ಮದ್ದೇರಿ ಕೆರೆನೀರು ಅಶುದ್ಧ

ಹೌದು.. ಕೋಲಾರ ತಾಲೂಕು ಮದ್ದೇರಿ ಕೆರೆಯ ನೀರು ಬಣ್ಣ ಬದಲಿಸಿದ್ದು, ಕೆರೆಯಲ್ಲಿ ಜಾಲಿ ಮರಗಳು ಬೆಳೆದು ದುರ್ವಾಸನೆ ಬರುತ್ತಿದೆ. ಜತೆಗೆ ಕೆರೆಯ ಒಡಲಿಗೆ ಮದುವೆ ಮತ್ತೀತರೆ ಸಮಾರಂಭದಲ್ಲಿ ಬಳಸಿದ ಪ್ಲಾಸ್ಟಿಕ್​ ಬಾಟಲ್​, ಊಟದ ತಟ್ಟೆ ಮತ್ತೀತರೆ ಪ್ಲಾಸ್ಟಿಕ್​ ವಸ್ತುಗಳನ್ನು ಸುರಿದು ಹೋಗುತ್ತಿದ್ದಾರೆ. ಜತೆಗೆ ಕೋಳಿ ತ್ಯಾಜ್ಯವೂ ಕೆರೆಯ ಸ್ವರೂಪ ಇನ್ನಿಲ್ಲದಂತೆ ಮಾಡಿದೆ.

ಮಳೆ ಬಂದರಷ್ಟೆ ಕೆರೆ ಮತ್ತು ಹಳ್ಳಕೊಳ್ಳಗಳಲ್ಲಿ ನೀರು ತುಂಬುತ್ತದೆ. ಕೆರೆ ಮತ್ತು ಹಳ್ಳಗಳಲ್ಲಿ ಸಂಗ್ರಹವಾಗಿದ್ದ ಅಲ್ಪ ಸ್ವಲ್ಪ ನೀರು ಬಿರು ಬಿಸಿಲಿನ ಹೊಡೆತಕ್ಕೆ ಆವಿಯಾಗುತ್ತಿದೆ. ತ್ಯಾಜ್ಯ, ಗಿಡ&ಗಂಟಿ ಬೆಳೆದು ಕೊಳೆತಿರುವುದರಿಂದ ನೀರಿನ ಬಣ್ಣ ಕಪ್ಪು ವರ್ಣಕ್ಕೆ ತಿರುಗಿ ಗಬ್ಬುನಾತ ಬೀರುತ್ತಿದೆ. ದನ& ಕರುಗಳು ಕುಡಿಯಲು ಸಹ ಯೋಗ್ಯವಲ್ಲದಂತಾಗಿದೆ.ಇದೇ ಕೆರೆಯಲ್ಲಿ ಪ್ರಾಕೃತಿಕವಾಗಿ ದೊರೆಯುವ ನೀರು ಒಂದು ಕಾಲದಲ್ಲಿ ಯಥೇಚ್ಛವಾಗಿದ್ದಾಗ ಕೃಷಿಗೆ ಬಳಕೆ ಮಾಡುತ್ತಿದ್ದರು.

ರಾಜಕಾಲುವೆ ಒತ್ತುವರಿ ಅಗತ್ಯ: ಕೋಲಾರ ಜಿಲ್ಲೆ ಮೊದಲೇ ಬರಡು ಜಿಲ್ಲೆಯಾಗಿ ಗುರುತಿಸಿಕೊಂಡಿದೆ. ಕೃಷಿ ಭೂಮಿಯ ಹೆಚ್ಚಳ, ಏರುತ್ತಿರುವ ಜನಸಂಖ್ಯೆ ನಿರ್ವಹಣೆ ಸರಿದೂಗಿಸಲು ನೀರು ಒದಗಿಸುವ ಕೆಲಸ ನಿರಂತರವಾಗಿರಬೇಕಿದೆ. ಮಳೆಗಾಲದಲ್ಲಿ ಸುತ್ತಮುತ್ತಲಿನ ನೀರು ಕೆರೆಗಳಿಗೆ ಸುಲಲಿತವಾಗಿ ಹರಿಯುವಂತೆ ನೂರಾರು ವರ್ಷಗಳ ಹಿಂದೆ ರಾಜಕಾಲುವೆ ನಿರ್ಮಿಸಿಕೊಂಡು ಬರಲಾಗಿದೆ. ಅಂದಿನ ಕಾಲದ ನಿಯಮಗಳನ್ನು ಧಿಕ್ಕರಿಸಿರುವ ಇಂದಿನ ನಾಗರಿಕ ಸಮಾಜ ರಾಜಕಾಲುವೆ ಮತ್ತು ಕೆರೆಗಳನ್ನು ಅತಿಕ್ರಮಣ ಮಾಡಿ ನೀರು ಸಂಗ್ರಹವಾಗಲು ಜಾಗವಿಲ್ಲದಂತೆ ಮಾಡಿರುವುದರಿಂದ ಬರ ಪರಿಸ್ಥಿತಿ ಹೆಚ್ಚಾಗಿದೆ. ಇನ್ನು ಗ್ರಾಮಗಳಲ್ಲಿ ನಿರ್ಮಿಸಲಾದ ಊರ ಕೆರೆಗಳು, ಪುಷ್ಕರಣೆಗಳು ಜನರ ಉಪೇೆಯಿಂದ ಕೊಳಚೆ ಗುಂಡಿಗಳಾಗಿವೆ.