ವ್ಯಕ್ತಿ ಮೇಲೆ ನಾಲ್ಕು ಕರಡಿಗಳಿಂದ ದಾಳಿ

ಕೊಪ್ಪಳ: ಇರಕಲ್ ಗಡಾ ಹೋಬಳಿ ವ್ಯಾಪ್ತಿಯಲ್ಲಿ ಕರಡಿ ದಾಳಿ ಹೆಚ್ಚುತ್ತಿವೆ. ಮೊನ್ನೆಯಷ್ಟೇ ಇಂದರಗಿಯಲ್ಲಿ ದಾಳಿ ನಡೆದಿತ್ತು. ಭಾನುವಾರ ಸಂಜೆ ಈರಣ್ಣ ಜಾಲಿ ಗಿಡದ ಎಂಬಾತನ ಮೇಲೆ ನಾಲ್ಕು ಕರಡಿಗಳು ಏಕಕಾಲಕ್ಕೆ ಮಾರಣಾಂತಿಕ ದಾಳಿ ನಡೆಸಿದ್ದು ಜನರು ಭಯಭೀತರಾಗಿದ್ದಾರೆ.

ಕೊಪ್ಪಳ ತಾಲೂಕಿನ ಹೊಸುರು ಗ್ರಾಮದ ಈರಣ್ಣ ಸೋಮವಾರ ಹುಣ್ಣಿಮೆ ಹಿನ್ನೆಲೆಯಲ್ಲಿ ಹುಲಿಗಿಗೆ ಪಾದಯಾತ್ರೆ ಬೆಳೆಸಿದ್ದ. ಆದರೆ, ಸಂಜೆ ಮನಸ್ಸು ಬದಲಾಯಿಸಿ ಕೊಪ್ಪಳಕ್ಕೆ ತೆರಳಲು ಇರಕಲ್ ಗಡಾ ಬಳಿ ತೆರಳುವಾಗ ನಾಲ್ಕು ಕರಡಿಗಳು ದಾಳಿ ಮಾಡಿವೆ.

ಮೈ, ಕೈ, ತಲೆ ಭಾಗಕ್ಕೆ ಬಲವಾಗಿ ಕಚ್ಚಿ, ತೀವ್ರಗಾಯಗೊಳಿಸಿವೆ.‌ ಅಸ್ವಸ್ಥನಾಗಿ ಬಿದ್ದಿದ್ದಾತನನ್ನು ಸ್ಥಳದಲ್ಲಿದ್ದವರು ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ.

ಈ ಭಾಗದಲ್ಲಿ ಕರಡಿಗಳು ಹೆಚ್ಚಿನ ಸಂಖ್ಯೆಯಲ್ಲಿವೆ. ಇದನ್ನು ಕರಡಿ ಸಂರಕ್ಷಿತ ಪ್ರದೇಶವೆಂದು ಘೋಷಿಸಲು ಅರಣ್ಯ ಇಲಾಖೆ ಪ್ರಸ್ತಾವನೆ ಸಲ್ಲಿಸಿದೆ. ಆದರೆ, ಸರ್ಕಾರ ಅನುಮೋದನೆ ನೀಡಿಲ್ಲ.

ಇತ್ತೀಚೆಗೆ ಗಂಗಾವತಿ ಶಾಸಕ ಗಾಲಿ ಜನಾರ್ದನ ರೆಡ್ಡಿ ಕರಡಿ ದಾಳಿ ತಡೆಗೆ ಅರಣ್ಯ ಸುತ್ತ ತಂತಿಬೇಲಿ ಆದರೂ ಹಾಕುವಂತೆ ಮನವಿ ಸಲ್ಲಿಸಿದ್ದರು. ಅದೂ ಕಾರ್ಗತವಾಗಿಲ್ಲ.