ಕೊಪ್ಪಳದಲ್ಲಿ ಸಿರಿಧಾನ್ಯ ಜಾಗೃತಿ ಜಾಥಾ

ಕೊಪ್ಪಳ: ನಮ್ಮದು ಕೃಷಿ ಪ್ರಧಾನ ಜಿಲ್ಲೆ. ರೈತರು ಕೃಷಿ ಬೆಳೆಗಳೊಂದಿಗೆ ಸಿರಿಧಾನ್ಯ ಬೆಳೆಯಲು ಮುಂದಾಗಬೇಕೆಂದು ಜಿಲ್ಲಾಧಿಕಾರಿ ಡಾ.ಸುರೇಶ ಬಿ.ಇಟ್ನಾಳ ರೈತರಿಗೆ ಮನವಿ ಮಾಡಿದರು.

ನಗರದ ಗವಿಸಿದ್ಧೇಶ್ವರ ಮಠದ ಆವರಣದಲ್ಲಿ ಕೃಷಿ ಇಲಾಖೆಯಿಂದ ಗುರುವಾರ ಹಮ್ಮಿಕೊಂಡಿದ್ದ ಸಿರಿಧಾನ್ಯ ಮೇಳಕ್ಕೆ ಚಾಲನೆ ನೀಡಿ ಮಾತನಾಡಿದರು.

ರಾಜ್ಯದ ಕೃಷಿ ಉತ್ಪಾದನೆಯಲ್ಲಿ ಕೊಪ್ಪಳ ಶೇ.10ರಷ್ಟು ಪಾಲು ನೀಡುತ್ತಿದೆ. ಭತ್ತದ ಕಣಜವೆಂದು ಖ್ಯಾತಿಯಾಗಿದೆ. ಕೇವಲ ಭತ್ತಕ್ಕೆ ಆದ್ಯತೆ ನೀಡದಿರಿ. ಕೃಷಿ, ಸಿರಿಧಾನ್ಯಗಳನ್ನು ಬೆಳೆಯಲು ಮುಂದಾಗಬೇಕು. ಸಿರಿಧಾನ್ಯ ಬೆಳೆವವರು ಬಡವರೆಂಬ ಮಾತು ಇತ್ತು. ಇಂದು ಅವರೇ ಶ್ರೀಮಂತರು. ರಾಗಿ, ಬರಗು, ಹರಕಕ್ಕೆ ಇತರೆಲ್ಲ ಕೃಷಿ ಬೆಳೆಗಳಿಗಿಂತ ಅಧಿಕ ಬೆಲೆ ಇದೆ. ಸಿರಿಧಾನ್ಯಗಳ ಸೇವನೆ ಆರೋಗ್ಯಕ್ಕೆ ತುಂಬಾ ಅನುಕೂಲಕರ. ಆರೋಗ್ಯವೂ ಸ್ಥಿರವಾಗಿರುತ್ತದೆ. ಕೊಪ್ಪಳದಲ್ಲಿ ಆರು ಸಾವಿರ ಹೆಕ್ಟೇರ್​ನಲ್ಲಿ ಸಿರಿಧಾನ್ಯ ಬೆಳೆಯಲಾಗುತ್ತಿದೆ. ಇನ್ನಷ್ಟು ವಿಸ್ತರಿಸಬೇಕಿದೆ. ಜತೆಗೆ ಸಾವಯವ ಕೃಷಿಗೂ ಆದ್ಯತೆ ನೀಡೋಣ ಎಂದರು.

ಆಹಾರ ಮೌಲ್ಯವರ್ಧನೆಗೆ ಪಿಎಂಎ್​ಎಂಇ ಯೋಜನೆ ನೆರವಾಗುತ್ತಿದೆ. ಜೋಳ ಸಂಸ್ಕರಿಸಿ ಆಕರ್ಷಕವಾಗಿ ಪ್ಯಾಕ್​ ಮಾಡಿ ಬ್ರಾಂಡಿಂಗ್​ ಮಾಡಿ ಮಾರುಕಟ್ಟೆಗೆ ಬಿಡುಗಡೆ ಮಾಡಬಹುದು. ಯೋಜನೆ ತಾಂತ್ರಿಕ ತರಬೇತಿಗೆ ಶೇ.50ರಷ್ಟು ಸಹಾಯಧನ ಲಭ್ಯವಿದೆ. ರೈತರು ಯೋಜನೆ ಸದುಪಯೋಗಪಡೆದುಕೊಳ್ಳಿ. ಆದಾಯ ವೃದ್ಧಿಸಿಕೊಂಡು ಕೃಷಿಯನ್ನು ಲಾಭದಾಯಕವಾಗಿಸಿಕೊಳ್ಳಿ ಎಂದು ಸಲಹೆ ನೀಡಿದರು.

ಜಂಟಿ ಕೃಷಿ ನಿರ್ದೇಶಕ ಜಿ.ಡಿ.ಕೃಷ್ಣಮೂರ್ತಿ ಮಾತನಾಡಿ, ಇದೇ ತಿಂಗಳಲ್ಲಿ ಜಿಲ್ಲಾ ಮಟ್ಟದ ಸಿರಿಧಾನ್ಯ ಮೇಳ ಆಯೋಜಿಸಲಾಗುವುದು. ರೈತರು ಮತ್ತು ಸಾರ್ವಜನಿಕರಲ್ಲಿ ಬೆಳೆ ಉತ್ಪಾದನೆ ನಂತರ ಸಂಸ್ಕರಣೆ, ಮೌಲ್ಯವರ್ಧನೆ ಮೂಲಕ ಆದಾಯ ಹೆಚ್ಚಿಸುವ ಕ್ರಮಗಳು ಹಾಗೂ ಸಿರಿಧಾನ್ಯಗಳ ಬಗ್ಗೆ ಹೆಚ್ಚಿನ ಜಾಗೃತಿ ಮೂಡಿಸುವ ಗುರಿ ಹೊಂದಲಾಗಿದೆ ಎಂದು ತಿಳಿಸಿದರು.

ಪ್ರಜಾಪಿತ ಬ್ರಹ್ಮಕುಮಾರಿ ಈಶ್ವರಿವಿವಿಯ ಅಕ್ಕ ಯೋಗಿನಿ ಮಾತನಾಡಿ, ಸಿರಿಧಾನ್ಯಗಳಿಂದ ಆರೋಗ್ಯ ಸಂಪತ್ತು ವೃದ್ಧಿಯಾಗುವುದು. ಔಷಧಮುಕ್ತ ಜೀವನ ಸಾಗಿಸಲು ನೆರವಾಗುವುದೆಂದರು.

ಇಟಗಿ ಡಾ.ಗುರುಶಾಂತವೀರ ಶಿವಾಚಾರ್ಯ ಸ್ವಾಮೀಜಿ ಮಾತನಾಡಿದರು. ಜಿಪಂ ಸಿಇಒ ವರ್ಣಿತ್​ ನೇಗಿ, ಉಪ ಕೃಷಿ ನಿರ್ದೇಶಕ ಎಲ್​.ಸಿದ್ದೇಶ್ವರ, ಕೃಷಿ ತಂತ್ರಜ್ಞಾನ ಸಂಸ್ಥೆ ಮುಖ್ಯಸ್ಥ ವೀರಣ್ಣ ಕಮತರ್​, ಸಹಾಯಕ ಕೃಷಿ ನಿರ್ದೇಶಕರು, ಕೃಷಿ ವಿಸ್ತರ್ಣ ಶಿಕ್ಷಣ ಕೇಂದ್ರದ ಅಧಿಕಾರಿಗಳು, ಜಿಲ್ಲಾ ಕೃಷಿ ಪರಿಕರ ಮಾರಾಟಗಾರರು ಇತರರಿದ್ದರು.