ಕ್ಷಿಪ್ರ ಕಾರ್ಯಪಡೆ ತಂಡ (ಆರ್ಆರ್ಟಿ), ಆನೆ ಕಾರ್ಯಾಚರಣೆ ಪಡೆ (ಇಟಿಎಫ್), ಚಿರತೆ ಕಾರ್ಯಾಚರಣೆ ಪಡೆ (ಎಲ್ಟಿಎಫ್), ಹುಲಿ ಕಾರ್ಯಾಚರಣೆ ಪಡೆ (ಟಿಟಿಎಫ್), ಕಳ್ಳಬೇಟೆ ತಡೆ ಶಿಬಿರ (ಎಪಿಸಿ), ಕಾಳ್ಗಿಚ್ಚು ತಡೆ ಶಿಬಿರ (ಎಫ್ಪಿಸಿ)...ಇವೆಲ್ಲಾ ಅರಣ್ಯ ಇಲಾಖೆಯಲ್ಲಿ ತಳಮಟ್ಟದಲ್ಲಿ ಕಾರ್ಯಾಚರಿಸುವ ತಂಡಗಳು. ಅರಣ್ಯ ಮತ್ತು ವನ್ಯ ಸಂಪತ್ತು ರಕ್ಷಿಸುವಲ್ಲಿ ಮಹತ್ವದ ಪಾತ್ರ ವಹಿಸುವ ಇವರು ಮಾಡುವ ಕೆಲಸ ತೀವ್ರ ಅಪಾಯಕಾರಿ ಆಗಿರುತ್ತದೆ. ಸ್ವಲ್ಪ ಎಚ್ಚರ ತಪ್ಪಿದರೂ ಪ್ರಾಣಹಾನಿ ಸಂಭವಿಸಬಹುದು. ಶಾಶ್ವತ ಅಂಗವಿಕಲರೂ ಆಗಬಹುದು. ಆದರೆ ಇರ್ಯಾರೂ ಇಲಾಖೆಯ ಕಾಯಂ ನೌಕರರಲ್ಲ. ಉಪ ವಲಯಾರಣ್ಯಾಧಿಕಾರಿ ಅಥವಾ ಅರಣ್ಯ ರಕ್ಷಕ ದರ್ಜೆ ಅಧಿಕಾರಿಗಳ ಜತೆ ಕೆಲಸ ಮಾಡುವ ಈ ಸಿಬ್ಬಂದಿ ಬಗ್ಗೆ ಹಿರಿಯ ಅಧಿಕಾರಿಗಳು ಯಾರು ಕೂಡ ಕಾಳಜಿ ತೋರಿಸುವುದೂ ಇಲ್ಲ.
