ನಗರದ ಬಾಲಕರ ಸ.ಪ.ಪೂ.ಕಾಲೇಜು (ಜ್ಯೂನಿಯರ್) ಮೈದಾನಕ್ಕೆ 75ವರ್ಷಗಳ ಇತಿಹಾಸವಿದ್ದು, ಬರೋಬ್ಬರಿ 10ಎಕರೆ ವಿಸ್ತಾರವಿತ್ತು. ಪ್ಲಾಟಿನಂ ಉತ್ಸವಕ್ಕೆ ಸಜ್ಜಾಗಿರುವ ತಾಲೂಕಿನ ಏಕೈಕ ಮೊದಲ ಬಾಲಕರ ಸರ್ಕಾರಿ ಪ್ರೌಢ ಶಾಲೆ ವ್ಯಾಪ್ತಿ ಮೈದಾನ 2004ರವರೆಗೂ ತಾಲೂಕಿನ ಎಲ್ಲ ಶಾಲೆ, ಕಾಲೇಜುಗಳ ಕ್ರೀಡಾ ಕೇಂದ್ರವಾಗಿತ್ತು. ರಾಜಕಾರಣಿಗಳು, ಸಾರ್ವಜನಿಕ ಮತ್ತು ಸರ್ಕಾರಿ ಯೋಜನೆಗಳ ಪ್ರಚಾರದ ಬಹಿರಂಗ ಕಾರ್ಯಕ್ರಮಕ್ಕೆ ವೇದಿಕೆಯಾಗಿತ್ತು.

ಬೆಟ್ಟದ ನೀರು ಸಂಗ್ರಹಕ್ಕೆ ಮೈದಾನಕ್ಕೆ ಹೊಂದಿಕೊಂಡು ಕೆರೆಯಿತ್ತು. ಬಾಲಕಿಯರ ಎಂಎನ್‌ಎಂ ಶಾಲೆ ಕಟ್ಟಡದಿಂದ ಶುರುವಾದ ಮೈದಾನದ ಒತ್ತುವರಿ ಕಳೆದ 25ವರ್ಷಗಳಲ್ಲಿ ಬಹುತೇಕ ಅತಿಕ್ರಮಣಕ್ಕೊಳಗಾಗಿದೆ. ಮೈದಾನ ಉಳಿಸಿಕೊಳ್ಳಲು ವಿದ್ಯಾರ್ಥಿ ಸಂಘಟನೆಗಳು ನಿರ್ಲಕ್ಷಿಸಿದ್ದು, ಜನಪ್ರತಿನಿಧಿಗಳಲ್ಲಿನ ನಿರಾಸಕ್ತಿ ಒತ್ತುವರಿಗೆ ಅನುಕೂಲವಾಗಿದೆ.

ಮೈದಾನದ ನಾಲ್ಕು ದಿಕ್ಕಿನಲ್ಲೂ ಕಾಂಕ್ರಿಟ್ ಕಟ್ಟಡಗಳಾಗಿದ್ದು, ಮುಂಭಾಗದಲ್ಲಿ ನಗರಸಭೆ, ಪಿಕಾರ್ಡ್, ಪಿಡಬ್ಲುೃಡಿ, ಬಿಇಒ ಸಂಬಂಧಿಸಿದ್ದ ಕಟ್ಟಡಗಳಿದ್ದರೇ, ಎರಡು ದಿಕ್ಕಿನಲ್ಲೂ ಬಾಲಕಿಯರ, ಬಾಲಕರ, ಅಲ್ಪಸಂಖ್ಯಾತರ ಕಟ್ಟಡಗಳ ಜತೆಗೆ ಶೈಕ್ಷಣಿಕ ಸಂಬಂಧಿಸಿದ ಅನುದಾನ ಬಳಕೆ ನೆಪದಲ್ಲಿ ಅನಗತ್ಯ ಕಟ್ಟಡಗಳನ್ನು ನಿರ್ಮಿಸಲಾಗಿದೆ. ಕಳೆದ 10ವರ್ಷಗಳ ಹಿಂದೆ ನಿರ್ಮಿಸಿದ, ಕೆಲ ಕಟ್ಟಡಗಳು ಇಂದಿಗೂ ಬಳಕೆಯಲ್ಲಿಲ್ಲ. 1990ರಲ್ಲಿ ಬಯಲು ರಂಗ ನಿರ್ಮಿಸಿದ್ದರೆ, 2008ರಲ್ಲಿ ವಾಕಿಂಗ್ ಟ್ರ್ಯಾಕ್ ಹಾಕಲಾಗಿತ್ತು. ಎಪಿಎಂಸಿಯಲ್ಲಿ ತಾಲೂಕು ಕ್ರೀಡಾಂಗಣ ನಿರ್ಮಾಣವಾಗಿದ್ದರಿಂದ ಜ್ಯೂನಿಯರ್ ಕಾಲೇಜು ಮೈದಾನ ಒತ್ತುವರಿಗೆ ಅನುಕೂಲವಾಗಿದ್ದು, ಇತ್ತೀಚೆಗಂತೂ ಹೋಟೆಲ್ ಮತ್ತು ಖಾಸಗಿ ವಾಹನಗಳ ಆಶ್ರಯತಾಣವಾಗಿದೆ.

ಮೈದಾನದ ವಾರಸುದಾರಿಕೆ ಗೊಂದಲವಿದ್ದು, 1990ರವರೆಗೂ ಬಾಲಕರ ಸ.ಪ್ರೌಢ ಶಾಲೆ ಹೆಸರಿನಲ್ಲಿದ್ದು, 2008ರಲ್ಲಿ ವಾಕಿಂಗ್ ಟ್ರ್ಯಾಕ್ ಅನುದಾನ ಬಳಕೆಗೆ ಯುವ ಸಬಲೀಕರಣ ಇಲಾಖೆ ಹೆಸರಿಗೆ ಬದಲಿಸಲಾಗಿತ್ತು. ವಾರಸುದಾರುವಿಕೆಗೆ ಬಿಇಒ ಅಧಿಕಾರಿಗಳು ಹಲವು ವರ್ಷಗಳಿಂದ ಕಂದಾಯ ಮತ್ತು ಭೂಮಾಪನ ಇಲಾಖೆ ಅಲೆದಾಡುತ್ತಿದ್ದರೂ ಸ್ಪಷ್ಟತೆ ಸಿಕ್ಕಿಲ್ಲ. ಇತ್ತೀಚೆಗೆ ಗೂಗಲ್ ಮ್ಯಾಪ್‌ನಲ್ಲಿ ಜೆಸ್ಕಾಂ ಹೆಸರು ತೋರಿಸುತ್ತಿದ್ದು, ಮೈದಾನದಲ್ಲಿ ಇದುವರೆಗೂ ಬಳಸಿಕೊಂಡ ಅನುದಾನ ಯಾರ ಲೆಕ್ಕದಲ್ಲಿದೆ ಎಂಬುದು ಯಕ್ಷ ಪ್ರಶ್ನೆಯಾಗಿದೆ. ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳ ನಿರ್ಲಕ್ಷ್ಯದಿಂದ ವಾರಸುದಾರುವಿಕೆ ಗೊಂದಲ ಸೃಷ್ಟಿಯಾಗಿದೆ.

ನಗರಸಭೆ ಮಳಿಗೆಗಳ ಜತೆಗೆ ಹೋಂಗಾರ್ಡ್, ಸ್ಕೌಟ್ಸ್ ಮತ್ತು ಗೈಡ್ಸ್ ಕಚೇರಿಗೂ ಮೈದಾನದಲ್ಲಿ ಜಾಗ ನೀಡಲಾಗಿದೆ. ಬೀದಿ ಬದಿ ತಿಂಡಿ ವ್ಯಾಪಾರಿಗಳಿಗಾಗಿ ಮೈದಾನದಲ್ಲಿ ುಡ್ ಕೋರ್ಟ್ ನಿರ್ಮಾಣಕ್ಕೆ ನಗರಸಭೆ ಮುಂದಾಗಿದ್ದು, ಮೈದಾನದ ಪ್ರವೇಶ ದ್ವಾರದ ಜಾಗ ಆಯ್ಕೆ ಮಾಡಿಕೊಂಡಿದೆ. ಈಗಾಗಲೇ ಕಾಮಗಾರಿ ಆರಂಭಿಸಿದ್ದು, 35 ವರ್ಷಗಳಿಂದಿದ್ದ ಬಯಲು ರಂಗ ಮಂದಿರ ತೆರವುಗೊಳಿಸಲಾಗಿದೆ. ಸಂಬಂಧಪಟ್ಟ ಇಲಾಖೆ ಅಧಿಕಾರಿಗಳ ಗಮನಕ್ಕೆ ತರದೆ ಏಕಾಏಕಿ ಬಯಲು ರಂಗ ಮಂದಿರ ತೆರವುಗೊಳಿಸಿರುವುದಕ್ಕೆ ಕ್ರೀಡಾಪಟುಗಳು ಮತ್ತು ವಾಯುವಿಹಾರಿಗಳು ಆಕ್ರೋಶ ವ್ಯಕ್ತಪಡಿಸಿದ್ದು, ವಿದ್ಯಾರ್ಥಿ ಸಂಘಟನೆಗಳು ಮೈದಾನ ಉಳಿಸುವಂತೆ ಸಾಮಾಜಿಕ ಜಾಲತಾಣದಲ್ಲಿ ಅಭಿಯಾನ ಶುರು ಹಚ್ಚಿಕೊಂಡಿವೆ.

ಜ್ಯೂನಿಯರ್ ಕಾಲೇಜು ಮೈದಾನಕ್ಕೆ ಮಾಜಿ ಪ್ರಧಾನಿ ಇಂದಿರಾಗಾಂಧಿ ಬಂದಿದ್ದು, 2009ವರೆಗೂ ಅವರ ಹೆಸರಿನಲ್ಲಿ ಇಂದಿರಾಗಾಂಧಿ ಕಟ್ಟೆಯಿತ್ತು. ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡ, ಮಾಜಿ ಸಿಎಂಗಳಾದ ರಾಮಕೃಷ್ಣ ಹೆಗಡೆ, ಬಿ.ಎಸ್. ಯಡಿಯೂರಪ್ಪ, ಎಚ್.ಡಿ. ಕುಮಾರಸ್ವಾಮಿ, ಸಿದ್ದರಾಮಯ್ಯ ಸೇರಿ ರಾಜ್ಯ ಮತ್ತು ಕೇಂದ್ರದ ಹಲವು ಸಚಿವರು ಮೈದಾನದಲ್ಲಿ ಸಂಚರಿಸಿದ್ದಾರೆ. ಗೋಕಾಕ್ ಚಳವಳಿ ಸಂದರ್ಭದಲ್ಲಿ ಚಿತ್ರನಟ ಡಾ.ರಾಜ್, ಪುನೀತ್‌ರಾಜ (ಬಾಲನಟ),ಶಿವರಾಂ ಬಂದಿದ್ದರು. ಬಹಿರಂಗ ಭಾಷಣಕ್ಕಾಗಿ ಶ್ರುತಿ, ಸೌಂದರ್ಯ, ಪ್ರಕಾಶರಾಜ್, ಜಗ್ಗೇಶ, ಮಂಡ್ಯ ರಮೇಶ, ಗುರುರಾಜ್ ಹೊಸಕೋಟೆ ಇನ್ನೂ ಹಲವು ನಟರು ಬಂದಿದ್ದರು. ನೀನಾಸಂ, ಶಿವಸಂಚಾರ ಮತ್ತು ರಂಗಾಯಣ ಕಲಾವಿದರಿಗೆ ಬಯಲು ರಂಗಮಂದಿರ ಪ್ರಶಸ್ತ ಸ್ಥಳವಾಗಿದ್ದು, ರಂಗ ಮತ್ತು ಸಿನಿಮಾ ಕಲಾವಿದರಿಗೆ ಮೈದಾನ ವೇದಿಕೆಯಾಗಿತ್ತು.

ಯಾವುದೇ ಅನುದಾನ ಬಳಕೆಯ ಕಟ್ಟಡ ತೆರವು ಮುನ್ನ ಜನರ ಅಭಿಪ್ರಾಯಕ್ಕೆ ಸಭೆ ಆಯೋಜಿಸುವುದು ವಾಡಿಕೆ. ಆದರೆ ಮೈದಾನದಲ್ಲಿರುವ ಬಯಲು ರಂಗ ತೆರವು ವಿಚಾರದಲ್ಲಿ ಜನರ ಮತ್ತು ವಿದ್ಯಾರ್ಥಿಗಳ ಸಂಘಟನೆ ಸಭೆ ನಡೆಸಿಲ್ಲ. ತೆರವಿಗೆ ಟೆಂಡರ್ ಕರೆದಿಲ್ಲ. ಮೈದಾನಕ್ಕೆ ಹೊಂದಿಕೊಂಡ ಕಾಲೇಜು ಪ್ರಾಚಾರ್ಯರಿಗೂ ತಿಳಿಸಿಲ್ಲ. ನಗರಸಭೆ ಅಧಿಕಾರಿಗಳ ಸರ್ವಾಧಿಕಾರ ಧೋರಣೆಗೆ ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದ್ದು, ಪ್ರಮುಖರು ಖಂಡಿಸಿದ್ದಾರೆ. ಶಾಸಕ ಗಾಲಿ ಜನಾರ್ದನರೆಡ್ಡಿ ಒತ್ತಡಕ್ಕೆ ಮಣಿದ ಅಧಿಕಾರಿಗಳು, ತರಾತುರಿಯಲ್ಲಿ ನಿರ್ಧಾರ ಕೈಗೊಂಡಿದ್ದಾರೆ. ಬೀದಿ ಬದಿಯ ವ್ಯಾಪಾರಿಗಳಿಗೆ ಹಳೇ ಪ್ರವಾಸಿ ಮಂದಿರ ಅಥವಾ ಹಳೇ ತಹಸೀಲ್ ಕಚೇರಿ ಆವರಣದಲ್ಲಿ ಸಾಕಷ್ಟು ಜಾಗವಿದ್ದು, ಬಳಸಿಕೊಳ್ಳಲು ಅವಕಾಶವಿತ್ತು. 2000ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿರುವ ಮೈದಾನ ಆಯ್ಕೆ ಮಾಡಿದ್ದು ಸರಿಯಲ್ಲ ಎನ್ನುತ್ತಾರೆ ಸಾರ್ವಜನಿಕರು.

"

ುಡ್ ಕೋರ್ಟ್ ನಿರ್ಮಾಣ ವಿಚಾರ ಪರಿಶೀಲಿಸಲಾಗುತ್ತಿದ್ದು, ಸ್ಥಳಕ್ಕೆ ಭೇಟಿ ನೀಡಲಾಗುವುದು. ಮೈದಾನಕ್ಕೆ ತೊಂದರೆಯಾಗದಂತೆ ಕ್ರಮ ಕೈಗೊಳ್ಳಲಾಗುವುದು.

— ಡಾ.ಸುರೇಶ ಬಿ.ಇಟ್ನಾಳ್ ಡಿಸಿ, ಕೊಪ್ಪಳ

"

ಐತಿಹಾಸಿಕ ಹಿನ್ನೆಲೆಯ ಮೈದಾನ ಉಳಿಸಬೇಕಿದ್ದು, ಸಂಘಟನೆಗಳು ಬಯಲಿಗೆ ಬರಲಿ. ಬಯಲು ರಂಗಮಂದಿರದಲ್ಲಿ ನಾಟಕ ನೋಡಿ, ಭಾಷಣ ಮಾಡಿ ಬೆಳೆದವರು. ಶಾಲೆ ಮಕ್ಕಳು ಬಣ್ಣ ಹಚ್ಚಿ ಏಕಪಾತ್ರಾಭಿನಯ ಮಾಡಿ ರಾಜ್ಯ ಮಟ್ಟಕ್ಕೆ ಕಳಿಸಿದ ರಂಗಮಂದಿರ. ನೆಲದ ಸಂಸ್ಕತಿಯೊಂದು ಬುಲ್ಡೋಜರ್‌ಗೆ ಬಲಿಯಾಗುತ್ತಿರು ವುದು ಕಂಡು ಸಂಕಟವಾಯಿತು. ನಮ್ಮ ಜನಕ್ಕೆ ಮಂದಿರ, ಮಸೀದಿ, ಚರ್ಚ್‌ಗಳ ಗದ್ದಲದಲ್ಲಿ ಈ ಕಲಾ ಮಂದಿರ ಕಾಣುತ್ತಿಲ್ಲ.

— ಅಜಮೀರ ನಂದಾಪುರ ಕಸಾಪ ಮಾಜಿ ಅಧ್ಯಕ್ಷ