ಉದ್ಯಾನದಲ್ಲಿನ ಜಾಗ ವಾಣಿಜ್ಯ ಚಟುವಟಿಕೆಗೆ ನೀಡಬೇಡಿ

ಬೆಂಗಳೂರು: ರಾಜಧಾನಿಯಲ್ಲಿ ಜನಸಂಖ್ಯೆ ಹೆಚ್ಚಾಗಿದ್ದು, ಸಾಧ್ಯವಾದರೆ ಹಸಿರು ವಾಪ್ತಿಯನ್ನು ಹೆಚ್ಚಿಸಬೇಕು, ಅದನ್ನು ಬಿಟ್ಟು ಉದ್ಯಾನಗಳಲ್ಲಿನ ಶೇ. 5 ಜಾಗವನ್ನು ವಾಣಿಜ್ಯ ಚಟುವಟಿಕೆಗಳಿಗಾಗಿ ಬಳಸಲು ಸರ್ಕಾರ ಅನುಮತಿ ನೀಡುವುದು ಸರಿಯಲ್ಲ ಎಂದು ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಪ್ರೊ. ಪುರುಷೋತ್ತಮ ಬಿಳಿಮಲೆ ಹೇಳಿದ್ದಾರೆ.

ಬಸವನಗುಡಿಯ ನ್ಯಾಷನಲ್​ ಕಾಲೇಜಿನ ಡಾ. ಎಚ್​.ಎನ್​. ಮಲ್ಟಿಮೀಡಿಯಾ ಸಭಾಂಗಣದಲ್ಲಿ ಕದಂಬ ಪ್ರಕಾಶನ ಹಮ್ಮಿಕೊಂಡಿದ್ದ "ಈಚಲ ಗರಿ ಹೆಣಿಗೆ' ಕೃತಿ ಬಿಡುಗಡೆ ಸಮಾರಂಭದಲ್ಲಿ ಮಾತನಾಡಿದರು.

ನಾಡಪ್ರಭು ಕೆಂಪೇಗೌಡರು ದೂರದೃಷ್ಟಿಯಿಂದ ಬೆಂಗಳೂರನ್ನು ಕಟ್ಟಿದ್ದರು. ಅದು ಈಗ ಬೃಹತ್​ ಪ್ರಮಾಣದಲ್ಲಿ ಬೆಳೆದಿದೆ. ಹೀಗಾಗಿ ಜನರಿಗೆ ಉತ್ತಮ ಪರಿಸರವನ್ನು ಒದಗಿಸುವುದು ಸರ್ಕಾರದ ಕರ್ತವ್ಯ. ಗಾರ್ಡನ್​ ಸಿಟಿ ಎಂದು ಹೆಸರಾಗಿರುವ ಈ ನಗರದಲ್ಲಿ ಉದ್ಯಾನಗಳನ್ನು ಮತ್ತಷ್ಟು ವಿಸ್ತರಿಸಬೇಕು. ಆದನ್ನು ಬಿಟ್ಟು ಶೇ. 5 ಜಾಗವನ್ನು ಅನ್ಯ ಉದ್ದೇಶಕ್ಕೆ ಬಳಸಲು ಅನುಮತಿ ನೀಡಬಾರದು ಎಂದರು.

ಕನ್ನಡದ ವಿಚಾರವಾಗಿ 3 ಸಾವಿರಕ್ಕೂ ಹೆಚ್ಚು ಆದೇಶಗಳಿದ್ದು, ಅವುಗಳಲ್ಲಿ ಹೆಚ್ಚಿನವು ಅನುಷ್ಠಾನಕ್ಕೆ ಬಂದಿಲ್ಲ. ಸಮಸ್ಯೆ ಬಂದಾಗ ಕಾನೂನು ಇದೆ ಅಂತ ಹೇಳಿದರೆ ಏನರ್ಥ? ನ್ಯಾಯಾಧೀಶರು ಸಹ ಪರಿಸರದ ಕುರಿತು ಮಾತನಾಡಿರುವುದನ್ನು ಕಂಡಿಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ವಿಜ್ಞಾನ ಸಾಹಿತಿ ಡಾ. ಟಿ.ಆರ್​. ಅನಂತರಾಮು, ಸಂಸತಿಕ ಚಿಂತಕ ಪ್ರೊ. ಎನ್​.ಬಿ. ಚಂದ್ರಮೋಹನ್​, ಕೃತಿಕಾರ ಎಚ್​.ಎ. ಪುರುಷೋತ್ತಮ ರಾವ್​, ನಿವೃತ್ತ ಪ್ರಾಧ್ಯಾಪಕ ಪ್ರೊ. ಎಂ.ಅರ್​. ನಾಗರಾಜು ಇದ್ದರು.

ಕೋಟ್​:

ಪ್ರಾಕೃತಿಕವಾಗಿ ಎದುರಾಗುವ ಸಮಸ್ಯೆಗಳಿಗೆ ಮನುಷ್ಯರು ಪರಿಸರದ ಕಡೆ ಬೊಟ್ಟು ಮಾಡಿ ತೋರಿಸುತ್ತಾರೆ. ಇದರ ಬದಲಿಗೆ ಸಮಸ್ಯೆ ಎದುರಾಗದಂತೆ ಎಚ್ಚರಿಕೆವಹಿಸಬೇಕು.