ಇಕ್ಕಟ್ಟಿನ ರಸ್ತೆಯಲ್ಲಿ ಸಂಚಾರ ಬಿಕ್ಕಟ್ಟು

ನಗರದಲ್ಲಿ ಜನ, ವಾಹನಗಳ ದಟ್ಟಣೆ ದಿನೇದಿನೆ ಹೆಚ್ಚಾಗುತ್ತಿದೆ. ಆದರೆ, ಇಕ್ಕಟ್ಟಾಗಿರುವ ರಸ್ತೆಯಲ್ಲಿ ಸಂಚಾರಕ್ಕೆ ಸಮಸ್ಯೆ ಎದುರಿಸುತ್ತಿದ್ದು, ಈ ಮಾರ್ಗಗಳ ವಿಸ್ತರಣೆ ಯಾವಾಗ ಆಗಲಿದೆ ಎಂಬುದು ಸಾರ್ವಜನಿಕರ ಪ್ರಶ್ನೆಯಾಗಿದೆ. ನಗರದ ಹಳೇ ಭಾಗದಲ್ಲಿನ ಬಹುತೇಕ ರಸ್ತೆಗಳು ಕಾಲಕ್ಕೆ ತಕ್ಕಂತೆ ಅಭಿವೃದ್ಧಿ ಹೊಂದಿಲ್ಲ, ಚರಂಡಿ ವ್ಯವಸ್ಥೆಯಿಲ್ಲ. ಇದೀಗ ರಸ್ತೆಗಳಲ್ಲಿ ಗುಂಡಿಗಳು ನಿರ್ಮಾಣವಾಗಿದ್ದು, ವಾಹನ ಸವಾರರು ಚಲಿಸಬೇಕಾದರೆ ಕಿರಿಕಿರಿ ಅನುಭವಿಸುವಂತಾಗಿದೆ.

ಜನಸಂಖ್ಯೆ ಮತ್ತು ಭೌಗೋಳಿಕ ವಿಸ್ತೀರ್ಣ ಹೆಚ್ಚಾದಂತೆ ವಾಹನಗಳ ದಟ್ಟಣಿಯೂ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಲೇ ಇವೆ. ಪ್ರಮುಖ ರಸ್ತೆಗಳನ್ನು ಹೊರತುಪಡಿಸಿದರೆ ಜನ, ವಾಹನಗಳ ದಟ್ಟಣೆ ಇರುವ ರಸ್ತೆಗಳು ವಿಸ್ತರಣೆ ಕಂಡಿಲ್ಲ.

ಕೋಲಾರದಿಂದ ಶ್ರೀನಿವಾಸಪುರ, ಚಿಕ್ಕಬಳ್ಳಾಪುರ, ಮುಳಬಾಗಿಲು, ಬಂಗಾರಪೇಟೆ ಮುಖ್ಯ ರಸ್ತೆ ಹೊರತು ಪಡಿಸಿದರೆ, ನಿತ್ಯ ಜನಜಂಗುಳಿಯಿರುವ ಕಾಳಮ್ಮಗುಡಿ ರಸ್ತೆ, ಎಂಜಿ ರಸ್ತೆ, ಅಮ್ಮವಾರಿಪೇಟೆ, ದೊಡ್ಡಪೇಟೆ, ಕಾರಂಜಿಕಟ್ಟೆ, ರಸ್ತೆ ಬಹಳ ಅಂತರಗಂಗೆ ಕಿರಿದಾಗಿವೆ. ಈ ಹಿಂದೆ ಡಾ.ಕೆ.ವಿ.ತ್ರಿಲೋಕಚಂದ್ರ ಅವರು ಜಿಲ್ಲಾಧಿಕಾರಿಯಾಗಿದ್ದ ವೇಳೆ 2015-2016ರಲ್ಲಿಯೇ ಕಿರಿದಾದ ರಸ್ತೆಗಳನ್ನು ಗುರುತಿಸಿ ವಿಸ್ತರಣೆ ಮಾಡಲು ಗುರುತು ಹಾಕಲಾಗಿತ್ತು. ಆಗ ಹಲವು ಮಾಲೀಕರು ಪರಿಹಾರಕ್ಕೂ ಒತ್ತಾಯಿಸಿದರು. ಇನ್ನು ಕೆಲವರು ಕೋರ್ಟ್ ಮೊರೆ ಹೋಗಿ ತಡೆಯಾಜ್ಞೆ ತಂದಿದ್ದರು.

ನಗರ ವ್ಯಾಪ್ತಿ ಸುಮಾರು 18.13 ಚದರ ಕಿಮೀ ಇದೆ, ಇಲ್ಲಿಗೆ ಸಮೀಪದ ಬೆಂಗಳೂರು-ಚೆನ್ನೈ, ರಾಷ್ಟ್ರೀಯ ಹೆದ್ದಾರಿ -75, ಸರ್ಕಾರಿ ಕಚೇರಿಗಳು, ಖಾಸಗಿ, ಸರ್ಕಾರಿ ಆಸ್ಪತ್ರೆಗಳು, ಹೋಟೆಲ್‌ಗಳು, ವಾಣಿಜ್ಯ ಮಳಿಗೆಗಳಿವೆ. ಜಿಲ್ಲಾ ಕೇಂದ್ರವು ಪ್ರಮುಖ ವಾಣಿಜ್ಯ ಕೇಂದ್ರವಾಗಿ ಅಭಿವೃದ್ಧಿ ಹೊಂದುತ್ತಿದೆ. ಈಗಾಗಲೇ ಗುರುತಿಸಲಾಗಿರುವ ರಸ್ತೆಗಳನ್ನು ವಿಸ್ತರಣೆ ಮಾಡಿದ್ದೇ ಆದರೆ ನಗರವು ಸಮಗ್ರ ಅಭಿವೃದ್ಧಿ ಹೊಂದುತ್ತದೆ.

ಕಳೆದ 2009ರಲ್ಲಿ ಶಾಸಕರಾಗಿದ್ದ ಕೆ.ಶ್ರೀನಿವಾಸಗೌಡ ಅವರ ಅವಧಿಯಲ್ಲಿ ನಗರದಲ್ಲಿನ ಮುಖ್ಯ ರಸ್ತೆಗಳನ್ನು ವಿಸ್ತರಣೆ ಮಾಡಿ ಅಭಿವೃದ್ಧಿಪಡಿಸಲಾಗಿತ್ತು. ಆನಂತರ ಅಧಿಕಾರಕ್ಕೆ ಬಂದ ವರ್ತೂರು ಪ್ರಕಾಶ್ ಈ ಕೆಲಸಕ್ಕೆ ಕೈ ಹಾಕಲಿಲ್ಲ. ಮತ್ತೆ 2018ರಲ್ಲಿ ಅಧಿಕಾರಕ್ಕೆ ಬಂದ ಶ್ರೀನಿವಾಸಗೌಡ ಕೋಲಾರ-ಬಂಗಾರಪೇಟೆ ಮಾರ್ಗ ವಿಸ್ತರಣೆ ಮಾಡಿಸಿದ್ದರು. ಆಗ ರಾಜಕೀಯ ಒತ್ತಡ ಬಂದಿತ್ತಾದರೂ ಅಭಿವೃದ್ಧಿ ವಿಚಾರದಲ್ಲಿ ರಾಜೀಯಾಗದೆ ಇದ್ದುದರಿಂದ ಒತ್ತುವರಿ ತೆರವು ಸಫಲವಾಯಿತು. ಆದರೆ, ಇಚ್ಛಾಶಕ್ತಿ ಕೊರತೆ ಇಲ್ಲವಾಗಿರುವುದೇ ಸಮಸ್ಯೆಗೆ ಕಾರಣವಾಗಿದೆ.

ನಗರದ ಬಹುತೇಕ ರಸ್ತೆಗಳು ಒತ್ತುವರಿಯಾಗಿದ್ದು, ಅಳತೆ ಮಾಡಿ ತೆರವುಗೊಳಿಸಿದರೆ ರಸ್ತೆಯ ಅಸಲಿ ಅಗ ಗೋಚರವಾಗುತ್ತದೆ. ಮನೆ, ಅಂಗಡಿ-ಮಾಲೀಕರು ಕಟ್ಟಡಗಳನ್ನು ಕಟ್ಟಿಕೊಂಡು ಒತ್ತುವರಿ ಮಾಡಿಕೊಂಡಿದ್ದಾರೆ. ಈಗಿನ ಎಂಜಿ ರಸ್ತೆಯು 1980ರಲ್ಲಿ ಸ್ಪಾರ್ಕ್ಸ್ ರಸ್ತೆಯಾಗಿತ್ತು. ಅಂದಿನ ದಾಖಲೆಗಳ ಪ್ರಕಾರ ಅಳತೆ ಮಾಡಿದರೆ ಒತ್ತುವರಿ ಆಗಿರುವುದು ಕಂಡು ಬರುತ್ತದೆ. ಎಂಜಿ ಚೌಕದಿಂದ ಗಾಂಧಿ ವನದ ತನಕ ಎಡಕೆ" ಬಹಳಷ್ಟು ಒತ್ತುವರಿ ಆಗಿದೆ ಎಂಬುದು ಸ್ಥಳೀಯರ ಆರೋಪವಾಗಿದೆ.

ನಗರದಲ್ಲಿನ ಮುಖ್ಯ ರಸ್ತೆಗಳನ್ನು ವಿಸ್ತರಣೆ ಮಾಡಿದಾಗ ಸಂತ್ರಸ್ತರಿಗೆ ಪರಿಹಾರ ನೀಡಿಲ್ಲ. ಸ್ವಾಧೀನದಾರರಿಗೆ ನೋಟಿಸ್ ನೀಡಬೇಕು. ಅದಕ್ಕೂ ಮೊದಲು ಸಾಧಕ-ಬಾಧಕ ಚರ್ಚಿಸಬೇಕು. ಆಸ್ತಿ ಕಳೆದುಕೊಳ್ಳುವವರಿಗೆ ಪರಿಹಾರ ಸಿಗುತ್ತದೋ ಇಲ್ಲವೋ ಎಂಬ ಅನುಮಾನ ಕಾಡುತ್ತಿದೆ. ಇದರಿಂದಲೇ ಅವರೆಲ್ಲ ಕೋರ್ಟ್ ಮೊರೆ ಹೋಗಿ ತಡೆಯಾಜ್ಞೆ ತಂದಿದ್ದಾರೆ. ಆದರೆ ಕೆಯುಡಿಎ ಅಧಿಕಾರಿಗಳು ತಡೆಯಾಜ್ಞೆ ತೆರವುಗೊಳಿಸುವ ಗೋಜಿಗೆ ಹೋಗಿಲ್ಲ. ಆಸ್ತಿ ಮಾಲೀಕರಲ್ಲಿರುವ ಗೊಂದಲ ನಿವಾರಣೆ ಮಾಡಿ, ಪರಿಹಾರ ಕಲ್ಪಿಸಿದರೆ ಅಭಿವೃದ್ಧಿಗೆ ಸಹಕರಿಸಲಾಗುವುದು ಎಂಬುದು ಕಟ್ಟಡ ಮಾಲೀಕರ ಮಾತು.

ಕಿರಿದಾದ ರಸ್ತೆಗಳನ್ನು ವಿಸ್ತರಣೆ ಮಾಡಿ ಅಭಿವೃದ್ಧಿಪಡಿಸಲು 10 ಕೋಟಿ ರೂ. ಅನುದಾನ ಮೀಸಲಿರಿ ಸಲಾಗಿದೆ. ಈ ಸಂಬಂಧ ನಗರ ಪ್ರದಕ್ಷಿಣೆ ಮಾಡಿದಾಗ ಪರಿಶೀಲಿಸಲಾಗಿದೆ. ಅಧಿಕಾರಿಗಳ ಸಭೆ ಕರೆದು ಕ್ರಮವಹಿಸಲಾಗುವುದು.

ಈಗಾಗಲೇ ಗುರುತಿಸಲಾಗಿರುವ ರಸ್ತೆಗಳನ್ನು ವಿಸ್ತರಣೆ ಮಾಡಬೇಕು ಎಂಬ ಒತ್ತಾಯ ಇದ್ದರೂ ಜನಪ್ರತಿನಿಧಿಗಳು ಗಮನ ಹರಿಸುತ್ತಿಲ್ಲ. ಇದು ರಾಜಕೀಯ ಕಾರಣದಿಂದಲೂ ನನೆಗುದಿಗೆ ಬಿದ್ದಿದೆ. ಪರಿಹಾರ ಸಮೇತ ಅಗಲೀಕರಣ ಮಾಡಿದರೆ ಕೆಲ ಸಮಸ್ಯೆಗಳು ಬಗೆಹರಿದಂತಾಗುತ್ತವೆ.

- ಬಿ.ಸುರೇಶ್ ಮಾಜಿ ಅಧ್ಯಕ್ಷ, ವಾಣಿಜ್ಯ ಮತ್ತು ಕೈಗಾರಿಕೆ ಸಂಸ್ಥೆ, ಕೋಲಾರ