ಗಣೇಶ ಚತುರ್ಥಿ ಎಂದರೆ ತಿಂಗಳುಗಟ್ಟಲೇ ಸಂಭ್ರಮಿಸಬಹುದೆಂದು ಅಂದುಕೊಂಡಿದ್ದ ಜನರಿಗೆ ಕರೊನಾ ಬ್ರೇಕ್ ಹಾಕಿದೆ. ವಿಘ್ನೇಶ್ವರನ ಆರಾಧನೆಗೆ ಸರ್ಕಾರ ಹಲವಾರು ಮಾರ್ಗಸೂಚಿ ಪ್ರಕಟಿಸಿ, ಒಂದೇ ದಿನದ ಸಂಭ್ರಮಕ್ಕೆ ಅವಕಾಶ ಮಾಡಿಕೊಟ್ಟಿತ್ತು. ಹೀಗಾಗಿ ಕಳೆದ ವರ್ಷದ ವೈಭವ, ತರಹೇವಾರಿ ಸಾಂಸ್ಕೃತಿಕ ಕಾರ್ಯಕ್ರಮಗಳು, ಉಪನ್ಯಾಸ ಸೇರಿ ಇತರ ಸಾರ್ವಜನಿಕ ಕಾರ್ಯಕ್ರಮಗಳು ಕಂಡುಬರಲಿಲ್ಲ. ನಗರದಲ್ಲಿ ವಾರ್ಡಿಗೊಂದು ಹಾಗೂ ಗ್ರಾಮಗಳಲ್ಲಿ ಗ್ರಾಮಕ್ಕೆ ಒಂದು ಸಾರ್ವಜನಿಕ ಮೂರ್ತಿ ಪ್ರತಿಷ್ಠಾಪನೆಗೆ ಅವಕಾಶ ನೀಡಿದ್ದರಿಂದ ಬೆರಳೆಣಿಕೆ ಗಣೇಶ ಮೂರ್ತಿಗಳು ಕಂಡುಬಂದವು. ಕೊಪ್ಪಳ ನಗರವೊಂದರಲ್ಲೇ ಕಳೆದ ವರ್ಷ 121ಕ್ಕೂ ಅಧಿಕ ಕಡೆಗಳಲ್ಲಿ ಗಣೇಶನನ್ನು ಪ್ರತಿಷ್ಠಾಪಿಸಲಾಗಿತ್ತು. ಆದರೆ, ಈ ಬಾರಿ ಕೇವಲ 40-50 ಕಡೆ ಮಾತ್ರ ಮೂರ್ತಿ ಪ್ರತಿಷ್ಠಾಪನಗೆ ಪೊಲೀಸರು ಅನುಮತಿಸಿದ್ದರು. ನಗರದ ಜವಾಹರ ರಸ್ತೆ, ಈಶ್ವರ ಪಾರ್ಕ್, ಗಡಿಯಾರ ಕಂಬ ರಸ್ತೆ, ಕೋಟೆ ರಸ್ತೆ ಸೇರಿ ಬೆರಳೆಣಿಕೆ ಕಡೆಗಳಲ್ಲಿ ಮಾತ್ರ ವಿಘ್ನೇಶ್ವರ ಕಾಣಿಸಿಕೊಂಡ.
