ಎಂಟು ಅಡಿ ರಸ್ತೆಯಲ್ಲಿ ಸಂಚಾರ ದುಸ್ತರ

ಕಂಬಿಬಾಣೆ ಮುಖ್ಯ ವೃತ್ತದಿಂದ ಬಲಕ್ಕೆ ತೆರಳಿ 2 ಕಿ.ಮೀ. ದೂರದಲ್ಲಿರುವ ಊರುಗುಪ್ಪೆ ಪೈಸಾರಿಗೆ ತೆರಳುವ ರಸ್ತೆಯು ಏಳನೇ ಹೊಸಕೋಟೆ ಗ್ರಾಮ ಪಂಚಾಯಿತಿಗೆ ಸೇರಿದ 3ನೇ ವಾರ್ಡ್‌ನಲ್ಲಿ 100ಕ್ಕೂ ಹೆಚ್ಚು ಕುಟುಂಬಗಳು ಈ ಭಾಗದಲ್ಲಿ ನೆಲೆಸಿವೆ. ಈ ವಾರ್ಡ್‌ಗೆ ತೆರಳುವ ರಸ್ತೆಯು 8 ದಶಕಗಳಿಂಗಿತಲ್ಲೂ ಹೆಚ್ಚು ಕಾಲದಿಂದ ವಿಸ್ತರಣೆ ಆಗದೆ ಇಲ್ಲಿನ ನಿವಾಸಿಗಳು ತೊಂದರೆ ಅನುಭವಿಸುತ್ತಿದ್ದಾರೆ. ಈ ರಸ್ತೆಯ 2 ಭಾಗವು ಟಾಟಾ ಕಾಫಿ ಲಿಮಿಟೆಡ್ ಸಂಸ್ಥೆಗೆ ಸೇರಿದಾಗಿದೆ. ಇದರಿಂದ ಈ ಭಾಗದ ನಿವಾಸಿಗಳು ಜನಪ್ರತಿನಿಧಿಗಳು ಸಂಬಂಧಿಸಿದ ಇಲಾಖೆಗೆ ಮನವಿ ಸಲ್ಲಿಸುತ್ತ ಬರುತ್ತಿದ್ದರೂ ರಸ್ತೆ ವಿಸ್ತರಣೆ ಮಾಡುತ್ತಿಲ್ಲ ಎಂದು ಈ ಭಾಗದ ನಿವಾಸಿಗಳು ದೂರಿದ್ದಾರೆ.

ಈ ಭಾಗದಲ್ಲಿ ಕೃಷಿಯನ್ನು ಅವಲಂಬಿತ ಪ್ರದೇಶವಾಗಿದೆ. ಅತಿ ಹೆಚ್ಚು ಬಡಕೂಲಿ ಕಾರ್ಮಿಕರೇ ನೆಲೆಸಿದ್ದಾರೆ. ಕೃಷಿಗೆ ಬೇಕಾದ ಅವಶ್ಯಕ ವಸ್ತುಗಳನ್ನು ಈ ಭಾಗದ ಕೃಷಿ ವಾಹನಗಳಲ್ಲಿ ಸಾಗಣೆ ಮಾಡಬೇಕಾದರೆ ಹರಸಾಹಸ ಮಾಡಬೇಕಿದೆ. ಭಾರಿ ವಾಹನಗಳು ಈ ಭಾಗದಲ್ಲಿ ಸಂಚರಿಸಿದರೆ ಎದುರು ಭಾಗದ ವಾಹನಗಳ ಚಾಲಕರು ಪರದಾಡಬೇಕಿದೆ. ಈ ಭಾಗದಲ್ಲಿ ಮತ್ತೊಂದು ಬಹುದೊಡ್ಡ ಸಮಸ್ಯೆ ಎಂದರೆ ಕಾಡಾನೆ ಸೇರಿದಂತೆ ವಿವಿಧ ವನ್ಯಪ್ರಾಣಿಗಳು ತೋಟಗಳಲ್ಲಿ ಕಾಣಬಹುದಾಗಿದೆ. ಈ ಕಿರಿದಾದ ರಸ್ತೆಯಲ್ಲಿ ಕಾಡಾನೆಗಳು ದಾಳಿ ನಡೆಸಲು ಮುಂದಾದರೆ ತಪ್ಪಿಸಿಕೊಳ್ಳಲು ಸಾಧ್ಯವೆ ಇಲ್ಲ.

ಅನಾರೋಗ್ಯಕ್ಕೆ ತುತ್ತಾದವರನ್ನು ಚಿಕಿತ್ಸೆಗೆ ಕರೆದೋಯ್ಯಬೇಕೆಂದರೆ ಬಹಳ ಶ್ರಮಪಡಬೇಕಾಗುತ್ತದೆ. ದೊಡ್ಡ ವಾಹನಗಳು ಈ ಭಾಗದಲ್ಲಿ ಸಂಚರಿಸಿದರೆ ಪಾದಚಾರಿಗಳು ತೋಟದ ಬೇಲಿಗೆ ನುಗ್ಗಬೇಕಾಗುತ್ತದೆ. ಈ ಗ್ರಾಮದ ಮೂಲಕವೇ ಚೆಟ್ಟಳ್ಳಿ, ಸಿದ್ದಾಪುರ ರಾಜ್ಯ ಹೆದ್ದಾರಿಗೆ ಸಂಪರ್ಕ ಕಲ್ಪಿಸುವ ರಸ್ತೆ ಇದಾಗಿದೆ. ಅಧಿಕಾರಿಗಳು ರಸ್ತೆ ವಿಸ್ತರಣೆಗೆ ಮುಂದಾಗುವುದರೊಂದಿಗೆ ಇಲ್ಲಿನ ನಿವಾಸಿಗಳು ನಿತ್ಯ ಅನುಭವಿಸುತ್ತಿರುವ ಯಾತನೆಯನ್ನು ದೂರ ಮಾಡಬೇಕೆಂದು ಈ ಭಾಗದ ನಿವಾಸಿಗಳು ಆಗ್ರಹಿಸಿದ್ದಾರೆ.

ಕಚ್ಚಾ ರಸ್ತೆಗೆ ಕಾಂಕ್ರೀಟ್ ರಸ್ತೆಯನ್ನು ಜೋಡಣೆ ಮಾಡಿದ್ದು ಅಲ್ಲಿ ಅವೈಜ್ಞಾನಿಕವಾಗಿ ರಸ್ತೆ ಉಬ್ಬು ನಿರ್ಮಿಸಲಾಗಿದೆ. ಇದರಿಂದ ವಾಹನಗಳು ಮುಖಾಮುಖಿಗೊಂಡ ಸಂದರ್ಭ ರಸ್ತೆಯ ಅಂಚು ಅಪಾಯಕಾರಿಯಾಗಿ ಪರಿಣಮಿಸಲಿದೆ.