ಬಿಸಿಲಿನ ಹೊಡೆತಕ್ಕೆ ಕಂಗೆಟ್ಟ ರೇಷ್ಮೆ ಬೆಳೆಗಾರ

ಜಿಲ್ಲೆಯಲ್ಲಿ ಬಿಸಿಲಿನ ತಾಪಮಾನ ದಿನೇದಿನೆ ಹೆಚ್ಚಾಗುತ್ತಿರುವ ಪರಿಣಾಮ ರೇಷ್ಮೆಗೂಡು ಉತ್ಪಾದನೆ ನಿರೀಕ್ಷಿತ ಮಟ್ಟದಲ್ಲಿ ಇಳುವರಿ ದೊರೆಯದೆ ಬೆಳೆಗಾರರಲ್ಲಿ ಆತಂಕ ಎದುರಾಗಿದೆ.

ಮಾರುಕಟ್ಟೆಯಲ್ಲಿ ರೇಷ್ಮೆ ಗೂಡಿಗೆ ಉತ್ತಮ ಬೆಲೆ ಇದೆ. ಆದರೆ, ಬೇಸಿಗೆಝಳ ಹೆಚ್ಚಿದ್ದರೂ ಹಿಪ್ಪು ನೇರಳೆ ಸೊಪ್ಪು ಸಮೃದ್ಧವಾಗಿ ಬೆಳೆಯುತ್ತದೆ. ಸೊಪ್ಪು ಚೆನ್ನಾಗಿದೆ ಎಂದು ಬೆಳೆಗಾರರು ಜಾಕಿ ತಂದು ಹುಳು ಸಾಕಣೆ ಮಾಡುತ್ತಿದ್ದಾರೆ. ಆದರೆ, ಅತಿಯಾದ ಬಿಸಿಲಿನ ಸೆಕೆಯಿಂದ ಹಲವು ದಿನಗಳು ಕಳೆದರೂ ಹುಳುಗಳು ಗುಣಮಟ್ಟದ ಗೂಡು ಕಟ್ಟುತ್ತಿಲ್ಲ. ಇದರಿಂದಾಗಿ ರೈತರು ಸಂಕಷ್ಟಕ್ಕೆ ಒಳಗಾಗುವಂತಾಗಿದೆ.

ಕಳೆದ ವರ್ಷಗಳಿಗೆ ಹೊಲಿಸಿದರೆ ಈ ಬಾರಿ ಬಿಸಿಲಿನ ತಾಪಮಾನ 35ರಿಂದ 38 ಡಿಗ್ರಿ ಗಡಿ ದಾಟಿದೆ. ಹುಳು ಸಾಕಣೆಗೆ 20ರಿಂದ 25 ಡಿಗ್ರಿ ತಾಪಮಾನ ಇರಬೇಕು. ಒಂದು ವೇಳೆ 25 ಡಿಗ್ರಿ ದಾಟಿದರೂ ತಂಪನೆಯ ವಾತಾವರಣ ಸೃಷ್ಟಿಸಿದರೆ ಗುಣಮಟ್ಟದ ಇಳುವರಿ ಪಡೆಯಬಹುದು. ಆದರೆ, ಸದ್ಯದ ಸ್ಥಿತಿಯಲ್ಲಿ ತಂಪನೆಯ ವಾತಾವರಣ ಅಸಾಧ್ಯವಾಗಿದೆ.

ಜಿಲ್ಲೆಯಾದ್ಯಂತ 19 ಸಾವಿರ ಹೆಕ್ಟೇರ್‌ನಲ್ಲಿ ಹಿಪ್ಪು ನೇರಳೆ ಬೆಳೆದಿದ್ದು, 20 ಸಾವಿರಕ್ಕೂ ಹೆಚ್ಚು ಬೆಳೆಗಾರರಿದ್ದಾರೆ. ಕೋಲಾರ, ಬಂಗಾರಪೇಟೆ, ಮುಳಬಾಗಿಲು, ಶ್ರೀನಿವಾರಪುರ, ಕೆಜಿಎಫ್, ಮಾಲೂರಿನ ಬಹುತೇಕ ರೈತರು ಪ್ರಮುಖವಾಗಿ ಮಿಶ್ರತಳಿ, ದ್ವಿತಳಿ ಗೂಡು ಉತ್ಪಾದನೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಮಾರುಕಟ್ಟೆಯಲ್ಲಿ ಉತ್ತಮ ಬೆಲೆಯಿದ್ದರೂ ಉತ್ಪಾದನೆ ಕೊರತೆಯಿಂದ ಬಂಡವಾಳ ಗಿಟ್ಟಿಸಿಕೊಳ್ಳುವುದೂ ಸವಾಲಾಗಿದೆ. ಕೋಲಾರ ಮಾರುಕಟ್ಟೆಗೆ ಒಂದು ದಿನಕ್ಕೆ ದ್ವಿತಳಿ ಗೂಡು 700 ಕೆಜಿಗೂ ಅಧಿಕ ಅವಕವಾಗುತ್ತಿದ್ದು, ಸರಾಸರಿ ಕೆಜಿಗೆ 650 ರೂ. ಹಾಗೂ ಮಿಶ್ರ ತಳಿ 7000 ಕೆಜಿಗೂ ಅಧಿಕ ಆವಕವಾಗುತ್ತಿದ್ದು, ಸರಾಸರಿ ಕೆಜಿಗೆ 550 ರೂ.ಗೆ ಮಾರಾಟವಾಗುತ್ತಿದೆ. ಕಳೆದ ದಿನಗಳಿಗೆ ಹೊಲಿಸಿದರೆ 2 ವಾರಗಳಿಂದ ಗೂಡಿನ ದರದಲ್ಲೂ ಕುಸಿತ ಕಂಡಿದೆ.

ಬಿಸಿಲಿನ ತಾಪ ಹೆಚ್ಚಾಗುತ್ತಿರುವುದರಿಂದ ರೇಷ್ಮೆ ಕೃಷಿ ಉಳಿಸಿಕೊಳ್ಳಲು ಬೆಳೆಗಾರರು ಸಾಕಷ್ಟು ಪ್ರಯತ್ನ ಮಾಡುತ್ತಿದ್ದಾರೆ. ಮನೆಗಳ ಸುತ್ತ ಚಪ್ಪರ ಹಾಕುವುದು, ಹನಿ ನೀರಾವರಿ, ಕಿಟಕಿಗಳಿಗೆ ಗೋಣಿಚೀಲ ಹಾಕಿ ನೀರು ಸಿಂಪಡಿಸುವುದು, ಮೇಲ್ಪಾವಣೆ ಕಾಯದಂತೆ ಶೆಡ್‌ನೆಟ್ ಹೊದಿಸುವುದು. ತಂಪು ಹೊತ್ತಿನಲ್ಲಿ ಸೊಪ್ಪು ತರುವುದು, ಹುಳು ಸಾಕಣೆಗೆ ಮನೆಯ ಉಷ್ಣಾಂಶ 28 ಡಿಗ್ರಿ ಸೆಲ್ಸಿಯಸ್‌ನಿಂದ 30 ಡಿಗ್ರಿ ಇರುವಂತೆ ನೋಡಿಕೊಳ್ಳುತ್ತಿದ್ದರೂ ಉತ್ತಮ ಫಸಲು ಪಡೆಯುವುದು ಸವಾಲಾಗಿದೆ.

ಶೇ.50 ಇಳುವರಿ ನಿರೀಕ್ಷೆ ಬಿಸಿಲ ಬೇಗೆ ಹೆಚ್ಚಿದ ಕಾರಣ 9 ದಿನ ಹಿಪ್ಪು ನೇರಳೆ ಸೊಪ್ಪು ತಿನ್ನುತ್ತಿದ್ದ ಹುಳುಗಳು 5ರಿಂದ6 ದಿನ ಮಾತ್ರ ತಿನ್ನುತ್ತಿವೆ. ಬಿಸಿಲಿಗೆ ಸೊಪ್ಪಿನಲ್ಲಿ ತೇವಾಂಶ ಬೇಗ ಆವಿಯಾಗುತ್ತಿದೆ. ಇದು ಸಹ ಗೂಡಿನ ಉತ್ಪಾದನೆ ಮೇಲೆ ಪರಿಣಾಮ ಬೀರಿದ್ದು, ಶೇ.50 ಮಾತ್ರ ಫಸಲು ಸಿಗುತ್ತಿದೆ.

ಪ್ರಸಕ್ತ ಸಾಲಿನಲ್ಲಿ ಉಷ್ಣಾಂಶ ಹೆಚ್ಚಾಗಿದ್ದು, ಹುಳು ಸಾಕಣೆಗೆ ಮನೆಯ ಸುತ್ತಲೂ ತಂಪನೆ ವಾತಾವರಣ ಸೃಷ್ಟಿಸಿದಾಗ ಗುಣಮಟ್ಟದ ಗೂಡು ಪಡೆಯಲು ಸಾಧ್ಯ. ಬೆಳೆಗಾರರು ಜಾಗೃತ ಕ್ರಮ ಅಳಡಿಸಿಕೊಳ್ಳಬೇಕು.