ಹಸಿರು ಕೋಲಾರಕ್ಕೆ ಮುನ್ನುಡಿ

ಪರಿಸರ ದಿನದಂದು ಸಸಿನೆಟ್ಟು ಫೋಟೋ ತೆಗೆಸಿಕೊಂಡ ನಂತರ ಆ ಗಿಡಗಳ ಪೋಷಣೆಯತ್ತ ಗಮನಹರಿಸುವವರು ಕಡಿಮೆ. ಆದರೆ ನಗರದ ಕೆಲ ಸ್ವಯಂ ಸೇವಾ ಸಂಘ-ಸಂಸ್ಥೆಗಳು ನೆಟ್ಟಿರುವ ಗಿಡಗಳಿಗೆ ಬೇಸಿಗೆಯಲ್ಲಿ ನೀರು ಹರಿಸುವ ಮೂಲಕ ಅವುಗಳನ್ನು ಮರಗಳಾಗಿ ಬೆಳೆಸಲು ಪಣತೊಟ್ಟಿವೆ.

ಪರಿಸರ ದಿನಾಚರಣೆ, ಹುಟ್ಟುಹಬ್ಬ, ಸರ್ಕಾರಿ ಕಾರ್ಯಕ್ರಮ ಹೀಗೆ ವಿಶೇಷ ದಿನಗಳಂದು ನಗರದಲ್ಲಿ ಸಸಿಗಳನ್ನು ವಿವಿಧ ಸಂಘ-ಸಂಸ್ಥೆಗಳು ಹಾಗೂ ಸಾರ್ವಜನಿಕರು ಗಿಡಗಳನ್ನು ನೆಡುತ್ತಾರೆ. ಆದರೆ, ನೆಟ್ಟ ಗಿಡಕ್ಕೆ ನೀರು ನೀಡಿ ಮರಗಳಾಗಿ ಬೆಳೆಯುವಂತೆ ಮಾಡುವುದು ತೀರಾ ಕಡಿಮೆ.

ಬೇಸಿಗೆಯಲ್ಲಿ ಪ್ರಾಣಿ, ಪಕ್ಷಿಗಳ ದಾಹ ತೀರಿಸಲು ನೀರಿನ ವ್ಯವಸ್ಥೆ ಮಾಡುತ್ತಿರುವವರನ್ನು ನೋಡಿದ್ದೇವೆ. ಸೈಟ್ಸ್ ಮತ್ತು ಗೈಡ್ಸ್ ಸಂಸ್ಥೆ, ರೋಟರಿ ನಂದಿನಿ ಕೋಲಾರ, ವಂಶೋದಯ ಆಸ್ಪತ್ರೆ, ಕೋಲಾರಮ್ಮ ಹಸಿರು ಪಡೆ ಸಹಕಾರದಿಂದ ನಗರದ ವಿವಿಧ ಭಾಗಗಳಲ್ಲಿ ಸುಮಾರು ವರ್ಷಗಳಿಂದ ನೆಡಲಾದ ಗಿಡಗಳಿಗೆ ಬೇಸಿಗೆಯಲ್ಲಿ ನೀರು ಹರಿಸುತ್ತಿದ್ದಾರೆ.

ನಗರ ವಿವಿಧ ಉದ್ಯಾನವನ, ರಸ್ತೆ ವಿಭಜಕ, ರೈಲ್ವೆ ನಿಲ್ದಾಣ, ಬಿಇಒ, ಬಿಆರ್‌ಸಿ ಕಚೇರಿ ಆವರಣ. ಜೂನಿಯ‌ರ್ ಕಾಲೇಜು ಮೈದಾನ, ಹಳೇ ಡಿಸಿ ಕಚೇರಿ ಆವರಣ, ಅಬಕಾರಿ ಇಲಾಖೆ, ರಸ್ತೆ ಬದಿ, ಶಾಲಾ-ಕಾಲೇಜು, ಸರ್ಕಾರಿ ಆಸ್ಪತ್ರೆ ಆವರಣಗಳಲ್ಲಿ ಕಳೆದ 10 ವರ್ಷಗಳಿಂದ 1,500ಕ್ಕೂ ಹೆಚ್ಚು ಗಿಡಗಳನ್ನು ನಾಟಿ ಮಾಡಿ ಪೋಷಿಸುತ್ತಿದ್ದಾರೆ. ನಾಟಿ ಮಾಡಿರುವ ಗಿಡಕ್ಕೆ ಪಾತಿ ಮಾಡುವುದು, ಗೊಬ್ಬರ, ಟೀಗಾರ್ಡ್ ಹಾಕುವುದು, ಇತರ ಪೋಷಣೆ ಮಾಡುವ ಸಂರಕ್ಷಣೆ ಮಾಡುವ ಸೇವಾ ಕಾರ್ಯದಲ್ಲಿ ಸ್ವಯಂ ಸೇವಕರು ತೊಡಗಿಸಿಕೊಂಡಿದ್ದಾರೆ.

ಮಳೆಗಾಲ ಹಾಗೂ ಚಳಿಗಾಲದಲ್ಲಿ ನೀರಿನ ಅವಶ್ಯ ಬರುವುದಿಲ್ಲ. ಆದರೆ, ಬೇಸಿಗೆ ವೇಳೆ ತಾಪಕ್ಕೆ ಗಿಡಗಳು ಒಣಗಿ ಹೋಗುತ್ತದೆ. ಈ ಸಮಸ್ಯೆ ಮನಗಂಡ ಸಂಸ್ಥೆಯವರು ಗಿಡಗಳಿಗೆ ನೀರುಣಿಸುತ್ತಿದ್ದಾರೆ. ಕಾರ್ಯದಲ್ಲಿ ಆಸಕ್ತಿಯಿರುವವರು ಕೋಲಾರಮ್ಮ ಹಸಿರು ಪಡೆಯೊಂದಿಗೆ ಸೇರಿಕೊಳ್ಳಬಹುದು.

ರಸ್ತೆ ಬದಿ ನೆಡಲಾದ ಗಿಡಗಳಿಗೆ ನೀರುಣಿಸಲು ವಾರಕ್ಕೆ 10 ಟ್ಯಾಂಕರ್ ನೀರು ಬೇಕಿದೆ. ಸಂಸ್ಥೆಯ ಸದಸ್ಯರು ಮಾಡುತ್ತಿರುವ ಸಾಮಾಜಿಕ ಕಾರ್ಯಕ್ಕೆ ವಿವಿಧ ಸಂಘ-ಸಂಸ್ಥೆಗಳವರು ಕೈ ಜೋಡಿಸಿದ್ದೇ ಆದರೆ ಹಸಿರು ಕೋಲಾರದ ಕನಸು ನನಸಾಗಲು ಸಾಧ್ಯ. ಟ್ಯಾಂಕರ್ ನೀರು ಪೂರೈಕೆಗೆ ತಗಲುವ ಹಣ ಇದೀಗ ತಂಡದ ಸದಸ್ಯರೇ ಹೊಂದಿಸಿಕೊಳ್ಳುತ್ತಾರೆ. ಕೆಲವೊಮ್ಮೆ ದಾನಿಗಳು ಸಹ ಹಣ ನೀಡುತ್ತಾರೆ. ತಂಡದಲ್ಲಿರುವ ಸದಸ್ಯರು ತಮ್ಮ ಹುಟ್ಟುಹಬ್ಬದ ಸಂದರ್ಭದಲ್ಲಿ ಗಿಡಗಳಿಗೆ ನೀರುಣಿಸುವ ಒಂದು ದಿನದ ಸಂಪೂರ್ಣ ವೆಚ್ಚ ಭರಿಸುತ್ತಾರೆ. ಮಾರ್ಚ್‌ನಿಂದ ಮಳೆ ಬರುವ ತನಕ ನೀರುಣಿಸುವುದು ವಾಡಿಕೆಯಾಗಿಸಿಕೊಂಡಿದ್ದಾರೆ. ಒಂದು ಸಸಿ ನಾಟಿ ಮಾಡಿದರೆ ಕನಿಷ್ಠ 5 ವರ್ಷ ಸಮರ್ಪಕ ಪೋಷಣೆ ಅಗತ್ಯವಿದೆ. ತಂಡದವರು ದಿನಕ್ಕೊಂದು ರಸ್ತೆ ಆಯ್ಕೆ ಮಾಡಿಕೊಂಡು ನಿರಂತರವಾಗಿ ನೀರುಣಿಸುವ ಕೆಲಸಕ್ಕೆ ಕೈ ಹಾಕಿದ್ದಾರೆ.

ನಗರದ ರಸ್ತೆ ಬದಿ, ವಿಭಜಕಗಳಲ್ಲಿ ನಗರಸಭೆಯಿಂದ ಗಿಡಗಳನ್ನು ಬೆಳೆಸಬೇಕು. ಆದರೆ ಅವರು ಮಾಡಬೇಕಾದ ಕೆಲಸವನ್ನು ಕೋಲಾರಮ್ಮ ಹಸಿರು ಪಡೆಯವರು ಮಾಡುತ್ತಿದ್ದಾರೆ. ಗಿಡಗಳನ್ನು ನಾಟಿ ಮಾಡುತ್ತಿರುವ ವಿಚಾರವನ್ನು ನಗರಸಭೆಯ ಅಧಿಕಾರಿಗಳ ಗಮನಕ್ಕೆ ತಂದಿದ್ದು, ನಗರಸಭೆಯಲ್ಲೇ ಲಭ್ಯವಿರುವ ಟ್ಯಾಂಕರ್ ಹಾಗೂ ನೀರು ಒದಗಿಸಲು ಮನವಿ ಮಾಡಲಾಗಿತ್ತು. ಆದರೆ ಸ್ಪಂದಿಸಿಲ್ಲ ಎಂಬುದು ಸದಸ್ಯರ ಅಸಮಾಧಾನ.

ಕಳೆದ 10 ವರ್ಷಗಳಿಂದ ಗಿಡಗಳನ್ನು ನಾಟಿ ಮಾಡುವ ಕಾಯಕದಲ್ಲಿ ಭಾಗಿಯಾಗಿರುವ ಸಂಘ-ಸಂಸ್ಥೆಯವರು ಬೇಸಿಗೆಯಲ್ಲಿ ನೀರುಣಿಸುತ್ತಾರೆ. ಹೀಗಾಗಿ ನಗರದಲ್ಲಿ ಸಾವಿರಾರು ಮರಗಳಾಗಿ ಬೆಳೆದು ನಿಂತಿದೆ. ಗಿಡಗಳಿಗೆ ನೀರುಣಿಸಲು ಕೆಲ ಬಾರಿ ದಾನಿಗಳು ನೆರವಾಗುತ್ತಾರೆ. ದಾನಿಗಳ ನೆರವು ದೊರೆಯದೆ ಇದ್ದಾಗ ತಂಡದ ಸದಸ್ಯರೇ ಹಣ ಹಾಕಿ ಗಿಡಗಳಿಗೆ ನೀರುಣಿಸುತ್ತೇವೆ. ದಾನಿಗಳು ಯಾರಾದರೂ ಟ್ಯಾಂಕರ್ ಒದಗಿಸಿದ್ದೇ ಆದರೆ ಕೆಲಸಕ್ಕೆ ವೇಗ ಸಿಗುತ್ತದೆ, ಆ ಮೂಲಕ ನಗರವನ್ನು ಹಸಿರೀಕರಣ ಮಾಡಲು ಒತ್ತು ನೀಡಲಾಗುವುದು ಎಂದು ರೋಟರಿ ನಂದಿ ಕೋಲಾರ ಅಧ್ಯಕ್ಷ ಬಿ.ಬಾಬು ಹೇಳಿದರು.

ನಗರವನ್ನು ಹಸಿರೀಕರಣ ಮಾಡುವ ಉದ್ದೇಶದಿಂದ ಸ್ವಯಂ ಪ್ರೇರಿತರಾಗಿ ಗಿಡಗಳನ್ನು ನಾಟಿ ಮಾಡಲಾಗುತ್ತಿದೆ, ಪೋಷಣೆಯ ಜವಾಬ್ದಾರಿ ಹೊತ್ತಿದ್ದೇವೆ, ಬೇಸಿಗೆಯಲ್ಲಿ ಒಣಗದಂತೆ ನೀರುಣಿಸಲಾಗುತ್ತಿದೆ.