ತೊಗರಿ ಬಿತ್ತನೆಯತ್ತ ಕೃಷಿಕರ ಚಿತ್ತ

ಕನಕಗಿರಿ: ತಾಲೂಕು ವ್ಯಾಪ್ತಿಯಲ್ಲಿ ಕಳೆದ ಕೆಲ ದಿನಗಳ ಹಿಂದೆ ಉತ್ತಮ ಮಳೆಯಾಗಿದ್ದು, ಭೂಮಿ ಹದ ಮಾಡಿಕೊಂಡಿರುವ ರೈತರು ಈ ಬಾರಿ ಅಧಿಕವಾಗಿ ತೊಗರಿ ಬಿತ್ತನೆಗೆ ಮುಂದಾಗಿದ್ದಾರೆ.

ತಾಲೂಕಿನಲ್ಲಿ ಕನಕಗಿರಿ, ನವಲಿ ಹಾಗೂ ಹುಲಿಹೈದರ ಹೋಬಳಿಗಳ ಪೈಕಿ ಹುಲಿಹೈದರ ಭಾಗದಲ್ಲಿ ಉತ್ತಮ ಮಳೆಯಾಗಿದ್ದು, ಈ ವ್ಯಾಪ್ತಿಯಲ್ಲಿ 8,700 ಹೆಕ್ಟೇರ್ ಬಿತ್ತನೆ ಗುರಿ ಪೈಕಿ 5,600 ಹೆಕ್ಟೇರ್‌ನಲ್ಲಿ ತೊಗರಿಯನ್ನೇ ಬಿತ್ತನೆ ಮಾಡಲಾಗಿದೆ. ಮಳೆಯ ಕೊರತೆಯಿರುವ ಕನಕಗಿರಿ ಹೋಬಳಿಯಲ್ಲಿ 9,600 ಹೆಕ್ಟೇರ್ ಪೈಕಿ 2,000 ಹೆಕ್ಟೇರ್‌ನಲ್ಲಿ ತೊಗರಿ ಬಿತ್ತಿದ್ದು, ಬಿತ್ತನೆ ಕಾರ್ಯ ಮುಂದುವರಿದಿದೆ. ಇನ್ನು ನವಲಿ ಹೋಬಳಿಯಲ್ಲಿ 9,000 ಹೆಕ್ಟೇರ್ ಪೈಕಿ 2,000 ಹೆಕ್ಟೇರ್‌ನಲ್ಲಿ ತೊಗರಿ ಬಿತ್ತನೆಯಾಗಿದೆ.

ಕುಷ್ಟಗಿ ತಾಲೂಕಿನ ರೈತರು ಕನಕಗಿರಿ ತಾಲೂಕಿನಲ್ಲಿ ಟ್ರಾೃಕ್ಟರ್ ಕೂರಿಗೆಯಿಂದ ಬಿತ್ತನೆ ಮಾಡಿ ಕಡಿಮೆ ಖರ್ಚಿನಲ್ಲಿ ಹೆಚ್ಚು ಲಾಭ ಪಡೆಯುತ್ತಿದ್ದರು. ಇದರಿಂದ ಸ್ಫೂರ್ತಿಗೊಂಡ ಇಲ್ಲಿನ ರೈತರು ಹೆಚ್ಚಿನ ರೀತಿಯಲ್ಲಿ ತೊಗರಿ ಬೆಳೆಗೆ ಒಲವು ತೋರಿದ್ದಾರೆ. ಜಿಲ್ಲೆಯಲ್ಲಿ ಕುಷ್ಟಗಿ ಹಾಗೂ ಕನಕಗಿರಿ ತಾಲೂಕುಗಳಲ್ಲಿ ಅತೀ ಹೆಚ್ಚಿನ ತೊಗರಿ ಬೆಳೆಯುವ ಪ್ರದೇಶಗಳಾಗಿವೆ. ಸಣ್ಣ ಹಾಗೂ ಅತಿ ಸಣ್ಣ ರೈತರು ಎತ್ತುಗಳ ಸಹಾಯದಿಂದ ಬಿತ್ತನೆ ಮಾಡಿದರೆ, ದೊಡ್ಡ ಹಾಗೂ ಗುತ್ತಿಗೆ ಮಾಡಿದ ರೈತರು ಟ್ರಾೃಕ್ಟರ್ ಮೂಲಕ ಗೊಬ್ಬರದ ಅಭಾವ ಲೆಕ್ಕಿಸದೇ ಬಿತ್ತನೆಯಲ್ಲಿ ತೊಡಗಿದ್ದಾರೆ.

"

ಈಗಾಗಲೇ ಗಂಗಾವತಿ ಅಖಂಡ ತಾಲೂಕಿನ ಪೈಕಿ ಕನಕಗಿರಿಯಲ್ಲಿ ತೊಗರಿ ಬಿತ್ತನೆ ಅಧಿಕವಾಗಿದೆ. ಬೆಳೆ ಹೂ ಬಿಡುವ ಸಮಯದಲ್ಲಿ ಕುಡಿ ಚಿವುಟುವಿಕೆಗೆ ರೈತರು ಮುಂದಾದರೆ ಹೆಚ್ಚು ಕವಲುಗಳಾಗಿ ಇಳುವರಿ ಹೆಚ್ಚಾಗುತ್ತದೆ.

— > ಡಾ.ಅಭಿಲಾಷಾ ಎಡಿಎ ಗಂಗಾವತಿ

ತೊಗರಿ ಬೆಳೆಗೆ ಶ್ರಮ ಮತ್ತು ವ್ಯಯ ಕಡಿಮೆಯಿದ್ದು, ಉತ್ತಮ ಲಾಭ ನಿರೀಕ್ಷೆಯಿಂದ ರೈತರು ತೊಗರಿ ಬಿತ್ತನೆಗೆ ಮುಂದಾಗಿದ್ದಾರೆ.