ಮಾವು ಬೆಳೆಗಾರರು ಮತ್ತೆ ಕಂಗಾಲು

ಮಾವು ಬೆಳೆಗಾರರು ಬೆಲೆ ಕುಸಿತಕ್ಕೆ ತತ್ತರಿಸಿದ್ದು, ರಾಜ್ಯದಲ್ಲೇ ಹೆಚ್ಚಾಗಿ ಮಾವು ಬೆಳೆಯುವ ಶ್ರೀನಿವಾಸಪುರ, ಮುಳಬಾಗಿಲು ಮತ್ತಿತರ ತಾಲೂಕುಗಳಲ್ಲಿ ಎರಡು ವರ್ಷಗಳಿಂದ ಸಾಕಷ್ಟು ನಷ್ಟಕ್ಕೆ ಒಳಗಾಗಿದ್ದಾರೆ.

ರೈತರು ಉತ್ಪಾದನಾ ವೆಚ್ಚ ಕೆಜಿಗೆ 8.6 ರೂ.ಇರುವುದರಿಂದ ಕನಿಷ್ಠ 15ರಿಂದ 20ರೂ. ಕೇಳುತ್ತಿದ್ದಾರೆ. 2025-26 ಕ್ವಿಂಟಾಲ್‌ಗೆ 1,616 ರೂ.ಇದ್ದ 2026-27 1,750 ರೂ. ಹೆಚ್ಚಿಸಲಾಗಿದೆ. ಆದರೆ ಇದು ಮಾರುಕಟ್ಟೆ ಬೆಲೆ ಕುಸಿದಾಗ ಶೇ.25 ವ್ಯತ್ಯಾಸ ಮಾತ್ರ ಕೊಡುವ ಪಿಡಿಪಿಎಸ್ ಯೋಜನೆಯಾಗಿದ್ದು, ನೇರ ಖರೀದಿ ಅಲ್ಲವಾಗಿದೆ.

ಮುಳಬಾಗಿಲು ತಾಲೂಕಿನಲ್ಲಿ ಜೂ.27 ರಿಂದ 30ರ ವರೆಗೆ 6,257 ಕ್ವಿಂಟಾಲ್ ಮಾತ್ರ ಬೆಂಬಲ ಬೆಲೆಗೆ ನೋಂದಣಿಯಾಗಿದೆ. ತದನಂತರ ಬಂದ ರೈತರು ವಾಪಸ್ ಮೊಬೈಲ್ ಸಂಖ್ಯೆ ನೀಡಿ ತೆರಳುತ್ತಿದ್ದಾರೆ. ಜೂ 29ಕ್ಕೆ ಹೆಕ್ಟೇರ್‌ನಲ್ಲಿ ಶ್ರೀನಿವಾಸಪುರದಲ್ಲಿ 7,089, ಮುಳಬಾಗಿಲು 658, ಕೋಲಾರ 360, ಬಂಗಾರಪೇಟೆ 67, ಮಾಲೂರು 15 ಕ್ವಿಂಟಾಲ್ ನೋಂದಣಿಯಾಗಿದೆ.

ದಲ್ಲಾಳಿಗಳ ಸಂಚು?

6 ತಿಂಗಳ ಮೊದಲೇ ಕಡಿಮೆ ಬೆಲೆಗೆ ತೋಟದ ಲೆಕ್ಕದಲ್ಲಿ ವ್ಯಾಪಾರಿಗಳು ಮತ್ತು ದಲ್ಲಾಳಿಗಳು ರೈತರಿಂದ ಮಾವು ಖರೀದಿ ಮಾಡಿದ್ದು, ಈಗ ರೈತರಿಗೆ ಹೋಗಬೇಕಾದ ಬೆಂಬಲ ಬೆಲೆ ಪಡೆಯಲು ವ್ಯಾಪಾರಿಗಳೇ ತಮ್ಮ ಹೆಸರಿನ ಪಹಣಿಯಲ್ಲಿ ನೋಂದಣಿ ಮಾಡಿಸುವುದು, ಟ್ಯಾಕ್ಟರ್ ಬದಲು ಈಚರ್ ಮಿನಿ ಲಾರಿಗಳಲ್ಲಿ ಎಪಿಎಂಸಿ ಮಾರುಕಟ್ಟೆಗೆ ಲೋಡ್ ತಂದು ಇಲ್ಲಿ ಇಳಿಸದೆ ರಸೀದಿ ಹಾಕಿಸಿ ದೂರದ ಮಾರುಕಟ್ಟೆಗೆ ಕಳಿಸುವ ಹುನ್ನಾರಕ್ಕೆ ಎಪಿಎಂಸಿ ಮತ್ತು ತೋಟಗಾರಿಕೆ ಅಧಿಕಾರಿಗಳು ಬ್ರೇಕ್ ಹಾಕಿರುವ ಕಾರಣ ವ್ಯಾಪಾರಿಗಳ ಆಕ್ರೋಶಕ್ಕೆ ಗುರಿಯಾಗಿದ್ದಾರೆ.

ಸರ್ಕಾರದ ಆದೇಶದಂತೆ ಮಾವು ಬೆಳೆಗಾರರ ಆಧಾರ್ ಮೊಬೈಲ್ ಸಂಖ್ಯೆ ಮೂಲಕ ನೋಂದಣಿ ಮಾಡಿಕೊಳ್ಳಲಾಗುತ್ತಿದೆ. ಜೂ.30ಕ್ಕೆ ನಿರ್ದಿಷ್ಟ ಗುರಿ ದಾಟಿದ ಕಾರಣ ಜು.1ರಂದು ನೋಂದಣಿಗೆ ಅವಕಾಶ ಸಿಕ್ಕಿಲ್ಲ. ಆದರೂ ರೈತರಿಂದ ಮಾಹಿತಿ ಪಡೆದುಕೊಳ್ಳಲಾಗುತ್ತಿದ್ದು, ಆದೇಶ ಬಂದ ತಕ್ಷಣ ಅವರಿಗೆ ಮಾಹಿತಿ ನೀಡಿ ನೋಂದಣಿ ಮಾಡಿಸಲಾಗುವುದು.

ರೈತರಿಗೆ ಮಾತ್ರ ಬೆಂಬಲ ಬೆಲೆ ಸಿಗಬೇಕು ಎಂಬ ಸಂಕಲ್ಪದೊಂದಿಗೆ ತೋಟಗಾರಿಕೆ ಮತ್ತು ಎಪಿಎಂಸಿ ಅಧಿಕಾರಿಗಳು ಮತ್ತು ಸಿಬ್ಬಂದಿ ಗೃಹರಕ್ಷಕ ಸಿಬ್ಬಂದಿ ರಕ್ಷಣೆಯಲ್ಲಿ ಕಾರ್ಯನಿರ್ವಹಿಸಲಾಗುತ್ತಿದೆ. ಮುಳಬಾಗಿಲು ಮತ್ತು ತಾಯಲೂರುಗಳಲ್ಲಿ ಮಾವು ವ್ಯಾಪಾರಿಗಳು ಖರೀದಿ ಮಾಡುತ್ತಿದ್ದು, ಸಿಸಿಕ್ಯಾಮರಾ ಹಾಕಿ ಕಣ್ಣಾವಲು ಇಡಲಾಗಿದೆ.