ತರಕಾರಿ ತ್ಯಾಜ್ಯದಿಂದಲೂ ಆದಾಯ ಸೃಷ್ಟಿ ಗೊತ್ತಾ !?

ಕೊಪ್ಪಳ: ಸದ್ಯ ಎಲ್ಲೆಡೆ ತ್ಯಾಜ್ಯ ವಿಲೇವಾರಿಯೇ ಸವಾಲು. ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿಗಳು ಇದಕ್ಕೆ ಹೊರತಲ್ಲ. ಕಸವನ್ನು ರಸವಾಗಿ ಬದಲಾಯಿಸಲು ಕೊಪ್ಪಳ ಜಿಲ್ಲಾಡಳಿತ ಯೋಜಿಸಿದ್ದು ತರಕಾರಿ ತ್ಯಾಜ್ಯವನ್ನು ಗೊಬ್ಬರವಾಗಿ ಪರಿವರ್ತಿಸಿ ಆದಾಯ ಸೃಷ್ಟಿಗೆ ಮುಂದಾಗಿದೆ.

ಹೌದು, ಎಪಿಎಂಸಿಗಳೆಂದರೆ ತರಕಾರಿ, ಕೃಷಿ ಉತ್ಪನ್ನಗಳ ವ್ಯಾಪಾರ ವಹಿವಾಟು ತಕ್ಷಣ ಕಣ್ಣಿಗೆ ಬರುತ್ತದೆ. ಅದು ಮುಗಿದ ಬಳಿಕ ಕಸದ ರಾಶಿ ಕಾಣ ಸಿಗುವುದು ಸಾಮಾನ್ಯ. ಅದರ ನಿರ್ವಹಣೆಯೂ ಸವಾಲಿನ ಕೆಲಸ. ಪರ್ಯಾಯ ಮಾರ್ಗ ಹುಡುಕಾಟದಲ್ಲಿರುವರಿಗೆ ಕೊಪ್ಪಳ ಜಿಲ್ಲಾಡಳಿತ ಹೊಸ ಉಪಾಯ ಹುಡುಕಿದೆ.

ಜಿಲ್ಲೆಯಲ್ಲಿ ಕೃಷಿ ಉತ್ಪನ್ನಗಳ ಜತೆಗೆ ತರಕಾರಿ, ಹಣ್ಣಿನ ಬೆಳೆಗಳನ್ನು ಬೆಳೆಯಲಾಗುತ್ತಿದೆ. ಗಂಗಾವತಿ, ಕೊಪ್ಪಳ, ಕುಷ್ಟಗಿ, ಕುಕನೂರು ಸೇರಿ ವಿವಿಧೆಡೆ ಎಪಿಎಂಸಿಗಳು ರೈತರ ತರಕಾರಿ, ಕೃಷಿ ಉತ್ಪನ್ನ ಮಾರಾಟಕ್ಕೆ ನೆರವಾಗುತ್ತಿವೆ. ಎಪಿಎಂಸಿ ಕಾಯ್ದೆ ತಿದ್ದುಪಡಿಯಿಂದ ಆದಾಯ ಸಂಗ್ರಹಕ್ಕೂ ಹೊಡೆತ ಬಿದ್ದಿದೆ. ನಿಯಮಾವಳಿ ಸಡಿಲಿಕೆಯಿಂದ ಅಧಿಕಾರಿಗಳ ಹಿಡಿತವಿಲ್ಲದಂತಾಗಿದೆ. ರೈತರೊಟ್ಟಿಗೆ ದಲ್ಲಾಲಿಗಳಿಗೆ ಅಧಿಕ ಲಾಭವಾಗುತ್ತಿದೆ. ಎಪಿಎಂಸಿಗಳ ನಿರ್ವಹಣೆಯೂ ಅಷ್ಟಕ್ಕಷ್ಟೆ ಎಂಬಂತಿದೆ. ಸ್ವಚ್ವತೆ, ಕುಡಿವ ನೀರು, ಶೌಚಗೃಹ ಇನ್ನಿತರ ಸೌಕರ್ಯಗಳು ಮರೀಚಿಕೆಯಾಗಿವೆ. ಎಲ್ಲೆಂದರಲ್ಲಿ ತ್ಯಾಜ್ಯ ಸಂಗ್ರಹವಾಗಿದ್ದು ಕಸದ ತೊಟ್ಟಿಗಳಾಗಿ ಮಾರ್ಪಡುತ್ತಿವೆ.

ಮುಖ್ಯವಾಗಿ ತರಕಾರಿ ಮಾರುಕಟ್ಟೆಗಳಲ್ಲಿ ಅಧಿಕ ಹಸಿ ಕಸ ಉತ್ಪಾದನೆಯಾಗುತ್ತಿದೆ. ನಿತ್ಯ ಟನ್​ಗಟ್ಟೆಲೇ ತ್ಯಾಜ್ಯ ಸಂಗ್ರಹವಾಗುತ್ತಿದ್ದು ವಿಲೇವಾರಿ ಸವಾಲಾಗಿ ಪರಿಣಮಿಸುತ್ತಿದೆ. ದರ ಕುಸಿತವಾದಾಗ ರೈತರು ಸ್ಥಳದಲ್ಲಿಯೇ ತರಕಾರಿ ಬಿಟ್ಟು ಹೋಗುವುದು ಹೆಚ್ಚು. ಕೆಟ್ಟ ತರಕಾರಿ, ಇನ್ನಿತರ ಕಸ ಹೆಚ್ಚುತ್ತಿದೆ. ಎಲ್ಲೆಂದರಲ್ಲಿ ಎಸೆಯುತ್ತಿದ್ದು ಅಸ್ವಚ್ಛತೆ ತಾಂಡವಾಡುತ್ತಿದೆ. ಇತ್ತೀಚೆಗೆ ಜಿಲ್ಲೆಗೆ ಭೇಟಿ ನೀಡಿದ್ದ ಉಪ ಲೋಕಾಯುಕ್ತ ಬಿ.ವೀರಪ್ಪ ಅವರು ಅಸ್ವಚ್ಛತೆ ಕಂಡು ಅಧಿಕಾರಿಗಳನ್ನು ಹಿಗ್ಗಾಮುಗ್ಗಾ ಜಾಡಿಸಿದ್ದರು. ಎಚ್ಚೆತ್ತ ಜಿಲ್ಲಾಡಳಿತ ಕಸದಿಂದ ರಸ ತೆಗೆಯಲು ಮುಂದಾಗಿದೆ.

ದಾವಣೆಗೆರೆ ಇನ್ನಿತರ ನಗರಗಳಲ್ಲಿ ಈ ಮಾದರಿ ಅನುಷ್ಠಾನ ಮಾಡಿದ್ದು ಯಶಸ್ವಿಯಾಗಿದೆ. ಅದರಂತೆ ಜಿಲ್ಲೆಯ ಎಪಿಎಂಸಿಗಳಲ್ಲೂ ಕ್ರಮ ಕೈಗೊಳ್ಳಲು ಜಿಲ್ಲಾಧಿಕಾರಿ ಡಾ.ಸುರೇಶ ಇಟ್ನಾಳ ಮಾರುಕಟ್ಟೆ ಅಧಿಕಾರಿಗಳಿಗೆ ತಾಕೀತು ಮಾಡಿದ್ದಾರೆ. ಯೋಜನೆ ರೂಪಿಸಿ ಶ್ರೀ ಅನುಷ್ಠಾನಕ್ಕೆ ಸೂಚಿಸಿದ್ದಾರೆ. ಕೃಷಿ ಮಾರಾಟ ಇಲಾಖೆ ಸಹಾಯಕ ನಿರ್ದೇಶಕರಿಗೆ ಜವಾಬ್ದಾರಿವಹಿಸಿದ್ದು, ಯೋಜನೆ ರೂಪಗೊಳ್ಳುತ್ತಿದೆ. ಜಾರಿಯಾದಲ್ಲಿ ಮಾದರಿ ಕ್ರಮ ಆಗಲಿದೆ. ತ್ಯಾಜ್ಯ ವಿಲೇವಾರಿಯಂಥ ಬಹುದೊಡ್ಡ ಸಮಸ್ಯೆಗೆ ಸರಳ ಪರಿಹಾರ ದೊರೆತಂತಾಗಲಿದೆ.

ಸದ್ಯ ತ್ಯಾಜ್ಯ ವಿಲೇವಾರಿಗೆ ಹೆಚ್ಚು ಶುಲ್ಕ ಭರಿಸುವಂತಾಗಿದೆ. ವಾಹನಗಳಲ್ಲಿ ಬೇರೆಡೆ ಸಾಗಿಸುವುದು ವೆಚ್ಚದಾಯಕವಾಗುತ್ತಿದೆ. ಅದರ ಬದಲು ಎಪಿಎಂಸಿಗಳಲ್ಲೇ ತೊಟ್ಟಿಗಳನ್ನು ನಿರ್ಮಿಸಿ ಹಸಿ&ಒಣ ಕಸ ವಿಂಗಡಿಸಿ ಸಂಗ್ರಹಿಸುವುದು. ವೈಜ್ಞಾನಿಕ ವಿಧಾನಗಳನ್ನು ಅನುಸರಿಸಿ ನಿರ್ವಹಣೆ ಮಾಡಿದಲ್ಲಿ ಕಾಂಪೋಸ್ಟ್​ ಗೊಬ್ಬರವಾಗಿ ಬದಲಾಗಲಿದೆ. ಗೊಬ್ಬರ ರೈತರಿಗೆ ಬಳಕೆ ನೀಡಬಹುದು. ಮುಕ್ತ ಮಾರುಕಟ್ಟೆ ದರಕ್ಕಿಂತ ಕಡಿಮೆ ನೀಡಿದಲ್ಲಿ ಮಾರಾಟವೂ ಸುಲಭವಾಗಲಿದೆ. ಅದರಿಂದ ಆದಾಯ ವೃದ್ಧಿಯಾಗಲಿದ್ದು, ಖರ್ಚು ಕಡಿಮೆ ಆಗಲಿದೆ. ತ್ಯಾಜ್ಯ ವಿಲೇವಾರಿ ಸಮಸ್ಯೆಯೂ ಪರಿಹಾರವಾಗಲಿದೆ ಎಂಬುದು ಜಿಲ್ಲಾಡಳಿತದ ಲೆಕ್ಕಾಚಾರ.

"