ಕೋವಿ-ತೋಕ್ ಆಚರಣೆಗೆ ಶಾಶ್ವತ ರಕ್ಷಣೆ ನೀಡಬೇಕು

ಕೋವಿ-ತೋಕ್ ಆಚರಣೆಗೆ 2029ರ ನಂತರಯಾವುದೇ ಸಾಂವಿಧಾನಿಕ ಧಕ್ಕೆ ಬಾರದಂತೆ ತಡೆಯಲು ಕೊಡವ ಧಾರ್ಮಿಕ ಸಂಸ್ಕಾರವನ್ನು ಸಂವಿಧಾನದ ವಿಧಿ 25 ಮತ್ತು 26ರ ಅಡಿಯಲ್ಲಿ ಅತ್ಯಗತ್ಯ ಧಾರ್ಮಿಕ ಚಟುವಟಿಕೆಗಳ ಕಾಯ್ದೆ ವ್ಯಾಪ್ತಿಗೆ ತರಬೇಕು. ಆ ಮೂಲಕ ಆಯುಧ ಕಾಯ್ದೆಯ ತಿದ್ದುಪಡಿಗಳ ಪ್ರಭಾವಕ್ಕೆ ಒಳಗಾಗದಂತೆ ಇದಕ್ಕೆ ಶಾಶ್ವತ ರಕ್ಷಣೆ ನೀಡಬೇಕು ಎಂದು ಕೊಡವ ನ್ಯಾಷನಲ್ ಕೌನ್ಸಿಲ್ ಸಂಘಟನೆ ಒತ್ತಾಯಿಸಿದೆ.

ಪ್ರಧಾನಮಂತ್ರಿ ನರೇಂದ್ರ ಮೋದಿ, ಗೃಹ ಸಚಿವ ಅಮಿತ್ ಶಾ, ಕರ್ನಾಟಕದ ಮುಖ್ಯಮಂತ್ರಿ ಡಿ.ಕೆ ಶಿವಕುಮಾರ್, ಕೆಪಿಸಿಸಿ ಅಧ್ಯಕ್ಷ ಬಿ.ಕೆ.ಹರಿಪ್ರಸಾದ್, ಭಾರತದ ಸುಪ್ರೀಂಕೋರ್ಟ್ ಮುಖ್ಯ ನ್ಯಾಯಮೂರ್ತಿಗಳು ಹಾಗೂ ಭಾರತೀಯ ಕಾನೂನು ಆಯೋಗದ ಅಧ್ಯಕ್ಷರಿಗೆ ಪತ್ರ ಬರೆದಿರುವ ಸಿಎನ್‌ಸಿ ಅಧ್ಯಕ್ಷ ಎನ್.ಯು. ನಾಚಪ್ಪ ಭಾರತದ ಸಂವಿಧಾನದ ವಿಧಿ 25 ಮತ್ತು 26ರ ಅಡಿಯಲ್ಲಿ ಪ್ರಾಚೀನ, ಆದಿಮ ಸಂಜಾತ, ಏಕ-ಜನಾಂಗೀಯ, ಪ್ರಕೃತಿ ಆರಾಧಕ ಕೊಡವ ಧಾರ್ಮಿಕ ಸಂಸ್ಕಾರವಾದ ಕೋವಿ-ತೋಕ್ ಗೆ ಸಾಂವಿಧಾನಿಕ ರಕ್ಷಣೆ ನೀಡಬೇಕು ಎಂದು ಮನವಿ ಮಾಡಿದ್ದಾರೆ.

ಆಯುಧ (ತಿದ್ದುಪಡಿ) ಕಾಯ್ದೆ 2019ರ ಪ್ರಕಾರ, ಆಯುಧ ಕಾಯ್ದೆ 1959ರ ಅಡಿಯಲ್ಲಿ ನೀಡಲಾದ ವಿಶೇಷ ವಿನಾಯಿತಿಗಳಿಗೂ ಸಹ ಪ್ರತಿ 10 ವರ್ಷಗಳಿಗೊಮ್ಮೆ ನವೀಕರಣ ಪ್ರಕ್ರಿಯೆಯನ್ನು ಕೇಂದ್ರ ಸರ್ಕಾರ ಕಡ್ಡಾಯಗೊಳಿಸಿದೆ. ಆಯುಧ ನಿಯಮಾವಳಿಗಳು 1962ರ ಅಡಿಯಲ್ಲಿ ಕೊಡವ ಜನಾಂಗಕ್ಕೆ ಇರುವ ಪ್ರಸ್ತುತ ವಿನಾಯಿತಿಯು 2029ರಲ್ಲಿ ಮುಕ್ತಾಯಗೊಳ್ಳಲಿದೆ. ಇದು ಆಡಳಿತಾತ್ಮಕ ಅಥವಾ ಶಾಸಕಾಂಗದ ಕ್ರಮದ ಮೂಲಕ ಕೊಡವರ ಪ್ರಾಚೀನ ಧಾರ್ಮಿಕ ಸಂಸ್ಕಾರವಾದ ಕೋವಿ-ತೋಕ್ ನಶಿಸಿಹೋಗುವ ಸನ್ನಿಹಿತ ಆಪತ್ತನ್ನು ತಂದೊಡ್ಡಿದೆ.

1949ರ ಸರ್ದಾರ್ ಪಟೇಲರ ಉಲ್ಲೇಖ ಅತ್ಯಂತ ಮೌಲ್ಯಯುತವಾದ ಸಾಂವಿಧಾನಿಕ ಆಧಾರವಾಗಿದೆ. ಇದು ಕೋವಿ-ತೋಕ್ ಅನ್ನು ದೇಶದ ಸಂಸ್ಥಾಪಕ ನಾಯಕರು ಮತ್ತು ಭಾರತದ ಒಕ್ಕೂಟ ವ್ಯವಸ್ಥೆಯೊಂದಿಗೆ ಬೆಸೆಯುತ್ತದೆ. 1949ರಲ್ಲಿ ರಾಷ್ಟ್ರೀಯ ಸಂಯೋಜನೆ ಮತ್ತು ಆಯುಧ ನೀತಿಯ ಕುರಿತಾದ ಸಂಸತ್ತಿನ ಚರ್ಚೆಯ ಸಂದರ್ಭದಲ್ಲಿ ಕೊಡವ ಸಮುದಾಯ ಮತ್ತು ಅವರ ಕೋವಿ ಹೆಮ್ಮೆಯನ್ನು ಸರ್ದಾರ್ ಪಟೇಲರು ಮುಕ್ತಕಂಠದಿAದ ಶ್ಲಾಘಿಸಿದ್ದರು. ಕೊಡವರ ಕೋವಿ ಹೆಮ್ಮೆಯು ಅವರ ಅಸ್ಮಿತೆ, ನಿಷ್ಠೆ ಮತ್ತು ದೇಶದ ಗಡಿಗಳನ್ನು ಕಾಯ್ದ ಅವರ ಶೌರ್ಯದ ಅವಿಭಾಜ್ಯ ಅಂಗ ಎಂಬುದನ್ನು ಸರ್ದಾರ್ ಪಟೇಲರು ಗುರುತಿಸಿದ್ದರು. ಸಾರ್ವಭೌಮ ಸಂಸತ್ತಿನಲ್ಲಿ ನಡೆದ ಈ ಅಂಗೀಕಾರವು, ಕೊಡವರ ಅಸ್ತಿತ್ವಕ್ಕೆ ಕೋವಿ-ತೋಕ್ ಅತ್ಯಗತ್ಯ ಎಂಬುದಕ್ಕೆ ರಾಜ್ಯ ನೀಡಿರುವ ಮೂಲಭೂತ ಮನ್ನಣೆಯಾಗಿದೆ. ಆಯುಧ ಕಾಯ್ದೆಯ 10 ವರ್ಷಗಳ ನವೀಕರಣ ಚಕ್ರದ ಅಡಿಯಲ್ಲಿ ಈ ಪವಿತ್ರ ಸಂಪ್ರದಾಯವನ್ನು 2029ರಲ್ಲಿ ಕೊನೆಗೊಳ್ಳಲು ಬಿಡುವುದು ಅಥವಾ ಏಕರೂಪ ನಾಗರಿಕ ಸಂಹಿತೆಯ ಅಡಿಯಲ್ಲಿ ಇದನ್ನು ದುರ್ಬಲಗೊಳಿಸುವುದು ಸರ್ದಾರ್ ಪಟೇಲರ ದೃಷ್ಟಿಕೋನಕ್ಕೆ ಮತ್ತು ಸಂವಿಧಾನದ ವಿಧಿ 25 ಮತ್ತು 26ರ ಅಡಿಯಲ್ಲಿ ಭಾರತದ ಬಹುತ್ವದ ಸಂಸ್ಕೃತಿಯನ್ನು ಗೌರವಿಸಿದ ಸಂವಿಧಾನ ಸಭೆಯ ನಿಲುವಿಗೆ ಬಗೆಯುವ ದ್ರೋಹವಾಗುತ್ತದೆ ಎಂದು ನಾಚಪ್ಪ ಅಭಿಪ್ರಾಯಪಟ್ಟಿದ್ದಾರೆ.