ಆರೋಗ್ಯಕರ ಜೀವನಕ್ಕಾಗಿ ಮಣ್ಣು ಮುಖ್ಯ

ಕೋಲಾರ: ಭೂಮಿಯಲ್ಲಿ ಯಾವುದೇ ಬೆಳೆ ಬೆಳೆಯಬೇಕಾದರೆ ಮಣ್ಣಿನ ಆರೋಗ್ಯ ಕಾಪಾಡಬೇಕು, ಆರೋಗ್ಯಕರ ಜೀವನಕ್ಕಾಗಿ ಮಣ್ಣು ಮುಖ್ಯ ಎಂದು ಕೃಷಿ ಇಲಾಖೆಯ ಜಂಟಿ ಕೃಷಿ ನಿರ್ದೇಶಕಿ ಜಾವೀದಾ ನಸೀಮಾ ಖಾನಂ ಹೇಳಿದರು.

ತೋಟಗಾರಿಕೆ ಮಹಾವಿದ್ಯಾಲಯ, ಐಸಿಎಆರ್​-ಭಾರತೀಯ ತೋಟಗಾರಿಕಾ ಕೇಂದ್ರ, ಕೃಷಿ ಇಲಾಖೆ ವತಿಯಿಂದ ಐಸಿಎಆರ್​- ಕೃಷಿ ವಿಜ್ಞಾನ ಕೇಂದ್ರದಲ್ಲಿ ಆರೋಗ್ಯಕರ ನಗರಗಳಿಗಾಗಿ ಆರೋಗ್ಯಕರ ಮಣ್ಣು ಘೋಷ್ಯವಾಕ್ಯದಡಿ ಹಮ್ಮಿಕೊಂಡಿದ್ದ ಶುಕ್ರವಾರ ಹಮ್ಮಿಕೊಂಡಿದ್ದ ವಿಶ್ವ ಮಣ್ಣು ದಿನಾಚರಣೆ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಮಣ್ಣಿನ ಮಹತ್ವದ ಬಗ್ಗೆ ಸಾರ್ವಜನಿಕರಿಗೆ ಅರಿವು ಮೂಡಿಸುವ ಉದ್ದೇಶದಿಂದ 2014ರಿಂದ ಪ್ರತಿವರ್ಷ ಡಿ.5ರಂದು ವಿಶ್ವ ಮಣ್ಣು ದಿನವನ್ನಾಗಿ ಆಚರಿಸಲಾಗುತ್ತಿದೆ. ಆಹಾರ ಭದ್ರತೆಗೋಸ್ಕರ ಮಣ್ಣನ್ನು ಸಂರಕ್ಷಿಸಬೇಕು. ಹವಾಮಾನ ವೈಪರೀತ್ಯ, ಅತಿಯಾದ ಮಳೆ ಸೇರಿದಂತೆ ನಾನಾ ಕಾರಣಗಳಿಂದ ಮಣ್ಣನ್ನು ಕಳೆದುಕೊಳ್ಳುತ್ತಿದ್ದೇವೆ. ಈಗಿನಿಂದಲೇ ಎಚ್ಚೆತ್ತುಕೊಳ್ಳಬೇಕು ಎಂದರು.

ಕೇಂದ್ರ, ರಾಜ್ಯ ಸರ್ಕಾರಗಳು ಮಣ್ಣಿನ ಸಂರಕ್ಷಣೆಗಾಗಿ ಹಲವಾರು ಯೋಜನೆಗಳನ್ನು ರೂಪಿಸಿದ್ದು, ನೈಸರ್ಗಿಕ ಕೃಷಿಯು ಒಂದಾಗಿದೆ. ಯೋಜನೆ ಕುರಿತು ರೈತರಿಗೆ ತರಬೇತಿ ನೀಡಲಾಗುತ್ತಿದೆ. ಮಣ್ಣಿನ ಸವಕಳಿಯನ್ನು ತಡೆಯಲು ನಿಗಾವಹಿಸಬೇಕು. ಮಣ್ಣು ಮತ್ತು ನೀರಿನ ಸಂರಕ್ಷಣೆಗೆ ಕಂದಕ ಬದುಗಳನ್ನು ತಾಕುಗಳಲ್ಲಿ ನಿರ್ಮಿಸಿಕೊಂಡು ಮಣ್ಣಿನ ಲವತ್ತತೆ ಕಾಪಾಡಲು ಮುಂದಾಗಬೇಕು ಎಂದು ಸಲಹೆ ನೀಡಿದರು.

ತೋಟಗಾರಿಕೆ ಮಹಾವಿದ್ಯಾಲಯದ ಡೀನ್​ ಡಾ.ರಾಘವೇಂದ್ರ ಕೆ.ಮೆಸ್ತಾ ಮಾತನಾಡಿ, ಹಲವಾರು ಸೂಷ್ಮ ಜೀವಿಗಳು ಮಣ್ಣಿನಲ್ಲಿದ್ದು ಕೃಷಿಯ ಜೀವಾಳ. ಮಣ್ಣು ಇಲ್ಲದೇ ಕೃಷಿ ಕೈಗೊಳ್ಳಲು ಸಾಧ್ಯವಿಲ್ಲ. ಆರೋಗ್ಯಕರ ಮಣ್ಣು ನಗರಗಳಿಗೂ ಅವಶ್ಯಕವಿದ್ದು, ನಾವೆಲ್ಲರೂ ಮಣ್ಣು ಸಂರಕ್ಷಣೆಯ ಪ್ರತಿಜ್ಞೆ ಮಾಡಬೇಕು ಎಂದು ಹೇಳಿದರು.

ಕೃಷಿ ವಿಜ್ಞಾನ ಕೇಂದ್ರದ ಹಿರಿಯ ವಿಜ್ಞಾನಿ ಡಾ.ಶಿವಾನಂದ ಹೊಂಗಲ ಮಾತನಾಡಿ, ಕೃಷಿಗೆ ಮಣ್ಣು ಅತ್ಯಂತ ಮುಖ್ಯ, ಆರೋಗ್ಯಕರವಾಗಿದ್ದರೆ ಕೃಷಿ ಆರೋಗ್ಯವಾಗಿರುತ್ತದೆ. ಕೃಷಿ ಆರೋಗ್ಯಕರವಾಗಿದ್ದರೆ ದೇಶ ಆರೋಗ್ಯಕರವಾಗಿರುತ್ತದೆ ಎಂದು ಅಭಿಪ್ರಾಯಪಟ್ಟರು.

ದೇಶದ ಶೇಕಡ ಶೇ.33ರಷ್ಟು ಮಣ್ಣಿನ ಆರೋಗ್ಯ ಹದಗೆಟ್ಟಿದೆ. ಮಣ್ಣು ಸಂಕಷ್ಟದಲ್ಲಿದೆ ಎಂದರೆ ಮನುಕುಲ ಸಂಕಷ್ಟಲ್ಲಿದೆ ಎಂದರ್ಥ. ಮನುಕುಲ ಮಣ್ಣಿನ ಮೇಲೆ ಅವಲಂಬಿತವಾಗಿದೆ. ನಗರವಾಸಿಗಳಿಗೂ ಕೂಡ ಮಣ್ಣು ಅಗತ್ಯ. ಮಣ್ಣಿನ ಆರೋಗ್ಯ ರಾಸಾಯನಿಕಗಳಿಂದ ಕೆಟ್ಟಿಲ್ಲ, ಅವೈಜ್ಞಾನಿಕ ಕೃಷಿ ಪದ್ಧತಿಯಿಂದ, ಅವೈಜ್ಞಾನಿಕ ಪೋಷಕಾಂಶಗಳ ನಿರ್ವಹಣೆಯಿಂದ ಮಣ್ಣಿನ ಆರೋಗ್ಯ ಕೆಟ್ಟಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ಕಾರ್ಯಕ್ರಮದಲ್ಲಿ ಸಂಶೋಧನಾ ಸಂಸ್ಥೆಯ ಪ್ರಧಾನ ವಿಜ್ಞಾನಿ ಡಾ.ಟಿ.ಎಚ್​.ಸಿಂಗ್​, ಐಐಎಚ್​ಆರ್​ ಹಿರಿಯ ವಿಜ್ಞಾನಿಯಾದ ಡಾ. ಜಯಂತಿ ಮಾಲಾ, ಕೃಷಿ ಇಲಾಖೆಯ ಉಪ ನಿರ್ದೇಶಕಿ ಡಾ.ಮಂಜುಳ, ಸಹಾಯಕ ನಿರ್ದೇಶಕ ಮಂಜುನಾಥ, ವಲಗ್ರೋ ಬಯೋಸೈನ್ಸ್​ ವ್ಯವಸ್ಥಾಪಕ ಕೇಶವ ರೆಡ್ಡಿ, ಆತ್ಮ ಯೋಜನೆಯ ಸಂಯೋಜಕಿ ಲಕ್ಷಿ$್ಮದೇವಿ, ಸಹಾಯಕ ಪ್ರಾಧ್ಯಾಪಕಿ ಡಾ.ಸ್ವಾತಿ, ಡಾ.ಶೀಲಾ ರಾಣಿ, ರೇಷ್ಮೆಕೃಷಿ ವಿಜ್ಞಾನಿ ಡಾ.ಕೆ.ಆರ್​.ಶಶಿಧರ್​, ತಾಂತ್ರಿಕ ಅಧಿಕಾರಿ ಸಿ.ಎಸ್​.ಜ್ಞಾನಸುಧಾ, ಕಾರ್ಯಕ್ರಮ ಸಹಾಯಕರಾದ ಗುರುನಾಥ ಸುತಗಟ್ಟಿ ಉಪಸ್ಥಿತರಿದ್ದರು.

ಕೋಟ್​...

ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗಿ ರಸಗೊಬ್ಬರ ಬಳಸುತ್ತಿರುವುದರಿಂದ ಮಣ್ಣಿನ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತಿದೆ. ಇದರ ಗಂಭೀರತೆ ಅರಿತು ಕೊಟ್ಟಿಗೆ ಗೊಬ್ಬರ ಬಳಕೆ ಹಾಗೂ ಸಮಗ್ರ ಪೋಷಕಾಂಶಗಳ ನಿರ್ವಹಣೆ ಮೂಲಕ ಮಣ್ಣಿನ ಫಲವತ್ತತೆ ಹೆಚ್ಚಿಸಬೇಕು.