ಪೂಜೆ ವಿಚಾರದಲ್ಲಿ ಶ್ರೀ ಹನುಮತ್ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್ ಪೀಠಾಧಿಪತಿ ಗೋವಿಂದಾನಂದ ಸರಸ್ವತಿ ಸ್ವಾಮೀಜಿ ಮತ್ತು ಅರ್ಚಕ ವಿದ್ಯಾದಾಸ ಬಾಬಾ ನಡುವೆ ಜಟಾಪಟಿ ನಡೆದಿದ್ದು, ಭಕ್ತರ ಸಮ್ಮುಖದಲ್ಲಿ ಕೈ ಕೈ ಮಿಸಲಾಯಿಸುವ ಹಂತಕ್ಕೆ ತಲುಪಿತ್ತು. ಇಬ್ಬರೂ ಜಗಳವಾಡುತ್ತಿರುವ ವಿಡಿಯೋ ವೈರಲ್ ಆಗಿತ್ತು. ಗೋವಿಂದಾನಂದ ಸರಸ್ವತಿ ಸ್ವಾಮೀಜಿ ನೀಡಿದ ದೂರಿನ ಅನ್ವಯ ವಿದ್ಯಾದಾಸಬಾಬಾ ಮತ್ತು 15 ಜನರ ವಿರುದ್ಧ ಹಲ್ಲೆ, ಜೀವ ಬೆದರಿಕೆ ಪ್ರಕರಣ ದಾಖಲಾಗಿದೆ. 15 ಆರೋಪಿಗಳಲ್ಲಿ ರಾಮಸುಶೀಲ್ ಚತುರ್ವೇದಿ, ರಾಜಬಸಪ್ಪ ಅಚ್ಚಳಿ, ಸುರೇಶ ಆಂಜನೇಯ ಗೊಗಟ್ಟಿ, ರಾಜು ಶ್ರೀನಿವಾಸ, ಮಂಜುನಾಥ ಶ್ರೀನಿವಾಸರನ್ನು ಗುರುತಿಸಿರುವ ಗ್ರಾಮೀಣ ಪೊಲೀಸರು, ಉಳಿದ 10 ಜನರ ಶೋಧಕ್ಕೆ ಮುಂದಾಗಿದ್ದಾರೆ.
