ಕ್ರೀಡಾಪಟುಗಳ ಸುರಕ್ಷತೆಗೆ ಒತ್ತು ನೀಡಿ

ಕೋಲಾರ: ದೊಡ್ಡ ಮಟ್ಟದ ಮ್ಯಾರಥಾನ್​ ಓಟ ಆಯೋಜನೆ ಮಾಡುವುದು ಸುಲಭದ ಮಾತಲ್ಲ, ಇದರಲ್ಲಿ ಕ್ರೀಡಾಪಟುಗಳ ಸುರಕ್ಷತೆಗೆ ಒತ್ತು ನೀಡಬೇಕಿದೆ, ಸ್ಥಳಿಯವಾಗಿ ಅಧಿಕಾರಿಗಳು ಸಭೆ ನಡೆಸಿ ಕಾರ್ಯಕ್ರಮ ಯಶಸ್ಸಿಗೆ ಸಹಕಾರ ಕೋರಬೇಕು ಎಂದು ಜಿಲ್ಲಾಧಿಕಾರಿ ಡಾ.ಎಂ.ಆರ್​.ರವಿ ಹೇಳಿದರು.

ನಗರದ ಜಿಲ್ಲಾಡಳಿತ ಭವನದಲ್ಲಿ ಜುಲೈ 12ರಂದು ಹಮ್ಮಿಕೊಂಡಿರುವ ಮ್ಯಾರಥನ್​ ಓಟ ಕುರಿತು ಮಂಗಳವಾರ ನಡೆದ ಪೂರ್ವಭಾವಿ ಸಭೆಯಲ್ಲಿ ಮಾತನಾಡಿ, ಯಾವುದೇ ಕ್ರೀಡೆ ಆಯೋಜನೆ ಮಾಡಬೇಕಾದರೆ ಸ್ಥಳಿಯರ ಸಹಕಾರ ಅಗತ್ಯ, ಅದಕ್ಕೂ ಮುಂಚೆ ವ್ಯವಸ್ಥಿತಿವಾಗಿ ರೂಪರೇಷಗಳು ಆಗಬೇಕು ಎಂದು ತಿಳಿಸಿದರು.

ಬಿಯ್ಯಾಂಡ್​ ಎಕ್ಸಲೆನ್ಸ್​ ಸ್ಪೋರ್ಟ್ಸ್​ ಟ್ರಸ್ಟ್​ ಮುಖ್ಯಸ್ಥ ನವೀನ್​ ಮಾತನಾಡಿ, ಜುಲೈ 12ರಂದು ಬೆಳಗ್ಗೆ 6ಕ್ಕೆ ಕೆಜಿಫ್ ನಗರದಲ್ಲಿ ಕೆಜಿಫ್ ​ ಅಲ್ಟ್ರಾ-2026 ಅಡಿಯಲ್ಲಿ ಮ್ಯಾರಥನ್​ ಕ್ರೀಡೆ ಆಯೋಜಿಸಲಾಗಿದೆ. ಮ್ಯಾರಥಾನ್​ ಅನ್ನು ವಿವಿಧ ವಿಭಾಗಗಳಾಗಿ ವಿಂಗಡಿಸಲಾಗಿದ್ದು, 5 ಮೈಲು (8 ಕಿ.ಮೀ), 10 ಮೈಲು (16 ಕಿ.ಮೀ), 50 ಕಿ.ಮೀ ಮತ್ತು 100 ಕಿ.ಮೀ ವಿಭಾಗಗಳ ಓಟವನ್ನು ಆಯೋಜಿಸಲು ಆಯೋಜಿಸಲಾಗಿದೆ ಎಂದು ಮಾಹಿತಿ ನೀಡಿದರು.

ಕೆಜಿಎಫ್​ ನಗರಸಭೆ ಮೈದಾನದಿಂದ ಮ್ಯಾರಥಾನ್​ ಆರಂಭಗೊಂಡು, ಸ್ಮಿತ್​ ರೋಡ್​, ಚಾಂಪಿಯನ್​ ರೀಫ್ಸ್​ ಮತ್ತು ಕೋಟಿಲಿಂಗೇಶ್ವರ ಕ್ಷೇತ್ರ ಒಳಗೊಂಡ ಮಾರ್ಗದಲ್ಲಿ ಸಾಗಲಿದೆ. 100 ಕಿ.ಮೀ ನಂತಹ ದೀರ್ಘಾವಧಿಯ ಓಟವು ರಾತ್ರಿಯವರೆಗೂ ಮುಂದುವರೆಯಲಿದೆ. ಕ್ರೀಡಾಪಟುಗಳ ಸುರಕ್ಷತೆಗಾಗಿ ಪ್ರತಿ 2 ಕಿ.ಮೀ ವ್ಯಾಪ್ತಿಯಲ್ಲಿ ಬೈಕ್​ ಹಾಗೂ ಕಾರ್​ ವಾಲಂಟಿಯರ್​ಗಳು ಕಾರ್ಯನಿರ್ವಹಿಸಲಿದ್ದಾರೆ. ನಿಗದಿಪಡಿಸಿದ ಸಮಯದೊಳಗೆ ಓಟ ಮುಗಿಸಲು ಸಾಧ್ಯವಾಗದ ಸ್ಪರ್ಧಿಗಳನ್ನು ಸುರಕ್ಷಿತವಾಗಿ ಕರೆತರಲು ಸ್ವೀಪರ್​ ವಾಹನಗಳ ವ್ಯವಸ್ಥೆ ಮಾಡಲಾಗುತ್ತದೆ, ಓಟದಲ್ಲಿ ಪಾಲ್ಗೊಳ್ಳುವವರು ಆನ್​ಲೈನ್​ ನೋಂದಣಿ ಮಾಡಿಕೊಳ್ಳಬೇಕು ಎಂದು ಮಾಹಿತಿ ನೀಡಿದರು.

ಕರ್ನಾಟಕ ಅಥ್ಲೇಟಿಕ್​ ಅಸೂಸಿಯೇಷನ್​ ಕಾರ್ಯದರ್ಶಿ ರಾಜುವೇಲು, ಮಾತನಾಡಿ, 100 ಕಿಮಿ ಮ್ಯಾರಥಾನ್​ ಓಟ ಆಯೋಜನೆ ಮಾಡುವುದು ಸುಲಭದ ಮಾತಲ್ಲ, ಇದು ಜನರ ಜತೆ ಚೆಲ್ಲಾಟವಾಡಿದಂತಾಗುತ್ತದೆ, ಸಾಮಾನ್ಯರು ಓಟ ಮಾಡಲು ಸಾಧ್ಯವಿಲ್ಲ, ಹೊಸಬರು ಬಂದು ಓಟ ಮಾಡಿದಾಗ ಸಮಸ್ಯೆ ಎದುರಾಗುವ ಸಾಧ್ಯತೆ ಇರುತ್ತದೆ ಎಂದು ಸಭೆಗೆ ತಿಳಿಸಿದರು.

ಜಿಲ್ಲಾಧಿಕಾರಿ ಡಾ.ಎಂ.ಆರ್​.ರವಿ ಮಾತನಾಡಿ, ಕ್ರೀಡಾಕೂಟದಲ್ಲಿ ಭಾಗವಹಿಸುವ ಕ್ರೀಡಾಪಟುಗಳ ಸುರಕ್ಷತೆಗೆ ಮೊದಲ ಆದ್ಯತೆ ನೀಡಬೇಕು. ಮ್ಯಾರಥಾನ್​ ಮಾರ್ಗವು ಯಾವುದೇ ಕಾರಣಕ್ಕೂ ಕರ್ನಾಟಕದ ಗಡಿ ದಾಟಿ ಆಂಧ್ರಪ್ರದೇಶವನ್ನು ಪ್ರವೇಶಿಸಬಾರದು, ಕೇವಲ ಜಿಲ್ಲೆಯ ಗಡಿಯೊಳಗೆ ಮಾರ್ಗ ಇರಬೇಕು, ಸಿದ್ದಪಡಿಸಿರುವ ಮಾರ್ಗವನ್ನು ಪರಿಸ್ಕರಿಸಬೇಕು ಎಂದು ಸೂಚಿಸಿದರು.

ಸ್ಥಳಿಯ ಸಂಘ- ಸಂಸ್ಥೆಗಳು, ಹಿರಿಯ ಕ್ರೀಡಾಪಟುಗಳು ಮತ್ತು ಪೊಲೀಸ್​ ಇಲಾಖೆಯನ್ನು ಸಮರ್ಥವಾಗಿ ಬಳಸಿಕೊಂಡು ಕಾರ್ಯಕ್ರಮವನ್ನು ಯಶಸ್ವಿಗೊಳಿಸಬೇಕು, ಇದಕ್ಕೆ ಉಪ ವಿಭಾಗಾಧಿಕಾರಿ ಜಂಬಗಿ ರೇಣುಕಾ ಪ್ರಸಾದ್​ ದಿಲೀಪ್​ ಅವರ ನಾಯಕತ್ವದಲ್ಲಿ ಸ್ಥಳಿಯ ಮಟ್ಟದಲ್ಲಿ ಸಭೆ ನಡೆಸಿ ರೂಪರೇಷಗಳ್ನು ರೂಪಿಸಬೇಕು ಎಂದು ತಿಳಿಸಿದರು.

ಸಭೆಯಲ್ಲಿ ಜಿಲ್ಲಾ ಪಂಚಾಯಿತಿ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಡಾ. ಪ್ರವಿಣ್​.ಪಿ.ಬಾಗೇವಾಡಿ, ಕೆಜಿಎಫ್​ ಪೊಲೀಸ್​ ವರಿಷ್ಠಾಧಿಕಾರಿ ಶಿವಾಂಶು ರಜಪೂತ, ಉಪವಿಭಾಗಾಧಿಕಾರಿ ಜಂಬಗಿ ರೇಣುಕಾ ಪ್ರಸಾದ್​ ದಿಲೀಪ್​, ಕೆಜಿಎಫ್​ ತಹಸೀಲ್ದಾರ್​ ಭರತ್​ ಕುಮಾರ್​, ಯುವಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯ ಸಹಾಯಕ ನಿರ್ದೇಶಕಿ ಟಿ.ಜಯಲಕ್ಷಿ$್ಮ, ನಗರಸಭೆ ಪೌರಾಯುಕ್ತ ವೆಂಕಟೇಶ ನಾಗನೂರ, ಜಿಲ್ಲಾ ಅಥೆ್ಲೇಟಿಕ್​ ಅಸೂಸಿಯೇಷನ್​ ಅಧ್ಯಕ್ಷ ಜಗನ್ನಾಥ್​, ಜಿಲ್ಲಾ ಪ್ಯಾರಾಲಿಂಪಿಕ್ಸ್​ ಅಧ್ಯಕ್ಷ ಜಯದೇವ, ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಅಧಿಕಾರಿ ಡಾ.ಶ್ರೀನಿವಾಸ್​ ಹಾಜರಿದ್ದರು.