"ಬರ' ಘೋಷಣೆಯೊಂದೇ ಬಾಕಿ

ಜಿಲ್ಲೆಯ ಏಳು ತಾಲೂಕುಗಳಲ್ಲಿ ಒಂದು ಹನಿಯೂ ಮಳೆ ಬೀಳುತ್ತಿಲ್ಲ. ಬಿತ್ತಿ ಚಿಗುರೊಡೆದ ಬೆಳೆ ಉಳಿಸಿಕೊಳ್ಳಲು ರೈತರು ಹರಸಾಹಸ ಪಡುವಂತಾಗಿದೆ. ಕೆಲವರು ವಿಧಿ ಇಲ್ಲದೆ ಬೆಳೆ ಹರಗುತ್ತಿದ್ದಾರೆ. ಇನ್ನು ಕೆಲವರು ಟ್ಯಾಂಕರ್​ ನೀರು ತಂದು ಸಲು ಕಾಪಾಡಲು ಪ್ರಯತ್ನಿಸುತ್ತಿದ್ದಾರೆ. ಜುಲೈ ಮಾಸ ಅರ್ಧ ಕಳೆದಿದ್ದು, ಬಾಕಿ ದಿನಗಳು ಮಳೆ ಬರುವ ಲಕ್ಷಣಗಳೂ ಇಲ್ಲ. ಜುಲೈ ಅಂತ್ಯಕ್ಕೆ ಮುಂಗಾರು ಬಿತ್ತನೆ ಕಾರ್ಯ ಬಹುತೇಕ ಮುಗಿಯಲಿದೆ. ವರುಣನ ದರ್ಶನ ದುರ್ಲಬವಾಗಿದ್ದು, ಮುಂಗಾರು ಹಂಗಾಮಿಗೆ ಬರ ಪರಿಸ್ಥಿತಿ ಬಹುತೇಕ ಆವರಿಸಿದಂತಾಗಿದೆ.

ಜೂನ್​&ಜುಲೈ ತಿಂಗಳಲ್ಲಿ ಮಳೆ ಆಗಿಯೇ ಇಲ್ಲ. 101 ಮಿ.ಮೀ. ವಾಡಿಕೆ ಮಳೆ ಪೈಕಿ ಕೇವಲ 60 ಮಿ.ಮೀ. ಆಗಿದೆ. ಅದು ಆಗಾಗ ಸುರಿದಿದ್ದು, ಒಟ್ಟಿಗೆ ಆದ ಉದಾಹರಣೆಗಳಿಲ್ಲ. ಜುಲೈ ತಿಂಗಳಲ್ಲಿ ಬುಧವಾರದ ಅಂತ್ಯಕ್ಕೆ 22.8 ಮಿ.ಮೀ. ವಾಡಿಕೆ ಮಳೆಯಲ್ಲಿ ಕೇವಲ 5 ಮಿ.ಮೀ. ಆಗಿದೆ. ಶೇ.75ರಷ್ಟು ವರ್ಷಧಾರೆ ಕೊರತೆ ಆಗಿದೆ. ಗಂಗಾವತಿ, ಕನಕಗಿರಿ, ಕೊಪ್ಪಳ, ಕುಷ್ಟಗಿ, ಯಲಬುರ್ಗಾ, ಕುಕನೂರು, ಕಾರಟಗಿ ತಾಲೂಕುಗಳಲ್ಲೂ ಮಳೆ ದರ್ಶನವೇ ಇಲ್ಲದಂತಾಗಿದೆ.

ಭತ್ತ, ಸಜ್ಜೆ, ಹೆಸರು, ಮೆಕ್ಕೆಜೋಳ, ಶೇಂಗಾ, ತೊಗರಿ, ಸೂರ್ಯಕಾಂತಿ ಸೇರಿ ಮುಂಗಾರಿನಲ್ಲಿ 3,49,892 ಹೆಕ್ಟೇರ್​ ಬಿತ್ತನೆ ಗುರಿ ಪೈಕಿ ಕೇವಲ 1,63,546 ಹೆಕ್ಟೇರ್​ ಬಿತ್ತನೆಯಾಗಿದೆ. ಜೂನ ಕೊನೇ ವಾರದಿಂದ ಜುಲೈ ಪೂರ್ವಾರ್ಧವರೆಗೆ ಬಿತ್ತನೆಯೇ ಆಗಿಲ್ಲ. ಬಿತ್ತಿದ ಬಹುತೇಕ ಒಣಗುತ್ತಿವೆ. ಮೆಕ್ಕೆಜೋಳ, ಸೂರ್ಯಕಾಂತಿ ಪೂರ್ಣ ನೆಲಕಚ್ಚಿವೆ. ಸಲು ನೆಲ ಬಿಟ್ಟು ಮೇಲೇರುತ್ತಿಲ್ಲ. ಮೋಡಗಳು ಮರೆಯಾಗಿದ್ದು, ಬಿಸಿಲಿನ ತೀವ್ರತೆ ದಿನ ಕಳೆದಂತೆ ಹೆಚ್ಚುತ್ತಿದೆ. 33&34 ಡಿಗ್ರಿ ಸೆಲ್ಸಿಯಸ್​ ತಾಪಮಾನ ದಾಖಲಾಗುತ್ತಿದೆ. ಭೂಮಿ ತೇವಾಂಶ ಕಳೆದುಕೊಳ್ಳುತ್ತಿದ್ದು, ಒಣ ಹವೆ ಕಾರಣ ಬೆಳೆ ಬಾಡುತ್ತಿವೆ.

ರಾಜ್ಯ ಸರ್ಕಾರ ಬರ ಘೋಷಣೆ ಭರವಸೆ ನೀಡಿದ್ದು, ಪ್ರಾಥಮಿಕ ಮಾಹಿತಿ ಸಂಗ್ರಹಕ್ಕೆ ಮುಂದಾಗಿದೆ. ಕೃಷಿ ಅಧಿಕಾರಿಗಳು ಜಮೀನುಗಳಿಗೆ ಭೇಟಿ ನೀಡಿ ಪರಿಸ್ಥಿತಿ ಅವಲೋಕಿಸುತ್ತಿದ್ದಾರೆ. ರಾಷ್ಟ್ರೀಯ ವಿಪತ್ತು ಮಾನದಂಡಗಳ ಅನ್ವಯ ಸತತ ಮೂರು ವಾರಗಳ ಮಳೆ ಕೊರತೆ, ಬಿತ್ತನೆ ಪ್ರಮಾಣ ಕುಸಿತ, ತೇವಾಂಶ, ಉಪಗ್ರಹ ಆಧಾರಿತ ಚಿತ್ರಗಳು, ಬೆಳೆಹಾನಿ ಸಮೀೆ ಆಧರಿಸಿ ಬರ ಘೋಷಿಸಲಾಗುತ್ತದೆ. ಈಗಾಗಲೇ ಇವೆಲ್ಲ ಲಕ್ಷಣ ಕಾಣಿಸಿಕೊಂಡಿದ್ದು, ಜನರು ನಿಟ್ಟುಸಿರು ಬಿಡುವಂತಾಗಿದೆ. ತಕ್ಷಣ ಸಮೀೆ ಕೈಗೊಂಡು ಹಾನಿ ಪ್ರಮಾಣ ವರದಿ ಸಲ್ಲಿಸಬೇಕು. ಬರ ಘೋಷಿಸಿ ಪರಿಹಾರ ಕ್ರಮ ಕೈಗೊಳ್ಳಬೇಕೆಂದು ಜನ ಒತ್ತಾಯಿಸುತ್ತಿದ್ದಾರೆ. ಹಲವು ಸಂಟನೆಗಳು ಮನವಿ ಸಲ್ಲಿಸಿ ಮೊರೆ ಇಡುತ್ತಿವೆ.

ಬೆಳೆ ನಷ್ಟಕ್ಕೆ ಸಿಲುಕುವ ರೈತರಿಗೆ ಬೆಳೆವಿಮೆ ಆಸರೆಯಾಗುವ ಆಸೆ ಮೂಡಿಸಿದೆ. ಬಿತ್ತನೆ ಪ್ರಮಾಣವೂ ಕುಸಿದಿದ್ದು, ಬಿತ್ತಿದ ರೈತರು ಕಡ್ಡಾಯವಾಗಿ ವಿಮೆ ನೋಂದಣಿ ಮಾಡಿಸಿದಲ್ಲಿ ಆಗುವ ನಷ್ಟದಿಂದ ತಪ್ಪಿಸಿಕೊಳ್ಳಬಹುದು. ಹೆಸರು, ಮೆಕ್ಕೆಜೋಳ, ತೊಗರಿ, ಸೂರ್ಯಕಾಂತಿ, ಸಜ್ಜೆ, ಭತ್ತ, ಹತ್ತಿ, ಅಲಸಂದೆ, ಈರುಳ್ಳಿ, ಶೇಂಗಾ, ಟೋಮಾಟೊ, ಎಳ್ಳು, ನವಣೆ, ಜೋಳ, ಹುರುಳಿ ಬೆಳೆಗೆ ವಿಮೆ ಮಾಡಿಸಬಹುದು. ಹೆಸರು ಬೆಳೆಗೆ ಜು.15ಕ್ಕೆ ಅವಧಿ ಮುಗಿದಿದೆ. ಬಾಕಿ ಬೆಳೆಗಳಿಗೆ ಜುಲೈ ಅಂತ್ಯದವರೆಗೆ ಮಾಡಿಸಲು ಅವಕಾಶವಿದೆ. ಜು.14ರ ಅಂತ್ಯಕ್ಕೆ ಗಂಗಾವತಿ ತಾಲೂಕಿನಲ್ಲಿ 643, ಕನಕಗಿರಿ 1,004, ಕಾರಟಗಿ 122, ಕೊಪ್ಪಳ 10,547, ಕುಕನೂರು 4,353 ಹಾಗೂ ಯಲಬುರ್ಗಾ ತಾಲೂಕಿನಲ್ಲಿ 6,249 ಸೇರಿ ಒಟ್ಟು 25,627 ರೈತರು 25,139 ಹೆಕ್ಟೇರ್​ ಪ್ರದೇಶಕ್ಕೆ ವಿಮೆ ನೋಂದಾಯಿಸಿದ್ದಾರೆ.

ಮಳೆ ಕೊರತೆ ಕಾರಣ ಜಿಲ್ಲಾಡಳಿತ, ಕೃಷಿ ಇಲಾಖೆ ರೈತರಿಗೆ ಸಾಮಾನ್ಯ ಬೆಳೆಗಳ ಬದಲಿಗೆ ಪರ್ಯಾಯ ಬೆಳೆ ಬಿತ್ತನೆಗೆ ಮನವಿ ಮಾಡಿದೆ. ಆದರೆ, ಹನಿ ಮಳೆಯೂ ಆಗದ ಕಾರಣ ಪರ್ಯಾಯ ಬೆಳೆಗಳ ಬಿತ್ತಯೂ ತೀವ್ರ ಣಿಸಿದೆ. ಜೋಳ, ಮೆಕ್ಕೆಜೋಳ, ಸಜ್ಜೆ, ಸವಣೆ, ಸಿರಿಧಾನ್ಯ, ತೊಗರಿ, ಹುರುಳಿ, ಹೆಸರು, ಅಲಸಂದಿ, ಅವರೆ, ಮಡಿಕೆ, ಶೇಮಗಾ, ಎಳ್ಳು, ಗುರೆಳ್ಳು, ಔಡಲ ಸೇರಿ 1,26,336 ಹೆಕ್ಟೇರ್​ನಲ್ಲಿ ಆಗಸ್ಟ್​ ಮೊದಲೆರಡು ವಾರದವರೆಗೆ ಮಳೆಯಾದಲ್ಲಿ ಬಿತ್ತನೆ ಮಾಡಬಹುದೆಂದು ಸಲಹೆ ನೀಡಿದೆ.