ಮಡಿಕೇರಿಯಲ್ಲಿ ವಿರಾಟ ಹಿಂದೂ ಸಂಗಮ ಕಾರ್ಯಕ್ರಮ

ಧರ್ಮ ಸಂರಕ್ಷಣೆಗಾಗಿ ಛತ್ರಪತಿ ಶಿವಾಜಿಯನ್ನು ಮಾತೆ ಜೀಜಾಬಾಯಿ ಸಿದ್ಧಪಡಿಸಿದ ರೀತಿಯಲ್ಲಿ ಪ್ರತಿ ಮನೆಯಲ್ಲೂ ಮಕ್ಕಳನ್ನು ತಯಾರು ಮಾಡಬೇಕಿರುವುದು ಇಂದಿನ ಅಗತ್ಯವಾಗಿದೆ ಎಂದು ಆರ್‌ಎಸ್‌ಎಸ್ ಪ್ರಚಾರಕ ಶಿವಪ್ರಸಾದ್ ಮಲೆಬೆಟ್ಟು ಹೇಳಿದರು. ಹಿಂದೂ ಸಂಗಮ ಆಯೋಜನಾ ಸಮಿತಿ ವತಿಯಿಂದ ಮಡಿಕೇರಿಯಲ್ಲಿ ಶನಿವಾರ ಸಂಜೆ ಆಯೋಜಿಸಲಾಗಿದ್ದ ವಿರಾಟ ಹಿಂದೂ ಸಂಗಮ ಕಾರ್ಯಕ್ರಮದಲ್ಲಿ ದಿಕ್ಸೂಚಿ ಭಾಷಣ ಮಾಡಿ ಮಾತನಾಡಿದರು.

ಜಗತ್ತಿನ ಎಷ್ಟೋ ದೇಶಗಳಲ್ಲಿ ಇರುವುದು ಕೇವಲ ಎರಡೇ ಭಾಷೆ. ಆದರೆ ಭಾರತದಲ್ಲಿ ಸಾವಿರಾರು ಭಾಷೆಗಳಿವೆ. ಜಾತಿ, ಮತ, ಪ್ರಾಂತ್ಯಕ್ಕೆ ಅನುಗುಣವಾಗಿ ಪ್ರತಿ 40 ಕಿಮೀಗೂ ಭಾಷೆಗಳು ಬದಲಾಗುತ್ತಾ ಹೋಗುತ್ತದೆ. ಸಾಂಸ್ಕೃತಿಕವಾಗಿಯೂ ನಮ್ಮ ದೇಶ ಶ್ರೀಮಂತವಾಗಿದೆ. ವಿಭಿನ್ನ ಸಂಸ್ಕೃತಿ ಇಲ್ಲಿದೆ. ಇದೇ ರೀತಿಯಲ್ಲಿ ಭೌಗೋಳಿಕವಾಗಿಯೂ ವಿಶೇಷತೆ ಹೊಂದಿದ ದೇಶ ಭಾರತವಾಗಿದೆ. ಮರುಭೂಮಿ, ಮಂಜುಗಡ್ಡೆ ಆವೃತ್ತ ಪ್ರದೇಶ, ದಟ್ಟಕಾಡು, ಸಮುದ್ರ ತೀರ ಹೀಗೆ ಎಲ್ಲಾ ವೈವಿಧ್ಯತೆಗಳನ್ನೂ ಒಂದೇ ದೇಶದಲ್ಲಿ ಕಾಣಬಹುದಾಗಿದೆ.

ರಸ್ತೆ ಬದಿಯಲ್ಲಿ ಚಿನ್ನ, ವಜ್ರ, ವೈಢೂರ್ಯ ಮಾರುತ್ತಿದ್ದ ದೇಶ ಇದು. ಇಷ್ಟೆಲ್ಲಾ ಶ್ರೀಮಂತ ಇತಿಹಾಸ ಇರುವ ದೇಶ ಇನ್ನೂ ಯಾಕೆ ಅಭಿವೃದ್ಧಿ ಆಗಿಲ್ಲ ಎನ್ನುವ ಪ್ರಶ್ನೆ ಎಲ್ಲರನ್ನು ಕಾಡುತ್ತಿದೆ. ಇದಕ್ಕೆ ನಮ್ಮ ದೇಶದ ದೌರ್ಬಲ್ಯವೇ ಕಾರಣವಾಗಿದ್ದು, ಇದರಿಂದಾಗಿಯೇ ಭಾರತ ಪರಕೀಯರ ವಶ ಆಗಬೇಕಾಯಿತು. ಇದನ್ನು ಮನಗಂಡ ಹಿರಿಯರು ದೇಶದ ಮೂಲನಿವಾಸಿಗಳು ಸಂಘಟಿತರಾಗಬೇಕು ಎನ್ನುವ ಕನಸು ಕಂಡಿದ್ದರು. ಇದಕ್ಕಾಗಿಯೇ ಬಾಲಗಂಗಾಧರ್ ತಿಲಕ್ ಸಾರ್ವಜನಿಕ ಗಣೇಶೋತ್ಸವ ಆಚರಣೆಗೆ ಕರೆ ಕೊಟ್ಟರು. ಆರ್‌ಎಸ್‌ಎಸ್ ಕೂಡ ಇದೇ ಉದ್ದೇಶದಿಂದ 100 ವರ್ಷಗಳ ಹಿಂದೆ ಆರಂಭವಾಯಿತು. ಬೇರೆ ಬೇರೆ ಸಂಘಟನೆಗಳ ಪರಿಸ್ಥಿತಿ ಏನೇನೋ ಆಗಿ ಹೋಗಿದ್ದರೂ ಆರ್‌ಎಸ್‌ಎಸ್ ಸದೃಢವಾಗಿ ಬೆಳೆದು ನಿಂತಿದೆ. ಈಗ ಹಿಂದೂಗಳ ಮನಸ್ಸಿನ ಒಳಗಿನ ಕೊಳೆ ಶುದ್ಧ ಮಾಡುವ ಕೆಲಸ ಆಗಬೇಕಿದೆ. ನಾವೆಲ್ಲಾ ಹಿಂದೂ ನಾವೆಲ್ಲಾ ಒಂದು ಎನ್ನುವ ಮಾನಸಿಕತೆ ಸೃಷ್ಟಿ ಆಗಬೇಕಿದೆ. ಹಿಂದಿನಿAದಲೂ ಹಿಂದೂಗಳ ಮೇಲೆ ಪೆಟ್ಟು ಬಿದ್ದಷ್ಟೂ ಪುಟಿದೆದ್ದು ನಿಲ್ಲುತ್ತಿದ್ದೇವೆ. ಧರ್ಮ ಮತ್ತು ದೇಶ ರಕ್ಷಣೆಗಾಗಿ ಹಿಂದೂಗಳು ಒಗ್ಗಟ್ಟಿನ ಮಂತ್ರ ಹೇಳುವುದು ಇಂದಿನ ಅಗತ್ಯವಾಗಿದೆ ಎಂದರು.

ಮುಖ್ಯ ಅತಿಥಿಯಾಗಿ ಪಾಲ್ಗೊಂಡಿದ್ದ ಮಡಿಕೇರಿ ಕೊಡವ ಸಮಾಜದ ನಿರ್ದೇಶಕಿ ಕನ್ನಂಡ ಕವಿತಾ ಬೊಳ್ಳಪ್ಪ ಮಾತನಾಡಿ ಹಿರಿಯರು ಮಾಡಿದ ತ್ಯಾಗ ಬಲಿದಾನಗಳ ಫಲವಾಗಿ ಹಿಂದೂ ಧರ್ಮ ಉಳಿದುಕೊಂಡು ಬಂದಿದೆ. ನಮ್ಮ ಧರ್ಮ ಹೀಗೆಯೇ ಮುಂದುವರಿಯಬೇಕು. ಹಿಂದೂ ಧರ್ಮದ ಅಡಿಪಾಯದಲ್ಲೇ ವಿಶ್ವದ ವಿವಿಧ ಧರ್ಮಗಳು ನಿಂತಿವೆ. ಹಿಂದೂಗಳಿಗೆ ಇರುವುದು ಒಂದೇ ದೇಶ. ಇದನ್ನು ನಾವೆಲ್ಲಾ ಅರಿತುಕೊಳ್ಳಬೇಕು. ಇಂಥ ಕಾರ್ಯಕ್ರಮಗಳ ಮೂಲಕ ಈ ಬಗ್ಗೆ ಜಾಗೃತಿ ಮೂಡಿಸಬೇಕು ಎಂದು ಹೇಳಿದರು.

ಹಿಂದೂ ಸಂಗಮ ಆಯೋಜನಾ ಸಮಿತಿ ಅಧ್ಯಕ್ಷ ಕಾರೇರ ಎಸ್. ಕವನ್ ಮಾತನಾಡಿ ಇಂದಿನ ಆಧುನಿಕ ಕಾಲಘಟ್ಟದಲ್ಲಿ ಸಂಬAಧಗಳು ಮೊಬೈಲ್ ಸಂದೇಶಗಳಲ್ಲಿ ಮುಗಿದು ಹೋಗುತ್ತಿದೆ. ವ್ಯಯಕ್ತಿಕ ಸಂಪರ್ಕವೇ ಇಲ್ಲದಂತಾಗಿದೆ. ಇಂಥ ಸಂದರ್ಭದಲ್ಲಿ ಹಿಂದೂಗಳು ಸಂಘಟಿತವಾಗಬೇಕು. ಸಂಘಕ್ಕೆ 100 ವರ್ಷ ತುಂಬಿದ ಸಂದರ್ಭದಲ್ಲಿ ಹಿಂದೂ ಸಂಗಮ ಕಾರ್ಯಕ್ರಮ ನಡೆಸಲಾಗುತ್ತಿದ್ದು ಮಡಿಕೇರಿಯ ಎಲ್ಲಾ ಹಿಂದೂಗಳು ಸಕ್ರಿಯವಾಗಿ ಪಾಲ್ಗೊಳ್ಳಬೇಕು ಎನ್ನುವ ಉದ್ದೇಶದಿಂದ ನಾಲ್ಕು ಭಾಗ ಮಾಡಿ ಆಯೋಜನೆ ಮಾಡಲಾಗಿದೆ. ಎಲ್ಲರ ಸಹಕಾರದಿಂದ ಕಾರ್ಯಕ್ರಮ ಯಶಸ್ವಿಯಾಗಿ ನಡೆದಿದೆ ಎಂದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಮಡಿಕೇರಿ ಗೌಡ ಸಮಾಜ ಅಧ್ಯಕ್ಷ ದಂಬೆಕೋಡಿ ಆನಂದ ಮಾತನಾಡಿ ಹಿಂದೂ ಸಮಾಜ ಸಂಘಟಿತವಾಗುವ ಅಗತ್ಯತೆ ಬಗ್ಗೆ ಒತ್ತಿ ಹೇಳಿದರು.

ವೈದ್ಯ ಡಾ. ಬಿ.ಸಿ. ನವೀನ್ ಕುಮಾರ್, ಕೆ.ಕೆ. ಮಹೇಶ್, ಕೆ.ಕೆ. ದಿನೇಶ್ ಸೇರಿದಂತೆ ಪ್ರಮುಖರು ಈ ಸಂದರ್ಭ ಇದ್ದರು. ಕಲಾವಿದ ರವಿಭೂತನಕಾಡು ಅವರಿಂದ ರಾಷ್ಟಿçÃಯತೆ ಬಿಂಬಿಸುವ ಸಾಂಸ್ಕೃತಿಕ ಕಾರ್ಯಕ್ರಮಗಳು ಗಮನ ಸೆಳೆದವು. ಸಭಾ ಕಾರ್ಯಕ್ರಮಕ್ಕೂ ಮೊದಲು ಕೇರಳ ಚೆಂಡೆ ಮತ್ತು ಓಲಗದ ಸದ್ದು ಸೇರಿದ್ದವರ ನವಿರೇಳಿಸುವಂತೆ ಮಾಡಿತು.