ ಸಮಸ್ಯೆ ಗಮನಕ್ಕೆ ತಂದರೂ ಪ್ರಯೋಜನವಾಗಿಲ್ಲ.
