ಇದೇ ರೀತಿ ವರುಣನ ಕೃಪೆ ಮುಂದುವರಿದರೆ, ಪ್ರತಿ ವರ್ಷದಂತೆ ಆಗಸ್ಟ್ ತಿಂಗಳ ಎರಡನೇ ವಾರಕ್ಕೆ ಭರಚುಕ್ಕಿ ಭೋರ್ಗರೆಯುವ ರೌದ್ರ ರಮಣೀಯ ದೃಶ್ಯವನ್ನು ಕಾಣಬಹುದಾಗಿದೆ. ಮಳೆ ಚುರುಕು ಗೊಂಡಿರುವುದರಿಂದ ಪರಿಸರ ಪ್ರೇಮಿಗಳ ಮನಸ್ಸನ್ನು ಭರಚುಕ್ಕಿ ಜಲಪಾತ ಸೆಳೆಯುತ್ತಿದೆ. ಅಂತೆಯೇ, ಶನಿವಾರ ಹಾಗೂ ಭಾನುವಾರ ಸಾವಿರಾರು ಸಂಖ್ಯೆಯಲ್ಲಿ ಶಿವನ ಸಮುದ್ರದ ಶ್ರೀ ಮಧ್ಯರಂಗನಾಥ ಸ್ವಾಮಿ ದೇವಾಲಯ, ಆದಿಶಕ್ತಿ ಮಾರಮ್ಮನ ದೇವಾಲಯ, ಸೋಮೇಶ್ವರ ದೇವಾಲಯ ಹಾಗೂ ಭರಚುಕ್ಕಿ ಫಾಲ್ಸ್ ವೀಕ್ಷಣೆ ಪ್ರವಾಸಿಗರು ಆಗಮಿಸಿ ವ್ಯಾಪಾರ ವಹಿವಾಟು ಚುರುಕು ಕಂಡಿದೆ. ಚುರುಮುರಿ, ಕೂಲ್ ಡ್ರಿಂಕ್ಸ್ ಅಂಗಡಿಗಳು, ಹಣ್ಣು ಅಂಗಡಿ, ಸಸ್ಯಾಹಾರಿ ಹಾಗೂ ಮಾಂಸಾಹಾರಿ ಹೋಟೆಲ್ಗಳು, ಫಿಶ್ ಪಾಯಿಂಟ್ ವ್ಯಾಪಾರಿಗಳ ಮೊಗದಲ್ಲಿ ಮಂದಹಾಸ ಮೂಡಿದೆ.
