ಭಕ್ತರ ವಸತಿಗೆ ಅಮ್ಮನ ಆಶೀರ್ವಾದ

ನಾಡಿನ ಶಕ್ತಿ ದೇವತೆ ಹುಲಿಗಿಯ ಹುಲಿಗೆಮ್ಮ ದೇವಿ ದೇವಾಲಯದಲ್ಲಿ ಹಂತ ಹಂತವಾಗಿ ಅಭಿವೃದ್ಧಿಗೆ ಪ್ರಾಧಿಕಾರ ಮುಂದಾಗಿದೆ. ಭಕ್ತರಿಗಾಗಿ ಎರಡು ಸುಲಭ್ ಶೌಚಗೃಹ ಹಾಗೂ ವಸತಿ ಸಂಕೀರ್ಣ ಕಾಮಗಾರಿಗೆ ಸರ್ಕಾರ ಅಸ್ತು ಎಂದಿದೆ.

ಲಕ್ಷಾಂತರ ಭಕ್ತರ ಆರಾಧ್ಯ ದೈವವಾದ ಹುಲಿಗೆಮ್ಮ ದೇವಾಲಯ ನಾಡಿನ ಪ್ರಮುಖ ಶಕ್ತಿ ಪೀಠದಲ್ಲಿ ಒಂದು. ಪ್ರತಿ ಮಂಗಳವಾರ, ಶುಕ್ರವಾರ, ಹುಣ್ಣಿಮೆ, ನವರಾತ್ರಿ ಹಾಗೂ ಜಾತ್ರೋತ್ಸವ ಅಂಗವಾಗಿ ಲಕ್ಷಾಂತರ ಭಕ್ತರು ಆಗಮಿಸುತ್ತಾರೆ‌. ಈ ವರ್ಷ ತುಂಗಾರತಿ ನಡೆಸಿದ್ದು ಪ್ರತಿ ವರ್ಷ ಮುಂದುವರಿಸಲು ನಿರ್ಧರಿಸಿದೆ. ನಿರೀಕ್ಷೆ ಮೀರಿ ಜನರು ಆಗಮಿಸಿದ್ದು ವಿಶೇಷ. ವಾರ್ಷಿಕ ಕೋಟ್ಯಂತರ ರೂ. ಹರಿದು ಬರುತ್ತಿದೆ. ಧಾರ್ಮಿಕ ದತ್ತಿ ಇಲಾಖೆಯಡಿ ನಿರ್ವಹಣೆಯಾಗುತ್ತಿದ್ದು, ಅಭಿವೃದ್ಧಿ ದೃಷ್ಟಿಯಿಂದ ಪ್ರತ್ಯೇಕ ಪ್ರಾಧಿಕಾರ ರಚಿಸಲಾಗಿದೆ.

ಬರುವ ಭಕ್ತರಿಗೆ ಶೌಚಗೃಹ, ಕುಡಿವ ನೀರು, ವಸತಿ, ಪಾರ್ಕಿಂಗ್ , ಸ್ನಾನಗೃಹ ಇನ್ನಿತರ ಸೌಲಭ್ಯಗಳ ಕೊರತೆ ಬಹುವಾಗಿ ಕಾಡುತ್ತಿದೆ. ಕನಿಷ್ಠ ಸೌಲಭ್ಯಗಳನ್ನಾದರೂ ಕಲ್ಪಿಸಬೇಕೆಂಬುದು ಭಕ್ತರ ಆಗ್ರಹ. ಯುಜಿಡಿ, ಸ್ನಾನ, ಶೌಚಗೃಹ, ದೇವಾಲಯ ಒಳಾಂಗಣ, ಪ್ರದಕ್ಷಿಣ ಪಥ ಇನ್ನಿತರ ಕಾಮಗಾರಿಗಳ ಯೋಜನೆ ಹಾಕಿಕೊಳ್ಳಲಾಗಿದೆ. ಮಾಸ್ಟರ್ ಪ್ಲ್ಯಾನ್ ರಚಿಸಿದ್ದು ಹಲವು ಹಂತದಲ್ಲಿ ಕಾಮಗಾರಿ ಕೈಗೆತ್ತಿಕೊಳ್ಳಲಾಗುತ್ತಿದೆ.

ಸದ್ಯ 17.80 ಕೋಟಿ ರೂ. ನಲ್ಲಿ ಒಳಚರಂಡಿ, 25.20 ಕೋಟಿ ರೂ. ನಲ್ಲಿ ಕುಡಿವ ನೀರು ಕಾಮಗಾರಿ ಕೈಗೊಳ್ಳಲು ಕ್ರಿಯಾಯೋಜನೆ ಸಿದ್ಧಪಡಿಸಲಾಗಿದೆ. 14.50 ಕೋಟಿ ರೂ.ನಲ್ಲಿ ರಸ್ತೆ ನಿರ್ಮಾಣ, 3.4ಕೋಟಿ ರೂ. ನಲ್ಲಿ ಪುರುಷ ಹಾಗೂ ಮಹಿಳೆಯರಿಗಾಗಿ ಪ್ರತ್ಯೇಕ ಸ್ನಾನ, ಶೌಚಗೃಹ ನಿರ್ಮಾಣಕ್ಕೆ ಯೋಜಿಸಿದ್ದು ಆಡಳಿತಾತತ್ಮಕ ಅನುಮೋದನೆ ದೊರೆಯಬೇಕಿದೆ. 9.99 ಕೋಟಿ ರೂ. ಅನುದಾನದೆಇ ದೇವಾಲಯ ಕಟ್ಟೆ ನಿರ್ಮಾಣಕ್ಕೆ ಸರ್ಕಾರ ಆಡಳಿತಾತ್ಮಕ ಅನುಮೋದನೆ ನೀಡಿದ್ದು ಟೆಂಡರ್ ಪ್ರಕ್ರಿಯೆ ನಡೆದಿದೆ. 9.85 ಕೋಟಿ ರೂ. ಮೊತ್ತದಲ್ಲಿ ಅಮ್ಮ ನಿಲಯ ವಸತಿ ಸಂಕೀರ್ಣದಲ್ಲಿ ಎರಡು ಮತ್ತು ಮೂರನೇ ಮಹಡಿ ನಿರ್ಮಾಣಕ್ಕೆ ಡೆಂಟರ್ ಮುಗಿದಿದ್ದು ಕಾಮಗಾರಿ ಆರಂಭವಾಗಬೇಕಿದೆ.

ಹುಣ್ಣಿಮೆ ಹಾಗೂ ವಿಶೇಷ ದಿನಗಳಲ್ಲಿ ಭಕ್ತರು ಹರಕೆ ತೀರಿಸಲು ಬರುತ್ತಾರೆ. ಈ ವೇಳೆ ಉಳಿದುಕೊಳ್ಳಲು ವಸತಿ ಸೌಲಭ್ಯ ಅವಶ್ಯ. ಸದ್ಯ ವಸತಿ ಅಮುಚ್ಛಯಗಳಿದ್ದು, ಅಗತ್ಯತೆ ಅನುಸಾರ ನೀಡಲಾಗುತ್ತಿದೆ‌. ಹುಲಿಗಿ ಪ್ರಮುಖ ಪ್ರವಾಸಿ ತಾಣವಾಗಿದ್ದು ಶಾಲಾ-ಕಾಲೇಜು ವಿದ್ಯಾರ್ಥಿಗಳು ಹೆಚ್ಚು ಭೇಟಿ ನೀಡುತ್ತಾರೆ. ಈ ಹಿನ್ನೆಲೆಯಲ್ಲಿ ಬೃಹತ್ ಊಟದ ಮೈದಾನ, ಆಧುನಿಕ ಕೊಠಡಿಗಳು, ಸ್ನಾನಗೃಹ ಇನ್ನಿತರ ಸೌಲಭ್ಯಗಳನ್ನಜ ಕಲ್ಪಿಸಲಾಗುತ್ತಿದೆ. ಈಗಿರುವ ಅಮ್ಮ ನಿಲಯದ ಮೇಲ್ಭಾಗದಲ್ಲಿ ಎರಡು ಮಹಡಿಗಳಲ್ಲಿ ಕಟ್ಟಡ ನಿರ್ಮಿಸುತ್ತಿದ್ದು ಒಟ್ಟು 120 ಕೊಠಡಿಗಳನ್ನು ನಿರ್ಮಿಸಲಾಗುತ್ತಿದೆ. ವಿಐಪಿ ಕೊಠಡಿಗಳನ್ನು ಕಟ್ಟುತ್ತಿದ್ದು ಎಲ್ಲ ವರ್ಗದ ಜನರಿಗೆನೆರವಾಗುವಂತೆ ಅನುಷ್ಠಾನಗೊಳಿಸಲಾಗುತ್ತಿದೆ.

ವಸತಿ ಜತೆಗೆ ಶೌಚಗೃಹ ಅಗತ್ಯವಿದ್ದು ಭಕ್ತರ ಅವಶ್ಯಕತೆಗೆ ತಕ್ಕಷ್ಟು ಇಲ್ಲ. ಸಾರ್ವಜನಿಕ ಶೌಚಗೃಹ ಕಲ್ಪಿಸಿದಲ್ಲಿ ನಿರ್ವಹಣೆ ಸಮಸ್ಯೆ ಎದುರಾಗಲಿದೆ. ಹೀಗಾಗಿ ಅಂತಾರಾಷ್ಟ್ರೀಯ ಸಾಮಾಜಿಕ ಸುಲಭ ಶೌಚಗೃಹ ಸಂಘಟನೆಗೆ ವಾರ್ಷಿಕ ನವೀಕರಣ ಶುಲ್ಕ ಪಾವತಿ ಷರತ್ತಿಗೆ ಒಳಪಟ್ಟು ಎರಡು ಶೌಚಗೃಹ ಕಲ್ಪಿಸಲು ಪ್ರಾಧಿಕಾರ ಯೋಜಿಸಿದೆ. ನಿರ್ವಹಣೆ ಸುಲಭವಾಗಲಿದ್ದು, ಸಾರ್ವಜನಿಕರಿಗೂ ಅನುಕೂಲವಾಗಲಿದೆ.

"