ಗೊಬ್ಬರ ಕೊರತೆ ಬಿತ್ತನೆಗೆ ಬರ

ಕುಕನೂರು: ಪ್ರಸಕ್ತ ಮುಂಗಾರು ಮಳೆ ಉತ್ತಮವಾದರೂ ಬಿತ್ತನೆ ಪ್ರಮಾಣ ಮಾತ್ರ ಶೇ.47.22ರಷ್ಟು ಆಗಿದ್ದು, ಅಗತ್ಯ ರಸಗೊಬ್ಬರ ಕೊರತೆಯೇ ಇದಕ್ಕೆ ಕಾರಣ ಎಂದು ಹೇಳಲಾಗುತ್ತಿದೆ.

2026-27ನೇ ಸಾಲಿನ ಮುಂಗಾರು ಹಂಗಾಮಿನಲ್ಲಿ ಕುಕನೂರು, ಮಂಗಳೂರು ಹೋಬಳಿ ಸೇರಿ ನಿಗದಿಗಿಂತ ಅರ್ಧದಷ್ಟು ಬಿತ್ತನೆಯಾಗಿಲ್ಲ. ಅಲ್ಲದೆ, ಯೂರಿಯಾ ಗೊಬ್ಬರ ಕೊರತೆಯಿಂದ ರೈತರು ಮೆಕ್ಕೆಜೋಳ ಬಿಟ್ಟು ಸೂರ್ಯಕಾಂತಿ, ತೊಗರಿ, ಹೆಸರು ಬಿತ್ತನೆಗೆ ಹೆಚ್ಚು ಒತ್ತು ನೀಡಿದ್ದಾರೆ. ಈಗಾಗಲೇ ಒಂದು ಎಕರೆ ಪಹಣಿ ಹೊಂದಿದ್ದ ರೈತರಿಗೆ ಎರಡು ಚೀಲ ಗೊಬ್ಬರ ಮಾತ್ರ ನೀಡಲಾಗುತ್ತಿದೆ. ಆದರೆ, ಪ್ರತಿ ಎಕರೆಗೆ ಎರಡು ಚೀಲ ಯೂರಿಯಾ ಬೇಕಾಗುತ್ತದೆ. ಕೇವಲ ಒಂದು ಎಕರೆ ಬಿತ್ತನೆ ಮಾಡಿದರೆ ಕಷ್ಟವಾಗುತ್ತದೆ ಎಂದು ಮೆಕ್ಕೆಜೋಳ ಬಿತ್ತನೆ ಮಾಡುತ್ತಿಲ್ಲ.

ಎಲ್ಲೆಲ್ಲಿ ಎಷ್ಟು ಪ್ರಮಾಣ: ಕುಕನೂರು ತಾಲೂಕಿನಲ್ಲಿ ಸದ್ಯ 46.7ಮಿಮೀ ವಾಡಿಕೆ ಪೈಕಿ 69.9ಮಿಮೀ ಮಳೆಯಾಗಿದೆ. ಮೆಕ್ಕೆಜೋಳ 12,956 ಹೆಕ್ಟೇರ್ ಬಿತ್ತನೆ ಗುರಿ ನಿಗದಿಯಾಗಿದ್ದು, 5,740 ಹೆಕ್ಟೇರ್ ಬಿತ್ತನೆಯಾಗಿದೆ. ತೊಗರಿ 1,190 ಹೆಕ್ಟೇರ್ ಗುರಿ ಪೈಕಿ 4,260 ಹೆಕ್ಟೇರ್, ಹೆಸರು 22,290 ಹೆಕ್ಟೇರ್ ಗುರಿಗೆ 9,885 ಹೆಕ್ಟೇರ್, ಶೇಂಗಾ 2,346 ಹೆಕ್ಟೇರ್ ಗುರಿ ಪೈಕಿ 110 ಹೆಕ್ಟೇರ್, ಸೂರ್ಯಕಾಂತಿ 5,102 ಹೆಕ್ಟೇರ್ ಗುರಿಗೆ 1,020 ಹೆಕ್ಟೇರ್ ಬಿತ್ತನೆಯಾಗಿದೆ. ಒಟ್ಟು 50,366 ಹೆಕ್ಟೇರ್ ಬಿತ್ತನೆಗೆ ಗುರಿ ನಿಗದಿಯಾಗಿದ್ದು, ಇದರಲ್ಲಿ 23,785 ಹೆಕ್ಟೇರ್ ಬಿತ್ತನೆಯಾಗಿದೆ.

ರಸಗೊಬ್ಬರ ಕೊರತೆ: ಕೃಷಿಕರಿಗೆ ರಸಗೊಬ್ಬರದ ಕೊರತೆ ಕಾಡುತ್ತಿದ್ದು, ನಿತ್ಯ ರಸಗೊಬ್ಬರದ ಮಳಿಗೆಗಳು, ಸಹಕಾರಿ ಸಂಘದ ಮುಂದೆ ಸರತಿ ಸಾಲಿನಲ್ಲಿ ನಿಲ್ಲುವ ಪರಿಸ್ಥಿತಿಯಿದೆ. ಇನ್ನು ಪಹಣಿ ಹೊಂದಿರುವ ರೈತರು ರಸಗೊಬ್ಬರ ಖರೀದಿಸಿದರೆ ಒಟಿಪಿ ಹೇಳಬೇಕಾಗಿದೆ. ಇದರಿಂದ ರೈತರು ತೊಂದರೆ ಅನುಭವಿಸಬೇಕಾಗಿದೆ. ಕೆಲವರ ಪಹಣಿಗಳು ಮನೆಯ ಹಿರಿಯರ ಹೆಸರಿನಲ್ಲಿದ್ದು, ಅಂಥವರಿಗೆ ಗೊಬ್ಬರ ದೊರೆಯುತ್ತಿಲ್ಲ. ಇಂತಹ ಹಲವು ತೊಂದರೆಗಳಿಂದ ಬಿತ್ತನೆ ಪ್ರಮಾಣ ಕೂಡ ಕುಸಿತಗೊಂಡಿದೆ. ಆದ್ದರಿಂದ ಇಂತಹ ತಾಂತ್ರಿಕ ಸಮಸ್ಯೆಗಳನ್ನು ಸರಿಪಡಿಸಿ ಕೂಡಲೇ ಅಗತ್ಯ ರಸಗೊಬ್ಬರ ನೀಡುವಂತೆ ರೈತರು ಒತ್ತಾಯಿಸುತ್ತಿದ್ದಾರೆ.

ಗುರಿ ಮೀರಿದ ತೊಗರಿ: ರಸಗೊಬ್ಬರ ಅಗತ್ಯತೆ ಕಡಿಮೆ ಇರುವ ಬೆಳೆಯತ್ತ ರೈತರು ಹೆಚ್ಚು ಆಸಕ್ತಿ ಹೊಂದಿದ್ದು, ಮಸಾರಿ (ಕೆಂಪು) ಮಣ್ಣು ಹೊಂದಿರುವ ಕೃಷಿಕರು ತೊಗರಿ ಬೆಳೆಯತ್ತ ಹೆಚ್ಚು ಒತ್ತು ನೀಡಿದ್ದಾರೆ. ಕಳೆದ ನಾಲ್ಕೈದು ವರ್ಷಗಳಿಂದ ತೊಗರಿ ಉತ್ತಮ ಇಳುವರಿ ಬರುತ್ತಿದ್ದು, ಕಡಿಮೆ ಖರ್ಚು, ಕೂಲಿಕಾರರ ಬಳಕೆ ಕಡಿಮೆ ಹಾಗೂ ರಸಗೊಬ್ಬರದ ಅಗತ್ಯತೆ ಸಹ ಕಡಿಮೆ ಇದೆ. ಕೃಷಿ ಇಲಾಖೆ ಕೇವಲ 1,190 ಹೆಕ್ಟೇರ್ ಮಾತ್ರ ತೊಗರಿ ಬಿತ್ತನೆ ಗುರಿ ಹೊಂದಿದೆ. ಆದರೆ, ಈಗಾಗಲೇ 4,260 ಹೆಕ್ಟೇರ್ ಬಿತ್ತನೆಯಾಗಿದೆ.

"

ಪ್ರತಿ ವರ್ಷ ಅತಿ ಹೆಚ್ಚು ಮೆಕ್ಕೆಜೋಳ ಬಿತ್ತನೆ ಮಾಡಲಾಗುತ್ತಿತ್ತು. ಈ ಬಾರಿ ಯೂರಿಯಾ ಗೊಬ್ಬರ ಕೊರತೆ ಕಾರಣ ಮೆಕ್ಕೆಜೋಳದ ಬದಲು ತೊಗರಿ, ಹೆಸರು, ಸೂರ್ಯಕಾಂತಿ ಬೆಳೆಗಳನ್ನೇ ಬಿತ್ತನೆ ಮಾಡಲಾಗುತ್ತಿದೆ.

— > ಗವಿಸಿದ್ದಪ್ಪ ಕುಂಬಾರ ರೈತ, ಭಾನಾಪುರ