ನಾಗಬನದ ಮಹಿಮೆ ಅಪಾರ

ಇಲ್ಲಿನ ಬಸ್ ನಿಲ್ದಾಣದಿಂದ ಸ್ವಲ್ಪ ಮುಂದೆ ಸಾಗಿದರೆ ಸುಳುಗಳಲೆ ಕಾಲನಿ ಇದ್ದು, ಅಲ್ಲಿಂದ ರಸ್ತೆ ಮೂಲಕ ಕ್ರಮಿಸಿದರೆ ದೇವರ ಬನ ಸಿಗಲಿದೆ. ಇಲ್ಲಿನ ಬಸ್ ನಿಲ್ದಾಣದಿಂದ ಸ್ವಲ್ಪ ಮುಂದೆ ಸಾಗಿದರೆ ಸುಳುಗಳಲೆ ಕಾಲನಿ ಇದ್ದು, ಅಲ್ಲಿಂದ ರಸ್ತೆ ಮೂಲಕ ಕ್ರಮಿಸಿದರೆ ಬನ ಸಿಗುತ್ತದೆ. ಪ್ರಶಾಂತ ವಾತವರಣದಲ್ಲಿರುವ ತೆರೆದ ಗುಡಿಗೆ ದೂರದೂರು ಸೇರಿದಂತೆ ಸುತ್ತಮುತ್ತಲ ಭಕ್ತರು ಆಗಮಿಸಿ ಪೂಜಿ ಸಲ್ಲಿಸಿ ತಮ್ಮ ಇಷ್ಟಾರ್ಥಗಳ ಈಡೇರಿಕೆಗಾಗಿ ಭಕ್ತಿಪೂರ್ವಕವಾಗಿ ಬೇಡಿಕೊಂಡರೆ ಕಷ್ಟಗಳು ಈಡೇರುತ್ತವೆ ಎಂಬುದು ಭಕ್ತರ ಬಲವಾದ ನಂಬಿಕೆ.

ಕೃಷಿ, ವ್ಯಾಪಾರ, ವಿವಾಹ, ಸಂತಾನಭಾಗ್ಯ, ಉದ್ಯೋಗ, ಜಾಗದ ವಿವಾದ, ಹಣಕಾಸು ವಿವಾದ, ವಾಹನ ಖರೀದಿಯಲ್ಲಿ ಹಿನ್ನಡೆಯಾಗಿದ್ದರೆ ಇಲ್ಲಿ ಬಂದು ಭಕ್ತಿಯಿಂದ ಬೇಡಿಕೊಳ್ಳುತ್ತಾರೆ. ಭಕ್ತಿಯಿಂದ ಬೇಡಿಕೊಂಡಾಗ ದೇವರ ಹೂ ಬೀಳುತ್ತದೆ ಎಂಬ ನಂಬಿಕೆ ಭಕ್ತರದ್ದು. ಕೆಲಸವಾದ ಬಳಿಕ ಹರಕೆ ರೀತಿಯಲ್ಲಿ ಹೂ ಅಲಂಕಾರ, ಎಳನೀರು ಅಭಿಷೇಕ, ತ್ರಿಶೂಲ, ಕಡ್ತಾಳೆ (ದೇವರ ಕತ್ತಿ), ಗಂಟೆ ಅರ್ಪಿಸುವುದು ವಾಡಿಕೆ.

ನಂತರ 2025ರ ಏಪ್ರಿಲ್ ಮೊದಲ ವಾರದಲ್ಲಿ ಇದಕ್ಕೆ ಹೆಚ್ಚು ಶಕ್ತಿ ತುಂಬುವ ಕೆಲಸವನ್ನು ಮಂಗಳೂರಿನ ಪಂಜದ ಅರ್ಚಕರಾದ ಲಕ್ಷ್ಮಣ್, ಗಂಗಾಧರ್, ಸ್ಥಳೀಯ ಅರ್ಚಕರಾದ ಮಂಜುನಾಥ್ ಶರ್ಮ ಸೇರಿದಂತೆ 6 ಅರ್ಚಕರು ಬಂದು ನಿರಂತರವಾಗಿ ಚಂಡಿಕಾ ಯಾಗ, ಹೋಮ, ತಂಬಿಲಾ ಸೇವೆ, ಬ್ರಹ್ಮಕಲಸೋತ್ಸವ ಮೂಲಕ ಮಂಟಪ ನಿರ್ಮಾಣ ಮಾಡಿ ಪೀಠದಲ್ಲಿ ಚೌಡಮ್ಮ, ಗುಳಿಗ, ಪಂಜುರ್ಲಿ ಹಾಗೂ ನಾಗ ದೈವವನ್ನು ಪ್ರತಿಷ್ಠಾಪನೆ ಮಾಡಿ ಬನಕ್ಕೆ ಹೆಚ್ಚು ಶಕ್ತಿ ತುಂಬಲಾಯಿತು.

ಪ್ರತಿ ತಿಂಗಳ ಸಂಕ್ರಮಣ ದಿನದಂದು ಗುಡಿಯಲ್ಲಿ ವಿಶೇಷ ಪೂಜೆ ನೆರವೇರುತ್ತದೆ. ಇನ್ನುಳಿದಂತೆ ಭಕ್ತರು ಇಷ್ಟಾರ್ಥ ಸಿದ್ಧಿಗಾಗಿ ಬೇಡಿಕೆ ಸಲ್ಲಿಸುತ್ತಾರೆ. ಪ್ರಾರಂಭದಲ್ಲಿ ಈ ಗುಡಿ ಕೆಲವರಿಗೆ ಮಾತ್ರ ಸೀಮಿತವಾಗಿತ್ತು. ಇದೀಗ ಈ ಗುಡಿ ಗ್ರಾಮದ ಗುಡಿಯಾಗಿದ್ದು, ನಿತ್ಯ ಪ್ರಾರ್ಥನೆ ಸಲ್ಲಿಸುವವರ ಸಂಖ್ಯೆ ಹೆಚ್ಚುತ್ತಿದೆ. ಪ್ರತಿ ಮನೆಯಲ್ಲಿ ನಡೆಯುವ ಯಾವುದೇ ಶುಭ ಸಮಾರಂಭದ ಮುನ್ನ ಗುಡಿಗೆ ಬಂದು ಪೂಜೆ ಸಲ್ಲಿಸಿ ಮುಂದುವರಿಯುವುದು ವಿಶೇಷ. ಇದರಿಂದ ಶುಭ ಸಮಾರಂಭಕ್ಕೆ ಯಾವುದೇ ವಿಘ್ನ ಎದುರಾಗುವುದಿಲ್ಲ ಎಂಬ ನಂಬಿಕೆ ಭಕ್ತರದ್ದು.

ಪ್ರತಿ ವರ್ಷ ಏಪ್ರಿಲ್‌ನಲ್ಲಿ ವಾರ್ಷಿಕ ವಿಶೇಷ ಪೂಜೆ, ಅಲಂಕಾರ, ಅಭಿಷೇಕ ಹಾಗೂ ಬಲಿಪೂಜೆ ನೆರವೇರಲಿದೆ. ಗೌರಿ ಗಣೇಶ, ಶಿವರಾತ್ರಿ, ದೀಪಾವಳಿ, ಸಂಕ್ರಾಂತಿ, ಯುಗಾದಿಯಂದು ವಿಶೇಷ ಪೂಜೆ ನೆರವೇರಲಿದೆ ಇದರೊಂದಿಗೆ ಪ್ರತಿ ತಿಂಗಳ ಸಂಕ್ರಮಣ ದಿನದಂದು ಬೆಳಗ್ಗೆಯಿಂದ ಮಧ್ಯಾಹ್ನಾದವರೆಗೆ ಗುಡಿಯ ಮೇಲೆ ನಿಂತು ವಿಶೇಷ ಪೂಜೆ ಸಲ್ಲಿಸಲಾಗುತ್ತದೆ.