ಹುಲಿಕೆರೆಯಲ್ಲಿ ಅಕ್ರಮ ರಸ್ತೆ ನಿರ್ಮಾಣ

88 ಎಕರೆ ವಿಸ್ತಾರ ಹೊಂದಿದ ಕೆರೆ ನೂರಾರು ವರ್ಷಗಳ ಇತಿಹಾಸ ಹೊಂದಿದೆ. ಕೊಪ್ಪಳ ಕೋಟೆಗೆ ಹೊಂದಿಕೊಂಡಿದ್ದು, ಪ್ರಾಕೃತಿಕ ಸೌಂದರ್ಯ ಹೊಂದಿದೆ. ನಿರ್ವಹಣೆ ಕೊರತೆ ಕಾರಣ ವರ್ಷದಿಂದ ವರ್ಷಕ್ಕೆ ಅತಿಕ್ರಮವಾಗುತ್ತಿದೆ. ಬಲದಂಡೆ ಭಾಗದಲ್ಲಿ ಶಿವರಾತ್ರೇಶ್ವರ ದೇವಾಲಯವಿದೆ. ಹಿಂಭಾಗದಲ್ಲಿ ಮಸೀದಿ ಮಾಡಲಾಗಿದೆ. ದಾರಿ ಮಾಡುವ ಉದ್ದೇಶದಿಂದ ಕೆರೆ ಕೋಡಿ ಬಗೆದು ತುಂಬಿದ್ದ ಕೆರೆ ನೀರು ಖಾಲಿ ಮಾಡಲಾಗಿದೆ. ಬೇಸಿಗೆ ಸಮೀಪಿಸಿದ್ದು, ಈ ಹಂತದಲ್ಲಿ ಕೆರೆ ನೀರು ಬರಿದಾಗಿಸಲಾಗಿದೆ. ಬಳಿಕ ಶಿವರಾತ್ರೇಶ್ವರ ದೇವಾಲಯಕ್ಕೆ ಹೊಂದಿಕೊಂಡು ಕೆರೆ ಮಧ್ಯ ಭಾಗದಲ್ಲಿ 15 ಅಡಿ ಅಗಲದ ರಸ್ತೆ ನಿರ್ಮಿಸಲಾಗಿದೆ. ಈ ಬಗ್ಗೆ ನಗರಸಭೆ, ಜಿಲ್ಲಾಧಿಕಾರಿಗಳಿಗೂ ಮಾಹಿತಿ ನೀಡಿಲ್ಲವೆಂದು ವಿಪ ಸದಸ್ಯೆ ಹೇಮಲತಾ ನಾಯಕ, ಬಿಜೆಪಿ ರಾಜ್ಯಕಾರ್ಯಕಾರಣಿ ಸದಸ್ಯ ಡಾ.ಬಸವರಾಜ ಕ್ಯಾವಟರ್​ ಆಕ್ರೋಶ ವ್ಯಕ್ತಪಡಿಸಿದರು.

ಪ್ರತಿಭಟನೆ ವಿಷಯ ತಿಳಿಯುತ್ತಲೇ ನಗರಸಭೆ ಪೌರಾಯುಕ್ತ ವೆಂಕಟೇಶ ನಾಗನೂರ, ನಗರಠಾಣೆ ಪಿಐ ಜಯಪ್ರಕಾಶ, ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಅಧಿಕಾರಿಗಳು ಸ್ಥಳಕ್ಕೆ ಧಾವಿಸಿದರು. ಸಂಸದ ರಾಜಶೇಖರ ಹಿಟ್ನಾಳ ಕರೆ ಮಾಡಿ ವಿಪ ಸದಸ್ಯೆ ಜತೆ ಮಾತನಾಡಿ ಸಮಾಧಾನಿಸಲು ಯತ್ನಿಸಿದರು. ದೇವಾಲಯ ಸಮಿತಿ ಹಾಗೂ ದರ್ಗಾ ಸಮಿತಿಯವರೊಂದಿಗೆ ಮಾತುಕತೆ ನಡೆಸಿ ರಸ್ತೆ ನಿರ್ಮಾಣಕ್ಕೆ ಸೂಚಿಸಿದ್ದಾಗಿ ಹೇಳಿದರು. ಕೆರೆ ಅಭಿವೃದ್ಧಿ ನಿಯಮಗಳು ಗೊತ್ತಿಲ್ಲವಾ ಎಂದು ಹೇಮಲತಾ ಕೆಂಡವಾದರು. ಹಾಗಿದ್ದಲ್ಲಿ ಸರ್ವೇ ಮಾಡಿಸಿ ಅತಿಕ್ರಮಣ ತೆರವು ಮಾಡಿ ಎಂದು ಸಂಸದರು ನಗರಸಭೆ ಅಧಿಕಾರಿಗಳಿಗೆ ಸೂಚಿಸಿದರು.

ಪ್ರಮುಖರಾದ ಗಣೇಶ ಹೊರತಟ್ನಾಳ, ಸೋಮಣ್ಣ ಹಳ್ಳಿ, ಮಹೇಶ ಅಂಗಡಿ, ಮಂಜುನಾಥ, ದೇವರಾಜ ಹಾಲಸಮುದ್ರ ಇತರರಿದ್ದರು.

ನಗರಾಭಿವೃದ್ಧಿ ಪ್ರಾಧಿಕಾರದಿಂದ ಹುಲಿಕೆರೆ ಅಭಿವೃದ್ಧಿಗೆ ಯೋಜನೆ ರೂಪಿಸಿದೆ. ಟೆಂಡರ್​ ಹಂತದವರೆಗೆ ಪ್ರಕ್ರಿಯೆ ನಡೆದಿವೆ. ಹೀಗಿದ್ದರೂ ಕೆರೆ ಭಾಗದಲ್ಲಿ ಆಗವು ಬದಲಾವಣೆಗಳ ಬಗ್ಗೆ ನಗರಾಡಳಿತದ ಅಧಿಕಾರಿಗಳಿಗೆ ಮಾಹಿತಿ ಇಲ್ಲದಿರುವುದು ಸೋಜಿಗದ ಸಂಗತಿ. ಶಿವರಾತ್ರೇಶ್ವರ ದೇವಾಲಯ ಕೆರೆಗೆ ಹೊಂದಿಕೊಂಡಿದೆ. ಹಿಂಭಾಗದಲ್ಲಿ ಮಸೀದಿ ಕೆರೆಯಂಗಳದಲ್ಲಿದೆ. ಅಸಲಿಗೆ ಕೆರೆ ವಿಸ್ತಾರ ಎಷ್ಟು ? ಎಂಬುದು ಗೊತ್ತಿಲ್ಲ. ದಾಖಲೆಗಳಲ್ಲಿ 88 ಎಕರೆ ಎಂದಿದ್ದು, ಎಲ್ಲೆಲ್ಲಿ ಒತ್ತುವರಿಯಾಗಿದೆ ಅದನ್ನು ಸರ್ವೇ ಮಾಡಬೇಕು ಎಂದು ಪೌರಾಯುಕ್ತ ವೆಂಕಟೇಶ ನಾಗನೂರ ತಿಳಿಸಿದರು. ಸದ್ಯಕ್ಕೆ ರಸ್ತೆಗಾಗಿ ಹಾಕಿದ ಮರಂ ತೆರವು ಕಾರ್ಯಾಚರಣೆ ಆರಂಭವಾಗಿದ್ದು ಮುಂದೇನಾಗುವುದೆಂದು ಪ್ರಶ್ನೆ ಮೂಡಿಸಿದೆ.

ಟನೆ ಸಂಬಂಧ ಯಾವ ಅಧಿಕಾರಿಗಳಿಗೂ ಮಾಹಿತಿ ನೀಡದೇ, ಏಕ ಪಯವಾಗಿ ನಿರ್ಧಾರ ತೆಗೆದುಕೊಳ್ಳಲು ಅಧಿಕಾರ ನೀಡಿದವರು ಯಾರೆಂದು ವಿಪ ಸದಸ್ಯೆ ಹೇಮಲತಾ ಸಂಸದರ ಮೇಲೆ ಗರಂ ಆದರು. ಉಭಯ ಧರ್ಮದ ಕಮೀಟಿ ಜತೆ ಮಾತುಕತೆ ಮಾಡಲಾಗಿದೆ. ಅಧಿಕಾರಿಗಳಿಗೂ ಈ ಬಗ್ಗೆ ಮಾಹಿತಿ ನೀಡಿದ್ದೇವೆಂದು ಸಂಸದರ ಸಮಜಾಯಿಷಿ ನೀಡಿದರು. ಬಳಿಕ ಸರ್ವೇ ಮಾಡಿಸಿ, ಎಷ್ಟೇ ಅತಿಕ್ರಮಣ ಆಗಿದ್ದರೂ, ಯಾರೇ ಮಾಡಿದ್ದರೂ ತೆರವು ಮಾಡಿ ಎಂದು ಖಡಕ್​ ಆಗಿ ತಾಕೀತು ಮಾಡಿದರು.

ಕೊಪ್ಪಳದ ಹುಲಿಕೆರೆ ಅತಿಕ್ರಮ ಖಂಡಿಸಿ ಬಿಜೆಪಿ ನಾಯಕರು ಶನಿವಾರ ಕಾಮಗಾರಿ ತಡೆದು ಪ್ರತಿಭಟನೆ ನಡೆಸಿದರು. ವಿಪ ಸದಸ್ಯೆ ಹೇಮಲತಾ ನಾಯಕ, ಬಿಜೆಪಿ ರಾಜ್ಯಕಾರ್ಯಕಾರಣಿ ಸದಸ್ಯ ಡಾ.ಬಸವರಾಜ ಕ್ಯಾವಟರ್​, ಗಣೇಶ ಹೊರತಟ್ನಾಳ, ಸೋಮಣ್ಣ ಹಳ್ಳಿ, ಮಹೇಶ ಅಂಗಡಿ ಇದ್ದರು.