ಮಾಹಿತಿಯ ಕಣಜವಾದ ಸಿರಿಧಾನ್ಯ ಹಬ್ಬ

ಹೌದು, ಕೃಷಿ ಮತ್ತು ರೈತರ ಕಲ್ಯಾಣ ಸಚಿವಾಲಯ, ಭಾರತ ಸರ್ಕಾರ ಹಾಗೂ ಕರ್ನಾಟಕ ಸರ್ಕಾರ, ಕೊಡಗು ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್ ಮತ್ತು ಕೃಷಿ ಇಲಾಖೆ ವತಿಯಿಂದ ಆತ್ಮ ಯೋಜನೆ, ದೇಸಿ ತಳಿಗಳ ಸಂರಕ್ಷಣೆ ಹಾಗೂ ಅಂತಾರಾಷ್ಟ್ರೀಯ ವಾಣಿಜ್ಯ ಮೇಳ-2026ರ ಅಂಗವಾಗಿ ಉತ್ಪಾದನೋತ್ತರ ಕೃಷಿ-ರೈತರ ಸಬಲೀಕರಣ ಎಂಬ ಶೀರ್ಷಿಕೆಯೊಂದಿಗೆ ಹಮ್ಮಿಕೊಂಡಿದ್ದ ಜಿಲ್ಲಾ ಮಟ್ಟದ ಸಿರಿಧಾನ್ಯ ಹಬ್ಬ, ದೇಸಿ ತಳಿಗಳ ಸಂರಕ್ಷಣೆ ಕಾರ್ಯಾಗಾರ ಮತ್ತು ಕಿಸಾನ್ ಮೇಳ ಹಾಗೂ ವಸ್ತು ಪ್ರದರ್ಶನದಲ್ಲಿ ರೈತರು, ವಿವಿಧ ಇಲಾಖೆ ವತಿಯಿಂದ ತೆರೆಯಲಾಗಿದ್ದ ಮಳಿಗೆಗಳಲ್ಲಿ ಜಿಲ್ಲೆಯ ರೈತರು ಮಾಹಿತಿ ಪಡೆದುಕೊಳ್ಳುತ್ತಿದ್ದ ದೃಶ್ಯ ಕಂಡುಬರುತ್ತಿತ್ತು.

ಕೃಷಿ ವಿಜ್ಞಾನ ಕೇಂದ್ರ ಗೋಣಿಕೊಪ್ಪ ವತಿಯಿಂದ ಕಿತ್ತಳೆ, ಸಪೋಟ, ಗಜನಿಂಬೆ, ಬಾಳೆಕಾಯಿ, ಫಿಂಗರ್ ಬನಾನಾ, ಎಗ್ ಫ್ರೂಟ್ ಹಣ್ಣುಗಳು ಗಮನ ಸೆಳೆದವು. ಕಾಗೆಸಣ್ಣ, ಬಿ.ಕೆ.ಬಿ, ಪಂಚರತ್ನ, ಬರ್ಮಬ್ಯಾಕ್, ದೊಡ್ಡಿ, ಜಿರಿಗೆ ಸಣ್ಣ, ರಾಜಮುಡಿ, ಗೋವಿಂದ ಬೋಗ್, ರತ್ನಚೂಡಿ, ಇಂಟಾನ್, ತುಂಗಾ, ಕಿನ್ಯ ಭತ್ತ, ಬಿಳಿಯ, ರಕ್ತಶಾಲಿ, ಆತ್ಮಕ, ಕಾಲಾನಾಮಕ್ ಸೇರಿದಂತೆ 40 ಹೆಚ್ಚು ಭತ್ತದ ತಳಿಗಳನ್ನು ಪ್ರದರ್ಶನಕ್ಕೆ ಇಡಲಾಗಿತ್ತು. ಕೃಷಿ ಇಲಾಖೆಯಿಂದ ಮಾಹಿತಿ ಕೇಂದ್ರ ತೆರೆಯಲಾಗಿತ್ತು.

ನೇಗಿಲಯೋಗಿ ಸಮಾಜ ಸೇವಾ ಟ್ರಸ್ಟ್ ಮೈಸೂರು ವತಿಯಿಂದ ಬೆಲ್ಲದ ಮಳಿಗೆ ತೆರೆಯಲಾಗಿತ್ತು. ಜಿಲ್ಲೆಯ ಪ್ರಗತಿಪರ ಕೃಷಿಕ ಬಿ.ಪಿ.ರವಿಶಂಕರ್ ದೇಸಿ ಭತ್ತದ ತಳಿಗಳನ್ನು ಪ್ರದರ್ಶನಕ್ಕಿಟ್ಟಿದ್ದರು. ಅಲ್ಲದೇ, ತಾವು ಬೆಳೆಯುತ್ತಿರುವ ಬೆಳೆಗಳ ಬಗ್ಗೆ ಮಾಹಿತಿ ಹಂಚಿಕೊಳ್ಳುತ್ತಿದ್ದು ಗಮನ ಸೆಳೆಯಿತು. ಜೇನು ಕೃಷಿ ತರಬೇತುದಾರರಾದ ಪುರುಷೋತ್ತಮ ಕಾಂತಿಲ ಅವರು ಏಲಕ್ಕಿ ಮತ್ತು ಜೇನು ಕೃಷಿ ಮಾಹಿತಿ ನೀಡುತ್ತಿದ್ದರು. ವಿವಿಧ ಬಗೆಯ ಕಾಫಿ ಪೌಡರ್ ಮಾರಾಟ ಮಳಿಗೆ ತೆರೆಯಲಾಗಿತ್ತು.

ಆದಿ ಪೆಪ್ಪರ್ ಡೆಮೋ ಫಾರ್ಮ್ ಮತ್ತು ರಿಸರ್ಚ್ ಸೆಂಟರ್‌ನಿಂದ ಆದಿ ಪೆಪ್ಪರ್‌ನ ಮಾಹಿತಿ ನೀಡಲಾಗುತ್ತಿತ್ತು. ಜಿಲ್ಲೆಯಲ್ಲಿ ಸಾಮಾನ್ಯವಾಗಿ ಬೆಳೆಯುವ ಕಾಳುಮೆಣಸಿಗಿಂತ ಆದಿ ಪೆಪ್ಪರ್ ಗಾತ್ರದಲ್ಲಿ ದೊಡ್ಡದಿದ್ದು, ಕಾರ ಸ್ವಲ್ಪ ಕಡಿಮೆ ಇರುವುದಾಗಿ ಬೆಳೆಗಾರರು ವರ್ಣಿಸುತ್ತಿದ್ದರು. ಗಿನ್ನಿಸ್ ದಾಖಲೆ ಹೊಂದಿರುವ ಚೈನಾ ದೇಸಿ ಹಸಿಮೆಣಸಿನ ತಳಿ ಎಲ್ಲರ ಗಮನ ಸೆಳೆಯಿತು. ಸುಮಾರು 18 ಇಂಚು ಬೆಳೆದ ಕಾಯಿಮೆಣಸಿನ ಮಾಹಿತಿಯನ್ನು ಪ್ರತಿಯೊಬ್ಬರೂ ಪಡೆಯುತ್ತಿದ್ದರು.

ತೋಟಗಾರಿಕೆ ಇಲಾಖೆಯಿಂದ ಹಸಿರು ಮನೆಗಳ ನಿರ್ವಾಹಣೆ, ಕಿತ್ತಳೆ ಬೆಳೆ, ಮನೆಯ ಛಾವಣಿಯಲ್ಲಿ ತಾರಸಿ ತೋಟ ಮಾಡುವ ಬಗ್ಗೆ, ಕೈ ತೋಟಗಳ ಬಗ್ಗೆ ಮಾಹಿತಿ ನೀಡಲಾಗುತ್ತಿತ್ತು. ಪಶುಸಂಗೋಪನಾ ಇಲಾಖೆ ವತಿಯಿಂದ ಹಂದಿ ಸಾಕಣೆ, ಆಧುನಿಕ ಹೈನುಗಾರಿಕೆ, ಹಾಲಿನ ಸಾಂದ್ರತೆ ಬಗ್ಗೆ ಮಾಹಿತಿ ನೀಡುತ್ತಿದ್ದರು. ಮೀನುಗಾರಿಕೆ ಇಲಾಖೆಯಿಂದ ಸರ್ಕಾರ ಸೌಲಭ್ಯಗಳು, ಯೋಜನೆಗಳ ಮಾಹಿತಿ ನೀಡಲಾಗುತ್ತಿತ್ತು.

ಭತ್ತ, ರಾಗಿ, ಮೆಕ್ಕೆಜೋಳ, ಕಾಳು ಮೆಣಸು, ಬೇಳೆ ಇತ್ಯಾದಿ ಧಾನ್ಯಗಳನ್ನು ಬಳಸಿ ವೇದಿಕೆ ಮುಂಭಾಗ ಅದ್ಭುತವಾದ ಕಲಾಕೃತಿಯನ್ನು ರಚಿಸಲಾಗಿತ್ತು. ರೈತರೊಬ್ಬರು ಎತ್ತುಗಳೊಂದಿಗೆ ನೇಗಿಲು ಹಿಡಿದು ಸಾಗುತ್ತಿದ್ದ ದೃಶ್ಯ ಗಮನ ಸೆಳೆಯಿತು. ಕಲಾಕೃತಿ ಸುತ್ತಲು ಮೆಕ್ಕೆಜೋಳದ ತೆನೆ, ಮಣ್ಣಿನ ಮಡಕೆಗಳನ್ನು ಆಕರ್ಷಣೆಗೆ ಇಡಲಾಗಿತ್ತು.

ಅಪ್ಪಂಗಳ ಪ್ರಾದೇಶಿಕ ಕೇಂದ್ರದ ಐಸಿಎಆರ್-ಐಐಎಸ್‌ಆರ್ ಹಿರಿಯ ವಿಜ್ಞಾನಿಗಳು ಮತ್ತು ಮುಖ್ಯಸ್ಥರಾದ ಡಾ.ಜಿ.ಎ.ರಾಜಣ್ಣ ಮಾತನಾಡಿ, ಅಪ್ಪಂಗಳ ಪ್ರಾದೇಶಿಕ ಕೇಂದ್ರದಿಂದ 6 ಏಲಕ್ಕಿ ತಳಿಗಳನ್ನು ಅಭಿವೃದ್ಧಿ ಮಾಡಲಾಗಿದೆ. ಮಳೆ ಕಡಿಮೆ ಬೀಳುವ ಪ್ರದೇಶಕ್ಕೆ ಅನುಗುಣವಾಗಿ ಏಲಕ್ಕಿ ಬೆಳೆಯನ್ನು ಅಭಿವೃದ್ಧಿಪಡಿಸಿದ್ದೇವೆ ಎಂದು ಮಾಹಿತಿ ನೀಡಿದರು. ಅಲ್ಲದೇ ಹೆಚ್ಚಿನ ಮಾಹಿತಿಗಾಗಿ ರೈತರು ಅಪ್ಪಂಗಳ ಪ್ರಾದೇಶಿಕ ಕೇಂದ್ರದ ಐ.ಸಿ.ಎ.ಆರ್ ಭಾರತೀಯ ಸಂಬಾರ ಬೆಳೆಗಳ ಸಂಶೋಧನ ಸಂಸ್ಥೆಗೆ ಭೇಟಿ ನೀಡಬಹುದು ಎಂದರು.

ದೇಸಿ ತಳಿಗಳ ಸಂರಕ್ಷಣೆ ಬಗ್ಗೆ ಜಿಲ್ಲೆಯ ಪ್ರಗತಿಪರ ಕೃಷಿಕರಾದ ರವಿಶಂಕರ್ ಮಾತನಾಡಿ, ನಮ್ಮಲ್ಲಿ ನಾಲ್ಕು ತಲೆಮಾರಿನಿಂದ ಭತ್ತ ಬೆಳೆಯಲಾಗುತ್ತಿದೆ. ಆದರೆ, ಪ್ರಸ್ತುತ ಜಿಲ್ಲೆಯಲ್ಲಿ ಕಾಫಿ, ಮೆಣಸು ಕೃಷಿಗೆ ಒತ್ತು ನೀಡುತ್ತಿದ್ದಾರೆ. ದೇಸಿ ತಳಿಗಳ ಉಳಿಸಲು ಯಾರು ಪ್ರಯತ್ನಿಸುತ್ತಿಲ್ಲ. ನಾನು 300ಕ್ಕೂ ಹೆಚ್ಚಿನ ಭತ್ತ ತಳಿಯನ್ನು ಬೆಳೆಯುತ್ತಿದ್ದೇನೆ. ಮುಂದಿನ ಯುವ ಪೀಳಿಗೆಗಾಗಿ ದೇಸಿ ತಳಿಗಳ ರಕ್ಷಣೆ ಅತ್ಯಗತ್ಯವಾಗಿದೆ ಎಂದು ಹೇಳಿದರು.

ಮಾಹಿತಿ ಕಾರ್ಯಾಗಾರದಲ್ಲಿ ತೋಟಗಾರಿಕೆ ಇಲಾಖೆ ನಿವೃತ್ತ ನಿರ್ದೇಶಕ ವಸಂತ್ ಮಾತನಾಡಿ, ಜೇನು ಅಮೃತಕ್ಕೆ ಸಮಾನ. ಕೊಡಗಿನ ಜನತೆ ತುಂಬ ಹಿಂದಿನಿಂದಲೂ ಜೇನುಕೃಷಿ ಮಾಡುತ್ತಾ ಬಂದಿದ್ದಾರೆ. ಕೊಡಗು ರಾಜ್ಯವಾಗಿದ್ದ ಸಂದರ್ಭದಲ್ಲಿ ಪ್ರತ್ಯೇಕವಾಗಿ ಜೇನು ಕೃಷಿಗೆ ಬಜೆಟ್ ಮಂಡಿಸುತ್ತಿದ್ದರು. ಇಂದು ಕೆಲವೆಡೆ ಕಲಬೆರಕೆ ಜೇನುತುಪ್ಪ ಮಾರಾಟ ಮಾಡಲಾಗುತ್ತಿದೆ. ಒಂದು ಬಿಳಿ ಹಾಳೆಯ ಮೇಲೆ ಜೇನಿನ ಹನಿ ಹಾಕಿದಾಗ ಹಾಳೆ ನೆನೆದರೆ ಅದು ಕಲಬೆರಕೆಯಾಗಿದೆ ಎಂದು ನಾವು ತಿಳಿಯಬೇಕು. ಶುದ್ಧ ಜೇನಿನ ಬಳಕೆಗೆ ಒತ್ತು ಕೊಡಬೇಕು ಎಂದರು.

ಸಭಾ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದ ನಗರಸಭೆ ಅಧ್ಯಕ್ಷೆ ಪಿ.ಕಲಾವತಿ ನವಣೆ ಆರೋಗ್ಯಕ್ಕೆ ಉತ್ತಮವಾಗಿದೆ. ಆದರೆ ಜಿಲ್ಲೆಯಲ್ಲಿ ನವಣೆ ಬಳಕೆ ಕಡಿಮೆಯಿದೆ. ಇದರ ಬಳಕೆಯತ್ತ ಜಿಲ್ಲೆಯ ಜನತೆ ಗಮನ ನೀಡಬೇಕು ಎಂದು ತಿಳಿಸಿದರು.

ಪ್ರಗತಿಪರ ಕೃಷಿಕ ಟಿ.ಜೆ.ಶೇಸಪ್ಪ, ಜಿಲ್ಲಾ ಕೃಷಿಕ ಸಮಾಜದ ಅಧ್ಯಕ್ಷ ಎಸ್.ಪಿ.ಪೊನ್ನಪ್ಪ, ಕೃಷಿ ಇಲಾಖೆಯ ಜಂಟಿ ನಿರ್ದೇಶಕ ಚಂದ್ರಶೇಖರ್ ಮಾತನಾಡಿದರು.

ಪ್ರಗತಿಪರ ಕೃಷಿಕರಾದ ನಾಪಂಡ ಸುಮಿತ್ರ ಗಣಪತಿ, ಟಿ.ಜೆ.ಶೇಸಪ್ಪ ಅವರನ್ನು ಸನ್ಮಾನಿಸಲಾಯಿತು. .ವೇದಿಕೆಯಲ್ಲಿ ಉಪ ಕೃಷಿ ನಿರ್ದೇಶಕ ಡಾ.ಡಿ.ಎಸ್.ಸೋಮಶೇಖರ್, ತೋಟಗಾರಿಕೆ ಇಲಾಖೆ ಉಪನಿರ್ದೇಶಕ ಶಶಿಧರ್, ಪಶುಪಾಲನಾ ಮತ್ತು ಪಶುವೈದ್ಯಕೀಯ ಸೇವಾ ಇಲಾಖೆ ಉಪ ನಿರ್ದೇಶಕ ಡಾ.ಲಿಂಗರಾಜ್ ದೊಡ್ಡಮನಿ ಇತರರಿದ್ದರು.