ರಾಜಿಯಿಂದ ಬಡವನಿಗೂ ನ್ಯಾಯ

ಕೋಲಾರ/ಟೇಕಲ್​: ಶಾಕಸರು, ತಾಲೂಕು ಆಡಳಿತ ನಡೆ, ಗ್ರಾಮದ ಕಡೆ ಕಾರ್ಯಕ್ರಮವು ಸೋಮವಾರ ಅಂತ್ಯಗೊಂಡಿದ್ದು, ಸಾರ್ವಜನಿಕರು ವಿವಿಧ ರೀತಿಯ ಸಮಸ್ಯೆಗಳ ಬಗ್ಗೆ ಶಾಸಕ ಕೆ.ವೈ.ನಂಜೇಗೌಡ ಅವರ ಗಮನಕ್ಕೆ ತಂದರು.

ಕಳೆದ ಒಂದು ತಿಂಗಳಿಂದ ಕಾರ್ಯಕ್ರಮವನ್ನು ಕ್ಷೇತ್ರದ ವ್ಯಾಪ್ತಿಯ 26 ಗ್ರಾಮ ಪಂಚಾಯಿತಿವಾರು ನಡೆಸಿಕೊಂಡು ಬಂದಿದ್ದು, ಸೋಮವಾರ ಕೊಂಡಶೆಟ್ಟಹಳ್ಳಿ, ಕೆಜಿ ಹಳ್ಳಿಯಿಂದ ಒಟ್ಟು 241 ಅರ್ಜಿಗಳು ಸಲ್ಲಿಕೆಯಾಗಿದ್ದು, ಬನಹಳ್ಳಿ, ಟೇಕಲ್​ ಗ್ರಾ.ಪಂ ವ್ಯಾಪ್ತಿಯಲ್ಲೂ ಕಾರ್ಯಕ್ರಮ ರಾತ್ರಿ 8 ಗಂಟೆಯಾದರು ಮುಂದುವರೆಯಿತು.

ಶಾಸಕ ಕೆ.ವೈ.ನಂಜೇಗೌಡ ಅವರಿಗೆ ಸಾರ್ವಜನಿಕರು ಅರ್ಜಿಗಳನ್ನು ಸಲ್ಲಿಸುವ ಮೂಲಕ ಸ್ಥಳದಲ್ಲೇ ಪರಿಹಾರ ಕಂಡುಕೊಂಡರು. ಗೊಂದಲ ಇದ್ದ ಅರ್ಜಿಗಳನ್ನು ಪರಿಶೀಲಿಸಿ ಬಗೆಹರಿಸಿ ಕೊಡುವುದಾಗಿ ಭರವಸೆ ನೀಡಿದರು.

ಶಾಸಕ ಕೆ.ವೈ.ನಂಜೇಗೌಡ ಮಾತನಾಡಿ, ಸಾಮಾನ್ಯ ಕಟ್ಟೆಯಲ್ಲಿ ರಾಜೀ ಪಂಚಾಯಿತಿ ನಡೆದರೆ ಬಡವನಿಗೂ ನ್ಯಾಯ ಸಿಗುತ್ತದೆ ಎಂಬ ನಂಬಿಕೆಯಿದೆ. ಪಂಚಾಯತಿ ವ್ಯಾಪ್ತಿಯಲ್ಲಿ ಸಾರ್ವಜನಿಕರ ಸಮಸ್ಯೆಗಳಿಗೆ ಸಂಬಂಧಿಸಿದಂತೆ ಆವಾಲುಗಳನ್ನು ಸ್ವೀಕರಿಸಿ ಸ್ಥಳದಲ್ಲೇ ಪರಿಹಾರ ಕಲ್ಪಿಸಲಾಗಿದೆ ಎಂದು ಹೇಳಿದರು.

ತಾಲೂಕಿನಲ್ಲಿ 32 ಇಲಾಖೆಯಲ್ಲಿ ಯಾವುದೇ ಸಮಸ್ಯೆ ಇದ್ದಲ್ಲಿ ಅಂತ ಫಲಾನುಭವಿಗಳಿಗೆ ಸ್ಥಳದಲ್ಲೇ ಪರಿಹಾರ ಕಲ್ಪಿಸುವ ಮುಟ್ಟಿನಿಂದ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ. ಇದಕ್ಕೆ ಸಾರ್ವಜನಿಕರಿಂದಲೂ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಮಾಲೂರಿನಲ್ಲಿ ನಡೆದ ಕಾರ್ಯಕ್ರಮ ರಾಜ್ಯಮಟ್ಟದಲ್ಲೂ ಸದ್ದು ಮಾಡಿದೆ. ಇದೆಲ್ಲ ಅಧಿಕಾರಿಗಳ, ಜನರ ಸಹಕಾರ ಕಾರಣವಾಗಿದೆ ಎಂದು ಸಂತಸ ವ್ಯಕ್ತಪಡಿಸಿದರು.

ತಹಶೀಲ್ದಾರ್​ ರೂಪ ಮಾತನಾಡಿ, ಸಮಸ್ಯೆ ಇದ್ದಲ್ಲಿ ಜನ ತಮ್ಮನ್ನು ನೇರವಾಗಿ ಸಂಪರ್ಕಿಸಬಹುದು, ಅಧಿಕಾರಿ ಸಿಗುವುದಿಲ್ಲ ಎಂಬ ಅನುಮಾನ ಬೇಡ ಎಂದು ತಿಳಿಸಿದರು.

ನಿವೇಶನ ರಹಿತರಿಗೆ ಹಕ್ಕು ಪತ್ರ ವಿತರಿಸುವುದು, 32 ಉಪ ಗ್ರಾಮಗಳನ್ನು ಮಂಜೂರು ಈಗಾಗಲೇ ಗುರುತಿಸಲಾಗಿದ್ದು, ಸರ್ಕಾರದ ಗಮನಕ್ಕೆ ತಂದು ಇತ್ಯರ್ಥಪಡಿಸಿಕೊಳ್ಳಲಾಗುವುದು ಎಂದು ಹೇಳಿದರು.

ಗೃಹಲಕ್ಷ್ಮಿ ಹಣ ಜಮಾ ಆಗದೆ ಇರುವ ಬಗ್ಗೆ ಚೆಂಬೆ ರೇಣುಕಮ್ಮ ದೂರು ಸಲ್ಲಿಸಿದ್ದು, ಸ್ಥಳದಲ್ಲೇ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಅಧಿಕಾರಿ ಪರಿಶೀಲಿಸಿದಾಗ ಅವರಿಗೆ 46,000 ಹಣ ಬಂದಿರುವುದು ಬ್ಯಾಂಕ್​ ಆಫ್​ ಬರೋಡ ಅಕೌಂಟಿಗೆ ಬಂದಿರುವುದಾಗಿ ತಿಳಿಸಿದರು.

ಭೂ ದಾಖಲೆ ತಿದ್ದುಪಡಿ, ಸರ್ವೇ ಅರ್ಜಿ ವಿಲೇವಾರಿ ಆಗದೆ ಇರುವುದು, ರೇಷನ್​ ಕಾರ್ಡ್​ ವಿತರಣೆ, ವಿದ್ಯುತ್​ ಸಮಸ್ಯೆ, ಗ್ರಾಮೀಣ ಭಾಗದಲ್ಲಿ ಎನ್​ಒಸಿ ನೀಡದೆ ಇರುವುದು ಬಗ್ಗೆ ದೂರುಗಳು ಸಲ್ಲಿಕೆಯಾದವು.

ಕೊಂಡೆಶೆಟ್ಟನಹಳ್ಳಿ ಗ್ರಾಮ ಸರ್ಕಾರ ಶಾಲೆ ಮುಂಭಾಗದಲ್ಲಿ ನಿತ್ಯ ನೂರಾರು ವಾಹಗಳು ಸಂಚರಿಸುತ್ತವೆ. ರಸ್ತೆ ಉಬ್ಬುಗಳು ಇಲ್ಲದೆ ಇರುವುದರಿಂದ ವೇಗಕ್ಕೆ ಮಿತಿಯಿಲ್ಲ. ಸಂಚರಿಸಲು ಭಯವಾಗುತ್ತದೆ ಎಂದು ಶಾಲಾ ಮಕ್ಕಳು ಶಾಸಕರ ಗಮನಕ್ಕೆ ತಂದರು, ಕೂಡಲೇ ರಸ್ತೆ ಉಬ್ಬು ನಿರ್ಮಿಸುವಂತೆ ಅಧಿಕಾರಿಗಳಿಗೆ ಶಾಸಕ ನಂಜೇಗೌಡ ಸೂಚಿಸಿದರು.

ನಿಧರಮಂಗಲದಲ್ಲಿ ಶ್ರೀ ಶಕ್ತಿ ಸಂಘದ 131 ಸದಸ್ಯರು, ತಲಾ 12 ಸಾವಿರ ರೂ.ನಂತೆ ಡಿಸಿಸಿ ಬ್ಯಾಂಕಿನಲ್ಲಿ ಠೇವಣಿ ಇಡಲಾಗಿದೆ. ಈಗಾಗಲೇ ತೆಗೆದುಕೊಂಡಿರುವ ಸಾಲ ಮರುಪಾವತಿ ಮಾಡಿದ್ದು, ಮರು ಸಾಲ ನೀಡುತ್ತಿಲ್ಲ. ಠೇವಣಿ ಮೊತ್ತ ಕೇಳಿದರೂ ಅಧಿಕಾರಿಗಳು ಕೊಡುತ್ತಿಲ್ಲ ಎಂದು ಸಂದ ಸದಸ್ಯರು ನಂಜೇಗೌಡರ ಗಮನಕ್ಕೆ ತಂದರು. ಇದಕ್ಕೆ ಸ್ಪಂದಿಸಿದ ಶಾಸಕ ಬ್ಯಾಂಕಿನ ಡಿಎಂಗೆ ಚರ್ಚಿಸಿ ನ್ಯಾಯ ದೊರಕಿಸುವುದಾಗಿ ತಿಳಿಸಿದರು.