ಮಾವು ಮಾರುಕಟ್ಟೆಗೆ ದೊರೆಯದ ಸೌಲಭ್ಯ

ಪ್ರಸಿದ್ಧ ಮಾವಿನ ನಗರಿ ಎಂಬ ಹೆಸರು ಪಡೆದ ಶ್ರೀನಿವಾಸಪುರ ಕೃಷಿ ಉತ್ಪನ್ನ ಮಾರುಕಟ್ಟೆಯಲ್ಲಿ ಈ ವರ್ಷವೂ ಹಲವು ಸಮಸ್ಯೆ ಎದ್ದು ಕಾಣುತ್ತಿವೆ. ಸುಗ್ಗಿಕಾಲ ಮುಗಿಯುವತ್ತ ಬರುತ್ತಿದ್ದರೂ ಸಹ ಅಧಿಕಾರಿಗಳು, ಶಾಸಕರು, ನಡೆಸಿದ ಸಭೆಗಳು ಮತ್ತು ತೆಗೆದುಕೊಂಡ ತೀರ್ಮಾನಗಳು ನಾಮ್ ಕೇ ವಾಸ್ತೆ ಎಂಬಂತೆ ಕಾಣುತ್ತಿವೆ ಎಂದು ವ್ಯಾಪಾರಿಗಳು, ಗ್ರಾಹಕರು ಅಕ್ರೋಶ ವ್ಯಕ್ತಪಡಿಸಿದ್ದಾರೆ.

ಎಪಿಎಂಸಿ ಮಾರುಕಟ್ಟೆಗೆ ಹೊಂದಿಕೊಂಡು ಇಂದಿರಾನಗರ ವಾರ್ಡ್ ಇದ್ದು, ಇಲ್ಲಿ ವಾಸವಾಗಿರುವ ಜನತೆಯ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತಿದೆ. ಕೊಳೆತ ಮಾವಿಕಾಯಿಗಳನ್ನು ಸುರಿಯುವದರಿಂದ, ಅಕ್ಕಪಕ್ಕದಲ್ಲಿ ಬಯಲು ಶೌಚ ಮಾಡುವದರಿಂದ ಸಮಸ್ಯೆ ಆಗುತ್ತಿದೆ ಎಂದು ಬೈಜೇಗೌಡ ಹೇಳಿದರು.

ಎಪಿಎಂಸಿ ಮಾರುಕಟ್ಟೆಯಲ್ಲಿ ಕಾನೂನು ಸುವ್ಯವಸ್ಥೆ ಕಾಪಾಡಲು ಸಂಚಾರ ನಿಯಂತ್ರಿಸಲು ಪೊಲಿಸ್ ಹೊರ ಠಾಣೆ ಪ್ರಾರಂಭಿಸಲಾಗಿದೆ. ಆದರೆ ಇಲ್ಲಿ ಯಾವಾಗಲೂ ಸಿಬ್ಬಂದಿ ಇಲ್ಲದೆ ಬೀಗ ಜಡಿದಿರುತ್ತಾರೆ. ಪ್ರಾಂಗಣದಲ್ಲಿ ಸಣ್ಣ-ಪುಟ್ಟ ತಿಂಡಿ, ಮಾಂಸದ ಹೋಟಲ್ಗಳು ತಲೆ ಎತ್ತಿದ್ದು, ಇವುಗಳಲ್ಲಿ ಕದ್ದು, ಮುಚ್ಚಿ ಮದ್ಯ ಮಾರಾಟ ಎಗ್ಗಿಲ್ಲದೆ ನಡೆಯುತ್ತಿದೆ.

ಶೌಚಗೃಹಗಳ ಅಗತ್ಯವಿದೆ. ರೈತಭವನ ದುರಸ್ತಿಯಾಗಬೇಕಾಗಿದೆ. ವಾಹನಗಳ ಅಧಿಕ ಸಂಚಾರದಿಂದ ನಿತ್ಯ ಕೊಳೆತಮಾವಿನ ಕಾಯಿಗಳನ್ನು ವಿಲೇ ಮಾಡಲು ಸಾಧ್ಯವಾಗುತ್ತಿಲ್ಲ. ಅಕ್ರಮ ಮದ್ಯ ಮಾರಾಟದ ಬಗ್ಗೆ ಅಬಕಾರಿ ಇಲಾಖೆ ಅಧಿಕಾರಿಗಳು ನಿಗಾವಹಿಸಬೇಕು. ಮಾರುಕಟ್ಟೆ ಅಭಿವೃದ್ಧಿಗೆ ಅನುದಾನಕ್ಕಾಗಿ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿದ್ದೇವೆ.

ಪ್ರತಿವರ್ಷ ಚುನಾಯಿತ ಪ್ರತಿನಿಧಿಗಳು, ಅಧಿಕಾರಿಗಳು, ಋತುಮಾನ ಮುನ್ನ ಸಭೆಗಳನ್ನು ನಡೆಸಿ ಕ್ರಿಯಾ ಯೋಜನೆ ಸಿದ್ಧಪಡಿಸುವುದು ಕಡತಗಳಿಗೆ ಸೀಮಿತವಾಗಿವೆ. ಮಾರುಕಟ್ಟೆಯಲ್ಲಿ ಯಾವುದೇ ಅಭಿವೃದ್ಧಿ ಕೆಲಸಗಳು ಆಗಿಲ್ಲ. ಹಾಳಾಗಿರುವ ರಸ್ತೆಗಳು, ಚರಂಡಿಗಳು, ಕೊಳೆತ ಮಾವಿನಕಾಯಿ ರಾಶಿಗಳು ಹೀಗೆ ಹಲವು ಸಮಸ್ಯೆಗಳ ಮಧ್ಯದಲ್ಲಿಯೇ ಸುಗ್ಗಿಕಾಲ ಕಳೆಯುತ್ತಿದೆ. ಚುನಾಯಿತ ಪ್ರತಿನಿಧಿಗಳ ಮತ್ತು ಅಧಿಕಾರಿಗಳ ಬೇಜವಾಬ್ದಾರಿತನ ಎದ್ದು ಕಾಣುತ್ತಿದೆ.