ಪುಸ್ತಕ ಖರೀದಿ ಟೆಂಡರ್​ ರದ್ದು

• ವಿಜಯವಾಣಿ ವರದಿ ಪರಿಣಾಮ
  

ಕೊಪ್ಪಳ: ಜಿಲ್ಲೆಯ ಸರ್ಕಾರಿ ಪದವಿ ಕಾಲೇಜು, ಇಂಜಿನಿಯರಿಂಗ್​ ಕಾಲೇಜು ಹಾಗೂ ಡಿಪ್ಲೋಮಾ ಕಾಲೇಜುಗಳಿಗೆ ಪಠ್ಯ ಪುಸ್ತಕ ಪೂರೈಕೆಗೆ ಕರೆದಿದ್ದ ಟೆಂಡರ್​ ಜಿಲ್ಲಾಡಳಿತ ರದ್ದುಗೊಳಿಸಿದೆ.

ಕಲ್ಯಾಣ ಕರ್ನಾಟಕ ಪ್ರದೇಶಾಭಿವೃದ್ಧಿ ಮಂಡಳಿತ ಮೆಗಾ ಮ್ಯಾಕ್ರೋ ಯೋಜನೆ ಅಡಿ ಜಿಲ್ಲೆಗೆ 1.5 ಕೋಟಿ ರೂ. ಅನುದಾನ ಬಿಡುಗಡೆಯಾಗಿದೆ. ಜಿಲ್ಲೆಯ 15 ಪದವಿ, ಎರಡು ಇಂಜಿನಿಯರಿಂಗ್​ ಹಾಗೂ ನಾಲ್ಕು ಡಿಪ್ಲೋಮಾ ಕಾಲೇಜುಗಳಿಗೆ ಪಠ್ಯ ಹಾಗೂ ಸ್ಪರ್ಧಾತ್ಮಕ ಪರೀೆ ಪುಸ್ತಕ ಖರೀದಿಗೆ ಜಿಲ್ಲಾಡಳಿತ ಮುಂದಾಗಿದೆ. ಇದಕ್ಕಾಗಿ ಸಮಿತಿ ರಚಿಸಿದ್ದು, ನೂತನ ಶಿಕ್ಷಣ ನೀತಿ (ಎನ್​ಇಪಿ) ಪಠ್ಯ ಕ್ರಮ ಅನ್ವಯ ಟೆಂಡರ್​ ಕರೆಯಲಾಗಿತ್ತು. 2024-25ನೇ ಸಾಲಿಗೆ ರಾಜ್ಯ ಸರ್ಕಾರ ಎನ್​ಇಪಿ ವಾಸಪ್​ ಪಡೆದಿದೆ. ರಾಜ್ಯ ಶಿಕ್ಷಣ ನೀತಿ (ಎಸ್​ಇಪಿ) ಜಾರಿ ಮಾಡಿದೆ. ಪಠ್ಯ ಕ್ರಮದಲ್ಲಿ ವ್ಯತ್ಯಾಸವಿದ್ದು, ಎನ್​ಇಪಿ ಪುಸ್ತಕ ಖರೀದಿಸಿದರೆ ವಿದ್ಯಾರ್ಥಿಗಳಿಗೆ ಅನುಕೂಲವಾಗುವುದಿಲ್ಲ.

ಈ ಬಗ್ಗೆ ಜಿಲ್ಲಾ ಲೀಡ್​ ಕಾಲೇಜು ಪ್ರಾಚಾರ್ಯರು ಸಮಿತಿಗೆ ಪತ್ರ ಬರೆದು ಮನವಿ ಮಾಡಿದ್ದರು. ಹೀಗಿದ್ದರೂ ಸಮಿತಿ ಟೆಂಡರ್​ ರದ್ದಿಗೆ ಸಿದ್ಧವಿರಲಿಲ್ಲ. ಈ ಬಗ್ಗೆ ವಿಜಯವಾಣಿ ಸೆ.3ರಂದು "ಪಠ್ಯ ಪುಸ್ತಕ ಖರೀದಿ ಗೊಂದಲ' ಶೀರ್ಷಿಕೆ ಅಡಿ ವಿಶೇಷ ವರದಿ ಪ್ರಕಟಿಸಿ ಗಮನ ಸೆಳೆದಿತ್ತು. ಈ ಬೆನ್ನಲ್ಲೇ ಜಿಲ್ಲಾಧಿಕಾರಿ ನಲಿನ್​ ಅತುಲ್​, ಸಮಿತಿಗೆ ಎನ್​ಇಪಿ, ಎಸ್​ಇಪಿ ಪಠ್ಯದ ನಡುವಿನ ತುಲನಾತ್ಮಕ ವರದಿ ಕೇಳಿದ್ದರು. ಅದರಂತೆ ಸಮಿತಿ ವರದಿ ಸಲ್ಲಿಸಿದೆ. ವರದಿ ಪರಿಶೀಲಿಸಿದ ಡಿಸಿ, ಪಠ್ಯಕ್ರಮದಲ್ಲಿ ವ್ಯತ್ಯಾಸ ಇರುವುದನ್ನ ಮನಗಂಡಿದ್ದಾರೆ. ಕೂಡಲೇ ಟೆಂಡರ್​ ರದ್ದುಪಡಿಸುವಂತೆ ಸೂಚಿಸಿದ್ದಾರೆ. ಸದ್ಯ ಟೆಂಡರ್​ ರದ್ದುಗೊಂಡಿದ್ದು, ಈಗಿರುವ ಪಠ್ಯ ಕ್ರಮದಂತೆ ಹೊಸದಾಗಿ ಟೆಂಡರ್​ ಕರೆಯಲು ಸಮಿತಿ ನಿರ್ಧರಿಸಿದೆ.