ಪರಸ್ಪರ ಪ್ರೋತ್ಸಾಹಿಸಿ ಸಾಹಿತ್ಯದ ಬೆಳವಣಿಗೆಗೆ ಶ್ರಮಿಸಿ

ಶನಿವಾರಸಂತೆಯ ವಿಶ್ವಕರ್ಮ ರಸ್ತೆಯಲ್ಲಿರುವ ನಾಟ್ಯ ಸದನದ, ನಾಟ್ಯಮಿಲನ ನೃತ್ಯ ಶಾಲಾ ಸಭಾಂಗಣದಲ್ಲಿ ಕೊಡಗು ಅಭಿನಯ ಕಲಾ ಮಿಲನ ಚಾರಿಟಬಲ್ ಟ್ರಸ್ಟ್ ಹಾಗೂ ಕುಶಾಲನಗರ ಕಣಿವೆ ಕಟ್ಟೆ ಸಂಯುಕ್ತ ಆಶ್ರಯದಲ್ಲಿ ಏರ್ಪಡಿಸಿದ್ದ ‘ಸಾಹಿತಿ ಶ.ಗ.ನಯನತಾರಾ ಅವರ ಕೃತಿಗಳನ್ನು ಓದೋಣ’ ಎಂಬ ಕೃತಿ ಪರಿಚಯಿಸುವ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಸಮಾನ ಮನಸ್ಕರಿಗೆ ಸಮಾನ ವೇದಿಕೆ ದೊರಕಬೇಕು. ಬರಹಗಾರರು ಇತರ ಬರಹಗಾರರ ಬರಹಗಳನ್ನು ಓದಬೇಕು, ಬರಹಗಾರರಿಗೆ ಬೇಕಾಗಿರುವುದು ಕವಿ ಮತ್ತು ಸಹೃದಯ. ಓದುವ ಪಾತ್ರದಲ್ಲಿ ಸಂವೇದನೆ ಇದ್ದು ನಾವೇ ಪಾತ್ರವಾಗಬೇಕು ಎಂದರು.

ಸೋಮವಾರಪೇಟೆ ಸಾಹಿತಿಗಳಾದ ಜಲಾ ಕಾಳಪ್ಪ ಅವರ‘ ಶನಿವಾರಸಂತೆ-ಕೊಡ್ಲಿಪೇಟೆ; ಒಂದು ಸಾಂಸ್ಕೃತಿಕ ಪಕ್ಷಿನೋಟ’ ಕೃತಿ, ಸಾಹಿತಿ ಶರ್ಮಿಳಾ ರಮೇಶ್ ಅವರ ‘ಕೊಡಗಿನ ಗೌರಮ್ಮ ಅವರ ಕಥೆಗಳಲ್ಲಿ ಪರಿವರ್ತನೆಯ ಚಿಂತನೆಗಳು’ ಕೃತಿ, ಮಡಿಕೇರಿಯ ರಂಜಿತ್ ಕವಲಪಾರ ಅವರ ‘ಹೊಸ ಬೆಳಕಿನತ್ತ ಕಥಾ ಸಂಕಲನ’, ಯಡವನಾಡು ಲೇಖಕ ಹೇಮಂತ್ ಪಾರೇರ ಅವರ ‘ಭಾವನಾ ತರಂಗ’ ಕವನ ಸಂಕಲನ, ಕುಶಾಲನಗರ ಸಾಹಿತಿ ಸುನೀತಾ ಲೋಕೇಶ್ ಅವರ ‘ವೈವಿಧ್ಯತೆಯಲ್ಲಿ ಅರಳಿದ ವೈಚಾರಿಕ ಲೇಖನಗಳು’ ಕೃತಿಗಳ ಬಗ್ಗೆ ವಿಮರ್ಶಾತ್ಮಕವಾಗಿ ಮಾತನಾಡಿದರು.

ಜಿಲ್ಲೆಯ ಸಾಹಿತಿ ಸ್ಮಿತಾ ಅಮೃತರಾಜ್ ಮಾತನಾಡಿ, ಸಾಹಿತ್ಯಾತ್ಮಕ ಕಾರ್ಯಕ್ರಮ ರಕ್ತ ಸಂಬಂಧಕ್ಕಿಂತಲೂ ಮಿಗಿಲಾದ ಸಂಬಂಧ ಬೆಸೆಯುತ್ತದೆ. ಬರಹಗಾರನಿಗೆ ಇಣುಕಿ ನೋಡುವ ವ್ಯಕ್ತಿತ್ವದೊಂದಿಗೆ ಇಚ್ಛಾಶಕ್ತಿ ಹುಟ್ಟಬೇಕು. ಬಹುಮುಖ ಚಟುವಟಿಕೆಯಲ್ಲಿ ತೊಡಗಿಸಿಕೊಳ್ಳುವ ನಾಟ್ಯ ಮಿಲನ ನೃತ್ಯ ಶಾಲೆಯ ಕಲಾವಿದೆ ಹಾಗೂ ಸಾಹಿತಿ ಮಿಲನ ಕೆ.ಭರತ್ ತಮ್ಮ ಇಚ್ಛಾಶಕ್ತಿಯಿಂದ ನೃತ್ಯ, ಸಂಗೀತ, ಸಾಹಿತ್ಯದಲ್ಲಿ ತೊಡಗಿ ತನ್ನ ಮನೆಯಲ್ಲಿ ತನ್ನದಲ್ಲದವರ ಪುಸ್ತಕಗಳ ಅನಾವರಣ ಮಾಡುವ ಮೂಲಕ ಹೃದಯ ವೈಶಾಲ್ಯ ಮೆರೆದಿದ್ದಾರೆ ಎಂದು ಪ್ರಶಂಶಿಸಿದರು.

ಅಭಿನಯ ಕಲಾ ಮಿಲನ ಚಾರಿಟಬಲ್ ಟ್ರಸ್ಟ್ ಟ್ರಸ್ಟಿ ಕುದುಕುಳಿ ಜೆ.ಭರತ್ ಮಾತನಾಡಿ, ಸಾಹಿತ್ಯ ಕ್ಷೇತ್ರದಲ್ಲಿ ಸಮಸ್ಯೆಗಳು ಸಹಜ. ಆದರೆ, ಸಾಹಿತ್ಯ ಬೆಳೆಯಲು ಸಮಾಜದ ವಿರೋಧವಿಲ್ಲ ಎಂದು ಶುಭ ಹಾರೈಸಿದರು.

ಅಭಿನಯ ಕಲಾ ಮಿಲನ ಚಾರಿಟಬಲ್ ಟ್ರಸ್ಟ್ ಟ್ರಸ್ಟಿ ಮಿಲನಾ ಭರತ್ ಪ್ರಾಸ್ತಾವಿಕ ನುಡಿಗಳನ್ನಾಡಿದರು

ಕಸಾಪ ಹೋಬಳಿ ಘಟಕದ ಅಧ್ಯಕ್ಷ ಬಿ.ಬಿ.ನಾಗರಾಜ್, ದುಂಡಳ್ಳಿ ಡಿಜಿಟಲ್ ಗ್ರಂಥಾಲಯ ಮೇಲ್ವಿಚಾರಕಿ ಎಸ್.ಪಿ.ದಿವ್ಯಾ, ಗ್ರಾಪಂ ಮಾಜಿ ಸದಸ್ಯೆ ಎಸ್.ಪಿ.ಭಾಗ್ಯಾ ಮಾತನಾಡಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಭಾರದ್ವಾಜ ಕೆ.ಆನಂದತೀರ್ಥ ಮಾತನಾಡಿ, ಬರಹಗಾರ ಬರಹ ಆರಂಭಿಸಿದಾಗ ಧರ್ಮ-ಜಾತಿ, ವಯಸ್ಸು, ರಾಜಕೀಯ ಕೆಲಸ ಮಾತನಾಡುತ್ತದೆ. ಹೊಗಳಿಕೆಯ ಅಗತ್ಯವಿಲ್ಲ. ಬರಗಾರರು ಹಾಗೂ ವಿಮರ್ಶಕರಲ್ಲಿ ಸಮಯಪ್ರಜ್ಞೆ ಮುಖ್ಯ ಎಂದರು.

ಗಾಯಕಿ ತೇಜಾವತಿ ಭಾವಗೀತೆಗಳನ್ನು ಹಾಡಿ ರಂಜಿಸಿದರು. ಪಿಯುಸಿ ಪರೀಕ್ಷೆಯಲ್ಲಿ ಅಧಿಕ ಅಂಕ ಗಳಿಸಿದ ಸೋಮವಾರಪೇಟೆಯ ವಿದ್ಯಾರ್ಥಿ ಪವನ್ ಅವರಿಗೆ ಪ್ರತಿಭಾ ಪುರಸ್ಕಾರ ನೀಡಿ ಗೌರವಿಸಲಾಯಿತು. ಹಾಡು. ಹರಟೆ, ವೇದಿಕೆ ಗಣ್ಯರ ಹಾಗೂ ಸಾಹಿತಿಗಳ ಸನ್ಮಾನ ಕಾರ್ಯಕ್ರಮವೂ ನಡೆಯಿತು.

ಸಾಹಿತಿ ಲಾವಣ್ಯ ಮೋಹನ್, ಕಣಿವೆ ಕಟ್ಟೆ ಸಂಚಾಲಕ ಉಮೇಶ್, ಚಾರಿಟಬಲ್ ಟ್ರಸ್ಟ್ ಟ್ರಸ್ಟಿಗಳಾದ ಜಿತೇಂದ್ರ, ಇಂದಿರಾ ಭರತ್, ಪುಣ್ಯ ಪ್ರಾಂಜಲಿ, ಹೇಮಂತ್, ಶಿಕ್ಷಕಿಯರಾದ ಕವಿತಾ, ಜ್ಯೋತಿ ನಿರಂಜನ್, ಸಂಗೀತ ಶಿಕ್ಷಕಿ ರೋಸಿ ಇತರರು ಹಾಜರಿದ್ದರು.