ಮೇದುರ ಜಲಪಾತದಲ್ಲಿ ಜಲರಾಶಿಯ ಭೋರ್ಗರೆತ

ಸೋಮವಾರಪೇಟೆ:

ಗರ್ವಾಲೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಗ್ರಾಮಗಳಲ್ಲಿ ಮಳೆಯ ರಭಸ ಹೆಚ್ಚಾಗಿದ್ದು, ಸೂರ್ಲಬ್ಬಿ ಗ್ರಾಮದ ಬಳಿ ಇರುವ ಮೇದುರ ಜಲಪಾತ ಭೋರ್ಗರೆಯುತ್ತ ನೋಡುಗರ ಮನ ಸೆಳೆಯುತ್ತಿದೆ.

ಹೆಚ್ಚಿನ ಮಳೆ ಬೀಳುವ ಪ್ರದೇಶವಾದ ಸೂರ್ಲಬ್ಬಿಯಲ್ಲಿ ಮುಂಗಾರು ಮಳೆ ಎಡಬಿಡದೆ ಸುರಿಯುತ್ತದೆ. ಮುಖ್ಯ ರಸ್ತೆಯಲ್ಲಿರುವ ಸೇತುವೆ ಮೇಲೆ ನಿಂತು ಜಲಪಾತದ ದೃಶ್ಯ ಸೆರೆಹಿಡಿಯಬಹುದು. ನೀರು ಕಡಿಮೆ ಇರುವ ಸಮಯದಲ್ಲಿ ಜಲಪಾತದ ಹಾದಿಯಲ್ಲಿ ನಡೆದುಕೊಂಡು ಬೆಟ್ಟ ಹತ್ತಬಹುದಾಗಿದೆ.

ಮಾದಾಪುರದಿಂದ ಕೇವಲ 14 ಕಿಲೋಮೀಟರ್ ದೂರದಲ್ಲಿದೆ. ಜಲಪಾತಕ್ಕೆ ಮಡಿಕೇರಿಯಿಂದ ಮಾದಾಪುರ ಮಾರ್ಗವಾಗಿ ಬರಬಹುದು. ಕುಶಾಲನಗರದಿಂದ ಸುಂಟಿಕೊಪ್ಪ-ಮಾದಾಪುರ ಮಾರ್ಗವಾಗಿಯೂ ಬರಬಹುದು. ಸೋಮವಾರಪೇಟೆಯಿಂದ ತಾಕೇರಿ ಮಾರ್ಗ ಇಲ್ಲವೇ ಸೋಮವಾರಪೇಟೆಯಿಂದ ಶಾಂತಳ್ಳಿ ಮಾರ್ಗವಾಗಿಯೂ ಬರಬಹುದು.

ಈ ಜಲಪಾತ ವೀಕ್ಷಿಸಲು ಬರುವವರಿಗೆ ಸ್ವಯಂ ನಿಯಂತ್ರಣ ಇರಬೇಕು. ನೀರು ಧುಮ್ಮಿಕ್ಕುವ ಸಂದರ್ಭದಲ್ಲಿ ತಳಭಾಗದ ಬಂಡೆಕಲ್ಲುಗಳ ಬಳಿ ತೆರಳಬಾರದು. ಇಲ್ಲಿ ಯಾವುದೇ ಎಚ್ಚರಿಕೆಯ ಸೂಚನಾ ಫಲಕಗಳು ಕಾಣ ಸಿಗುವುದಿಲ್ಲ. ಪ್ರವಾಸಿಗರ ಅತಿರೇಕದ ವರ್ತನೆಗೆ ಕಡಿವಾಣ ಹಾಕುವವರೂ ಇಲ್ಲ. ಕೆಲವರು ಹಳೇ ಸೇತುವೆ ಪಕ್ಕದಲ್ಲಿಯೇ ಬೈಕ್ ನಿಲ್ಲಿಸಿ ಅತಿರೇಕದ ವರ್ತನೆಯಿಂದ ಇತ್ತೀಚೆಗೆ ಗ್ರಾಮಸ್ಥರಿಂದ ಛೀಮಾರಿ ಹಾಕಿಸಿಕೊಂಡ ಘಟನೆಯೂ ನಡೆದಿದೆ.

ಸೋಮವಾರಪೇಟೆ ತಾಲೂಕು ವ್ಯಾಪ್ತಿಯಲ್ಲಿ ಸಾಕಷ್ಟು ಸಣ್ಣ ಪುಟ್ಟ ಜಲಪಾತಗಳು ಇವೆ. ಚಾರಣಕ್ಕೆ ಸೂಕ್ತ ಎನಿಸುವ ಪುಷ್ಪಗಿರಿ ಬೆಟ್ಟ ಇದೆ. ಮಾಹಿತಿ ಕೊರತೆಯಿಂದ ಕೆಲವು ಸಣ್ಣ ಪುಟ್ಟ ಜಲಪಾತಗಳು ಹೊರ ಪ್ರಪಂಚದಿಂದ ದೂರ ಉಳಿದಿವೆ. ಪ್ರವಾಸೋದ್ಯಮ ಪಟ್ಟಿಗೆ ಸೂರ್ಲಬ್ಬಿ ಜಲಪಾತವನ್ನು ಸೇರಿಸಿರುವುದು ಸ್ವಾಗತಾರ್ಹ. ಆದರೆ, ನಿರೀಕ್ಷಿತ ಅಭಿವೃದ್ಧಿ ಆಗಬೇಕಿದೆ.