ಮಿಶ್ರ ಬೆಳೆ ಪದ್ಧತಿಯಿಂದ ಸಮೃದ್ಧ ಫಸಲು

ಪೊನ್ನಂಪೇಟೆ: ಪ್ರಾಕೃತಿಕ ವಿಕೋಪ, ಕಾರ್ಮಿಕರ ಸಮಸ್ಯೆ, ದರ ಕುಸಿತ, ಬೆಳೆ ಹಾನಿ ಇತ್ಯಾದಿ ಸಮಸ್ಯೆಗಳನ್ನು ಮೆಟ್ಟಿ ನಿಂತು ತಮ್ಮದೇ ಕೃಷಿ ವಿಧಾನದಲ್ಲಿ ಯಶಸ್ಸು ಕಂಡ ಕೃಷಿಕ ಕಿರುಂದಂಡ ಶಶಿ ಅಯ್ಯಪ್ಪ ಒಬ್ಬ ಮಾದರಿ ರೈತರಾಗಿದ್ದಾರೆ.

ಪೊನ್ನಂಪೇಟೆ ತಾಲೂಕಿನ ಚಿಕ್ಕಮುಂಡೂರು ಗ್ರಾಮದ ರೈತ ಶಶಿ ಅಯ್ಯಪ್ಪ, ಪಿತ್ರಾರ್ಜಿತ ಆಸ್ತಿಯಾಗಿ ಬಂದ ಮೂರುವರೆ ಎಕರೆ ಜಾಗದಲ್ಲಿ ಕಾಫಿ, ಕರಿಮೆಣಸು, ತೆಂಗು, ಅಡಕೆ, ಬಾಳೆ ಮುಂತಾದ ಮಿಶ್ರ ಬೆಳೆಗಳನ್ನು ಬೆಳೆದು ಯಶಸ್ವಿ ರೈತ ಎನಿಸಿಕೊಂಡಿದ್ದಾರೆ. ಕಾಫಿ ಕೃಷಿಯಲ್ಲೂ ಶಶಿ ಅಯ್ಯಪ್ಪ ಸೈ ಎನಿಸಿಕೊಂಡಿದ್ದಾರೆ. ಎಕರೆಗೆ ಸುಮಾರು 40 ರಿಂದ 45 ಚೀಲಗಳಷ್ಟು ಇಳುವರಿ ತೆಗೆಯುವ ಅವರು ಪೊನ್ನಂಪೇಟೆ ಭಾಗದಲ್ಲಿ ಒಬ್ಬ ಸಾಧಕ ಎಂಬ ಕೀರ್ತಿಗೆ ಭಾಜನರಾಗಿದ್ದಾರೆ.

ಕಾಫಿ ತೋಟಕ್ಕೆ ವರ್ಷಕ್ಕೆ 3 ರಿಂದ 4 ಬಾರಿ ಅಲ್ಪಪ್ರಮಾಣದಲ್ಲಿ ರಸಗೊಬ್ಬರ ಹಾಕುತ್ತಾರೆ. ಮುಂಗಾರು ಪ್ರಾರಂಭವಾಗುವ ಮುಂಚಿತವಾಗಿ ಸಗಣಿ ಗೊಬ್ಬರ ಮತ್ತು ಪ್ರತಿ ಮೂರು ವರ್ಷಗಳಿಗೊಮ್ಮೆ ತೋಟಕ್ಕೆ ಸುಣ್ಣವನ್ನು ಹಾಕುತ್ತಾರೆ. ಇದರಿಂದ ಬೆರಿಬೋರರ್ ಮತ್ತು ಕಾಂಡಕೊರಕಗಳ ಹಾವಳಿಯಿಂದ ಕಾಫಿ ಗಿಡಗಳಿಗೆ ತೊಂದರೆ ಆಗುವುದನ್ನು ತಪ್ಪಿಸಲು ಸಹಕಾರಿಯಾಗಿದೆ. ತೋಟದಲ್ಲಿ ಕೆರೆ ಹೊಂದಿರುವ ಅವರು ತೋಟ ಮತ್ತು ಗದ್ದೆಗೆ ನೀರಾವರಿ ವ್ಯವಸ್ಥೆ ಮಾಡಿಕೊಂಡಿದ್ದಾರೆ.

4 ಎಕರೆ ಪ್ರದೇಶದಲ್ಲಿ ಶಶಿ ಅಯ್ಯಪ್ಪ ಭತ್ತದ ಗದ್ದೆ ಹೊಂದಿದ್ದಾರೆ. ಪ್ರಸ್ತುತ ಅಥಿರ ಮತ್ತು ತನು ತಳಿಯ ಭತ್ತವನ್ನು ಬೆಳೆದು ಎಕರೆಗೆ ಸುಮಾರು 15 ಕ್ವಿಂಟಾಲ್‌ಗಳಷ್ಟು ಇಳುವರಿಯನ್ನು ತೆಗೆಯುತ್ತಿದ್ದಾರೆ. ಕೆಎಚ್‌ಪಿ ದೊಡ್ಡಿ, ಇಂಟಾನ್ ತಳಿಗಳನ್ನು ಈ ಹಿಂದೆ ಬೆಳೆದಿದ್ದರು. ಅದರಲ್ಲಿ ಉತ್ತಮ ಇಳುವರಿ ಪಡೆಯಲಾಗಲಿಲ್ಲ. ಹಾಗಾಗಿ ಹೆಚ್ಚು ಇಳುವರಿ ಪಡೆಯುವತ್ತ ಅವರು ಗಮನಹರಿಸಿ ಶ್ರಮ ಹಾಕಿದರು.

ಕಾರ್ಮಿಕರ ಸಮಸ್ಯೆಗೆ ಪರಿಹಾರ:

ಇತ್ತೀಚಿನ ವರ್ಷಗಳಲ್ಲಿ ಕಾರ್ಮಿಕರ ಸಮಸ್ಯೆ ಹೆಚ್ಚಾಗಿ ಭತ್ತದ ಗದ್ದೆಯನ್ನು ಪಾಳು ಬಿಡುವ ಯೋಚನೆಯಲ್ಲಿದ್ದರು. ಆಗ ವರದಾನವಾಗಿ ಬಂದಿದ್ದೇ ನಾಟಿಯ ಬದಲು ಭತ್ತ ಬಿತ್ತನೆ(ಎರಚುವ) ಪದ್ಧತಿ. ಖರ್ಚು ಕಡಿಮೆ ಮತ್ತು ವರಮಾನ ಅಧಿಕವಾಗಿರುವ ಈ ಪದ್ಧತಿ ವರದಾನ ಆಯಿತು. ಉತ್ತಮ ಫಸಲೂ ಬಂತು. ಭತ್ತವನ್ನು ತಮ್ಮ ಉಪಯೋಗಕ್ಕೆ ಬೇಕಾದಷ್ಟು ಇಟ್ಟುಕೊಂಡು ಉಳಿದದ್ದನ್ನು ಸ್ಥಳೀಯ ಮಾರುಕಟ್ಟೆಯಲ್ಲಿ ಮಾರುತ್ತಾರೆ. ಭತ್ತದ ಹುಲ್ಲನ್ನು ತಮ್ಮ ಜಾನುವಾರುಗಳಿಗೆ ನೀಡುತ್ತಾರೆ.

ಅರೇಬಿಕ ಕಾಫಿಯಲ್ಲಿ ತಾವು ನಿರೀಕ್ಷಿಸಿದಷ್ಟು ಇಳುವರಿಯನ್ನು ತೆಗೆಯುವುದು ಕಷ್ಟವಾದಾಗ ಇದಕ್ಕೆ ಪರ್ಯಾಯವಾಗಿ ತಮ್ಮ ತೋಟದಲ್ಲಿ 250ರಿಂದ 300 ನಾಟಿ ಅಡಕೆ ಗಿಡ, 200 ತೀರ್ಥಳ್ಳಿ ತಳಿಯ ಅಡಕೆ ಗಿಡಗಳನ್ನು ಬೆಳೆಸಿದರು. ಇದರಲ್ಲಿ ವರ್ಷಕ್ಕೆ 20 ರಿಂದ 30 ಕ್ವಿಂಟಾಲ್ ಅಡಕೆ ಇಳುವರಿ ಪಡೆಯುತ್ತಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ದಕ್ಷಿಣ ಕೊಡಗಿನಲ್ಲಿ ಅಧಿಕ ಮಳೆ ಬೀಳುತ್ತಿದೆ. ಇದು ಅಡಕೆ ಫಸಲಿನ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತಿದೆ. ಅದಕ್ಕಾಗಿ ಅಡಿಕೆ ಮರಗಳಿಗೆ ಮಳೆಗಾಲದಲ್ಲಿ ಮೂರರಿಂದ ನಾಲ್ಕು ಬಾರಿ ಕಾಪರ್ ಸಲ್ಫೇಟ್, ಸುಣ್ಣ ಮಿಶ್ರಣದ ಜೊತೆಗೆ ಸೇರಿಸಿ ಅಡಕೆ ಕಾಯಿಗಳಿಗೆ ಸಿಂಪಡಣೆ ಮಾಡುತ್ತಾರೆ. ಇದರಿಂದ ಶಿಲೀಂಧ್ರಗಳು, ಇತರ ರೋಗ ತಡೆಗಟ್ಟಬಹುದು ಎಂದು ಹೇಳುತ್ತಾರೆ.

ಅಡಕೆ ಫಸಲಿಗೆ ಕೊಡಗಿನ ಹವಾಮಾನ, ಮಣ್ಣು ಅಷ್ಟೇನು ಸಹಕಾರಿ ಆಗುವುದಿಲ್ಲ. ಬಯಲು ಸೀಮೆಗೆ ಹೋಲಿಸಿದರೆ ಇಲ್ಲಿನ ಮಣ್ಣು ಅಧಿಕ ತೇವಾಂಶದಿಂದ ಕೂಡಿರುತ್ತದೆ. ಹಾಗಾಗಿ ಅಡಕೆ ಗಿಡಗಳಿಗೆ ರೋಗ ನಿರೋಧಕ ಶಕ್ತಿ ಕಡಿಮೆ ಇರುತ್ತದೆ ಎಂದು ಶಶಿ ಅಯ್ಯಪ್ಪ ಹೇಳುತ್ತಾರೆ. ಹಾಗಿದ್ದೂ ತಮ್ಮದೇ ಆದ ವಿಧಾನಗಳನ್ನು ಬಳಸಿ ಅಧಿಕ ಇಳುವರಿ ಪಡೆಯುತ್ತಾರೆ. ತಾವು ಬೆಳೆದ ಅಡಕೆ ಫಸಲನ್ನು ಗೋಣಿಕೊಪ್ಪದ ಆರ್‌ಎಂಸಿ ಮಾರುಕಟ್ಟೆ ಮತ್ತು ಸ್ಥಳೀಯ ವ್ಯಾಪಾರಿಗಳಿಗೆ ಮಾರಾಟ ಮಾಡುತ್ತಿದ್ದಾರೆ. ಮನೆಯ ಸಮೀಪದಲ್ಲೇ ಇರುವ ಅರ್ಧ ಎಕರೆ ಜಾಗದಲ್ಲಿ ಶಶಿ ಒಂದು ವರ್ಷದಿಂದ ನೇಂದ್ರ ಬಾಳೆ, ಮೈಸೂರು ಬಾಳೆ ತಳಿಗಳನ್ನು ಬೆಳೆಸಿದ್ದಾರೆ. ಇದು ಇವರಿಗೆ ವರ್ಷವಿಡೀ ಸಿಗುವ ಅಲ್ಪ ಆದಾಯದ ಮೂಲವಾಗಿದೆ. ಇದನ್ನು ಸಮೀಪದ ಅಂಗಡಿಗಳಿಗೆ ಮಾರಾಟ ಮಾಡುತ್ತಾರೆ.

*

ಮೀನು ಕೃಷಿಯಲ್ಲೂ ಯಶ

ತೋಟ, ಗದ್ದೆ ನಿರ್ವಹಣೆಯೊಂದಿಗೆ ಶಶಿ ಅಯ್ಯಪ್ಪ ಮೀನು ಕೃಷಿಯಲ್ಲೂ ಆಸಕ್ತಿ ಹೊಂದಿದ್ದಾರೆ. ತಮ್ಮ ತೋಟದಲ್ಲೇ ಇರುವ ಕೃಷಿ ಹೊಂಡದಲ್ಲಿ ರೂಪ್ ಚಂದ್, ಗ್ರಾಸ್ ಕಾರ್ಪ್ , ಕಾಮನ್ ಕಾರ್ಪ್ ತಳಿಯ ಮೀನುಗಳನ್ನು ಸಾಕುತ್ತಿದ್ದಾರೆ. ಕೆಲವು ಮರಗಳ ಎಲೆಗಳು ಮತ್ತು ಮಾರ್ಕೆಟ್‌ನಲ್ಲಿ ಸಿಗುವ ಮೀನಿನ ಆಹಾರವನ್ನು ಅವುಗಳಿಗೆ ನೀಡುತ್ತಾರೆ. ಮೀನುಗಳನ್ನು ಹಿಡಿದು ಸ್ಥಳೀಯವಾಗಿ ವ್ಯಾಪಾರ ಮಾಡಿ ವರ್ಷಕ್ಕೆ 20 ರಿಂದ 30 ಸಾವಿರ ರೂ. ಆದಾಯ ಗಳಿಸುತ್ತಿದ್ದಾರೆ.

ಶಶಿ ಅಯ್ಯಪ್ಪ ಈ ಹಿಂದೆ ಕೋಳಿ, ಹಂದಿ ಸಾಕಿ ಅದರಲ್ಲೂ ಲಾಭ ಕಂಡಿದ್ದರು. ಇತ್ತೀಚಿಗೆ ಕಾರ್ಮಿಕರ ಸಮಸ್ಯೆ ಹೆಚ್ಚಾಗಿದೆ. ಹಾಗಾಗಿ ಅವರು ಗದ್ದೆಗಿಂತಲೂ ತೋಟಗಾರಿಕೆ ಬೆಳೆಗಳ ಬಗ್ಗೆ ಒಲವು ಮೂಡಿಸಿಕೊಂಡಿದ್ದಾರೆ. ಸದ್ಯಕ್ಕೆ ತೋಟಕ್ಕೆ ಹಾಕಲು ಸಾವಯವ ಗೊಬ್ಬರದ ಅವಶ್ಯಕತೆ ಇರುವ ಕಾರಣ ಅಲ್ಪ ಮಟ್ಟಿಗೆ ಹೈನುಗಾರಿಕೆಯತ್ತಲೂ ಗಮನ ಹರಿಸಿದ್ದಾರೆ. ನಾಟಿ ತಳಿಯ ಹಸುಗಳನ್ನು ಸಾಕಿದ್ದಾರೆ. ಹಾಲನ್ನು ಮನೆ ಬಳಕೆಗೆ, ಸಗಣಿ ಗೊಬ್ಬವರವನ್ನು ತಮ್ಮ ತೋಟಕ್ಕೆ ಬಳಸುತ್ತಿದ್ದಾರೆ.

ಸಾವಯವ ಗೊಬ್ಬರ ಬಳಕೆ

ತೋಟದಲ್ಲಿ ಅಲ್ಪ ಜಾಗವನ್ನೂ ಶಶಿ ಅಯ್ಯಪ್ಪ ಖಾಲಿ ಬಿಟ್ಟಿಲ್ಲ. ಅಲ್ಲಿ ಅವಕಾಡ, ಸಪೋಟ, ಪಪ್ಪಾಯ ಗಿಡಗಳನ್ನು ಬೆಳೆಸಿದ್ದಾರೆ. ಇವುಗಳನ್ನು ಮನೆಗೇ ಉಪಯೋಗಿಸುತ್ತಿದ್ದಾರೆ. ಮನೆಗೆ ಬೇಕಾದ ತರಕಾರಿಗಳನ್ನು ತಾವೇ ಬೆಳೆದುಕೊಳ್ಳುತ್ತಾರೆ. ರಾಸಾಯನಿಕ ಗೊಬ್ಬರಗಳ ಬಳಕೆಯನ್ನು ವರ್ಷದಿಂದ ವರ್ಷಕ್ಕೆ ಕಡಿಮೆ ಮಾಡಿದ್ದಾರೆ.

ರೈತ ಶಶಿ ಅಯ್ಯಪ್ಪ ಅವರು ಯಾವುದೇ ಪ್ರಶಸ್ತಿ, ಪುರಸ್ಕಾರಗಳಿಗೆ ಆಸೆ ಪಡುವವರಲ್ಲ. ಕೃಷಿರಂಗವೇ ಅವರಿಗೆ ಅಪರಿಮಿತ ಆನಂದ ನೀಡುವುದಾಗಿದೆ. ಹಾಗಾಗಿ ಅವರು ಎಲೆಮರೆ ಕಾಯಿಯಂತೆ ಇದ್ದು, ಕೃಷಿ ಲೋಕದಲ್ಲಿ ಯಶಸ್ಸು ಸಾಧಿಸಿದ್ದಾರೆ.

ಕೋಟ್)

ಯಂತ್ರೋಪಕರಣಗಳ ಬಳಕೆಯಿಂದ ತೋಟದ ನಿರ್ವಹಣಾ ವೆಚ್ಚ ಕಡಿಮೆಯಾಗುತ್ತದೆ. ಅಧಿಕ ಆದಾಯ ಗಳಿಸಲು ಇದು ನೆರವಾಗಲಿದೆ. ಸಾವಯವ ಗೊಬ್ಬರದ ಬಳಕೆಯಿಂದ ಗಿಡಗಳು ಸಮೃದ್ಧವಾಗಿ ಬೆಳೆದು ಪ್ರತೀವರ್ಷ ಸರಾಸರಿ ಇಳುವರಿ ನೀಡುತ್ತವೆ. ಕಾಫಿ ತೋಟಗಳಲ್ಲಿ ಮರಗಳ ಅಧಿಕ ನೆರಳು ಇರದಂತೆ ನೋಡಿಕೊಂಡು ಸಮಯಕ್ಕೆ ಸರಿಯಾಗಿ ಕೆಲಸ ನಿರ್ವಹಣೆ ಮಾಡಿದರೆ ಉತ್ತಮ ಫಸಲು ಪಡೆಯಬಹುದು.

ಕಿರುಂದಂಡ ಶಶಿ ಅಯ್ಯಪ್ಪ

ಕೃಷಿಕ, ಚಿಕ್ಕ ಮುಂಡೂರು

*

ಶಶಿ ಅಯ್ಯಪ್ಪ ಒಬ್ಬ ಯಶಸ್ವಿ ಕೃಷಿಕ, ಪೊನ್ನಂಪೇಟೆ ಭಾಗದಲ್ಲಿ ಇವರು ತಮ್ಮದೇ ಕೃಷಿ ವಿಧಾನದಲ್ಲಿ ಬೇಸಾಯ ಮಾಡಿ ಎಲ್ಲರಿಗೂ ಮಾದರಿಯಾಗಿದ್ದಾರೆ. ಕೃಷಿಕರು ಇವರ ವ್ಯವಸಾಯ ಪದ್ಧತಿಯನ್ನು ಅನುಕರಣೆ ಮಾಡಿದರೆ ಬೇಸಾಯದಲ್ಲಿ ಉತ್ತಮ ಅಭಿವೃದ್ಧಿ ಕಾಣಬಹುದು.

ಮುದ್ದಿಯಡ ನಿತಿನ್

ಕೃಷಿಕ, ಮುಗುಟಗೇರಿ