ಕುವೆಂಪು ರಚಿತ ಸಾಹಿತ್ಯದಲ್ಲಿ ಸಮಾಜಕ್ಕೆ ನೀಡಿರುವ ಸಂದೇಶಗಳು ಕುರಿತು ಮಾತನಾಡಿದ ಕುಶಾಲನಗರದ ಸಾಹಿತಿ ಉಪನ್ಯಾಸಕಿ ಶ್ರೀಮತಿ ಎನ್.ಕೆ. ಮಾಲದೇವಿ ಮಾತನಾಡಿ ಕುವೆಂಪು ರಚಿಸಿದ ಲೇಖನಗಳಿರಬಹುದು, ಕಥೆಗಳಿರಬಹುದು, ಕವನಗಳಿರಬಹುದು, ಕಾದಂಬರಿಗಳಿರಬಹುದು, ಮಹಾಕಾವ್ಯವಿರಬಹುದು ಅವೆಲ್ಲದರಲ್ಲೂ ಕೂಡ ಸಮಾಜಕ್ಕೆ ಉತ್ತಮವಾದ ಸಂದೇಶವನ್ನ ನೀಡಿದ್ದಾರೆ. ಅವರ ಸಾಹಿತ್ಯವನ್ನು ಮನನ ಮಾಡಿದರೆ ಮಾತ್ರ ಆ ಸಂದೇಶ ನಮ್ಮ ಮನಸ್ಸಿಗೆ ನಿಲುಕಲು ಸಾಧ್ಯ. ಅವರು 1930ರಲ್ಲಿ ಪ್ರಕಟಿಸಿದ ಕೊಳಲು ಕವನ ಸಂಕಲನದಲ್ಲಿ 70 ಕವನಗಳಿದ್ದು ನಾಡಗೀತೆ ಜಯ ಭಾರತ ಜನನಿಯ ತನುಜಾತೆ, ರೈತ ಗೀತೆಗಳು ಈ ಕವನ ಸಂಕಲನದಲ್ಲಿ ಒಳಗೊಂಡಿದೆ. ಪ್ರಕೃತಿ ಪ್ರೇಮವನ್ನು, ರಾಷ್ಟ್ರ ಪ್ರೇಮವನ್ನು, ನಾಡಪ್ರೇಮವನ್ನು ಆಧ್ಯಾತ್ಮಿಕ ಚಿಂತನೆಯನ್ನು ಒಳಗೊಂಡಿರುವAತಹ ಕವನ ಸಂಕಲನ ಇದಾಗಿದೆ. ಪಾಂಚಜನ್ಯ ಅನ್ನುವ ಇನ್ನೊಂದು ಕವನ ಸಂಕಲನದಲ್ಲಿ ದೇಶಭಕ್ತಿ, ಕ್ರಾಂತಿ, ಸ್ವಾತಂತ್ರ್ಯ ಹೋರಾಟ ಜಾಗೃತಿಯ ಕಾಂತಿಯನ್ನು ನೀಡಿದ್ದಾರೆ. ಓದುಗರಲ್ಲಿ ಆತ್ಮವಿಶ್ವಾಸವನ್ನು, ಧೈರ್ಯವನ್ನು, ಹೋರಾಟದ ಮನೋಭಾವವನ್ನು ಮೂಡಿಸುವ ಸಂದೇಶವಾಗಿ ಈ ಕವನ ಸಂಕಲನ ಮೂಡಿಬಂದಿದೆ ಎಂದರು.
