ಕೊಡಗಿಗೆ ಮತ್ತೆ ಕಸ್ತೂರಿ ರಂಗನ್ ವರದಿ ಗುಮ್ಮ

ಕಸ್ತೂರಿರಂಗನ್ ವರದಿ ಅಥವಾ ಯಾವುದೇ ಯೋಜನೆಯಿಂದ ಕೊಡಗಿನ ರೈತರಿಗೆ, ಕಾಫಿ ಬೆಳೆಗಾರರಿಗೆ ಹಾಗೂ ಭೂಮಿಯ ಮಾಲೀಕರಿಗೆ ಯಾವುದೇ ರೀತಿಯ ತೊಂದರೆಯಾಗಬಾರದು. ಈ ಸಂಬAಧ ಅರಣ್ಯ ಪ್ರದೇಶ, ಪೈಸಾರಿ ಭೂಮಿ ಹಾಗೂ ರೈತರ ಕೃಷಿ ಭೂಮಿ ಯಾವುದು ಎಂಬುದರ ಕುರಿತು ಸಮಗ್ರ ಮತ್ತು ವೈಜ್ಞಾನಿಕ ಸರ್ವೆ ನಡೆಸಬೇಕು. ರೈತರ ಕೃಷಿ ಭೂಮಿಯನ್ನು ಈ ಯೋಜನೆಯ ವ್ಯಾಪ್ತಿಯಿಂದ ಸಂಪೂರ್ಣವಾಗಿ ಹೊರಗಿಡಬೇಕು.ಈ ವಿಷಯವನ್ನು ನಮ್ಮ ಶಾಸಕರು ಹಾಗೂ ರಾಜ್ಯ ಸರ್ಕಾರ ಕೇಂದ್ರ ಸರ್ಕಾರದ ಗಮನಕ್ಕೆ ಗಂಭೀರವಾಗಿ ತಂದು, ರೈತರ ಹಿತಾಸಕ್ತಿಗೆ ಯಾವುದೇ ಧಕ್ಕೆಯಾಗದಂತೆ ಅಗತ್ಯ ಕ್ರಮ ಕೈಗೊಳ್ಳುವ ಸಂಪೂರ್ಣ ಜವಾಬ್ದಾರಿ ವಹಿಸಬೇಕು.

— ರವಿ ಕುಶಾಲಪ್ಪ, ಮಾಜಿ ಅಧ್ಯಕ್ಷ, ಕರ್ನಾಟಕ ಪಶ್ಚಿಮ ಘಟ್ಟಗಳ ಕಾರ್ಯಪಡೆ

ಕಸ್ತೂರಿ ರಂಗನ್ ವರದಿಯ ಅನುಷ್ಠಾನ ಅರಣ್ಯ ಸರಹದ್ದು ವಿಸ್ತರಿಸುವ ನಿರ್ಣಯ ಆಗಿದೆ. ನಂತರ ಪೂರ್ತಿ ಪಶ್ಚಿಮ ಘಟ್ಟ ಕೇರಳದಿಂದ ಗುಜರಾತಿನವರೆಗೂ 1600 ಮೈಲಿ ವಿಶ್ವ ಸಂಸ್ಥೆಯ ವಿಶ್ವ ಪಾರಂಪರಿಕ ಪಟ್ಟಿಯಲ್ಲಿ ಸೇರಿಸುವ ತಯಾರಿ ಇರಬಹುದು. ಈ ಮೊದಲೇ ಎಲ್ಲ ಬಾಧಿತ ರಾಜ್ಯಗಳ ಸರ್ವ ಪಕ್ಷಗಳು ಏಕ ಪಕ್ಷಿಯವಾಗಿ ಕಸ್ತೂರಿ ರಂಗನ್ ವರದಿಯ ಅನುಷ್ಠಾನ ವಿರೋಧಿಸಿದ್ದವು. ಬಫರ್ ಝೋನ್ ಕೈ ಬಿಟ್ಟು ಬರಿ ರಿಸರ್ವ್ ಫಾರೆಸ್ಟ್ ಮಾತ್ರ ಸೇರಿಸುವಂತೆ ಕೇಳಿತ್ತು. ಬಫರ್ ಝೋನ್ ಒಳಗೆ ಸೇರಿಕೊಂಡರೆ ನಾವುಗಳೆಲ್ಲ ಫಾರೆಸ್ಟ್ ಕಾನೂನಿಗೆ ಒಳಗೊಂಡು ತುಂಬಾ ಕಷ್ಟಗಳನ್ನು ಅನುಭವಿಸಬೇಕಾಗಬಹುದು.

— ಉದಯ್ ಕೀಕಣಮಾಡ, ಮಾಜಿ ಸೈನಿಕ, ಪೂಕೋಳ ಗ್ರಾಮ

ಕೇಂದ್ರ ಸರ್ಕಾರ ಮಲೆನಾಡಿನ ಪರಿಸರ ಸೂಕ್ಷ್ಮ ಗ್ರಾಮಗಳ ಪಟ್ಟಿ ಪ್ರಕಟಿಸಿದೆ. ಆ ಪಟ್ಟಿಯಲ್ಲಿ ಕೊಡಗು ಜಿಲ್ಲೆಯ 53 ಗ್ರಾಮಗಳಿವೆ.ನಮ್ಮ ಗ್ರಾಮವೂ ಪರಿಸರ ಸೂಕ್ಷ್ಮ ವಲಯಕ್ಕೆ ಸೇರುವ ಆತಂಕ ಎದುರಾಗಿದೆ. ಸರ್ಕಾರಗಳು ಕಸ್ತೂರಿರಂಗನ್ ವರದಿಯ ಸಾಧಕ-ಬಾಧಕಗಳನ್ನಅರಿತು ಜನಪರವಾಗಿ ಮುಂದುವರಿದು ಒಳಿತು ಮಾಡಬೇಕು. ಪರಿಸರವೂ ಉಳಿಯಬೇಕು. ರೈತನೂ ಬದುಕಬೇಕು. ಜನವಿರೋಧಿ ವರದಿ ನಮಗೆ ಬೇಡ!

— ಬಿಂದು, ಗೃಹಿಣಿ, ಅಪ್ಪಂಗಳ ಗ್ರಾಮ

ಜಿಲ್ಲೆಯ 53 ಗ್ರಾಮಗಳು ಪರಿಸರ ಸೂಕ್ಷ್ಮ ವಲಯಕ್ಕೆ ಸೇರಿರುವುದು ಕೇಂದ್ರ ಸರ್ಕಾರ ಪ್ರಕಟಿಸಿರುವ ಪಟ್ಟಿಯಿಂದ ತಿಳಿದುಬಂದಿದೆ. ಆದರೆ ಈ ವಲಯದಲ್ಲಿ ವಾಸಿಸುತ್ತಿರುವ ರೈತಾಪಿ ವರ್ಗದ ಜನರಿಗೆ ಇದರಿಂದ ಬಹಳ ಸಂಕಷ್ಟವನ್ನು ಎದುರಿಸುವ ಪರಿಸ್ಥಿತಿ ಬರಬಹುದು. ಅಲ್ಲಿಯ ಜನರ ಕೃಷಿ ಚಟುವಟಿಕೆಗಳಿಗೆ ತೊಡಕಾಗಬಹುದು. ಸೂಕ್ಷ್ಮ ಪರಿಸರ ವಲಯ ಘೋಷಣೆಯಾದಲ್ಲಿ ಮಾನವ ಪ್ರಾಣಿ ಸಂಘರ್ಷ ಮತ್ತಷ್ಟು ಉಲ್ಬಣಗೊಳ್ಳುವ ಸಾಧ್ಯತೆ ಖಂಡಿತ ಬರುತ್ತದೆ. ಸರ್ಕಾರ ಮತ್ತೊಮ್ಮೆ ಈ ಬಗ್ಗೆ ಸೂಕ್ಷ್ಮವಾಗಿ ಪರಿಶೀಲನೆ ನಡೆಸಿ ಜನಪರ ಕಾಳಜಿ ವಹಿಸಬೇಕಾಗಿದೆ. ಸÀರ್ಕಾರದ ಈ ಯೋಜನೆಗೆ ವಿರೋಧವಿದೆ.

— ಕೊಡಪಾಲು ಎಸ್. ಗಣಪತಿ, ಅಧ್ಯಕ್ಷ, ಗೌಡ ಸಮಾಜ, ಕಾರುಗುಂದ