ತ್ಯಾಜ್ಯ ನಿರ್ವಹಣೆಗೂ ಅನುದಾನ ಬರ

ಜಿಲ್ಲೆಯಲ್ಲಿ ಹೊಸದಾಗಿ ಪಟ್ಟಣ ಪಂಚಾಯಿತಿ ಆಗಿ ಮೆಲ್ದರ್ಜೆಗೇರಿದ ಹನುಮಸಾಗರ ಸೇರಿ 10 ನಗರ&ಸ್ಥಳಿಯ ಸಂಸ್ಥೆಗಳಿವೆ. ಕೊಪ್ಪಳ, ಗಂಗಾವತಿ ನಗರಸಭೆಗಳಾದರೆ, ಕುಷ್ಟಗಿ, ಕಾರಟಗಿ ಪುರಸಭೆ ಸ್ಥಾನಮಾನ ಹೊಂದಿವೆ. ಉಳಿದಂತೆ ಕನಕಗಿರಿ, ಕುಕನೂರು, ಯಲಬುರ್ಗಾ, ತಾವರಗೇರಾ, ಭಾಗ್ಯನಗರ ಪಟ್ಟಣ ಪಂಚಾಯಿತಿಗಳಾಗಿ ಕಾರ್ಯನಿರ್ವಹಿಸುತ್ತಿವೆ. ದಿನ ಕಳೆದಂತೆ ಜನಸಂಖ್ಯೆ ಬೆಳವಣಿಗೆ ಜತೆಗೆ ನಗರ ವಾಸಿಗಳ ಪ್ರಮಾಣವೂ ಅಧಿಕವಾಗುತ್ತಿದೆ. ಹೊಸ ಬಡಾವಣೆ, ನಿವೇಶನಗಳ ರಚನೆ ಗ್ರಾಮ ಗಡಿ ಮೀರಿ ವಿಸ್ತರಿಸುತ್ತಿದೆ.

ಆದರೆ, ಜನವಸತಿಗೆ ತಕ್ಕಂತೆ ಮೂಲ ಸೌಕರ್ಯಗಳ ಅಭಿವೃದ್ಧಿ ಆಗುತ್ತಿಲ್ಲ. ಬಡಾವಣೆಗಳಲ್ಲಿ ಬೃಹತ್​ ಐಷಾರಾಮಿ ಮನೆಗಳು ತಲೆ ಎತ್ತುತ್ತಿವೆ. ಆದರೆ, ಉತ್ತಮ ರಸ್ತೆ, ಚರಂಡಿ, ಒಳ ಚರಂಡಿ, ಬೀದಿ ದೀಪ, ತ್ಯಾಜ್ಯ ಹಾಕುವ ನಿಖರ ಸ್ಥಳಗಳಿಲ್ಲ. ಜನ ಎಲ್ಲೆಂದರಲ್ಲಿ ಕಸ ಚೆಲ್ಲುತ್ತಿದ್ದಾರೆ. ಪರಿಣಾಮ ಪರಿಸರ ಹಾಳಾಗುತ್ತಿದೆ. ಹಸಿ, ಒಣ ಕಸ ಹಾಗೂ ಜಡ ತ್ಯಾಜ್ಯ ಪ್ರಮಾಣ ಹೆಚ್ಚುತ್ತಿದ್ದು ವಿಲೇವಾರಿ ನಗರಾಡಳಿತಗಳಿಗೆ ಸವಾಲಾಗುತ್ತಿದೆ.

ಗಂಗಾವತಿ ನಗರದಲ್ಲಿ ನಿತ್ಯ 45.5 ಟನ್​, ಕೊಪ್ಪಳ 37 ಟನ್​, ಕುಷ್ಟಗಿ 9.15 ಟನ್​, ಕಾರಟಗಿ 5 ಟನ್​, ಭಾಗ್ಯನಗರ 8 ಟನ್​, ಕನಕಗಿರಿ 5 ಟನ್​, ಕುಕನೂರು 3.8 ಟನ್​, ಯಲಬುರ್ಗಾ 5.35 ಟನ್​ ಹಾಗೂ ತಾವರಗೇರಾ ಪಟ್ಟಣದಲ್ಲಿ 5.6 ಟನ್​ನಷ್ಟು ತ್ಯಾಜ್ಯ ಉತ್ಪತ್ತಿಯಾಗುತ್ತಿದೆ. ನಿತ್ಯ ಕಸ ಸಂಗ್ರಹಿಸಿ ಹಸಿ&ಒಣ ಹಾಗೂ ಜಡ ತ್ಯಾಜ್ಯವಾಗಿ ವಿಂಗಡಿಸಿ ವಿಲೇವಾರಿ ಮಾಡಲಾಗುತ್ತಿದೆ. ನಿತ್ಯ ಸಂಗ್ರಹವಾಗುವ ಅಷ್ಟೂ ಕಸವನ್ನು ಅಂದೇ ವಿಲೇವಾರಿ ಮಾಡುವುದು ಸವಾಲಾಗುತ್ತಿದೆ.

ಸ್ವಚ್ಛ ಭಾರತ್​ ಮಿಷಿನ್​ ಯೋಜನೆಯಡಿ ನ ತ್ಯಾಜ್ಯ ನಿರ್ವಹಣೆ ಮಾಡಲಾಗುತ್ತಿದೆ. ಅವುಗಳ ನಿರ್ವಹಣೆ, ಮೂಲ ಸೌಕರ್ಯ ಅಭಿವೃದ್ಧಿಗಾಗಿ ಕಳೆದ ಮೂರು ವರ್ಷದಲ್ಲಿ ರಾಜ್ಯ ಸರ್ಕಾರ ಬರೋಬ್ಬರಿ 262.61 ಕೋಟಿ ರೂ. ವ್ಯಯಿಸಿದೆ. ಕಾಂಪೌಂಡ್​, ಒಳಾಂಗಣ ರಸ್ತೆ, ವೇಬ್ರಿಜ್​, ಸ್ಯಾನಿಟರಿ ಲ್ಯಾಂಡ್​ಪಿಟ್​, ವಿದ್ಯುತ್​ ಸಂಪರ್ಕ ಸೇರಿ ಇನ್ನಿತರೆ ಕಾಮಗಾರಿಗಳಿಗೆ ಖರ್ಚುಮಾಡಲಾಗಿದೆ. ಆದರೆ, ಜಿಲ್ಲೆಯ ನಗರ&ಸ್ಥಳಿಯ ಸಂಸ್ಥೆಗಳಿಗೆ ಕೇವಲ 5.74 ಕೋಟಿ ರೂ. ಬಿಡುಗಡೆಯಾಗಿದೆ. 2023-24ರಲ್ಲಿ ಯಾವೊಂದು ಸ್ಥಳಿಯಾಡಳಿತಕ್ಕೂ ಯೋಜನೆಯಡಿ ಬಿಡಿಗಾಸು ಬಿಡುಗಡೆಯಾಗದಿರುವುದು ಖೇದಕರ ಸಂಗತಿ.

ಜಿಲ್ಲೆಯ ಗ್ರೇಡ್​-1 ನಗರಸಭೆಯಾದ ಗಂಗಾವತಿಗೆ 2022-23ರಲ್ಲಿ 1.94 ಕೋಟಿ ರೂ. ಬಂದಿದ್ದು ಬಿಟ್ಟರೆ, ಎರಡು ವರ್ಷದಿಂದ ಅನುದಾನವೇ ಬಂದಿಲ್ಲ. ಜಿಲ್ಲಾ ಕೆಂದ್ರ ಕೊಪ್ಪಳ ನಗರಸಭೆಗೆ 2022&23ರಲ್ಲಿ 58 ಲಕ್ಷ ರೂ. ಹಾಗೂ 2024-25ರಲ್ಲಿ 59.68 ಲಕ್ಷ ರೂ. ಸೇರಿ 1.17 ಕೋಟಿ ರೂ. ಬಂದಿದೆ. ಕುಷ್ಟಗಿ ಪುರಸಭೆಗೆ 2022ರಲ್ಲಿ 1.32 ಕೋಟಿ ರೂ. ನೀಡಿದ್ದೇ ಕೊನೆ. ಯಲಬುರ್ಗಾ ಪಪಂಗೆ 2022-23ರಲ್ಲಿ 31.12 ಲಕ್ಷ ರೂ., 2024-25ರಲ್ಲಿ 12.95 ಲಕ್ಷ ರೂ. ಒಟ್ಟು 44.07 ಲಕ್ಷ ರೂ. ಅನುದಾನ ದಕ್ಕಿದೆ. ಕನಕಗಿರಿ ಪಪಂಗೆ 2024-25ರಲ್ಲಿ ಮಾತ್ರ 11.60 ಲಕ್ಷ ರೂ. ನೀಡಲಾಗಿದೆ. ಭಾಗ್ಯನಗರ ಪಪಂಗೆ 2024-25ರಲ್ಲಿ 66.79 ಲಕ್ಷ ರೂ., ತಾವರಗೇರಾಕ್ಕೆ 6.32 ಲಕ್ಷ ರೂ. ಅನುದಾನ ಹಂಚಿಕೆಯಾದರೆ, ಕುಕನೂರು ಮತ್ತು ಕಾರಟಗಿಗೆ ಅನುದಾನವೇ ಬಂದಿಲ್ಲ.

"

ಜಿಲ್ಲೆಯ 10 ನಗರ-ಸ್ಥಳಿಯ ಸಂಸ್ಥೆಗಳಲ್ಲಿ ತ್ಯಾಜ್ಯ ವಿಲೇವಾರಿ ಘಟಕಗಳು ಕಾರ್ಯನಿವರ್ಹಿಸುತ್ತಿವೆ. ಹಸಿ, ಒಣ ಕಸ ವಿಂಗಡಿಸಿ ವಿಲೇವಾರಿ ಮಾಡಲಾಗುತ್ತಿದೆ. ಸ್ವಚ್ಛ ಭಾರತ್​ ಮಿಷಿನ್​ ಹಾಗೂ 15ನೇ ಹಣಕಾಸು ನಿಧಿಯಡಿ ಅನುದಾನ ಬರುತ್ತಿದ್ದು ಬಳಕೆ ಮಾಡುತ್ತಿದ್ದೇವೆ.

— ಮಂಜುನಾಥ ಗುಂಡೂರು. ಡಿಯುಡಿಸಿ ಪಿಡಿ ಕೊಪ್ಪಳ.