ಪರೋಪಕಾರದ ಗುಣಗಳನ್ನು ಅಳವಡಿಸಿಕೊಳ್ಳಿ

ಅಳವಂಡಿ: ಮನುಷ್ಯ ಪರೋಪಕಾರದ ಗುಣಗಳನ್ನು ಅಳವಡಿಸಿಕೊಂಡಾಗ ಮಾತ್ರ ಬದುಕು ಸಾರ್ಥಕವಾಗುತ್ತದೆ ಎಂದು ಲೋಕಾಪುರದ ಮಹಾಂತ ಶ್ರೀಗಳು ಹೇಳಿದರು.

ಬಿಸರಳ್ಳಿ ಗ್ರಾಮದ ಶ್ರೀ ಗವಿಸಿದ್ಧೇಶ್ವರ ಶಾಖಾ ಮಠದಲ್ಲಿ ಲಿಂ. ಶಿವಶಾಂತವೀರ ಸ್ವಾಮೀಜಿ ಹಾಗೂ ಲಿಂ. ಮರಿಶಾಂತವೀರ ಶಿವಯೋಗಿಗಳ ಪುಣ್ಯಸ್ಮರಣೋತ್ಸವ ಅಂಗವಾಗಿ ಆಯೋಜಿಸಿದ್ದ ಶ್ರೀ ಗವಿಸಿದ್ಧೇಶ್ವರ ಪುರಾಣ ಪ್ರವಚನ ಕಾರ್ಯಕ್ರಮದ ಧಾರ್ಮಿಕ ಸಭೆಯಲ್ಲಿ ಮಾತನಾಡಿದರು. ಧರ್ಮ ಎನ್ನುವುದು ಆಚರಣೆ, ಸಂಪ್ರದಾಯಗಳಿಗೆ ಸೀಮಿತವಾಗಬಾರದು. ಧರ್ಮದ ಮೂಲ ಆಶಯವನ್ನು ಅರಿತು ಸತ್ಯ, ಶಾಂತಿ, ದಯೆ, ಕರುಣೆ ಹಾಗೂ ಸಂಸ್ಕಾರ ಅಳವಡಿಸಿಕೊಳ್ಳಬೇಕು. ಗವಿಸಿದ್ಧೇಶ್ವರನ ತತ್ವಾದರ್ಶಗಳು ಸಮಾಜದಲ್ಲಿ ಸದಾಚಾರ, ಸಮಾನತೆ ಹಾಗೂ ಮಾನವೀಯ ಮೌಲ್ಯಗಳನ್ನು ಬೆಳೆಸುವ ಸಂದೇಶವನ್ನು ಸಾರುತ್ತವೆ ಎಂದರು.

ಮೈನಳ್ಳಿ-ಬಿಕನಳ್ಳಿಯ ಸಿದ್ಧೇಶ್ವರ ಸ್ವಾಮೀಜಿ ಮಾತನಾಡಿ, ಪುರಾಣಗಳು ಹಿಂದಿನ ಕಾಲದ ಕಥೆಗಳನ್ನು ತಿಳಿಸುವ ಗ್ರಂಥಗಳಲ್ಲ. ಅವು ಮನುಷ್ಯನ ಬದುಕಿಗೆ ದಾರಿದೀಪವಾಗಿದ್ದು, ಉತ್ತಮ ಸಂಸ್ಕಾರ, ನೈತಿಕ ಮೌಲ್ಯ ಹಾಗೂ ಸತ್ಕಾರ್ಯಗಳ ಮಹತ್ವವನ್ನು ತಿಳಿಸುತ್ತವೆ ಎಂದರು.

ಬಿಸರಳ್ಳಿಯ ಶಿವಶಾಂತವೀರ ಸ್ವಾಮೀಜಿ ಮಾತನಾಡಿ, ಮಕ್ಕಳಿಗೆ ಬಾಲ್ಯದಿಂದಲೇ ಧಾರ್ಮಿಕ ಹಾಗೂ ನೈತಿಕ ಸಂಸ್ಕಾರಗಳನ್ನು ನೀಡಬೇಕು. ಹಿರಿಯರನ್ನು ಗೌರವಿಸುವುದು, ಸತ್ಯದ ಮಾರ್ಗದಲ್ಲಿ ನಡೆಯುವ ಮನೋಭಾವ ಬೆಳೆಸಬೇಕು ಎಂದರು.

ಇಟಗಿಯ ಗುರುಶಾಂತವಿರ ಸ್ವಾಮೀಜಿ, ಗಡ್ಡಿ ಕ್ಷೇತ್ರದ ಸಂಗಮೇಶ ಸ್ವಾಮೀಜಿ, ಅಭಿನವ ನಾಗಭೂಷಣ ದೇಶೀಕರು, ಪ್ರವಚನಕಾರ ಶರಣಬಸವ ಶಾಸ್ತ್ರಿ, ಕಲಾವಿದರಾದ ಮನೋಜಕುಮಾರ, ವೀರೇಶ ಇತರರಿದ್ದರು.