ಕೊಡಗು

ಉದ್ಯಮ ಸಾಹಸಿಗಳಿಗೆ ಆರ್‌ಎಸ್‌ಇಟಿಐ ಆಸರೆ

ಕುಶಾಲನಗರ ತಾಲೂಕು ಕೂಡಿಗೆಯಲ್ಲಿ ಇರುವ ಯೂನಿಯನ್ ಬ್ಯಾಂಕ್‌ನ ಗ್ರಾಮೀಣ ಸ್ವಯಂ ಉದ್ಯೋಗ ತರಬೇತಿ ಕೇಂದ್ರ
ಕುಶಾಲನಗರ ತಾಲೂಕು ಕೂಡಿಗೆಯಲ್ಲಿ ಇರುವ ಯೂನಿಯನ್ ಬ್ಯಾಂಕ್‌ನ ಗ್ರಾಮೀಣ ಸ್ವಯಂ ಉದ್ಯೋಗ ತರಬೇತಿ ಕೇಂದ್ರ
ಸುನಿಲ್ ಪೊನ್ನೇಟಿ
Published on: 

ಪ್ರಮುಖ ಮುಖ್ಯಾಂಶಗಳು

  • ಕೂಡಿಗೆಯಲ್ಲಿದೆ ಆರ್‌ಎಸ್‌ಇಟಿಐ ಕೇಂದ್ರ
  • ನಿರುದ್ಯೋಗಿಗಳಿಗೆ ಉಚಿತ ತರಬೇತಿ
  • ತರಬೇತಿ ಅವಧಿಯಲ್ಲಿ ಊಟ, ವಸತಿಯೂ ಉಚಿತ
ಮಡಿಕೇರಿ:
ಉನ್ನತ ವ್ಯಾಸಂಗ ಮಾಡಿದವರಿಗೆಲ್ಲಾ ಸರ್ಕಾರಿ ಉದ್ಯೋಗ ಎನ್ನುವುದು ಇಂದು ಕನಸಿನ ಮಾತು. ಈ ನಿಟ್ಟಿನಲ್ಲಿ ಸ್ವಯಂ ಉದ್ಯೋಗದ ಮೂಲಕ ಬದುಕು ಕಟ್ಟಿಕೊಳ್ಳಲು ಬಯಸುವವರಿಗೆ ಸರ್ಕಾರವೇ ಹಲವು ರೀತಿಯಲ್ಲಿ ಪ್ರೋತ್ಸಾಹ ಕೊಡುತ್ತಿದೆ. ಇದಕ್ಕೆ ಪೂರಕವಾಗಿ ಗ್ರಾಮೀಣ ಸ್ವಯಂ ಉದ್ಯೋಗ ತರಬೇತಿ ಕೇಂದ್ರಗಳು ನಿರುದ್ಯೋಗಿಗಳಿಗೆ ಸೂಕ್ತ ತರಬೇತಿ ಕೊಟ್ಟು ಸ್ವತಂತ್ರವಾಗಿ ದುಡಿಯಲು ದಾರಿ ತೋರಿಸುತ್ತಿವೆ. ಕೊಡಗಿನ ಕೂಡಿಗೆಯಲ್ಲಿ ಇರುವ ಯೂನಿಯನ್ ಬ್ಯಾಂಕ್ ಗ್ರಾಮೀಣ ಸ್ವಯಂ ಉದ್ಯೋಗ ತರಬೇತಿ ಕೇಂದ್ರ ಕಳೆದ 10 ವರ್ಷಗಳಲ್ಲಿ ಹೀಗೆ ಸುಮಾರು 8 ಸಾವಿರ ಯುವಕರನ್ನು ಸ್ವ-ಉದ್ಯೋಕ್ಕಾಗಿ ಅಣಿಗೊಳಿಸುವ ಮೂಲಕ ದಾಖಲೆ ಮಾಡಿದೆ.
ಯುವಜನತೆಗೆ ಸರ್ಕಾರಿ ಉದ್ಯೋಗ ಸಿಗುತ್ತಿಲ್ಲ. ಖಾಸಗಿ ವಲಯದಲ್ಲಿ ಕೆಲಸ ಸಿಗಬೇಕಾದರೆ ವಿದ್ಯೆ, ಪದವಿ ಜತೆಗೆ ಕೌಶಲ್ಯದ ಅಗತ್ಯವೂ ಇರುತ್ತದೆ. ಅಂಕ ಗಳಿಸುವುದಕ್ಕಷ್ಟೇ ಆದ್ಯತೆ ಕೊಡಲಾಗುತ್ತಿರುವ ಇಂದಿನ ಶಿಕ್ಷಣ ಪದ್ಧತಿಯಲ್ಲಿ ವರ್ತಮಾನದ ಉದ್ಯೋಗದಾತರ ಅಗತ್ಯತೆಗಳನ್ನು ಪೂರೈಸುವ ಕಾಳಜಿಯೇ ಇಲ್ಲವಾಗಿದೆ. ಹಾಗಾಗಿ ಸರ್ಕಾರ ಇತ್ತೀಚಿನ ವರ್ಷಗಳಲ್ಲಿ ಕೌಶಲ್ಯಾಧಾರಿತ ತರಬೇತಿಗಳಿಗೆ ಆದ್ಯತೆ ಕೊಡುತ್ತಿದೆ. ಈ ಹಿನ್ನೆಲೆಯಲ್ಲಿ ಗ್ರಾಮೀಣ ಸ್ವಯಂ ಉದ್ಯೋಗ ತರಬೇತಿ ಕೇಂದ್ರಗಳನ್ನು ಆಯಾಯ ಜಿಲ್ಲೆಗಳ ಲೀಡ್ ಬ್ಯಾಂಕ್ ಮೂಲಕ ಅನುಷ್ಠಾನಗೊಳಿಸಲಾಗಿದೆ.
ಜಿಲ್ಲೆಯಲ್ಲಿ ಕುಶಾಲನಗರ ತಾಲೂಕು ಕೂಡಿಗೆಯಲ್ಲಿ ಕಾರ್ಪೊರೇಷನ್ ಬ್ಯಾಂಕ್ ಮೂಲಕ ಆರಂಭವಾದ ಗ್ರಾಮೀಣ ಸ್ವಯಂ ಉದ್ಯೋಗ ತರಬೇತಿ ಕೇಂದ್ರ ಪ್ರಸ್ತುತ ಯೂನಿಯನ್ ಬ್ಯಾಂಕ್ ಗ್ರಾಮೀಣ ಸ್ವಯಂ ಉದ್ಯೋಗ ತರಬೇತಿ ಕೇಂದ್ರವಾಗಿ ಕಾರ್ಯ ನಿರ್ವಹಿಸುತ್ತಿದೆ. ಯೂನಿಯನ್ ಬ್ಯಾಂಕ್‌ನ ರಾಜ್ಯದಲ್ಲಿ ಇರುವ ಇಂಥ 2 ಕೇಂದ್ರಗಳ ಪೈಕಿ ಕೂಡಿಗೆ ಕೇಂದ್ರವೂ ಒಂದಾಗಿದ್ದು, 2015ರಿಂದ ಇಲ್ಲಿ ನಿರುದ್ಯೋಗಿಗಳನ್ನು ಸ್ವಯಂ ಉದ್ಯೋಗಿಗಳನ್ನಾಗಿ ರೂಪಿಸಲು ಶ್ರಮಿಸುತ್ತಿದೆ.
ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾ ಪ್ರಾಯೋಜಿಸಿರುವ ಯೂನಿಯನ್ ಆರ್‌ಎಸ್‌ಇಟಿಐಗಳು ಗ್ರಾಮೀಣ ನಿರುದ್ಯೋಗಿ ಯುವಕರಿಗೆ ಕೌಶಲ್ಯ ಅಭಿವೃದ್ಧಿ ತರಬೇತಿ ಕಾರ್ಯಕ್ರಮಗಳನ್ನು ನೀಡುತ್ತಾ ಬಂದಿದೆ. ಅವರಿಗೆ ಸೂಕ್ತವಾದ ಮತ್ತು ಸ್ಥಳೀಯ ಅಗತ್ಯತೆಗಳನ್ನು ಪೂರೈಸುವ, ಕಡಿಮೆ ಇನ್‌ಪುಟ್ ವೆಚ್ಚ ಮತ್ತು ಹೆಚ್ಚಿನ ಆದಾಯವನ್ನು ಹೊಂದಿರುವ ಸ್ವಯಂ-ಉದ್ಯೋಗ, ವ್ಯವಹಾರ ಅಥವಾ ಉದ್ಯಮಗಳನ್ನು ಕೈಗೊಳ್ಳಲು ಅನುವು ಮಾಡಿಕೊಡುವ ರೀತಿಯಲ್ಲಿ ತರಬೇತುಗೊಳಿಸುತ್ತಿದೆ.
ಯೂನಿಯನ್ ಆರ್‌ಎಸ್‌ಇಟಿಐಗಳ ಮೂಲಕ ತರಬೇತಿ ಪಡೆದ ಅಭ್ಯರ್ಥಿಗಳಿಗೆ ತಮ್ಮದೇ ಆದ ಉದ್ಯಮಗಳನ್ನು ಪ್ರಾರಂಭಿಸಲು ಬೆಂಬಲ ನೀಡುತ್ತದೆ. ಯಶಸ್ವಿಯಾಗಿ ತರಬೇತಿ ಪಡೆದ ಅಭ್ಯರ್ಥಿಗಳು ಸ್ವಯಂ ಉದ್ಯೋಗದಲ್ಲಿ ತಮ್ಮ ದಾರಿ ಕಂಡು ಕೊಳ್ಳುವ ತನಕವೂ ಬೆಂಬಲವಾಗಿ ನಿಲ್ಲುತ್ತವೆ. ಸ್ವಯಂ-ಉದ್ಯೋಗ, ಉದ್ಯಮಗಳು ಅಥವಾ ವ್ಯವಹಾರಗಳನ್ನು ಸ್ಥಾಪಿಸಲು ಯಶಸ್ವಿಯಾಗಿ ತರಬೇತಿ ಪಡೆದ ಅಭ್ಯರ್ಥಿಗಳಿಗೆ ಯೂನಿಯನ್ ಬ್ಯಾಂಕ್ ವತಿಯಿಂದ ಅಗತ್ಯ ಸಾಲ ಸೌಲಭ್ಯದ ವ್ಯವಸ್ಥೆಯನ್ನೂ ಮಾಡಲಾಗುತ್ತದೆ.
ಕಳೆದ 10 ವರ್ಷಗಳಲ್ಲಿ ಕೂಡಿಗೆಯ ಯೂನಿಯನ್ ಆರ್‌ಎಸ್‌ಇಟಿಐನಲ್ಲಿ ಗ್ರಾಮೀಣ ನಿರುದ್ಯೋಗಿ ಯುವಜನತೆಗೆ 304 ಬ್ಯಾಚ್‌ಗಳ ಮೂಲಕ ಬ್ಯೂಟಿಷಿಯನ್ ತರಬೇತಿ, ಮೊಬೈಲ್ ಫೋನ್ ರಿಪೇರಿ, ಟೈಲರಿಂಗ್, ವಿದ್ಯುತ್ ಉಪಕರಣಗಳ ದುರಸ್ತಿ, ಪಶುಸಂಗೋಪನೆ, ಕಂಪ್ಯೂಟರ್ ತರಬೇತಿ, ವಿವಿಧ ಕೃಷಿ ಸಂಬAಧಿತ ಕಾರ್ಯಕ್ರಮಗಳು, ಪಿಎಂಇಜಿಪಿ ಸೇರಿದಂತೆ 30 ಬಗೆಯ ತರಬೇತಿ ಕೊಡಲಾಗಿದೆ. 8,361 ನಿರುದ್ಯೋಗಿಗಳು ಇಲ್ಲಿ ತರಬೇತಿ ಪಡೆದುಕೊಂಡಿದ್ದು, 6,223 ಜನರು ಸ್ವಯಂ ಉದ್ಯೋಗದ ಮೂಲಕ ನೆಲೆ ಕಂಡುಕೊAಡಿದ್ದಾರೆ. ವರ್ಷ ಪೂರ್ತಿ ಇಲ್ಲಿ ಒಂದಿಲ್ಲೊAದು ತರಬೇತಿ ನಡೆಯುತ್ತಿರುತ್ತದೆ. ಆಯಾಯ ತರಬೇತಿ ಸಂದರ್ಭ ಅರ್ಜಿದಾರರನ್ನು ಸಂಸ್ಥೆಯಿAದ ಸಂಪರ್ಕಿಸಿ ತರಬೇತಿಗೆ ಕರೆಯಿಸಿಕೊಳ್ಳಲಾಗುತ್ತದೆ.
ನಿರುದ್ಯೋಗಿಗಳ ಇಚ್ಛೆಗೆ ಅನುಗುಣವಾಗಿ ಆರ್ಥಿಕ ಚಟುವಟಿಕೆ ಆರಂಭಿಸಲು ಮತ್ತು ಲಾಭದಾಯಕವಾಗಿ ಸ್ವ-ಉದ್ಯೋಗ ನಡೆಸಲು ಇಲ್ಲಿ 6 ದಿನಗಳಿಂದ 60 ದಿನಗಳವರೆಗೆ ಉದ್ಯಮಶೀಲತಾಭಿವೃದ್ಧಿ ತರಬೇತಿ ಕೊಡಲಾಗುತ್ತದೆ. ತರಬೇತಿ ನಂತರ 2 ವರ್ಷಗಳ ಕಾಲ ಅಗತ್ಯ ನೆರವು ನೀಡಲಾಗುತ್ತದೆ. ತರಬೇತಿ ಸಮಯದಲ್ಲಿ ವಸತಿ ಮತ್ತು ಊಟೋಪಚಾರ ಸಂಪೂರ್ಣವಾಗಿ ಉಚಿತವಾಗಿರುತ್ತದೆ. ಈ ಕೇಂದ್ರ ಉದ್ಯಮಶೀಲತಾ ಅಭಿವೃದ್ಧಿ ತರಬೇತಿಗಳನ್ನು ನಡೆಸಲು ಬೇಕಾದ ಎಲ್ಲಾ ಮೂಲಭೂತ ಸೌಲಭ್ಯಗಳನ್ನು ಹೊಂದಿದೆ. 1 ಎಕರೆ ವಿಸ್ತೀರ್ಣದ ಕ್ಯಾಂಪಸ್ ಹೊಂದಿದ್ದು 2 ಕ್ಲಾಸ್ ರೂಮ್‌ಗಳಿವೆ. 30 ಕಂಪ್ಯೂಟರ್‌ಗಳನ್ನು ಹೊಂದಿದ ಕಂಪ್ಯೂಟರ್ ಲ್ಯಾಬ್, 30 ಹೊಲಿಗೆ ಯಂತ್ರಗಳು, ಮಹಿಳೆಯರಿಗಾಗಿ ಬ್ಯೂಟಿಪಾರ್ಲರ್ ಲ್ಯಾಬ್, ಲೈಬ್ರರಿ ಮತ್ತು 60 ಜನಗಳಿಗೆ ಏಕಕಾಲದಲ್ಲಿ ಉಳಿದುಕೊಳ್ಳಲು ಅನುಕೂಲವಾಗುವ ಪುರುಷರು ಮತ್ತು ಮಹಿಳೆಯರಿಗೆ ಪ್ರತ್ಯೇಕ ವಸತಿ ಗೃಹಗಳು, ಬಿಸಿನೀರು ವ್ಯವಸ್ಥೆ ಇಲ್ಲಿದೆ. ಸ್ವ-ಉದ್ಯೋಗದ ಮೂಲಕ ಬದುಕು ಕಟ್ಟಿಕೊಳ್ಳಲು ಬಯಸುವ 18-45ರ ವಯೋಮಾನದ ನಿರುದ್ಯೋಗಿಗಳು ಈ ಕೇಂದ್ರ ಸಂಪರ್ಕಿಸಬಹುದು.
ಕೊಡಗಿನಲ್ಲಿ 2018, 19 ಹಾಗೂ 20ರಲ್ಲಿ ಪ್ರಾಕೃತಿಕ ವಿಕೋಪ ಸಂಭವಿಸಿದ ಸಂದರ್ಭ ಸರ್ವಸ್ವವನ್ನೂ ಕಳೆದುಕೊಂಡು ಬೀದಿಗೆ ಬಂದಿದ್ದ ಸಂತ್ರಸ್ತರಿಗೆ ಬದುಕಿನ ದಾರಿ ತೋರಿಸುವ ಕೆಲಸವನ್ನೂ ಈ ಸಂಸ್ಥೆ ಮಾಡಿದೆ. ಬಹುತೇಕ ಕಾರ್ಮಿಕ ಕುಟುಂಬಗಳೇ ಈ ವೇಳೆ ನಿರಾಶ್ರಿತರಾಗಿದ್ದು, ಕೂಲಿ ಕೆಲಸ ಸಿಗದೆ ಕಂಗೆಟ್ಟಿದ್ದ ಇವರಿಗೆ ಹಲವು ಬಗೆಯ ಸ್ವ-ಉದ್ಯೋಗದ ತರಬೇತಿ ನೀಡುವ ಮೂಲಕ ಸ್ವಾವಲಂಬಿ ಬದುಕಿಗೆ ಆಸರೆ ನೀಡಲಾಗಿತ್ತು. ಸಂತ್ರಸ್ತರು ಇದ್ದ ಸ್ಥಳಕ್ಕೇ ತೆರಳಿದ ಕೇಂದ್ರದ ನುರಿತ ತರಬೇತುದಾರರು ಆಸಕ್ತಿ ಇರುವವರನ್ನು ಆಯ್ಕೆ ಮಾಡಿಕೊಂಡು ಜೀವನ ನಡೆಸಲು ಬೇಕಾದ ಸಂಪಾದನೆಗೆ ಅಗತ್ಯ ಇರುವ ಸ್ವಯಂ ಉದ್ಯೋಗದ ಬಗೆಗಿನ ಪಾಠ ಹೇಳಿಕೊಟ್ಟಿದ್ದರು. ಬಟ್ಟೆಯ ಬ್ಯಾಗ್, ಸೋಪ್ ಆಯಿಲ್, ಫಿನಾಯಿಲ್, ಹೊಲಿಗೆ ಸೇರಿದಂತೆ ದೈನಂದಿನ ಬೇಡಿಕೆಯ ವಸ್ತುಗಳ ತಯಾರಿಕೆ ಕಲಿತುಕೊಂಡಿದ್ದ ಸಂತ್ರಸ್ತರು ಸ್ವ-ಸಹಾಯ ಸಂಘಗಳ ಮೂಲಕ ಸಾಲ ಪಡೆದುಕೊಂಡು ಸ್ವ-ಉದ್ಯೋಗ ಆರಂಭಿಸಿದ್ದರು. ತಮ್ಮೂರಿನ ಆಸುಪಾಸು ಮಾತ್ರವಲ್ಲದೆ ಮೇಳ, ಜಾತ್ರೆ, ಹಬ್ಬ, ಸಮ್ಮೇಳನಗಳಲ್ಲೂ ತಮ್ಮದೊಂದು ಅಂಗಡಿ ಹಾಕಿ ಉತ್ಪನ್ನಗಳ ಪ್ರಚಾರ ಮತ್ತು ಮಾರಾಟ ಮಾಡುತ್ತಾ ಉತ್ತಮ ಸಂಪಾದನೆಯ ಹಾದಿಗೆ ನೆರವಾಗಿತ್ತು.
"

ಗ್ರಾಮೀಣ ಬಡ ನಿರುದ್ಯೋಗಿ ಯುವಕರಿಗೆ ಸ್ವಯಂ ಉದ್ಯೋಗಾವಕಾಶಗಳನ್ನು ಸೃಷ್ಟಿಸುವ ಜತೆಗೆ ಅವರ ಬದುಕಿಗೆ ದಾರಿ ತೋರಿಸುವ ನಿಟ್ಟಿನಲ್ಲಿ ಯೂನಿಯನ್ ಬ್ಯಾಂಕ್‌ನ ಗ್ರಾಮೀಣ ಸ್ವಯಂ ಉದ್ಯೋಗ ತರಬೇತಿ ಸಂಸ್ಥೆಗಳು ಸಾಕಷ್ಟು ಕೊಡುಗೆ ನೀಡುತ್ತಿವೆ. ಕೊಡಗಿನಲ್ಲಿ ಕುಶಾಲನಗರ ತಾಲೂಕು ಕೂಡಿಗೆಯಲ್ಲಿರುವ ಆರ್‌ಎಸ್‌ಇಟಿಐ ಕೂಡ ಜಿಲ್ಲೆಯ ಪಾಲಿಗೆ ಆಶಾಕಿರಣವಾಗಿದ್ದು, ಸಾವಿರಾರು ಯುವಕರು ಈ ಕೇಂದ್ರದ ಪ್ರಯೋಜನ ಪಡೆದುಕೊಂಡಿದ್ದಾರೆ. ಈ ಮೂಲಕ ಸ್ಥಳೀಯವಾಗಿ ಉದ್ಯೋಗವಕಾಶದ ಮಾರ್ಗವನ್ನೂ ತೋರಿಸಿದಂತಾಗಿದೆ.

"

ನಾನು ಯೂನಿಯನ್ ಬ್ಯಾಂಕ್‌ನ ಗ್ರಾಮೀಣ ಸ್ವಯಂ ಉದ್ಯೋಗ ತರಬೇತಿ ಕೇಂದ್ರದ ಮೂಲಕ ಟೈಲರಿಂಗ್ ತರಬೇತಿ ಪಡೆದುಕೊಂಡು ಸ್ವಾವಲಂಬಿ ಆಗಿದ್ದೇನೆ. ಕಳೆದ 2 ವರ್ಷಗಳಿಂದ ನನ್ನದೇ ಆದ ಟೈಲರಿಂಗ್ ಅಂಗಡಿ ತೆರೆದ್ದಿದ್ದೇನೆ. ಟೈಲರಿಂಗ್‌ಗೆ ಸಂಬAಧಿಸಿದ ವಸ್ತುಗಳ ಮಾರಾಟ ಕೂಡ ಮಾಡುತ್ತೇನೆ. ಪತಿಯೂ ಟೈಲರ್ ಆಗಿದ್ದು ಅವರ ಪ್ರೋತ್ಸಾಹವೂ ಇದೆ. ಅವರು ಕೂಡ ಪ್ರತ್ಯೇಕ ಅಂಗಡಿ ಇಟ್ಟುಕೊಂಡಿದ್ದಾರೆ. ಆರ್‌ಎಸ್‌ಇಟಿಐ ಕಡೆಯಿಂದಲೂ ಸಹಾಯ ಸಿಗುತ್ತಿದೆ.

Employee
Self
Kudige
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net