ಸಾಮಾಜಿಕ ಜಾಲತಾಣಗಳಲ್ಲಿ ರಸ್ತೆ ವಾರ್

ಕೊಡಗಿನ ರಸ್ತೆಗಳ ಸದ್ಯದ ಪರಿಸ್ಥಿತಿ ಮಳೆಗಾಲದಲ್ಲೂ ರಾಜಕೀಯ ಪಕ್ಷಗಳ ಮಧ್ಯೆ ಬಿಸಿ ಬಿಸಿ ಚರ್ಚೆಗೆ ಕಾರಣವಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ದಿನಂಪ್ರತಿ ಪರ-ವಿರೋಧ ಅಭಿಪ್ರಾಯಗಳು ವ್ಯಕ್ತವಾಗುತ್ತಿದ್ದರೆ, ಜನಸಾಮಾನ್ಯರು ವ್ಯವಸ್ಥೆ ವಿರುದ್ಧ ಆಕ್ರೋಶ ಹೊರಹಾಕುತ್ತಿದ್ದಾರೆ. ಜಿಲ್ಲೆಯ ಬಹುತೇಕ ರಸ್ತೆಗಳಲ್ಲಿ ವಾಹನ ಸವಾರಿ ಹರಸಾಹಸದಂತಾಗಿದ್ದು, ಡಾಂಬರು ಕೊರತೆಯಿಂದ ರಸ್ತೆ ದುರಸ್ತಿ ಸಾಧ್ಯವಾಗುತ್ತಿಲ್ಲ ಎನ್ನುವ ಸಮರ್ಥನೆ ಆಡಳಿತ ವರ್ಗದ ಕಡೆಯಿಂದ ಬರುತ್ತಿದೆ.

ಕಳೆದ ವರ್ಷದ ಮಳೆಗಾಲದ ಸಂದರ್ಭ ಹಾನಿಗೆ ಒಳಗಾದ ರಸ್ತೆಗಳನ್ನೇ ಇನ್ನು ಸರಿಪಡಿಸಿಲ್ಲ. ಹಿಂದಿನ ವರ್ಷ ಡಿಸೆಂಬರ್ ತಕನವೂ ಜಿಲ್ಲೆಯಲ್ಲಿ ಮಳೆ ಸುರಿಯುತ್ತಲೇ ಇತ್ತು. ಹಾಗಾಗಿ ಮಳೆ ನಿಂತ ಕೂಡಲೇ ರಸ್ತೆಗಳನ್ನು ಸರಿಪಡಿಸಲಾಗುವುದು ಎಂದು ಅಧಿಕಾರಿಗಳು ಹೇಳಿಕೊಂಡು ಬಂದಿದ್ದರು. ಹದಗೆಟ್ಟ ರಸ್ತೆಗಳು ಮತ್ತು ಸಾರ್ವಜನಿಕರ ಆಕ್ರೋಶದ ಬಗ್ಗೆ ಕೆಡಿಪಿ ಸಭೆ ಸೇರಿದಂತೆ ಇತರ ಸಭೆಗಳಲ್ಲಿ ಉಸ್ತುವಾರಿ ಸಚಿವರು, ಜಿಲ್ಲೆಯ ಶಾಸಕರು ತರಾಟೆಗೆ ತೆಗೆದುಕೊಂಡಾಗಲೂ ಸಂಬAಧಿಸಿದ ಅಧಿಕಾರಿಗಳು ಇದೇ ಮಳೆ ನೆಪ ಹೇಳಿಕೊಂಡು ಬೀಸುವ ದೊಣ್ಣೆಯಿಂದ ಪಾರಾಗಿಬಿಡುತ್ತಿದ್ದರು.

ಮಳೆಯ ಕಾರಣ ಕೊಟ್ಟು ಕಾಮಗಾರಿಗಳನ್ನು ಮುಂದೂಡಿಕೊAಡೇ ಬಂದಿದ್ದ ಅಧಿಕಾರಿಗಳು ಮಳೆ ನಿಂತ ನಂತರವೂ ಕೆಲಸ ಮಾಡಿಸಲು ಮನಸ್ಸು ಮಾಡಲಿಲ್ಲ. ಅಷ್ಟರಲ್ಲಾಗಲೇ ಯುದ್ಧ ಆರಂಭವಾಗಿ ಪೆಟ್ರೋಲಿಯಂ ಉತ್ಪನ್ನಗಳ ಪೂರೈಕೆ ಮೇಲೆಯೂ ಹೊಡೆತ ಬೀಳಲಾರಂಭಿಸಿತು. ಡಾಂಬರಿನ ಕೊರತೆಯೂ ಕಾಣಿಸಿಕೊಂಡಿತು. ಡಾಂಬರು ಪೂರೈಕೆ ಕಡಿಮೆಯಾದ ಕಾರಣ ಬೆಲೆಯಲ್ಲೂ ಹೆಚ್ಚಳ ಕಂಡು ಬಂತು. ಇದರ ಪರಿಣಾಮ ಹಳೆಯ ದರದ ಆಧಾರದಲ್ಲೇ ಟೆಂಡರ್ ಪಡೆದುಕೊಂಡಿದ್ದ ಗುತ್ತಿಗೆದಾರರು ಕೆಲಸವನ್ನೇ ಆರಂಭಿಸಿಲ್ಲ.

ಹಳೆಯ ಗುಂಡಿಗಳ ಜತೆಗೆ ಹೊಸ ಗುಂಡಿಗಳೂ ಸೇರಿಕೊಂಡು ಜಿಲ್ಲೆಯ ಬಹುತೇಕ ರಸ್ತೆಗಳು ಈಗ ಸಂಪೂರ್ಣ ಹಾಳಾಗಿವೆ. ಹೆಚ್ಚಿನ ರಸ್ತೆಗಳಲ್ಲಿ ವಾಹನ ಸಂಚಾರ ಸಾಧ್ಯವೇ ಇಲ್ಲ ಎನ್ನುವ ಸ್ಥಿತಿ ನಿರ್ಮಾಣ ಆಗಿದೆ. ಕೆಲವೆಡೆ ದುರಸ್ತಿ ಕಾಮಗಾರಿ ನಡೆದಿದ್ದ ಸ್ಥಳಗಳಲ್ಲೂ ರಸ್ತೆಗಳು ಹದಗೆಟ್ಟುಹೋಗಿವೆ. ಇದರಿಂದ ಸಾರ್ವಜನಿಕರು ತೊಂದರೆ ಅನುಭವಿಸುವಂತಾಗಿದೆ. ಈ ರಸ್ತೆಗಳ ದುಸ್ಥಿತಿ ಈಗ ರಾಜಕೀಯ ಪಕ್ಷಗಳ ಮಧ್ಯೆ ಆರೋಪ-ಪ್ರತ್ಯಾರೋಪಕ್ಕೂ ಕಾರಣವಾಗಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಈಗ ಜಿಲ್ಲೆಯ ರಸ್ತೆ ಪರಿಸ್ಥಿತಿ ಬಗ್ಗೆಯೇ ಚರ್ಚೆಗಳು ಆಗುತ್ತಿವೆ. ಬಿಜೆಪಿಯ ಸಾಮಾಜಿಕ ಜಾಲತಾಣ ವಿಭಾಗ ಜಿಲ್ಲೆಯಾದ್ಯಂತ ಕಂಡು ಬರುವ ಹಾಳಾದ ರಸ್ತೆಗಳ ಫೋಟೋ, ವೀಡಿಯೋಗಳನ್ನು ತೆಗೆದು ಹರಿಯಬಿಡುತ್ತಿದೆ. ತಮ್ಮ ಪಕ್ಷದ ಶಾಸಕರು ಇದ್ದ ಸಂದರ್ಭ ಕೊಡಗಿಗೆ ಈ ಪರಿಸ್ಥಿತಿ ಇರಲಿಲ್ಲ. ಈಗಿನ ಶಾಸಕರು ಅಧಿಕಾರಕ್ಕೆ ಬಂದು ಮೂರು ವರ್ಷ ಕಳೆದರೂ ಅಭಿವೃದ್ಧಿ ಕಡೆಗೆ ಚಿಂತನೆ ನಡೆಸುತ್ತಿಲ್ಲ. ಅಭಿವೃದ್ಧಿ ಕೆಲಸಗಳಿಗೆ ಸರ್ಕಾರದ ಬಳಿ ಹಣವೇ ಇಲ್ಲ ಎಂದು ಕಾಲೆಳೆಯಲಾಗುತ್ತಿದೆ.

ಕಾಂಗ್ರೆಸ್‌ನ ಸಾಮಾಜಿಕ ಜಾಲತಾಣದ ಕಲಿಗಳೇನೂ ಸುಮ್ಮನೆ ಕುಳಿತಿಲ್ಲ. ಬಿಜೆಪಿಯ ಏಟುಗಳಿಗೆ ಸರಿಯಾಗಿಯೇ ತಿರುಗೇಟು ಕೊಡುವ ಕೆಲಸ ಮಾಡುತ್ತಿದ್ದಾರೆ. ಬಿಜೆಪಿಯ ಶಾಸಕರು ಹಾಳು ಮಾಡಿದ್ದನ್ನು ನಮ್ಮ ಶಾಸಕರು ಈಗ ಸರಿದಾರಿಗೆ ತರುತ್ತಿದ್ದಾರೆ. ಸರ್ಕಾರ ಕೊಡಗಿನ ಅಭಿವೃದ್ಧಿಗೆ ಯಥೇಚ್ಛ ಹಣ ಕೊಡುತ್ತಿದೆ. ರಸ್ತೆಗಳ ಕಾಮಗಾರಿಗೂ ಟೆಂಡರ್ ಆಗಿದೆ. ಡಾಂಬರು ಸಿಗದ ಕಾರಣ ಕೆಲಸ ನಡೆಯುತ್ತಿಲ್ಲ. ಡಾಂಬರು ಪೂರೈಕೆ ಸರಿಯಾದ ಕೂಡಲೇ ರಸ್ತೆ ದುರಸ್ತಿ ಕಾಮಗಾರಿ ನಡೆಸಲಾಗುವುದು ಎಂದು ಸಮರ್ಥಿಸಿಕೊಳ್ಳುತ್ತಿದ್ದಾರೆ.

ರಾಜಕೀಯ ಪಕ್ಷಗಳ ಆರೋಪ ಪ್ರತ್ಯಾರೋಪಗಳು ಏನೇ ಇದ್ದರೂ ಕೊಡಗಿನ ರಸ್ತೆಗಳ ಪ್ರಸ್ತುತ ನೈಜ ಸ್ಥಿತಿ ಸಾರ್ವಜನಿಕರೆದುರು ಪ್ರದರ್ಶನವಾಗುತ್ತಿದೆ. ಸೂಕ್ತ ಸಮಯದಲ್ಲಿ ದುರಸ್ತಿ ಕಾಮಗಾರಿ ನಡೆಸುವಲ್ಲಿ ಸಂಬAಧಿಸಿದವರು ವಿಫಲರಾದ ಕಾರಣ ಜನಸಾಮಾನ್ಯರು ತೊಂದರೆ ಅನುಭವಿಸುವಂತಾಗಿದೆ. ಮಳೆಗಾಲವಾದರೂ ಸದ್ಯದ ಸ್ಥಿತಿಯಲ್ಲಿ ಇನ್ನೂ ಮಳೆ ಶುರುವಾಗದಿರುವುದರಿಂದ ಅಗತ್ಯವಿರುವ ಕಡೆಗಳಲ್ಲಿ ತುರ್ತು ಕಾಮಗಾರಿಯನ್ನು ನಡೆಸಲಾದರೂ ಮುಂದಾಗಲಿ ಎನ್ನುವುದು ಪ್ರಜ್ಞಾವಂತರ ಕಳಕಳಿ.

"

ಡಾಂಬರು, ಪೆಟ್ರೋಲ್ ಡೀಸೆಲ್ ಇದರೆಲ್ಲದರ ಸಮಸ್ಯೆ ಆರಂಭವಾಗಿದ್ದು ಕೇವಲ ಎರಡು ತಿಂಗಳಿನಿAದ. ಆದರೆ ಇವರು ಮೂರು ವರ್ಷದಿಂದ ಏನು ಮಾಡುತ್ತಿದ್ದರು? ಇವರಿಗೆ ಮಾತ್ರ ಡಾಂಬರು ಸಿಗಲಿಲ್ಲವಾ? ಅಥವಾ ಇವರಿಗೆ ಕೆಲಸ ಮಾಡಲು ಆಸಕ್ತಿ ಇಲ್ಲವಾ ? ಅಥವಾ ಇವರ ಸರ್ಕಾರದ ಬೊಕ್ಕಸದಲ್ಲಿ ಹಣ ಇಲ್ಲವಾ ? ಇವರ ಸಮಸ್ಯೆಯಾದರು ಏನು? ಡಾಂಬರು ಸಿಗುತ್ತಿಲ್ಲವೆಂದು ಕೇಂದ್ರ ಸರ್ಕಾರದ ಕಡೆ ಬೊಟ್ಟು ತೋರಿಸಿ ಐದು ವರ್ಷ ಕಳೆದು ಬಿಡುವ ಎಲ್ಲಾ ಸಂಭವ ಕಾಣಿಸುತ್ತಿದೆ.

— ರವಿಕುಶಾಲಪ್ಪ, ಜಿಲ್ಲಾ ಬಿಜೆಪಿ ಮಾಜಿ ಅಧ್ಯಕ್ಷ

"

ಕೊಡಗು ಜಿಲ್ಲೆಯಲ್ಲಿ ರಸ್ತೆಗಳ ಬಗ್ಗೆ ಬಿಜೆಪಿಯವರು ಮಾತನಾಡುತ್ತಿದ್ದಾರೆ. ಆದರೆ ರಸ್ತೆ ಮಾಡಲಿಕ್ಕೆ ಡಾಂಬರು ಇಲ್ಲ. ಡಾಂಬರು ಇಲ್ಲವಾಗೋದಿಕ್ಕೆ ನಾನು ಕಾರಣ ಅಲ್ಲ. ಡಾಂಬರು ಕೊರತೆ ದೊಡ್ಡದಾಗಿದೆ. ಹಣ ಕೊಟ್ಟರೂ ಡಾಂಬರು ಸಿಗುತ್ತಿಲ್ಲ. ಡಾಂಬರು ಒಂದು ಪೆಟ್ರೋಲಿಯಂ ಉತ್ಪನ್ನ. ಇದನ್ನು ಈಗ ಪ್ರಚಾರಕ್ಕಾಗಿ ಹುಟ್ಟಿಕೊಂಡವರಿಗೆ ಹೇಳಲು ಇಷ್ಟಪಡುತ್ತೇನೆ. ಅನೇಕ ರಸ್ತೆಗಳ ಅಭಿವೃದ್ಧಿಗೆ ಟೆಂಡರ್ ಆಗಿದೆ. ಆದರೆ ಡಾಂಬರಿನ ತೊಂದರೆಯಿAದ ರಸ್ತೆ ಕಾಮಗಾರಿಗಳು ನಿಂತಿವೆ.

— ಎ.ಎಸ್. ಪೊನ್ನಣ್ಣ, ವಿರಾಜಪೇಟೆ ಶಾಸಕ

"

ರಸ್ತೆಗಳ ಅಭಿವೃದ್ಧಿಗಾಗಿ ಕೋಟಿ ಕೋಟಿ ರೂ. ಅನುದಾನ ಬಂದಿದೆ ಎಂದು ಪ್ರಚಾರವನ್ನಷ್ಟೇ ಮಾಡಲಾಗುತ್ತಿದೆ. ಜನರ ಕಣ್ಣೊರೆಸುವ ಉದ್ದೇಶದಿಂದ ರಸ್ತೆ ಕಾಮಗಾರಿಗೆ ವಿವಿಧೆಡೆ ಭೂಮಿಪೂಜೆ ನೆರವೇರಿಸಲಾಗಿದೆ. ಆದರೆ ಇಲ್ಲಿಯವರೆಗೆ ಎಲ್ಲೂ ಕಾಮಗಾರಿ ಆರಂಭಗೊAಡಿಲ್ಲ. ಆರಂಭಗೊAಡಿರುವ ಕಾಮಗಾರಿ ಪೂರ್ಣಗೊಂಡಿಲ್ಲ. ಮಳೆಗಾಲ ಸಮೀಪಿಸುವ ಹಂತದಲ್ಲಿ ಕಾಮಗಾರಿ ಆರಂಭಿಸುವ ನಾಟಕ ಮಾಡಲಾಗಿದೆ. ಮಳೆಯ ಕಾರಣ ನೀಡಿ ಕಾಮಗಾರಿ ನಡೆಸದೆ ನಿರಾಸಕ್ತಿ ತೋರಲಾಗುತ್ತಿದೆ.

— ಬಲ್ಲಾರಂಡ ಕಂಠಿ ಕಾರ್ಯಪ್ಪ, ಸೋಮವಾರಪೇಟೆ ಬಿಜೆಪಿ ಮಂಡಲ ವಕ್ತಾರ

"

ಬಿಜೆಪಿಯವರು ಸುಮ್ಮನೆ ಜನರ ದಾರಿ ತಪ್ಪಿಸುವ ಕೆಲಸ ಮಾಡುತ್ತಿದ್ದಾರೆ. ಜಿಲ್ಲೆಯ ರಸ್ತೆ ಕಾಮಗಾರಿಗೆ ಟೆಂಡರ್ ಆಗಿದೆ. ಆದರೆ ಡಾಂಬರು ಸಿಗದ ಕಾರಣ ಕಾಮಗಾರಿ ನಡೆಯುತ್ತಿಲ್ಲ. ಕೊಲ್ಲಿ ಯುದ್ಧದ ಕಾರಣದಿಂದ ಡಾಂಬರು ಪೂರೈಕೆ ನಿಂತಿದೆ. ಕೆಲವು ಅಗತ್ಯ ಇರುವ ಕಡೆಗಳಲ್ಲಿ ತುರ್ತು ಕಾಮಗಾರಿ ನಡೆಸಲು ಶಾಸಕರು ಸೂಚನೆ ನೀಡಿದ್ದಾರೆ. ಮಳೆ ಆರಂಭಗೊAಡಿರುವುದರಿAದ ಪೂರ್ಣ ಪ್ರಮಾಣದಲ್ಲಿ ರಸ್ತೆ ನಿರ್ಮಾಣ ಅಸಾಧ್ಯವಾಗಿದ್ದು ಕಾಲೂರು ರಸ್ತೆಯನ್ನು ಸದ್ಯಕ್ಕೆ ತಾತ್ಕಾಲಿಕ ದುರಸ್ತಿ ಮಾಡಿ ಬಸ್ ಸಂಚಾರಕ್ಕೆ ಅನುವು ಮಾಡಿಕೊಡುವುದಾಗಿ ಶಾಸಕರು ಭರವಸೆ ನೀಡಿದ್ದಂತೆ ಈಗ ತಾತ್ಕಾಲಿಕ ದುರಸ್ತಿ ಆಗುತ್ತಿದೆ.

— ತೆನ್ನಿರ ಮೈನಾ, ಕಾಂಗ್ರೆಸ್ ವಕ್ತಾರ