ಕೊಪ್ಪಳ ತಾಲೂಕಿನ 38, ಯಲಬುರ್ಗಾ 20 ಮತ್ತು ಕುಕನೂರು ತಾಲೂಕಿನ 15 ಸೇರಿ 73 ಗ್ರಾಪಂಗಳ 1,212 ಸದಸ್ಯರಿಗೆ ಮತದಾರರು ಮತ ಚಲಾಯಿಸುವ ಮೂಲಕ ಭವಿಷ್ಯ ಬರೆದರು. ಬೆಳಗ್ಗೆ ಚಳಿ ಹೆಚ್ಚಿದ್ದ ಕಾರಣ ಮತದಾರರು ಮತಗಟ್ಟೆಯತ್ತ ತುಸು ತಡವಾಗಿ ಆಗಮಿಸಿದರು. ಬೆಳಗ್ಗೆ 8 ಗಂಟೆ ವೇಳೆಗೆ ಮತಗಟ್ಟೆಗಳು ಮತದಾರರಿಂದ ತುಂಬಿಕೊಂಡವು. ಮತಗಟ್ಟೆಗೆ ಆಗಮಿಸಿದವರಿಗೆ ಥರ್ಮಲ್ ಸ್ಕಾೃನಿಂಗ್ ಮಾಡಿ ಒಳ ಕಳಿಸಲಾಯಿತು. ಕೆಲವೆಡೆ ಮಾಸ್ಕ್ ಧರಿಸದವರಿಗೆ ಮಾಸ್ಕ್ ನೀಡಿ ಒಳ ಕಳಿಸಲಾಯಿತು. ಮೊದ ಮೊದಲು ಅಭ್ಯರ್ಥಿಗಳು ತಮ್ಮ ತಮ್ಮ ವಾರ್ಡ್ನಲ್ಲಿನ ವೃದ್ಧರು, ಅನಾರೋಗ್ಯ ಪೀಡಿತರು, ಅಂಗವಿಕಲರನ್ನು ಕರೆತಂದು ಮತ ಹಾಕಿಸಿದರು. ಮಂಗಳಾಪುರದಲ್ಲಿ 96 ವರ್ಷದ ವೃದ್ಧೆ ಉತ್ಸಾಹದಿಂದ ಮತದಾನ ಮಾಡಿದರು. ಇಲ್ಲಿ ಗಾಲಿಕುರ್ಚಿ ಇಲ್ಲದ ಕಾರಣ ವೃದ್ಧರು, ಅಂಗವಿಕಲರಿಗೆ ಕೊಂಚ ತೊಂದರೆಯಾಯಿತು. ಹಲಗೇರಿ ಗ್ರಾಮದಲ್ಲಿ ಜಿಲ್ಲಾ ಚುನಾವಣಾ ವೀಕ್ಷಕ ಡಾ.ಬಿ.ಷಣ್ಮುಖ ಭೇಟಿ ನೀಡಿ ಮತದಾನ ಪ್ರಕ್ರಿಯೆ ಪರಿಶೀಲಿಸಿದರು.
