ಕೋಲಾರದ ಯುವಕ ಅಮೆರಿಕದಲ್ಲಿ ಸಾವು

ಕೋಲಾರ: ಅಮೆರಿಕದ ಫೂಂಡಾ ಚೆಕ್ಕಾಸ್​ನಲ್ಲಿ ಸೋಮವಾರ ಸಂಭವಿಸಿದ ಅಪಘಾತದಲ್ಲಿ ಕೋಲಾರ ನಿವಾಸಿ ಮೃತಪಟ್ಟಿದ್ದಾನೆ. ಕೋಲಾರ ಗಾಂಧಿನಗರದ ನಿವಾಸಿ ಬಾಡಿಬಿಲ್ದರ್​ ಸುರೇಶ್​ ಬಾಬು (42) ಮೃತ. ಮೂರು ದಿನಗಳ ಹಿಂದೆ ಫ್ಲೋರಿಡಾದಿಂದ ಚೆಕ್ಕಾಸ್​ಗೆ ತೆರಳುವಾಗ ರಸ್ತೆ ಅಪಘಾತದಲ್ಲಿ ಸುರೇಶ್​ ಗಂಭೀರ ಗಾಯಗೊಂಡಿದ್ದು, ಚಿಕಿತ್ಸೆ ಫಲಕಾರಿಯಾಗದೆ ಖಾಸಗಿ ಆಸ್ಪತ್ರೆಯಲ್ಲಿ ಮಂಗಳವಾರ ಮೃತಪಟ್ಟಿದ್ದಾರೆ. ಪ್ರೇಮಾ, ಪ್ರಿಯಾಮಣಿ ಸೇರಿ ಹಲವು ನಟಿಯರ ಜತೆ ಮಾಡಲಿಂಗ್​ನಲ್ಲಿ ಪೋಸ್​ ಕೊಟ್ಟಿದ್ದರು. ಉಪ್ಪಿ&2 ಸೇರಿ ಹಲವು ಚಲನಚಿತ್ರಗಳಲ್ಲಿಯೂ ನಟಿಸಿದ್ದಾರೆ. ಜತೆಗೆ ಫಿಜಿಯೋಥೆರಪಿಸ್ಟ್​ ಆಗಿ ಸ್ವಂತ ಉದ್ಯಮ ಆರಂಭಿಸಿದ್ದಲ್ಲದೇ ನಟ&ನಟಿಯರಿಗೆ ದೈಹಿಕ ತರಬೇತುದಾರರಾಗಿದ್ದರು. ದೆಹಲಿ ಮೂಲದ ಯುವತಿಯನ್ನು ಪ್ರೀತಿಸಿ ವಿವಾಹವಾಗಿದ್ದರು. ಸುರೇಶ್​ ಬಾಬು ಅವರು ರಾಜ್ಯಮಟ್ಟದ ಹಲವು ಪ್ರಶಸ್ತಿ ಪಡೆದಿದ್ದು, ಎರಡು ವಾರದ ಹಿಂದೆ ಕೋಲಾರಕ್ಕೆ ಆಗಮಿಸಿ ಪತ್ನಿ ಮತ್ತು ಮಕ್ಕಳನ್ನು ಅಮೆರಿಕಕ್ಕೆ ಕರೆದುಕೊಂಡು ಹೋಗಿದ್ದರು. ಮಿಸ್ಟರ್​ ಕರ್ನಾಟಕ ಮತ್ತು ಮಿಸ್ಟರ್​ ಇಂಡಿಯಾ ಶೀರ್ಷಿಕೆಗಳನ್ನು ಗೆದ್ದಿದ್ದ ಅವರು, ದೇಹದಾರ್ಢ್ಯ ಕ್ಷೇತ್ರದಲ್ಲಿ ಯುವಕರಿಗೆ ಸ್ಫೂರ್ತಿಯಾಗಿದ್ದರು.

ಮಗನಿಗಾಗಿ ತಾಯಿಯ ಮನವಿ : ಮೃತ ದೇಹವನ್ನು ಅಮೆರಿಕದಿಂದ ಭಾರತಕ್ಕೆ ತರಬೇಕಾದರೆ ಹೆಚ್ಚು ವೆಚ್ಚವಾಗುತ್ತದೆ. ರಾಜ್ಯ, ಕೇಂದ್ರ ಸರ್ಕಾರ ಗಮನ ಹರಿಸಿ ಮೃತದೇಹ ತರಿಸಿಕೊಟ್ಟು ಕೊನೆಯದಾಗಿ ಸುರೇಶ್​ ಬಾಬು ಮುಖ ನೋಡುವ ಅವಕಾಶ ಕಲ್ಪಿಸಿಕೊಡಬೇಕು ಎಂದು ತಾಯಿ ಮುನಿಯಮ್ಮ ಮನವಿ ಮಾಡಿದ್ದಾರೆ.

ಏಳು ಯುವತಿಯರ ರಕ್ಷಣೆ

ಬಂಗಾರಪೇಟೆ: ತಾಲೂಕಿನ ಎರಡು ಪ್ರತ್ಯೇಕ ವೇಶ್ಯಾವಾಟಿಕೆ ಅಡ್ಡೆಗಳ ಮೇಲೆ ಪೊಲೀಸರು ದಾಳಿ ನಡೆಸಿ 7 ಮಂದಿ ಹೊರರಾಜ್ಯದ ಯುವತಿಯರ ರಕ್ಷಣೆ ಮಾಡಿದ್ದಾರೆ. ಬಂಗಾರಪೇಟೆ ತಾಲೂಕು ದೇಶಿಹಳ್ಳಿ ಹಾಗೂ ದೊಡ್ಡೂರು ಹರಪನಹಳ್ಳಿ ಪ್ಲಾಂಟೇಷನ್​ ಬಳಿ ಮನೆಯೊಂದರಲ್ಲಿ ವೈಶ್ಯಾವಾಟಿಕೆ ನಡೆಯುತ್ತಿದೆ ಎಂಬ ಖಚಿತ ಮಾಹಿತಿ ಮೇರೆಗೆ ಸಿಪಿಐ ದಯಾನಂದ್​ ನೇತೃತ್ವದಲ್ಲಿ ಪೊಲೀಸರು ದಾಳಿ ನಡೆಸಿದ್ದು, ಒಬ್ಬ ಆರೋಪಿ ಪರಾರಿಯಾಗಿದ್ದಾನೆ. ಬಂಗಾರಪೇಟೆ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಗುಡ್ಡ ಕುಸಿದು ಒಬ್ಬ ಸಾವು?

ಕೋಲಾರ/ಟೇಕಲ್​: ಮಾಲೂರು ತಾಲೂಕಿನ ಟೇಕಲ್​ ಹೋಬಳಿಯ ಹುಣಸೀಕೋಟೆ ಗ್ರಾಮದ ಬೆಟ್ಟದ ಬಳಿ ಮಂಗಳವಾರ ರಾತ್ರಿ ಕಲ್ಲು ಸ್ಫೋಟಿಸುವ ವೇಳೆ ಗುಡ್ಡ ಕುಸಿದು ಒಬ್ಬ ಮೃತಪಟ್ಟಿರುವ ಶಂಕೆ ವ್ಯಕ್ತವಾಗಿದ್ದು, ಮತ್ತೊಬ್ಬ ತೀವ್ರ ಗಾಯಗೊಂಡಿದ್ದಾರೆ. ಹುಣಸೀಕೋಟೆ ಗ್ರಾಮದ ಕಲ್ಲು ಕುಟಿಗ ಮಂಜುನಾಥ್​ (40) ಕಲ್ಲುಬಂಡೆ ಕೆಳಗೆ ಸಿಲುಕಿಕೊಂಡಿದ್ದು, ಹುಡುಕಾಟ ನಡೆಯುತ್ತಿದೆ. ಹೊರ ರಾಜ್ಯದ ಕಾರ್ಮಿಕ ನವೀನ್​ ಎಂಬುವರನ್ನು ಚಿಕಿತ್ಸೆಗಾಗಿ ಕೋಲಾರ ಆಸ್ಪತ್ರೆಗೆ ದಾಖಲಾಗಿಸಲಾಗಿದೆ. ಕಾರ್ಮಿಕ ನವೀನ್​ ಜಿಲೆಟಿನ್​ ಕಡ್ಡಿ ಇಟ್ಟು ಕಲ್ಲು ಸ್ಫೋಟಕ್ಕೆ ಮುಂದಾಗಿದ್ದರು. ಆ ಸಂದರ್ಭದಲ್ಲಿ ಗುಡ್ಡ ಕುಸಿತ ಸಂಭವಿಸಿದೆ. ಮಾಸ್ತಿ ಠಾಣೆ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸುತ್ತಿದ್ದಾರೆ.