ಕುಕನೂರು-ಯಲಬುರ್ಗಾ ತಾಲೂಕು ಬರದ ನಾಡೆಂಬ ಹೆಗ್ಗಳಿಕೆ ಇದೆ. ಒಂದೆರಡು ವರ್ಷ ಮುಂಗಾರು ಮಳೆ ರೈತರ ಕೈ ಹಿಡಿದರೆ ಹಿಂಗಾರು ಕೈಕೊಡುತ್ತದೆ. ಈ ಪರಿಸ್ಥಿತಿ ಪ್ರತಿವರ್ಷವೂ ನಡೆಯುತ್ತದೆ. ಯಾವುದೇ ಜಲಮೂಲವಿಲ್ಲದ ಇಲ್ಲಿನ ಕೃಷಿ ಚಟುವಟಿಕೆಗೆ ಬೋರ್‌ವೆಲ್ ನೀರೇ ಆಸರೆಯಾಗಿದೆ.

ಮಸಬಹಂಚಿನಾಳ ಹಾಗೂ ಬೆಣಕಲ್ ಗ್ರಾಮಗಳ ಹಳ್ಳಕ್ಕೆ 3 ಕೋಟಿ ರೂ. ವೆಚ್ಚದಲ್ಲಿ 6 ವರ್ಷಗಳ ಹಿಂದೆಯೇ ಬ್ರಿಡ್ಜ್ ಕಂ ಬ್ಯಾರೇಜ್ ನಿರ್ಮಾಣ ಮಾಡಲಾಗಿದೆ. ಆದರೆ, ಇದುವರೆಗೂ ನೀರು ಸಂಗ್ರಹಣೆಗೆ ಆಧಾರವಾದ ಗೇಟ್‌ಗಳನ್ನು ಅಳವಡಿಸಿಲ್ಲ. ಹಿಂದಿನ ಬಿಜೆಪಿ ಸರ್ಕಾರದ ಅವಧಿಯಲ್ಲಿ ಮಾಜಿ ಸಚಿವ ಹಾಲಪ್ಪ ಆಚಾರ್ ಅವರು ಅಂತರ್ಜಲ ಹೆಚ್ಚಳದ ಉದ್ದೇಶದಿಂದ ಯೋಜನೆ ತರುವ ಕಾರ್ಯ ಮಾಡಿದ್ದು, ಅದು ಅಲ್ಲಿಗೇ ನಿಂತಿದೆ.

ಇನ್ನೂ ಬರದ ನಾಡಿಗೆ ಗಂಗೆ ತರುತ್ತೇವೆಂಬ ರಾಜಕಾರಣಿಗಳ ಭರವಸೆ ಭಾಷಣಕ್ಕಷ್ಟೇ ಸೀಮಿತವಾಗಿದೆ. ಇತ್ತೀಚೆಗೆ ಮುಂದಿನ ದಿನಗಳಲ್ಲಿ ಬರದ ನಾಡು ನೀರಾವರಿಯಾಗಲಿದ್ದು ಯಾವ ರೈತರೂ ಸೋಲಾರ್, ವಿದ್ಯುತ್ ಉತ್ಪಾದನೆಯಂತಹ ಕಾಮಗಾರಿಗಳಿಗೆ ಜಮೀನು ಮಾರ ಬಾರದೆಂಬ ಹೇಳಿಕೆ ಜೋರಾಗಿದೆ. ಆದರೆ ಇರುವ ಬ್ರಿಡ್ಜ್ ಕಂ ಬ್ಯಾರೇಜ್‌ನಲ್ಲಿ ನೀರು ಸಂಗ್ರಹಿಸುವ ಕೆಲಸ ಮಾತ್ರ ಮಾಡುತ್ತಿಲ್ಲ.

ಬ್ರಿಡ್ಜ್ ಕಂ ಬ್ಯಾರೇಜ್‌ಗೆ ಅಳವಡಿಸಲೆಂದು ತರಿಸಿರುವ ಗೇಟ್‌ಗಳು ಗ್ರಾಪಂ ಆವರಣದಲ್ಲೇ ತುಕ್ಕು ಹಿಡಿಯುತ್ತಿವೆ. ಹೀಗಾಗಿ ಬ್ಯಾರೇಜ್‌ಗೆ ಬರುವ ನೀರೆಲ್ಲ ಹರಿದು ಹೋಗುತ್ತಿದೆ. ಇನ್ನು ಬ್ಯಾರೇಜ್‌ಗೆ ಹೊಂದಿಕೊಂಡು ಜಮೀನುಗಳಿದ್ದು, ಇಲ್ಲಿ ನೀರು ಸಂಗ್ರಹವಾದರೆ ಹೊಲಗಳಿಗೆ ನೀರು ನುಗ್ಗುತ್ತದೆ ಎಂಬ ಕಾರಣ ಗೇಟ್ ಅಳವಡಿಸಿಲ್ಲವೆಂಬ ಮಾತುಗಳು ಕೇಳಿ ಬರುತ್ತಿವೆ. ಹೀಗಾಗಿ ರೈತರ ಜಮೀನಿಗೆ ತಡೆಗೋಟೆ ನಿರ್ಮಿಸಿ ಬ್ಯಾರೇಜ್‌ಗೆ ಗೇಟ್ ಅಳವಡಿಸಲು ಸಣ್ಣ ನೀರಾವರಿ ಇಲಾಖೆ ಅಧಿಕಾರಿಗಳು ಮುಂದಾಗಬೇಕೆಂಬುದು ಕೃಷಿಕರ ಒತ್ತಾಯವಾಗಿದೆ.