ಶಿವ-ಬಸವನಿಗೆ ಕೈ ಕೃಪೆ

ರಾವೇಂದ್ರ ಹಿಟ್ನಾಳಗೆ ಸಚಿವ ಸ್ಥಾನ ಸಿಗದ ಕಾರಣ ಅವರ ಬೆಂಬಲಿಗರು ಸೋಮವಾರ ಕೊಪ್ಪಳದಲ್ಲಿ ಪ್ರತಿಭಟನೆ ನಡೆಸಿದರು.

Published on:

04 Aug 2026, 6:16 am

ಪ್ರಮುಖ ಮುಖ್ಯಾಂಶಗಳು

ಕೊಪಣಗಿರಿಗೆ ಬಂಪರ್, ರಾಯರಡ್ಡಿ-ತಂಗಡಗಿಗೆ ಮಂತ್ರಿಗಿರಿ
ಹಿಟ್ನಾಳಗೆ ಕೈ ಕೊಟ್ಟ ಅದೃಷ್ಟ, ಮೊದಲ ಬಾರಿ ಇಬ್ಬರಿಗೆ ಸಚಿವಗಿರಿ

ಕೊಪ್ಪಳ : ರಾಜ್ಯದಲ್ಲಿ ಅಧಿಕಾರದಲ್ಲಿರುವ ಕಾಂಗ್ರೆಸ್ ಭವಿಷ್ಯದ ಚುನಾವಣೆಗಳಿಗೆ ಒಂದೆಡೆ ದಿಕ್ಸೂಚಿ, ಮತ್ತೊಂದೆಡೆ ಕಗ್ಗಂಟಾಗಿದ್ದ ಸಂಪುಟ ವಿಸ್ತರಣೆ ಕಗ್ಗಂಟು ಕೊನೆಗೂ ಬಿಡಿಸಿದೆ. ಕೊಪ್ಪಳದ ಇಬ್ಬರು ಶಾಸಕರಿಗೆ ಮಂತ್ರಿಭಾಗ್ಯ ಕರುಣಿಸುವ ಮೂಲಕ ಜಿಲ್ಲಾ ರಾಜಕಾರಣದಲ್ಲಿ ಹೊಸ ಇತಿಹಾಸ ಸೃಷ್ಟಿಗೆ ನಾಂದಿ ಹಾಡಿದೆ.

ರಾಜ್ಯ ರಾಜಕಾರಣದಲ್ಲಿ ಯಾವುದೇ ಪಕ್ಷದ ಸರ್ಕಾರ ಅಧಿಕಾರಕ್ಕೆ ಬಂದರೂ ಬಹುತೇಕ ಸಮಯದಲ್ಲಿ ಜಿಲ್ಲೆಯ ಶಾಸಕರಿಗೆ ಮಂತ್ರಿ ಭಾಗ್ಯ ಒಲಿದಿದೆ. 2008ರ ಕ್ಷೇತ್ರ ಮರು ವಿಂಗಡಣೆ ಬಳಿಕ ಹೆಚ್ಚು ಶಾಸಕರು ಸಚಿವರಾಗಿ ಬೀಗಿದ್ದಾರೆ. ಸದ್ಯ ಜಿಲ್ಲೆಯ ಮೂವರು ಕಾಂಗ್ರೆಸ್ ಶಾಸಕರ ಪೈಕಿ ಯಲಬುರ್ಗಾದ ಬಸವರಾಜ ರಾಯರಡ್ಡಿ, ಕನಕಗಿರಿಯ ಶಿವರಾಜ ತಂಗಡಗಿ ಸಂಪುಟದಲ್ಲಿ ಸ್ಥಾನ ಪಡೆವ ಮೂಲಕ ಉಳಿದ ಜಿಲ್ಲೆಯವು ಹುಬ್ಬೇರುವಂತೆ ಮಾಡಿದ್ದಾರೆ. ರೇಸ್ನಲ್ಲಿ ತೀವ್ರ ಪೈಪೋಟಿ ನೀಡಿದ್ದ ಕೊಪ್ಪಳ ಶಾಸಕ ರಾವೇಂದ್ರ ಹಿಟ್ನಾಳಗೆ ಅದೃಷ್ಟ ಕೈ ಕೊಟ್ಟಿದೆ.

2013ರಿಂದ ಈವರೆಗೆ ಹ್ಯಾಟ್ರಿಕ್ ಗೆಲುವು ದಾಖಲಿಸಿದ್ದಾರೆ. ಕುರುಬ ಸಮುದಾಯಕ್ಕೆ ಸೇರಿದ್ದು, ಕಲ್ಯಾಣ ಕರ್ನಾಟಕ ಭಾಗದ ಹಿಂದುಳಿದ ವರ್ಗಗಳ ಕೋಟಾದಡಿ ಮಂತ್ರಿಗಿರಿಗೆ ಬೇಡಿಕೆ ಇಟ್ಟಿದ್ದರು. ಮಾಜಿ ಸಿಎಂ ಸಿದ್ದರಾಮಯ್ಯ ಮಾನಸಪುತ್ರನಾಗಿ ಗುರುತಿಸಿಕೊಂಡಿದ್ದು ಸಚಿವಗಿರಿಗಾಗಿ ಶತಾಯಗತಾಯ ಪ್ರಯತ್ನ ನಡೆಸಿದ್ದರು. ಅವರ ಬೆಂಬಲಿಗರು ಡಿಕೆಶಿ ಸಿಎಂ ಆದ ಹೊಸತರಲ್ಲಿ ಸಚಿವ ಸ್ಥಾನಕ್ಕೆ ಆಗ್ರಹಿಸಿ ಉಗ್ರ ಪ್ರತಿಭಟನೆ ನಡೆಸಿದ್ದರು. ಸಿದ್ದರಾಮಯ್ಯ ಬೆಂಬಲ ಮೂಲಕ ಎಐಸಿಸಿ ಕೃಪೆಯಾಗಿ ಕಾಯ್ದಿದ್ದರು. ಅವರು ಸಚಿವರಾಗುವುದು ಪಕ್ಕಾ ಎಂದು ಬೆಂಬಲಿಗರೂ ಸಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಸಹ ಮಾಡಿದ್ದರು. ಆದರೆ, ಕೊನೇ ಳಿಗೆಯಲ್ಲಿ ಅದೃಷ್ಟ ಕೈಕೊಟ್ಟಿದ್ದು, ಹಿಟ್ನಾಳ ಬೆಂಬಲಿಗರಲ್ಲಿ ನಿರಾಸೆ ಮೂಡಿಸಿದೆ.

ಲೆಕ್ಕಾಚಾರ ತಲೆಕೆಳಗಾಗಿಸಿದ ರಾಯರಡ್ಡಿ

ರಾಜ್ಯದ ಹಿರಿಯ ರಾಜಕಾರಣಿಗಳ ಸಾಲಿನಲ್ಲಿ ಬಸವರಾಜ ರಾಯರಡ್ಡಿ ಅಗ್ಗಣ್ಯರು. ಸಿದ್ದರಾಮಯ್ಯ ಆಪ್ತ ಬಳಗದಲ್ಲಿ ಗುರುತಿಸಿಕೊಂಡಿರುವುದು, ಎಐಸಿಸಿಯೊಂದಿಗೆ ಉತ್ತಮ ನಂಟು ಅದೃಷ್ಟ ತಂದೊಡ್ಡಿದೆ. ಉಕ, ಕಕ ಭಾಗದ ರಡ್ಡಿ ಲಿಂಗಾಯತ ನಾಯಕ, ಅನುಭವ, ಭ್ರಷ್ಟಾಚಾರ ರಹಿತ ಆಡಳಿತ, ಅಭಿವೃದ್ಧಿಪರ ವ್ಯಕ್ತಿತ್ವ, ಉತ್ತಮ ವಾಕ್ಚಾತುರ್ಯ ಸಚಿವಗಿರಿಗೆ ಪ್ಲಸ್ ಪಾಯಿಂಟ್ ಆಗಿವೆ. ಮಾಜಿ ಸಿಎಂ ಸಿದ್ದರಾಮಯ್ಯ ರಾಯರಡ್ಡಿ ಬೆನ್ನಿಗೆ ನಿಂತ ಕಾರಣ ಮೂರನೇ ಅವಧಿಗೆ ಮಂತ್ರಿಯಾಗಿದ್ದಾರೆ.

ಅಧಿಕಾರ ಹಂಚಿಕೆ ಚರ್ಚೆ ಬಂದಾಗಲೆಲ್ಲ ಸಿದ್ದರಾಮಯ್ಯ ಪೂರ್ಣ ಅವಧಿ ಮುಗಿಸುವರು, ಅವರು ಬದಲಾದರೆ ಮಲ್ಲಿಕಾರ್ಜುನ ರ್ಖಗೆಗೆ ಮಾತ್ರ ಸಿಎಂ ಆಗುವ ಅರ್ಹತೆ ಇದೆ ಎಂದೆಲ್ಲ ಹೇಳಿಕೆ ನೀಡಿ ಡಿಕೆಶಿ ಕೆಂಗಣ್ಣಿಗೆ ಗುರಿಯಾಗಿದ್ದರು. ಹಿರಿತನ, ಸಿದ್ದರಾಮಯ್ಯಪರ ಒಲವು ಸಚಿವರಾಗಲು ಅಡ್ಡಿಯಾಗಲಿವೆ ಎಂದೇ ವಿಶ್ಲೇಷಣೆಗಳು ಕೇಳಿ ಬಂದಿದ್ದವು. ಕಕ ಭಾಗದಲ್ಲಿ ರಡ್ಡಿ ಲಿಂಗಾಯತರ ಪೈಕಿ ಇತರರು ಮಂತ್ರಿ ಆಗದಿರುವದೂ ರಾಯರಡ್ಡಿಗೆ ವರವಾಗಿದೆ.

ರಾಜಕೀಯ ಇತಿಹಾಸ :

ರಾಯರಡ್ಡಿ ಕೊಪ್ಪಳ ಜಿಲ್ಲೆ, ಕುಕನೂರು ತಾಲೂಕಿನ ತಳಕಲ್ ಗ್ರಾಮದವರು. 1985ರಲ್ಲಿ ಮೊದಲ ಬಾರಿ ವಿಧಾನಸಭೆ ಪ್ರವೇಶಿಸಿದರು. ಈವರೆಗೆ ಆರು ಬಾರಿ ಶಾಸಕರಾಗಿ ಆಯ್ಕೆಯಾಗಿದ್ದಾರೆ. 1996-98ದಲ್ಲಿ ಲೋಕಸಭೆ ಸದಸ್ಯರಾಗಿದ್ದರು. ದೆಹಲಿ ವಿಶೇಷ ಪ್ರತಿನಿಧಿ, ವಿರೋಧ ಪಕ್ಷ ಮುಖ್ಯ ಸಚೇತಕರಾಗಿ ಸೇವೆ ಸಲ್ಲಿಸಿದ್ದಾರೆ. 2013-18ರ ಸಿದ್ದರಾಮಯ್ಯ ಸರ್ಕಾರದ ಕೊನೇ ವರ್ಷದಲ್ಲಿ ಉನ್ನತ ಶಿಕ್ಷಣ ಸಚಿವರಾಗಿದ್ದರು. ಅದಕ್ಕೂ ಮೊದಲು ವೀರಪ್ಪ ಮೊಯ್ಲಿ ಸರ್ಕಾರದಲ್ಲಿ ವಸತಿ ಖಾತೆ ರಾಜ್ಯ ಸಚಿವರಾಗಿದ್ದರು. 2023ರಿಂದ ಸಿದ್ದರಾಮಯ್ಯ ಸಿಎಂ ಆಗಿದ್ದ ಅವಧಿಯಲ್ಲಿ ಆರ್ಥಿಕ ಸಲಹೆಗಾರರಾಗಿ ಗಮನ ಸೆಳೆದಿದ್ದಾರೆ.

ಅದೃಷ್ಟದ ಓಟ ಮುಂದುವರೆಸಿದ ತಂಗಡಗಿ

ರಾಜ್ಯ ರಾಜಕಾರಣದಲ್ಲಿ ಅದೃಷ್ಟವಂತ ರಾಜಕಾರಣಿ ಎಂದು ಗುರುತಿಸಿಕೊಂಡಿರುವ ಕನಕಗಿರಿ ಕ್ಷೇತ್ರದ ಶಾಸಕ ಶಿವರಾಜ ತಂಗಡಗಿ ಈ ಬಾರಿಯೂ ಸಂಪುಟದಲ್ಲಿ ಸ್ಥಾನ ಪಡೆದು ಎಲ್ಲರ ಹುಬ್ಬೇರುವಂತೆ ಮಾಡಿದ್ದಾರೆ. ಪರಿಶಿಷ್ಟ ಜಾತಿ ಸ್ಪ-ೃಶ್ಯ ವಿಭಾಗ ಹಾಗೂ ಭೋವಿ ಸಮುದಾಯ ಕೋಟಾಗಳೇ ತಂಗಡಗಿಗೆ ಶ್ರೀರೆ. ಮಾಜಿ ಸಿಎಂ ಸಿದ್ದರಾಮಯ್ಯ, ಹಾಲಿ ಸಿಎಂ ಡಿ.ಕೆ.ಶಿವಕುಮಾರ್ ಅವರೊಂದಿಗೆ ಉತ್ತಮ ಬಾಂಧವ್ಯ, ಸಮುದಾಯ, ಪ್ರದೇಶವಾರು ಆದ್ಯತೆಗಳನುಸಾರ ಮಂತ್ರಿಭಾಗ್ಯ ಒಲಿದಿದೆ.

ಸಮುದಾಯ ಶ್ರೀಗಳ ವಿರೋಧ, ಭೋವಿ ಸಮುದಾಯದ ಇತರರಿಗೆ ಅವಕಾಶ ದೊರೆಯಲಿ ಎಂಬ ವಾದ, ಮಂತ್ರಿ ಆದವರಿಗೆ ಮತ್ತೆ ಅವಕಾಶವಿಲ್ಲವೆಂಬ ಚರ್ಚೆಗಳು ತಂಗಡಗಿ ಹಾದಿಗೆ ಅಡ್ಡಿಯಾಗಿದ್ದವು. ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ರ್ಖಗೆ ಕೃಪೆ ಬಲವಾಗಿ ಕೆಲಸ ಮಾಡಿದ್ದು, ತಮ್ಮ ಅದೃಷ್ಟದ ಓಟ ಮುಂದುವರೆಸಿದ್ದಾರೆ.

ರಾಜಕೀಯ ಇತಿಹಾಸ : ಕ್ಷೇತ್ರ ಮರು ವಿಂಗಡೆ ಬಳಿಕ ಕೊಪ್ಪಳ ಜಿಲ್ಲೆಯ ಕನಕಗಿರಿ ವಿಧಾನಸಭಾ ಕ್ಷೇತ್ರದಿಂದ 2008ರಲ್ಲಿ ಪಕ್ಷೇತರರಾಗಿ ಸ್ಪರ್ಧಿಸಿ ಮೊದಲ ಬಾರಿ ಶಾಸಕರಾಗಿ ಜಯಗಳಿಸಿದರು. ಬಳಿಕ 2013ರಲ್ಲಿ ಮರು ಆಯ್ಕೆಯಾದರು. 2018ರ ಚುನಾವಣೆಯಲ್ಲಿ ಸೋತಿದ್ದಾರೆ. 2023ರಲ್ಲಿ ಮತ್ತೆ ಆಯ್ಕೆಯಾಗಿದ್ದಾರೆ. ಗೆದ್ದಾಗಲೊಮ್ಮೆ ಸಚಿವರಾಗುವ ಮೂಲಕ ಅದೃಷ್ಟವಂತರು ಎನಿಸಿಕೊಂಡಿರುವುದು ವಿಶೇಷ. ಆದರೆ, ಈವರೆಗೆ ಒಮ್ಮೆಯೂ ಪೂರ್ಣಾವಧಿ ಸಚಿವರಾಗಿ ಮುಂದುವರೆದಿರಲಿಲ್ಲ. ಈ ಬಾರಿ ಸಿದ್ದರಾಮಯ್ಯ ಅವಧಿಯಲ್ಲಿ ಮೂರು ಖಾತೆಗಳನ್ನು ನಿಭಾಯಿಸಿದ್ದರು, ಇದೀಗ ಸಿಎಂ ಡಿಕೆಶಿ ಸಂಪುಟದಲ್ಲಿ ಸ್ಥಾನ ಗಿಟ್ಟಿಸಿ ಐದು ವರ್ಷ ಸಚಿವರಾಗುವ ವಿಶ್ವಾಸದಲ್ಲಿದ್ದಾರೆ.

ಸಚಿವಗಿರಿ ಅನುಭವಿಸಿದವರು

1999ರಲ್ಲಿ ಕನಕಗಿರಿ ಕ್ಷೇತ್ರದ ಶಾಸಕರಾಗಿದ್ದ ನಾಗಪ್ಪ ಸಾಲೋಣಿ ಕಂದಾಯ ಸಚಿವರಾಗುವ ಮೂಲಕ ಜಿಲ್ಲೆಯ ಮೊದಲ ಸಚಿವರಾಗಿ ಇತಿಹಾಸ ದಾಖಲಿಸಿದರು. ಯಲಬುರ್ಗಾ ಕ್ಷೇತ್ರದ ಬಸವರಾಜ ರಾಯರಡ್ಡಿ ಸಹ ಎರಡು ಬಾರಿ ಸಚಿವರಾಗಿದ್ದು, ಇದೀಗ ಮೂರನೇ ಬಾರಿ ಅದೃಷ್ಟ ಗಿಟ್ಟಿಸಿಕೊಂಡಿದ್ದಾರೆ. 2008ರಲ್ಲಿ ಕ್ಷೇತ್ರ ಮರು ವಿಂಗಡಣೆ ಬಳಿಕ ಇಳಕಲ್ನಿಂದ ಕನಕಗಿರಿಗೆ ವಲಸೆ ಬಂದ ಶಿವರಾಜ ತಂಗಡಗಿ ಗೆದ್ದಾಗಲೊಮ್ಮೆ ಸಚಿವರಾಗಿದ್ದಾರೆ. ಇದೀಗ ನಾಲ್ಕನೆ ಬಾರಿಗೂ ಅದೃಷ್ಟ ಕೈ ಹಿಡಿದಿದೆ. ಗಂಗಾವತಿಯಲ್ಲಿ ಜೆಡಿಎಸ್ನಿಂದ ಗೆದ್ದಿದ್ದ ಇಕ್ಬಾಲ್ ಅನ್ಸಾರಿ ಸಹ ಸಚಿವಗಿರಿ ಅನುಭವಿಸಿದ್ದಾರೆ. 2018ರಲ್ಲಿ ಯಲಬುರ್ಗಾದಿಂದ ಗೆದ್ದಿದ್ದ ಹಾಲಪ್ಪ ಆಚಾರ್ ಸಹ ಸಚಿವರಾಗಿ ಅಧಿಕಾರ ಮುಗಿಸಿದ್ದಾರೆ.

ಜಿಲ್ಲಾ ಕೇಂದ್ರ ಕ್ಷೇತ್ರಕ್ಕಿಲ್ಲ ಅದೃಷ್ಟ

ಕೊಪ್ಪಳ ಸ್ವತಂತ್ರ ಜಿಲ್ಲೆಯಾಗಿ ಮೂರು ದಶಕ ಕಳೆಯುತ್ತಿವೆ. ಈವರೆಗೂ ಕೊಪ್ಪಳ ಕ್ಷೇತ್ರದಿಂದ ಗೆದ್ದವರಿಗೆ ಮಂತ್ರಿ ಭಾಗ್ಯ ಒಲಿಯದಿರುವುದು ವಿಶೇಷ. 1985ರಲ್ಲಿ ಕೊಪ್ಪಳ ಶಾಸಕರಾಗಿದ್ದ ವಿರೂಪಾಕ್ಷಪ್ಪ ಅಗಡಿ ಎಸ್.ಆರ್.ಬೊಮ್ಮಾಯಿ ಸರ್ಕಾರದಲ್ಲಿ ಸಚಿವರಾಗಿ ಪ್ರಮಾಣವಚನ ಪಡೆದಿದ್ದರು. ವಾರದೊಳಗೆ ಸರ್ಕಾರ ಪತನವಾಗಿ ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ ಎಂಬಂತಾಗಿತ್ತು. ಕೊಪ್ಪಳ ಶಾಸಕ ರಾವೇಂದ್ರ ಹಿಟ್ನಾಳ 2013ರಿಂದ ಸತತ ಮೂರನೇ ಬಾರಿ ಗೆದ್ದಿದ್ದರೂ ಸಚಿವರಾಗಿಲ್ಲ. ಹೀಗಾಗಿ ಜಿಲ್ಲಾ ಕೇಂದ್ರದವರಿಗೆ ಮಂತ್ರಿಗಿರಿ ಭಾಗ್ಯ ಡಿಕೆಶಿ ಅವಧಿಯಲ್ಲೂ ದೊರೆಯಲಿಲ್ಲ.

ಹಿಟ್ನಾಳ ಬೆಂಬಲಿಗರಿಂದ ಪ್ರತಿಭಟನೆ

ಹ್ಯಾಟ್ರಿಕ್ ಗೆಲುವಿನ ಸರದಾರ, ಕುರುಬ ಸಮುದಾಯ ನಾಯಕನಾಗಿರುವ ಶಾಸಕ ರಾವೇಂದ್ರ ಹಿಟ್ನಾಳ ಹೆಸರು ಸಚಿವರ ಪಟ್ಟಿಯಲ್ಲಿ ಇಲ್ಲದಿದ್ದಕ್ಕೆ ಬೇಸರಗೊಂಡ ಹಿಟ್ನಾಳ ಬೆಂಬಲಿಗರು ಸೋಮವಾರ ಅಶೋಕ ವೃತ್ತದಲ್ಲಿ ಟೈರ್ಗೆ ಬೆಂಕಿಹಚ್ಚಿ ಆಕ್ರೋಶ ವ್ಯಕ್ತಪಡಿಸಿದರು.

ಮೂರು ಅವಧಿಗೆ ಸತತ ಗೆಲುವು ದಾಖಲಿಸಿದ್ದಾರೆ. ಹಿಂದುಳಿದ ವರ್ಗದ ಕುರುಬ ಸಮುದಾಯದ ನಾಯಕರಾಗಿದ್ದಾರೆ. ಜಿಲ್ಲಾ ಕೇಂದ್ರ ಕೊಪ್ಪಳದ ಶಾಸಕರು ಈವರೆಗೂ ಮಂತ್ರಿ ಆಗಿಲ್ಲ. ಹೀಗಾದರೇ ಕ್ಷೇತ್ರ ಅಭಿವೃದ್ಧಿ ಯಾವಾಗ, ಈ ಬಾರಿ ಅವಕಾಶ ಕಲ್ಪಿಸಬೇಕಿತ್ತು. ಆದರೆ, ಎಐಸಿಸಿ ಹಿಟ್ನಾಳಗೆ ಮಣೆ ಹಾಕದಿರುವುದು ನಿಷ್ಠಾವಂತ ಕಾರ್ಯಕರ್ತರಿಗೆ ನೋವು ತಂದಿದೆ ಎಂದು ದಿಕ್ಕಾರ ಕೂಗಿದರು.